سوالف يدتي الله يرحمها......

[واحد فاضي]

أهلين بخيتنا نوارة الدنيا ومرحبتين
السلام عليكم خيي ابو زين
عليكم السلام ورحمة الله وبركاته
ارحبوا ارحبوا
إرحبو بش وبأهلش وبالجمل اللي رحل بش
يا مرحبا مليون ....يا مرحبا رش المطر
بما ان السالفة فيها نخيل فبعدوا عني
اختكم وبلا فخر تمت ولادتها في احد نخيل القديح العامرة
يعني نخلاوية من ساسي لراسي
والنعم بش خيتي
بس عن الفشيلة فيه مصطلحات وااااااجد ناسيتها مع الزمن <<<الحين بيقولوا عمري فوق الخمسين خخخخ
ههههههههههههه مو خمسين يمكن 49 بس ههههههههههههههه
الجدوبة وعرفناها ويا محلاها وهي تقرمش يم يمي لذيذة خاصة اذا فيها حلاوة
أي والله مقرمشه ولا بطاطس ليز هههههههههه
الكر هذا الي يطلعوا به النخلة عشان يحدروها ويلقحوها
العكفاااااااااات اممممممم مو متأكدة منه بس اعتقد زي المنجل اذا مو غلطانة <<<العتب على الكبر
مزبووووووووووووووووط
والحين انتوا دناوة نفس مع العذر ويش تاكلون في هالعصافير المساكين كل الي فيهم عظامة
شدعوه خيتي نسويهم مقرمشيييييييين وناكلهم بعظامتهم هههههههههه

بس صحيح كيف تشتروا العناقيش هذاكم ماليين النخيل عوووووع شكلهم فلم رعب يخوفوا
ذكرتني مرة لمست واحد بالغلط وضليت اتنافض اسبوع
اخوتي كانوا حريفين صيد سمنات ومدقيات بس اذا انت تاكلهم هم بس للاذية يصيدوا ويرموا لان امي من ربعي تخاف تطبخهم
العناقيش لول كانت تجاره فيهم وان شاء الله بنمر على هالسالفه
في الجاي من السوالف
عليكم بالعافية اكلتوهم عاد مدري ويش اكلتوا فيهم << بشتغل مناهضة لحقوق العصافير
الله يستر
مشكور على السالفة الحلوة
حياش الله ويا مرحبتين

[واحد فاضي]

[/center]
بالأذن أخوي واحد فاضي ، سأندس بين الطين والعجين وألقف منك الخط كما يلقف الملقوف نصيبه في السالفة بدون إحم ولا دستور .. !!
كأنني سمعت أحدهم يستفسر عن السمن والمدقية ، فأتمنى إنني جئت في الوقت المناسب والكلام المفيد ، فهذه على ما أظن نوع من الطيور تعيش عادة في البراري والنخيل ويعتقد البعض في حلاوة طعمها ، وأنا جربتها فهي واعلى كبدي صغيرة - أقصد السمنة - ولا تملك هبرات من اللحم المفطح بل يا دوب تحمل قشرة من اللحم يغطي جسدها الرهيف ، ولكن حينما تعتاد على أكلها ستشعر بقيمة ما تأكل وسترى نفسك تحترف الصيد من أجل بس أن تصطاد طيراً أو طيرين ..؟؟
تحياتي وعذراً على المداخلة
يوم سعيد

أهلين بأخونا يوم سعيد
نو مشكا أخي مرحبتين بمداخلتك بين الأخوان أخي

ومشكوووووووور على التوضيح الرائع أخي ما قصرت

تقبل خالص تحياتي

[واحد فاضي]

