الجزء الاخير


وام البنية قالت انه البنت موافقة والصبي سالو عنه امس وقالو عنه اوكي فقالت هدى للام انه ان شاء الله باجر بيجي ليها عشان الفحص وبعد ذلك بيسافر العمرة هو وبعد العمرة قد تطلع النتايج فاذا كل شئ اوكي يتعادلون وتصير الملجة وقالت ام البنية اوكي مافي اشكال,, طلعوا بيت محمد وفي السيارة محمد قام قال ليهم وش صار في المقابلة وسالوه انت مقتنع فيها قال أي مية في المية ورجعوا بيتهم
في اليوم التالي قعد محمد من الساعة سبع ولبس ليه جينز ازرق وفانيلة حمر(( خبركم الصبيان يمموتون في الاحمر ليش مادري)) حليوين يعني وتريق على خفيف وراح الي بيت نورة عشان يروحون الفحص وركبت ام نورة ونورة ورى وراحو مركزهم الصحي مال البديع واخذوا منهم دم وقالو لهم عقب اسبوع تطلع النتايج وبعدين في الرجعة مر على كفتيريا عشان يريق عمته المستقبليه ونورة
محمد: تامرون على شنو
ام نورة: ما امر عليك عدو مانبي يا ولدي تونا متريقين
محمد: ما يصيير انا احين وقفت
ام نورة: الي بتشتريه عادي مو جوعانين يعني شئ خفيف
محمد: تبون شندويج همبرجر عادي تاكلون
ام نورة: أي عادي
محمد: ويش نورة تاكل همبرجر؟؟
نورة: (( ساكتة))
ام نورة: أي تاكل
محمد: عصير شنو تشربون
ام نورة: همبه
طق هرن على الهندي وجه الهندي عند الدريشة
محمد: هلو بيه جيب ثلاث سندويج جيز برجر وثلاث عصير همبه فرش كلو تمام كاجب مافي حط وزيد فلفل يالله جلدي كرو
هندي: اوكي
وراح الهندي وما مهل وجاب الريوق
محمد: جم الحساب
الهندي : دينارين
محمد: شنو دينارين
الهندي: اسير وسندويج
محمد: انت باقل مافي مفهوم سلاسة اسير بسلاس روبيات يعني تسع ربيات وسلاس سندويج بربيتين يعني ست روبيات يعني تسع زائد ست يساوي جم يا باقل((انته مجنون ماتفهم ثلاثة عصير ايصير بثلاث ربيات يعني تسع ربيات وثلاثة سندويج بست ربيات يساوي جم يا باقل))
هندي: يساوي دينار ونس
محمد:هاك واقلب وجهك ياغبي
نورة ضحكت على خفيف بس ما سمعها,,قامو ياكلونه في السيارة,, وبعدين وصلهم بيتهم و ورجع محمد سيدة الشغل لانه اهو في الاساس مترخص من الشغل واتصلت اليه امه قال لها كل شئ تمام والنتيجة بعد سبوع,, محمد اليوم اخر يوم يداوم بعدين سبوع بيروح العمرة ..
رجع محمد من الشغل الساعة خمس وسبح وارتاح وفي الليل نادى على مريم عشان تنسق ليه الثياب الي بيلبسهم هناك وتحطهم في الشنطة
محمد: كم بدله احمل ليي
مريم: ست
محمد: اوووووو واجد الا كلها اسبوع بروحه وجيه
مريم: يالذكي هناك البس وقط يعني ما بتغسل ثيابك
محمد: يعني تقولين جدي
مريم:ايه
محمد: انزين هذا البانطلون يناسب على أي فانيلة الحمرة والله السودة
مريم: مو كله احمر البس اسود حليو بعد
وتموا ينسقون ويعدلون الثياب وحطوهم في الشنطة
مريم: مو تنسى الصابونة وشامبوا صغير انجان شتريت
محمد: الصابون والمعجون وادوات النظافة كلها حطيتها من شوي بس باقي شامبو صغير يبغي ليي
مريم: لو تدري لا تشتري اكو فيه غرشة مالت شامبو صغيرة حط من مالنا عشان لا يصير غفة ليك واجد
محمد: زين عجل
مريم: المهم لا تنسانا بالهدايا مو تشتري لخطيبتك المستقبلية ان شاء الله وتنسانا وادعي ليي
محمد: بدعي عليش والهدايا يصير خير
مريم: مسود الويه قول أي بجيب هذي ما تطمن
