الجزء الرابع عشر


قعدت مريم من النوم عند اذان الصبح وصلت وكانت تبي تفتح النت للنتايج بس حست روحها مو قادرة تقاوم رد نامت والصبح قالت بتشوف,, وعلى الساعة تسع ونص قعدت من النوم دخلت الحمام وبعدين سيدة دايركت على النت تبي تشوف النتيجة ولا بالعناد النت صاير بطئ عندها,, وبالغصب حطت رقمها الاكاديمي وتنتظر الا برنة تلفونها خطيبها متصل تقول في قلبها هذا صج متفرغ حزتها ولا ردت على التلفون تنظر نتيجتها وطلعت وقامت تشاقح وتناطح ما توقعت ترتفع بهذي الدرجة وسيدة راحت تركض الى امها وخبرتها وباركت ليها وتذكرت التلفون وراحت شالته
علي: الو صباح الفل
مريم من كثر فرحتها ردت عليه بكل حب
مريم: صباح الورد والياسمين
علي: او شكلش مستانسة كله لاني اتصلت فيش
مريم: ((بكل عفوية)) لا لاني طلعت نتيجتي ونجحت
علي : فشلتيني على كل حال كم نسبتش
مريم: توقع
علي: اممممممم 85
مريم: ههههههه هذا بس الي استاهله
علي: لا بس مجرد توقع
مريم: اممممم 93.8
علي: وااااااااااااااو كلش ما توقعت
مريم: اني قدها وقدود لا تتساهل فيني
علي: مبروووووك على النجاح ومبرووووووك عليش انا
مريم: ابتسمت)) الله يبارك في حياتك
علي: تريقتين؟؟
مريم: لا من قعدت من النوم سيدة على النت
علي: انزين مو تتريقين عني احين بجي ليش اوكي
مريم: اوكي بس عقب ساعة تعال عشان اجهز روحي
علي: لا احين بجي بشوفش وانتي عفسة
مريم:ما بطلع ليك
علي: مو على كيفش
مريم: صج صج لا تجي ليي
علي: اوكي الساعة عشر ونص انا بجي
مريم: اوكي
علي: مع السلامة عمري
مريم: ((من احين صرت عمره غريب امره)) الله يسلمك
وسيدة مريم قالت الى امها تسوي ريوق سبشل لان بيجي خطيبها احين وراحت سبحت وولبست ليها تنورة وقميص لونهم بحري ممزوج باسود ,, ولفت شعرها بطريقة حلوة وتعطرت وسوت مسج ليه(( هلا انا احين كملت اذا بتجي حياك))
وبس دقيقتين من وصول المسج الا وهو عند باب البيت طق الجرس وراحت له دخلته سلم عليها باليد وودته الى امها يسلم عليها وبعدين دخلته المجلس والاام جابت الريوق وقعد هو يتريق جنه من سنة ما اكل وهي يادوب تاكل لها شئ الريوق كان عبارة ((عن بيض مقلي وانواع من الاجبان وعسل ووسمبوسة وبلاليط وبيبسي))
حدها كلت سمبوستين وهو لت الاكل لت ,,
علي: اكلي شفيش ما تاكلين لا تستحين انا ما استحي اكو اكلت الاكل اكال
مريم: عليك بالعافية
علي: بس بعدين مو تروحين المطبخ تاكلين بروحش ترى بلحق وراش
مريم: هههههههههه لا ما بسويها
علي: انزين خلاص انا كملت شيلي الصينية مالت الريوق
مريم: اوكي تبي تروح الحمام تغسل ايدك
علي: يالله وبعدين وديني حجرتش ابي اشوفها
مريم: اوكي
ودت مريم الصينية المطبخ وعلي غسل ايده وودته مريم حجرتها شافها وقعد وياها هناك راوته البوم صور مالها من يوم هي صغيرة لين احين وسوالف متفرقة عامة وحزة اذان الضهر
علي: يالله مريوم احين انا بروح المسجد بصلي وبعدين بجي ليش بوديش البيت جهزي روحش اذا تبين تحملين شئ
مريم: انت تعال البيت ما يحتاج اجي
علي: ما تبين تشوفين حجرتش؟؟
مريم: امممممممم اوكوووو اذا كملت بسوي رنة وانت لين وصلت سو رنة وبطلع ليك