السلام عليكم ورحمة الله وبركاته
اللهم صل على محمد وآل محمد
ومتباركين بهذا اليوم العظيم
عيد الله الأعظم عيد الغدير
واللي إحتفل واللي راح الحسينية واللي راحت العزيه
واللي قرقشت وأهم شي جددنا البيعة والولاء لآل البيت عليهم السلام
---------
نعود لمحور سالفتنا
هذا يا محفوظين السلامه والصحة والبقاء
هذاك اليوم رجعت من المدرسه وحطيت راسي ونمت من مغربيّه ، وما فيه الا شخييييييييييييييير من التعب
وشوي الا يدتي يايه اليي في الغرفه ومقعدتني
يدتي:- قوم قوم انته نايم الى الحين
أنا :- ( وعيوني نص مفتحه ):- خير أماه ويش صاير
يدتي:- وشوه ويش صاير ، يعني تسوي روحك ما تدري
أنا:- والله أماه ما أدري ويش صاير ، أحد مات ولا حريقه في الديره ولا وشوه
يدتي:- ما تسمع الأذانات في المسايد داكيه تشتغل
أنا:- الأذانات حق الصلاة أكيد يعني حق ويش
يدتي:- حق الصلاه ، أي صلاه والحين الساعه بعدهيه فنعشر الليل ، هذي صلاة شريعة الماي
أنا :- الساعه طنعش الحين ، ما أدري
يدتي :- قوم يالله البس فيابك وروح المسيد
أنا:- أروح المسيد ويش أسوي
يدتي:- قوم روح ذاكيه يت الحوته وبلعت القمر
أنا:- يعني ، حوتة القمر
يدتي:- يعني انته تعرف بس تسوي روحك
أنا:- ما أدري أماه ما أحد قال ليي الليله عن حوتة القمر
بس با أسألش يداه ويش هيه صلاة شريعة الماي
يدتي :- اذا ييت من المسيد با أقول لك
وقمت ولبست فيابي ورحت المسيد اللي في فريقنا وجلست ويا الناس وكل شوي يقوم واحد ويأذن لامن الحوته بدت تطلع القمر من بطنها وقمنا وصلينا الى ربنا صلاة الخسوف
وطلعنا من المسيد ووقفنا نطالع في القمر وكل واحد يقول لصاحبه :- شوف شوف الحوته خافت وزوعت القمر من بطنها ، أكيد بعد ما صلّوا الناس عورها بطنها وزوعته
ويوم بيّن القمر رجعنا لبيوتنا وكل واحد حامل لبشاره الى أهله
أنا:- أماه الحوته طلّعت القمر
يدتي:- زين الحمد لله
أنا:- أماه تراني ما نسيت ، ويش هيه صلاة شريعة الماي
يدتي:- هذي صلاة الميانين يخلوهم يوقفوا
ويعلموهم الصلاة ويقولوا ليهم

أصلّي صلاتي وأنشر عباتي
فوق الشرعه والدنيا وسيعه
الله أكبر

( وفيه تكمله ليها بس نسيتها واذا جت حلوة اللبن ان شاء الله نسألها )
أنا:- الله يعين ، يعني بس ركعه صلاتهم
يدتي:- زين بعد يخلوهم يصلّوا
أنا:- أي والله زين ، اليوم في المسيد يا الينا ........وقام يصلي ويانا بعد
يدتي:- الله يرحم بالحال هذا .......الى الحين يروح المسيد ويصلي ويا الشيخ
أنا:- ايه بعد وين يروح أحسن من هالمصبنه اللي ما يخلّوه في حاله هالمسكين
يدتي:- اي والله ، والحين يالله قوم نام وراك بكره مدرسه

وخرجت من عند يدتي وأنا متعجب من هالحوته اللي تركب للسماء وتبلع القمر وتالي تزوعه هههههههه

وحطيت راسي ورحت في سابع نووووومه

ويالله تصبحوا على خير

[لحن الخلود]

رحم الله والديك اخوي واحد فاضي
رحم الله المؤمنين والمؤمنات برحمته الواسعة
بس بصراحة سالفة الحوتة والقمر اول مرة اسمع بلاسماء هذي
بس المسيد = المسجد هنا ظليت اعود وازيدلحد ما عرفتها
صارت عندي عقدة من حرف الياء يبلع حرف الجيم
معذرة منك بس لانه هو السبب الي يخليني خبلة شوي
تقبل مروري
وانتظر السالفة الجديدة

[عفاف الهدى]

حوتة القمر اول مرة اسمع فيها


يسلموا على هالسالفة الحلوة

[ملاك الورد ..~]

السلم عليكم اخوي ابو زين
معلومة جديدة اخدتها عن صلاة المجانين ( صلاة الشريعة )
بالنسبة للحوتة سامعه بها
حتى ان بعض اليهال يقولوا لهم
اكلوا اكلتكم حوته من السما منعوتة
عادة بليالي الكسوف من يقولوا الحوتة بلعت القمر عاد ساعتها تجيني الهواجيس واتخيل ان وحش له فم كبير طالع لقمرنا ياكل فيه
بس من رحنا للمدرسة وعرفنا السالفة الصجية عرفنا انه كله كلام عجايز
قال زاعته قال
مشكور اخوي

