السلام عليكم ورحمة الله وبركاته

هذا يا محفوظين السلامه يوم من أيام الله الكفيره
رحت ليدتي متأخر يعني الساعه فمان.... فمان ونص
يعني عند يدتي هذا وقت النوم
ودخلت حجرتها وأنا اتوقع انها نايمه بس حبيت اتطمن

لا والله شفتها قاعده وفي أيدها بت أختي
وتوني با اتكلم الا هيه اتأشر باصبعها
>>>يعني لا تتكلم

أنا شفتها هودت له شوي

لولو عن السنور والعوى
عن الكليب لا يعضك
هلولو ....هلولو

.....وهيه ما هي راضيه تنام
قمت قلت اليها
أنا :- أماه ييبي اليها سالفه
يدتي :- ويش اييب اليها ؟؟؟ويش اييب اليها
أنا :- ييبي اليها سالفة ( انتيف نتيفان)
يدتي:- ( وقد ابتسمت ) ايه زين علشان تخاف من السعلوه وتنام
أنا :- عيل حارسي با أييب أوراقي
يدتي:- وييب وياك قماطها ويا مشمري عشان اغطيها به
أنا :- ان شاء الله يمه
وخرجت ويبت اليها الا طلبته
أنا :- أول شي أماه لويش تقمطوا الياهل
يدتي:- حق لا يطلع صدره
أنا :- يعني ويش ؟؟
يدتي :- يعني عشان صدره يربض على القلب ولا يصيبه أذيه
أنا :- رحم الله والديش أماه
يدتي:- يالله ما أبغى منك ولا كلمه شان تنام هاللقمه زين
أنا :- ان شاء الله
يدتي:- مو تصير مفلات ذاك قالوا اله صلي ولا تتكلم قام كبر قال ويش أسوي بعدين
أنا :- لا أما هذانا باأسكت

