السلام عليكم ورحمة الله وبركاته

اليوم بنييب اليكم سالفة اليهال اللي ما ينامو وويش يسوو اليهم

من أولها بالصلاة على النبي وآل النبي صلى الله عليه وآله

وأنا في يوم من أيام الله الكفيره دخلت على المرحومه يدتي في حجرتها في بيت أبويي بعد فلافة أيام من علمتني كيفه ينيموا اليهال
وأول ما دخلت عليها .......
يدتي :- عليكم السلام
أنا :- السلام عليكم

يدتي :- ويش هالخواهر اليوم
أنا :- أي والله اليوم خواهر ، ويش تنامي الليلة على الصدح
يدتي :- يالله روح وخم شوي من الصدح اليي وافرش منامي هناك ...بس شوف من غبشة الغباش تقعدني
أنا :- ان شاء الله يمه ، الحين باروح
يدتي :- قبل لا تروح روح ييبي الي تبلة ماي بابل حلقي
ورحت يبت اليها تبلة ماي وعطيتها وياه
وقعدت
يدتي :- ويش ما بروح تسوي اللي قلت الك وياه
أن :- ان شاء الله أماه بعد شوي
يدتي :- والله شكلنا زي داك
أنا :- منهوه
يدتي :- مفلاة ذاك ...اتكل عويس على مويس وضاعت البقره
أنا :- لا أماه باروح والش ما تنامي الليله الا فوق الصدح
يدتي :- بنشوف
أنا :- زين الحين أماه
يدتي :- ( حست اني با أسئلها ) قول لا تستحي قول
أنا :- قبل فلافة أيام قلتي لي كيفه ينيموا اليهال ، أبغى الحين اليهال اللي ما ينامو ويش تسووا اليهم
يدتي :- ايه ، يعني تبغى تكتب ، بس شوف اذا ما نمت الليلة فوق الصدح ما با أقول لك شي
أنا :- ان شاء الله أماه ، تامري أمر
يدتي :- هذا يا ....يا ولد......
بالصلاة على النبي وآل النبي عليه الصلاة وعليه السلام
أنا :- اللهم صل على محمد وآل محمد
يدتي :- اليهال اذا أمهاتهم تعبوا وياهم ولا ناموا يقوموا يصكوا الدرايش والباب علشان ما يدخل ضوا أبداً ، وبعدين يقولوا اليهم
أول شي يقولوا اليهم
نيووووووو نيوووووووووو
روح تت ( الى السنور يعني )
وتالي يقولوا له
يا سنور تت يا سنور تت .....ما عندنا بت ...
ما عندنا الا (فطوووم ) تصيح وتسكت ....
يا سنور تت يا سنور تت .....ما عندنا بت ...
وتقولها كم مره وتخفف من صوتها شوي شوي

أنا :- زين اذا ما نام ؟؟؟
يدتي :- يعني اا صار لوتي ، اذا قامت أمه عنه يقعد ويصيح
تفور مرارة أمه وتقول اله
عوووووووو عووووووو
بيي اليني وياخذك

لا لا يني لا تيي وتاخذه بينام

روح روح داهوه بينام

خلاص روح
وتقوم تهز منزه أول شي بقوه وبعدين شوي شوي
لحد ما ينام
أنا :- واذا ما نام ؟؟؟
يدتي :- نايبه تصقعه ، ماليها الا أم الخضر والليف
وتقوم تحرك الشرشف اللي على الدريشه وهي
تقول اله أم الخضر والليف لا تاخذيك داهوه بينام
نام نام لا تييك أم الخضر والليف
وتالي بعد تييب ويا أم الخضر والليف
الدعيدع ( خصوصاً اذا الياهل تبغاه أمه ينام في الليل )

تقول اله دعيدع عووووووووووو نيو
نيوووووووو
الدعيدع خلاص اني با أروح عنك وبا خلي الدعيدع ياخذك الحين ولا با أخليه ياخذني وياك روح اله لحالك
واذا ما نام تقوم وتحمله أمه على أيدها
وتعود تقول اله كلام حليو

وتهوده على أيدها

أنا:- واذا مانام

يدتي :- ( وقد ضحكت ):- صاقعه تصقعه هذا يطلع يني
ولازم يشببوه هههههههههه

أنا :- كل هذا يسووه في الياهل
يدتي :- وهوه قليل اللي يسويه في أمه

وكنت با أكمل ويا يدتي الا أنه ..........

يدتي :- خلاص اليوم قوم افرش لي مرقدي فوق الصدح يالله
أنا :- انشاء الله أماه
وخرجت وسويت اللي أمرتني به

وسكتت يدتي عن الكلام المباح
عندما طلع الصباح

وغداً لنا لقاء جديد إن شاء الله

تحياتي