بسم الله الرحمن الرحيم
رجعت من العمل ذاك اليوم
وجلست أطالع التلفزيون شوي
وشوي الا يدتي داخله علينا في المجلس

وقمت أتكلم وياها في حاجات واااايد
وبعد شوي نادوا عليها علشان تنيم اليهال
وقبل لا تدخل الحجره عطتني فلافة أريل
وقالت لي نفسي في -صبعبلي-
فسألتها شا اليوم ويش متغديه
فقالت لي اليوم ما قصرت أمك سوت لي كاورما
وأكلت ليي سلوقتين وأحين أبغى أبرد على روحي
ورحت على طول اشتريت اليها
وجيت ودخلت الحجرة
وقامت تاكل الصبعبلي
وبعد ما خلصت بدأت تنيم اليهال
وقلت اليها
أنا :- أماه آخر شي وصلنا اله هوه يو انتيف نتيفان وصل للسعلوه
يدتي:- بالصلاة على محمد وآل محمد الطيبين الطاهرين
نبتدي

بعد ما سلم انتيف نتيفان على السعلوه الأولى
ردت عليه السعلوه :- لولا سلامك قبل كلامك شان أكلتك وكسكست عظامك ، وهوه لا يشبع ولا يسمن
فقال ليها انتيف نتيفان:- احنا أولاد اختك جيناك من مكان بعيد وأخوتي موجودين نبغى نبات عندش وعند أخواتش
ضيفينا
قالت السعلوه :- ياهلا بأولاد أختي وبيتتهم وقعد كل واحد منهم عند سعلوه من السعالوا التسع وذبحوا ليهم الذبايح لين أكلوا وشربوا
وبعد فلاف ليالي يو اليهم وهم يبغوا ياكلوهم ، فشافوهم نايمين الا انتيف نتيفان فسألته :- ليش ما تنام ؟؟
فقال ليها انتيف نتيفان:- أنا ما أنام الا في حضن أمي
فقالت السعلوه :- تعال نام في حضني .
ووضعته في حضنها وهي ناويه عليه نية القشرا
وأخذت تهود عليه وتقول:- كل الناس هودت ونامت وما من عين الا عيني وعينك يالله .
فرد عليها انتيف نتيفان أنا وياش بعد
فقالت له ليش بعد ما نمت
فقال ليها :- كيف أنام وتيسي ما أكل ؟
فقامت الى تيسه وأكلته
وعودت وحطت انتيف نتيفان في حظنها وقالت له نفس الشي
فقال ليها بعد أنا وياش
وسألته :- زليش ما نمت بعد هالمرة ؟
فقال ليها :- كيف أنام وتيسي ما شرب ؟
فقامت مره فانيه وهي غضبانه وشربت تيسه
وعودت اله وحطته في حضنها بعد مره فانيه
وقامت تهود عليه وما فيه فايده بعد انتيف نتيفان ما نام
وسألته بعد لاويش مانمت لها الحزه
فقال ليها كيفه أنام وتيسي بردان
فقامت وغطت تيسه بلحاف
والتيس كل شوي يتحرك
فقام الى أخوته ونبههم واحد واحد
وهوه يقول ليهم قوموا يالخبلان ذاكم السعلوات يسنوا ضروسهم يبغوا ياكلونا وانتون تشاخروا في النوم
وقاموا وشافوا السعلوات وهم يسنوا ضروسهم والسعلوه الكبيره تقول ليهم يالله سنوا ضروسكم عدل علشان بس ينام هالاغبر انتيف نتيفان نقوم مره وحده وناكلهم

فقال انتيف نتيفان لأخوته يالله كل واحد يروح اييب يدع نخله ويحطه مكانه تحت الفراش
ويالله شيلوا فلوس السعلوات وذهبهم وحطوهم على خيولكم
وما أبغى أشوف ولا واحد منكم
وخلوني لحالي ، وأنا با أتصرف وياهم
وعلى طول قاموا وشالوا الذهب والفلوس وحطوهم على الخيول وانحاشوا وظل انتيف نتيفان لحاله
ويوم دخلوا السعالوه في ذاك البيت
كل وحده دخلت الحجره اللي فيها واحد من أخوة انتيف نتيفان وقاموا يقرضوا في يدوع النخيل
ويقولوا مصقعهم لحمهم خشن
مو زي اللي أكلناهم من أول
هذولا فير شكلهم
وانتيف نتيفان يقفل عليهم الحجر وحده ورى الفانيه
لامن أخذ المفاتيح كلهم وخلاهم عنده
وأخذ له شوية أكل وشوية ماي وركب تيسه
ومشى عن السعلوات وهم محبوسين كل وحده في حجره لحالها ، ويصارخوا على انتيف نتيفان طلعنا وبنعطيك فلوووس واااايد
وما ياب خبرهم وؤاح عنهم
أما أخوته فمشوا الليل والنهار وهم فرحانين ويقولوا :- حصلنا الذهب وافتكينا من انتيف نتيفان أكيد السعلوات تعشوا به
ويوم وصلوا الى بيتهم راووا أمهم الذهب والفلوس
فسألتهم عن انتيف نتيفان فقالوا ليها :- ما ندري عنه ولا شفناه أصلاً !!!!!
فقامت تدعي :- يارب توصل هالولد سالم وتعوده غانم

وبعد يومين وصل انتيف نتيفان الى بيت أمه ويوم دخل البيت شافته أمه وقامت وحضنته وسألته :- لا ويش ما رحت ويا أخوتك؟؟
فقال لأمه :- يعني نكروني وما بيعطوني نصيبي؟
فقالت أمه :- أصلاً يقولوا ما شافوك ولا شفتهم .
فقال ليها :- أماه انتين لا ويش أول شي كنتي تبغي يهال
ويوم الله أرزقش بالاولاد خليتينا نروح الى السعلوات ؟؟؟
فقالت اله :- شوف يا انتيف نتيفان أني ما سويت كده الا علشان أشوف منهو الشجاع فيكم
فقال ليها انتيف نتيفان :- بعد شوي بعلمش من الشجاع .
ويوم يوا أخوته الى البيت قال ليهم شوفوا يا أخوتي
أبغى نصيبي من الذهب
فقال ليهم :- ماليي نصيب ؟؟؟زين
يا تيسي تعال خلنا نفك السعلوات من سجنهم ونخليهم ياخذوا فلوسهم ....وطلع المفاتيح من مخباه
ويوم شافوا المفاتيح عرفوا ان انتيف نتيفان ما يهرج وياهم
وهوه اللي يقدر يسوي كل هالحاجات يسويها ويفك السعلوات من سجنهم
فقالوا لأمهم السالفة من طلعتهم لامن عودوا وعندهم هالذهب والفلوس
وعرفت أمهم انم انتيف نتيفان هوه أشجعهم
وعاشوا ويا بعض وعرسوا ويابوا ولاد وبنات

وحبوا أخوهم انتيف نتيفان
لامن ماتوا كلهم

وخلصت وملصت ويت الديايه ورقصت

وحطت يدتي نقطه بعد هالسالفه
وسكتت عن الكلام المباح
يوم ناموا اليهال وخلصت سالفة انتيف نتيفان

وتقبلوا خالص تحياتي
با أروح أشتري لي
صبعبلي