وبدأت يدتي تقول سالفة (انـتـيّـف نـتّـيفان) وأنا ساكت وأكتب بس
بالصلاة على محمد وآل محمد
هذا فيه مره وما كان ربك رازقنها ولاد وفيها حسرة على الاولاد ، يت اليها يارتهم وشافتها متغير لونها وحالتها متخلقنه سألتها ويش فيش ؟؟
قالت هالمره :- أبغى اييب ولاد ولا أقدر ريلي مات وأني مايبت اله ولاد والحين داهوه كل حزه تبغى روحي الاولاد ولاني عارفه ويش أسوي
قالت اليها يارتهم :- شوفي روحي اشتري لش تسعة أقراص ولفيهم بفوطه وحطيهم في منز ونزي عليهم أربعين يوم وفي تمام الأربعين بيوش تسعة ولاد
ما صدقت هالمره خبر وراحت واشترت ليها تسعة أقراص ولفتهم بفوطه مفل ما قالت يارتهم وقامت تنـزهم وقلت طلعتها من البيت .
ويوم تمام الأربعين ما حست الا وواحد يدق الباب قامت اله وقالت :- منهو اللي يدق بابي واني مقطوعه لا أهل ولا أخواني؟
قال اللي يدق الباب:- أنا طلاب وانقطع طريقي ، شان عندش أكل اعطيني؟
المره:- الرزق على الله
اللي واقف على الباب:- من اللي عندش عطيني وما استحمق صدقيني.
المره :- شان هذا قولك تفضل وخلني أييب الك.
ودخل السائل الى البيت وقالت اله المره :- هذولا اولادي في المنز حاطتنهم باروح اييب الك بس انته كمل نزهم ولا تغفل عنهم .
وقام الريال ينز المنز وهو مستغرب هاليهال ما يصيحوا ولا شي وكيفه تسعة ولاد في منز واحد ومتى يابتهم في وكت واحد
وقام فتش ذيك الفوطه ما شاف الا تسعة اقراص مرصوصه
شال واحد منهم ونتف منه نتفه ورجعه مكانه ولف الفوطه زي ما كانت وحط النتفه في مخباه
ويم يت المره عطته شوية عيش بيوته وشوية مرقه بارده
المهم طلع الريال من البيت وتوه حاط الخبزه اللي نتفها في بوزه الا هذا هيه صايره دم في بوزه قام تفلها وهو مستحمق
ويقول :- ما يندرى هالمره ساحره ولا ويش ؟؟؟
أما المره فكملت نز ولادها وهيه ما تدري عن فعلته واللي سواه ، ويوم يا الليل الا هذيك الاقراص صايره
ولاد فمانيه كاملين مكملين قامت وشافت منزها الا تاسعهم ما هو عارف يطلع من المنز لانه صار قصير ومنتوف
المهم من فرحتها بأولادها الباقيين ما سألت لا ويش صار كده
وسموه ( انتيّف نتيفان ) مسوى هوه قصير ومنتوف
وكبروا هالاولاد وعاشت وياهم فرحانه
وفيه يوم من الايام يا اليها انتيف نتيفان
وسألها :- عاد اماه ما عندش لا خت ولا أخو في هالدنيا أبداً
وهيه تقوله :- لا ما عندي .
وكل يوم ايي اليها وهو يقول ليها هالشكل
لامن استملت من سؤاله.
وفي ليله من الليالي يمعتهم وقالت اليهم :- شوفوا هذا انتيف انتيفان كل يوم يسألني عن خالاتكم وخيلانكم وأني ما أقول اله شي ، بس با أقول اليكم اني عندي تسع خالات من زمان ما شفتهم تعرفوا لا ويش ؟
ردوا عليها :- لا ويش؟
قالت اليهم :- مسوى كلهم صاروا سعلوات بس عندهم فلوس وااايد وأني ما أروح اليهم مسوى أخاف منهم .
قالوا اليها :- أفا عليش وإحنا موجودين ، خلاص يمه بكره جهزي الينا أكل حق عشرين نفر بنروح إحنا اليهم .
قالت اليهم :- خلاص انتوا ناموا الحين وبكره با أجهز اليكم اللي طلبتوه .
وناموا ليلتهم .....ويوم قعدوا الصبح لقوا امهم عدلت خيولهم وحطت عليها أكلهم لفلافين نفر مو عشرين
بس انتيف نتيفان مسوى ما عنده حصان ما سوت اله شي
ويوم بيروحوا قال اليهم نتيف انتيفان :- خذوني وياكم .
قالوا اله :- ويش ناخذك ويانا ...تعطلنا وتمرمرنا .عود واقعد ويا أمك احسن الك
قال ليهم :- لكن روحوا وأنا با أيي وراكم على تيسي .
فقاموا يضحكوا عليه :- ويش اللي اييبك على تيسك اقعد مكانك ولا تشاقينا.
قال ليهم :- روحوا وما بتتوفقوا ، عساكم يبل على يبل حوله يبل ما يتكسر ولا تركبوه
فراحوا وهم يضحكوا عليه ويقولوا : ويش يقول يبل على يبل حوله يبل لا يتكسر ولا نركب عليه ويش اللي اييب اليبل في هالبر وكله رمل
فقال الى أمه :- اماه ابغى أكل با أروح ورى أخوتي .
قالت اله أمه :- أني تعبانه وما ني مسويه أكل
قال ليها انتيف نتيفان :- خلاص عيل دانا با أركب تيسي وبا أروح الى أخوتي
وركب انتيف نتيفان تيسه وراح ورى أخوته هم يشوفوه وهوه ما يشوف الا غبارهم
وبعد ما مشوا شوي الا هذا يبل كبييييير مرررره
لا يمين ولا يسير ولا وراء ولا قدام
قالوا في نفسهم :- صدق أخونا هذا اليبل اللي قال عنه
فقاموا يصرخوا إلى أخوهم :- نتيف نتيفان يا خونا .
رد عليهم نتيف نتيفان :- لا أنا أخوكم ولا أنا أبوكم ولا شربت من درة أمكم .
فصرخوا اله مره فانيه وهوه يرد عليهم وتالي قال اليهم :- شوفوا بتعطوني ربع أكلكم با ايي اليكم وبا أخليكم تعبروا .
قالوا له :- تعال ، وعطوه ربع أكلهم
فقام يا كل ويأكّل تيسه وياه ...وهو يقول لتيسه :- كل كل ترى الشغل وايد .


...........ونامت بنت اختي
وما رضيت تكمل يدتي سالفتها وقالت لي :- خلها لبكره
وسكتت يدتي عن الكلام المباح
عندما .......نامت بت أختي

وبكره بنعرف ويش سوى انتيف نتيفان

وتصبحوا على خير ...