[الفارسه الحسناء]

السلام عليكوووووووووووووووم

شحوالك أخوي عساك بخير


ما قصرت وفيت وكفيت خوش سوالف ترد الروح

والله سجدت على الموضوع البارحه لين أخر صفحه

والله ذكريات حلوه


(وعلى فكره )
شهيتني للباجه >>>أحين بقولوا ويعععع تاكل باجه
والعصيده<<<قمت من الصبح عشان أسوي لي عصيدة دبس تفضل
وداني أكلها ويا نسكافيه مو قهوه عربيه عاد
ويالجو الحلو والمغيم أن شاء الله تمطر
لكن خساره ما عندنا خمقات
والله صار نفسي أوقف في المطر بس أخاف من المرض
يالله أذا مطرت وقفنا واللي فيها فيها
وندعي لينا كم دعوه ولحبايبنا

يالله عاد نبي سوالف غير
أوه صح
عجبتني سالفت نتيف نتيفان
عمري ما سمعت خرافه من خراريف لول
الله يرحم جدتي أم أبوي ما فهمت عليها كنت صغيره
وأم أمي الله يعطيها العافيه مانسمع منها سوالف لأنها عصبيه



رحم الله والديك
والله يرحم جدتك ويسكنها فسيح جناته مع محمد وآل محمد
والمؤمنين والمؤمنات


في أمان الله

[جورية الخليج]

(( بسم الله الرحمن الرحيم * الحمد لله رب العالمين * الرحمن الرحيم * مالك يوم الدين * اياك نعبد واياك نستعين * اهدنا السراط المستقيم * صراط الذين انعمت عليهم * غير المغضوب عليهم * ولا الضالين ))

الله يرحمها ويرحم امواتنا جميعا

[واحد فاضي]

خيتي لحن الخلود حياش الله

آسف في البداية على التأخير في الكتابة والردود
نظراً للإنشغال

رحم الله والديك اخوي واحد فاضي
رحم الله المؤمنين والمؤمنات برحمته الواسعة
الله يرحم والدينش خيتي
بس بصراحة سالفة الحوتة والقمر اول مرة اسمع بلاسماء هذي
أفا على غيرش
هذي معروفه حوتة القمر
بس المسيد = المسجد هنا ظليت اعود وازيدلحد ما عرفتها
صارت عندي عقدة من حرف الياء يبلع حرف الجيم
معذرة منك بس لانه هو السبب الي يخليني خبلة شوي
هههههههههههه
ويش نسوي بعد هذا كلامنا وما نقدر نغيره بعدويش
وسلامتش ....
تقبل مروري
وانتظر السالفة الجديدة
بعد شوي بس خيتي
سالفه حلوه يديده

خالص تحياتي وتقديري

[واحد فاضي]

حوتة القمر اول مرة اسمع فيها


يسلموا على هالسالفة الحلوة

خيتي عفاف الهدى مرحبتين
انتظري سوالف أحلى بعد ان شاء الله

ومعليش على التأخير

خالص التحيات

[واحد فاضي]

خيتي نوارة الدنيا حياش الله

السلام عليكم اخوي ابو زين
عليكم السلام ورحمة الله وبركاته
معلومة جديدة اخدتها عن صلاة المجانين ( صلاة الشريعة )
منتاز ...هالشكل نعرف اننا نكتب شي مفيد

بالنسبة للحوتة سامعه بها
حتى ان بعض اليهال يقولوا لهم
اكلوا اكلتكم حوته من السما منعوتة
عادة بليالي الكسوف من يقولوا الحوتة بلعت القمر عاد ساعتها تجيني الهواجيس واتخيل ان وحش له فم كبير طالع لقمرنا ياكل فيه
ههههههههههههههه
ضحكتيني
أنا من أشوف القمر وهوه صاير أحمر قبل الخسوف
أعتقد ان القمر الحين في البطن هههههههه
وبعدين من يبتدي يخلص الخسوف أعتقد ان الحوته
يعورها بطنها ههههههههه