علي: اوكي يالله باي
مريم: الله يسلمك
علي: هههههههههه( مط خدودها) ما نسيتين
مريم: ( بابتسامة) ما تطوف عليي
علي: مع السلامة عمري
مريم: الله يسلمك
وعلي راح المسجد ومريم تمسحت وصلت وقعدت تجهز روحها وتحط ليها ميك اب على خفيف لانها ما تحب الواجد والدفش وفي الاساس ما تعرف وخبرت امها وامها قالت اوكو وسوت رنة الى علي وقعدت تنتظرهفي الحوش عند الباب ومن سوا رنة سيدة طلعت له
وبطلت الباب الي جمب علي وقعدت
مريم: سلام
علي: هلا ما شاء الله من سويت رنة سيدة عند الباب
مريم: ما احب احد ينتتظرني
علي: والله زين,, لان انا اكره شئ عليي الانتظار
مريم: من حظك اخذتني احمد ربك
علي: ليه الغرور والكبرياء
مريم: واني اقول ان شاء الله اخد ليي واحد ما يسمع اغاني عشان اتركه
علي: انا مو واجد اسمع ساعات
مريم: احسن
علي: امممممم متشوقة عشان تشوفين الحجرة
مريم: اكيد
علي: مسامحة المفروض تشوفين شقة بس شنسوي على قد حالنا
مريم: لا عادي الواحد يمشي خطوة خطوة عشان يوصل للي يبيه اني اهم شئ اكون سعيدة حتى لو في حجرة
علي: ان شاء الله يتيسر حالي واسوي الشقة في اقرب وقت
مريم: ان شاء الله
علي: يالله وصلنا دشيتين بيتنا من قبل؟؟
مريم: ولا مرة
علي: احسن
مريم: ليش؟؟!
علي: بس عشان يصير له زهوة خخخخخخ
مريم: ههه
علي: يالله نزلي
ونزلت مريم ويا علي ومشى قدام وهي وراه ودخل باب الحوش بعدين ما دخلو الباب الي يوصل للصالة لا ركبها على درج وهي وراه ما تدري بالدنيا وفتح باب والا تشوف شقة
علي: هذي حجرتي
مريم: هذي شقة مو حجرة
علي: أي هذي شقتي
مريم: يالشلاخ وجذب تقول ما عندك شقة ليش؟
علي: كنت ابي اعرف ردة فعلش
مريم: واحين عرفت
علي: أي واستانست
مريم: مالت
علي: على بليسي
مريم: هههههه
علي: وش رايش
مريم: يالله راوني اياها عدل وبعدين بقول رايي
وعلي راوها اول ما تدخلين من المدخل الرئيسي في ممر وعلى جنب تصير الصالة وبعدين تمشين شوي بعد تجي صالة شوي اصغر وفي ممر فيه الغرف حجرتين ومطبخ وقسم للغسيل كانت حلوة الشقة وعودة,, هي مو مكملة يعني وصلوا فيها الكهرباء الجبس باقي الصباغ والاثاث وغيره..
علي: يالله شفتين الشقة ها شرايش؟؟
مريم: تجنن حلوة كلش التصميم مالها
علي: تستاهلينها
مريم: مشكور
علي: يالله خلنا ننزل براويش حجرتي
مريم: اوكي
ونزلوا علي ومريم ودخلوا البيت اول شئ راحت مريم الى عمتها ام علي وسلمت عليها وحبت راسها وابو علي بعد سلمت عليه وحبت راسه وقعدت شوي وياهم بعدين علي ناداها وراحت وياه الى الحجرة الحجرة كانت حلوة طبعا احلى من حجرتها كانت مسوية على اصول واثاثها حلو واهم شئ فيه حمام هذا الي استانست منه
وقعدت وياه سوالف وهرار
علي: اممممممم مريوم تكلمي ليي عن نفسش ابيي اعرفش اكثر واكثر
مريم: ههههه شاقول ما اعرف جذي يعني كل شئ بينقال في وقته
علي: انزين قولي ليي ليش ما كنتنين تشتهيني
مريم: لا مو على شئ كنت احسك مغرور لا اكثر مو معناه اني ما اشتهيك
علي: زعلت انا مغرور
مريم: غيرت نظرتي عنك
علي: اشوة
مريم: انزين علي شلون يعني اخترتني؟؟