محمد: ان شاء الله
مريم: لا قول بجيب
محمد: في احسن من ان شاء الله
مريم: بنشوف يالله بروح انام
ومريم طلعت عنه وراحت تنام وونام هو بعد ما صك شنطاته
ورااااااااااااح اليوم الثاني العمرة من الصبح واليوم رابع ليه من راح كانت مريم ويا علي خطيبها في بيت عمها ابو علي
مرة وحدة حست بشوق لمحمد
مريم: خاطري في محمد حدي مرة وحدة جه على بالي
علي: ما كلمتينه من راح
مريم: لا
علي: انزين اتصلي ليه
مريم: ها ما عندي فوجار
علي: انجان قلتين ليي احط ليش,, احين جودي اتصلي بتلفوني وبعدين بشحنها ليش
مريم: لا بس خلاص(( يازعم تستحي))
علي: جودي جودي
واتصلت مريم الى محمد
مريم: مرحبااااااااااااااااااااااااا ملايين ولا يسدن
محمد: مسامحة اختي هني مو الامارات
مريم: وحشتني يالكريه
محمد: وانتون اكثر
مريم: شمسوي دعيت ليي
محمد: دعيت ليكم كامل
مريم: لا قصدي خصوصي ليي
محمد: امممممممم بصراحة لا
مريم: مالت هذا واني الي معدلة شنطتك ما فيك خير
محمد: بدعي عليش اليوم اوه قصدي اليش
مريم: سخيف,, انزين ها ويش اشتريت ليي؟؟
محمد: اممممممم ما اشتريت شئ اشتريت العاب الى بنات خواتي بس وشي نوع التحفة حق مرتي المستقبلة ان شاء الله نوع التحفة على ميدالية فيها اسمها
مريم: حماااااااااار عدل ولا تستاهل شوقي ليك,, ذكرت ذيك الي بعدها ما صارت ليك واني نسيتيني
محمد: بشتري ليش انزين توني واصل
مريم: : أي تبي تسكتني لان ما عندك رد,, المهم متى بترجع
محمد: اليوم بنروح المدينة
مريم: اها اوكي خلصت فوجار خطيبي على واحد ما يستاهل باي
محمد: افا
مريم: باي
وسكرته حز في خاطرها تقول من احين بداها عليي وهو لحين ما صارت له الدموع شوي وتطيح بس وقفتها لانه خطيبها طلع من الحمام جاي صوبها ,, وطبعا مريم جهزت كل اغراضها مال حفلة الخطوبة وبتصير بعد ما يرجع محمد دايركت من العمرة في نفس اليوم..
ورجع محمد وصارت الخطوبة وصارت مريم من احلى ما ايكون تغيرت عن الملجة لانها حفت وتغير شكلها طبعا ومحمد راح لمريم في الستيديو وسلمت عليه وصور وياها ويوم وصلوا الصالة دخل المعرس ويا خيلان مريم واخوانها ومصورة الفيديو تصور وبعدين دخلت مريم وهي مجودة ابوها ووصلها لين المسرح وسلمها للمعرس وصوروا وشال الشال عن وجهها وباسها في الجبين وجوا البنات والمعازيم يسلمون على العروس ويباركون لها وقام التصوير واخر وحدة جت باركت علياء كانت تراقب مريم من بعيد ودموعها اربع اربع
طبعا كانوا مثل الخوات واكثر مو متصورة انها بتنخطب وبتروح عنها ,, اهي في الملجة وحست كانه خذاها عنه بس يالله هذا النصيب..
واليوم الثاني من الخطوبة ناس تدخل وتاس تطلع من بيت ام مريم ,, خبركم احين حتى الخطوبة فيها مبارك ..
ما اطول عليكم وطلعت نتيجة نورة ومحمد طلعوا الاثنين منهم سليمين بس محمد في نقص الخميرة وما ياثر طبعا,, وبعدين حددوا الخطوبة والملجة كلها تصير ورا بعض ,, ليلة الملجة هي ليلة الحنة والليلة الثانية اهي الخطوبة وتمت الحفلة بخير..
واحين محمد ونورة يعيشون ثنائي جميل وكذلك علي ومريم صار لهم ثلاث اشهر وهم سمن على عسل مثل طيور الحب
والله يخليهم على طول جذي,,
وتووووووووووتة توتة خلصت الحتوتة حلوة والله فتفوتة

تحيات
أختكم{الياسمين}