بس من رحنا للمدرسة وعرفنا السالفة الصجية عرفنا انه كله كلام عجايز
قال زاعته قال
أي والله زاعته هههههه
دقولي الى وحده شايبه ( ضبعا) هالكلام وقولي ليها
ان الأرض تصير بين الشمس والقمر وعلشان كده ما يضهر نور القمر
وشوفي ويش يصير ههههههههه
ما فيه الا تكسير قداوه ههههههههههههههه

مشكور اخوي

حياش الله خيتي
رحم الله والديش

خالص التحيات

[واحد فاضي]

حياش الله خيتي الفارسة الحسناء

السلام عليكوووووووووووووووم
عليكم السلام ورحمة الله وبركاته
شحوالك أخوي عساك بخير
حياش الله خيتي ويا مرحبا

ما قصرت وفيت وكفيت خوش سوالف ترد الروح
عليش بالعافيه خيتي
هذا واجب علينا للمنتدى

والله سجدت على الموضوع البارحه لين أخر صفحه

والله ذكريات حلوه
الله يغربل ابليسش
على هالحاله ما فيه لا مذاكره ولا طبخ ونفخ هههههههههه

(وعلى فكره )
شهيتني للباجه >>>أحين بقولوا ويعععع تاكل باجه
عليش بالعافيه
توني اليوم مخلي المدام تسوي ليي
باجه ...أمممممممممممممممممم
والعصيده<<<قمت من الصبح عشان أسوي لي عصيدة دبس تفضل
وين نصيبي
ما عليي أمبى صحن
وداني أكلها ويا نسكافيه مو قهوه عربيه عاد
تطور رهيب
عصيده ونسكافيه
وعلى قولت الشياب ...ما ترهم هههههههههه
ويالجو الحلو والمغيم أن شاء الله تمطر
لكن خساره ما عندنا خمقات
أشوا عندنا إحنا خمقات
وخليت ولدي يلعب ويطرب وأنا وياه
بس في الليل ...فنينا في الدختور
وكل واحد منّا أبراتين
ودواء سعله
كح كح كح ...إسعل ..إسعل ..إسعل

والله صار نفسي أوقف في المطر بس أخاف من المرض
يالله أذا مطرت وقفنا واللي فيها فيها
وندعي لينا كم دعوه ولحبايبنا
إي والله ولا تنسينا من الدعاء

يالله عاد نبي سوالف غير
الليلة فيه سالفه ان شاء الله تعجبكم
واللي عندهم اختبارات
يروحوا يذاكروا أحسن ليهم
أوه صح
عجبتني سالفت نتيف نتيفان
عمري ما سمعت خرافه من خراريف لول
الله يرحم جدتي أم أبوي ما فهمت عليها كنت صغيره
وأم أمي الله يعطيها العافيه مانسمع منها سوالف لأنها عصبيه
ان شاء الله قريب سالفه فانيه حلوه


رحم الله والديك
والله يرحم جدتك ويسكنها فسيح جناته مع محمد وآل محمد
والمؤمنين والمؤمنات
الله يرحم والديش والمؤمنين والمؤمنات أجمعين

في أمان الله

فمان الله خيتي

خالص التحيات

[واحد فاضي]

(( بسم الله الرحمن الرحيم * الحمد لله رب العالمين * الرحمن الرحيم * مالك يوم الدين * اياك نعبد واياك نستعين * اهدنا السراط المستقيم * صراط الذين انعمت عليهم * غير المغضوب عليهم * ولا الضالين ))

الله يرحمها ويرحم امواتنا جميعا

أهلين بخيتنا جورية الخليج

رحم الله والديش والمؤنين والمؤمنات أجمعين

خالص تحياتي للتواجد الكريم

[واحد فاضي]

السلام عليكم ورحمة الله وبركاته
اللهم صل على محمد وآل محمد الطيبين الطاهرين

في البداية اقدم أسفي لكثرة انشغالي
في الشهر السابق
ولم أكتب أي شيء خلال الفترة السابقة
------

هذا يا محفوظين السلامة ذاك اليوم ياي من بيت خالتي
بعدما وديت ليهم صالونة مسويتنها الوالده
واشتهت لأختها - الله يرحمها - وحطت اليها
في غضارة شويه
وأنا راجع من بيت خالتي شفت صديقي وهوه على باب بيتهم
أنا:- هاه أبوجاسم ويش تسوي
محمد:- دحنا قاعدين الصبيان راحوا الحبال عني
أنا:- خلاص يالخوي ، تروح وياي عين أم عمار
محمد :- والله فكره ، با أمر عليك عند بيتكم
وبس أرمي حيره على دريشتكم يعني أنا
أنا:- خلاص ولا تنسى تييب وياك الميوه
محمد :- النص بالنص
وحطيت ريولي على قولتهم
ووصلت البيت وعلى طول رحت الى يدتي

أنا:- أماه بنروح نتسبح في عين أم عمار
يدتي:- انتفتوا لروحكم مو تغرقوا
أنا:- ولا ما نعرف نتسبح ، ولا يهمش أماه
يدتي:- لا تنسى تييب ليي( *$%^&*)
أنا :- ما عليه ما نسيت ودانا با أخذ كيس عشان أييب لش وااااااايد
يدتي :- وادي با أطلّع قوطيتي الماو
وسمعت صوت الحجره على الدريشه
أنا :- يالله مع السلامه با أروح الحين
وذهبت الى المطبخ وأخذت ميوه للروحه

وخرجت الى صاحبي ومشينا الى العين ويكفيكم واحنا رايحين ما خلينا لا برتقاله ولا تفاحه ولا شي
الا أكلناه ...وما بقت عندنا الا فنديتين حق بعد السباحه
ووصلنا وشفنا العين صافيه وما أحد وصل من اللي يسبحوا هناك
وقمنا نيمع الطين اللي وصتني فيه يدتي وحطينا في الكيس علشان نتقاسمه بعدين
وقمنا نصيد في الحراسين في العين وقعدنا ما فيه الا طبه رواسي وطبه قلّه وطبه من فوق النخله
وشوي الا يايين ناس يتسبحوا
وشويه شويه وانترست العين من الناس
فيه ناس عاد فنانين في السباحه
وفيه واحد الى الحين اتذكره يركب من فوق نخله جنب العين ويطب من فوقها
وذيك الأيام الواحد مو بس يتعجب من هالشي الا يرتفع حواجبه مفلات مساحة السياره

ويوم تعبنا قمنا من العين ولبسنا ورجعنا وفي الطريق شفنا في طريقنا نخله غره وفيها خَلاَل وقمنا ويمعنا بعد شوي
ووصلنا لبيتنا وتقسمنا كل شي
ودخلت البيت
أنا :- سلام عليكم
يدتي:- عليكم السلام ، يا هلا بالحامل والمحمول
أنا:- هلا بأمي يا هلا بها الله يعطيش العافيه لا تستعيلي على رزقش هذاهوه في الكيس وياه شي فاني بعد

يدتي:- ويش هوه بعد وياه
أنا ( وقد فتحت الكيس وأعطيتها منه):- ويش رايش
يعجبش هذا
يدتي:- ايه ، بت .....( نادت على حلوة اللبن)
وجائت أمي
حلوة اللبن :- خير آمري أماه
يدتي:- شوفي ولدش ويش ياب
وأعطيت الوالده شويه من الطين وشويه من الخَلاَل

حلوة اللبن :- ايه يا محلا الخلال، عطاك الله العافيه وسهل الله الك دربك يااااارب

يدتي:- بت .....سوي لينا قلادة خلال اليوم
حلوة اللبن :- خلاص ولا يهمش بعد شويه أسويها
أنا :- عليكم بالعافيه
أنا الحين با أروح أنام بكره ورايي قعده من الصبح
حلوة اللبن :- ويش وراها هالقعده من الصبح

أنا هذا سر وبكره بتعرفوا

وانتون تصبحوا على خير وبعدين بتعرفوا

فمان الله

[لحن الخلود]

هلا والله اخوي
يعطيك الله الف عافية
مشكور على السالفة الجديدة مع انك طولت على بال تجيبها
والله يوفقك
وانا الحين محترة ابي اعرف السر
تراني مابعرف انام من اللقافه بس يالله انشاء الله ما تتأخر

وامورك تتسهل انشاء الله واشغالك تنقضي عسى ربي لا يشغلك شاغل غير عبادته

والله يرحم المؤمنين المؤمنات