علي: مثل ما قلت ليش من كلمتش اعجبت فيش وفي شخصيتش وخصوصا الفترة الي ما قمتين تكلميني فيها زاد حبي ليش وبس قلت ابيش
مريم: لو شفتني وما عجبتك شكليا كنت بتاخذني؟
علي: طبعاااااااا باخذش حبش انحفر هني(( وياشر على قلبه))
مريم: ( ابتسمت ابتسامة خفيفة ممزوجة بفرح كبير) ما توقعت ابدا اني انخطب بهذي الطريقة
علي: الله كاتب
مريم: انزين بقولك سر
علي: قووووووولي شنووووووووو
مريم: بس خلاص ولا شئ
علي: الا تقولين
مريم: خلاص مو شئ
علي: ترى بزعل
مريم: كنت امزح
علي: متاكدة
مريم: متاكدتين
وتموا علي ومريم يسولفون عن اشياء خاصة وعامة (( طبعا اسرار ما بقول لكم شقالوا ))ورجعت مريم المغرب بيتهم ووياها علي وقعدوا ويا ام مريم سوالف ووياهم محمد
محمد: يالله مريم انا ماليي كار دورو ليي وحدة له
علي: الاخ بيخطيب
مريم: أي وملوع جبدنا مو محصلين ليه
علي: ياخي دور لروحك بنفسك صير مثلي
مريم: (( تنغز علي بايدها متفشلة قدام امها)) قلت لك اني ما يتكل عليي
محمد: قولي انخطبتين واحين خلاص استغريتين
مريم: هههههه على ويش استغر انت صاير حساس واجد
علي: امممممم فالك طيب خلاص البنية عليي انا
محمد: عندك احد؟؟
علي: عندي بنات واجد بشوف لك وحدة من الي كنت اكلمهم قبل
اشوة بعدني ما مسحت ارقامهم
انقهرت مريم حدها وبكل وقاحة يقول
مريم: خلهم لك ما نبي حق اخويي وحدة من الخايسات الي تكلمهم
وقامت مريم حجرتها
علي: هههههههههههههههه شفيها دي شبت ضو من صدقها صدقت يعني لا حول احين وش الي يراضيها
محمد: اشوفك من احين قلبت على اختي هي بشويش عليها
علي: طالع واقول بدور ليك وحدة خلاص نجفت خل اختك هي الي تدور ليك
محمد: انزين احين قوم راضها الله يساعدك عليها
علي: نقوم وامرنا لله
وراح علي لحجرة مريم وقعد يطق الباب وهي ما حقرته عشان فشلة مو حلوة قدام الكل وسيدة بطلت الباب وهي مباعدة
وجهها عن لا يشوفها ورجعت قعدت على السرير تسوي روحها تحوس في مجراتها ومتجاهلتنه وسرحت وهو مخلنها لفترة عشان يعرف شيقول لها هي تقول في قلبها(( اني توقعته مو خالي هالاشكال ما تتخلى بحالها الله يصبرني )) وقام علي لها يتحجج فيها بطل شعرها
مريم: هيييييييييييييييي هدني
علي: ما بهدش الا لما تكلميني
مريم: الذا عدلت اسلوبك وحاسبت لكلامك بعدين يصير خير
علي": انا امزح يعني لو فعلا عندي بنات بقول في وجهش
مريم ساكته وحاقرتنه
علي: مريووووووووم هذا اول يوم لينا لا تخربينه عليي والله شوفي تلفوني ما فيه احد اذا تبين بتصل لرقم رقم وشوفي
مريم مطنشتنه
علي: لا تسكتين عني اكلمش انا
مريم تصيح
علي: شفيش مو لهدرجة عاد مريوم والله احبش يعني تتوقعينها مني (( مسح دمعتها وفر وجهها بايده لعيونه )) شوفي عيوني وقولي شتشوفين فيها غير الحب واللهفة يالله عاد مريوم ابتسمي
مريم: لا تسوي فيني جذي مرة ثانية
علي: تامرين امر يالله قومي غسلي وجهش وتعالي لبسي بنطلع
قامت مريوم وغسلت وجهها ولبست بالطوها وشيلتها وفي طلعتهم
محمد: ها راضيتها
علي: انته ماليك دخل كله منك
محمد: طالع ان شاء الله احين بناخذ اختي منك
علي: هذي لي انا ما تقدر يالله بار بار
محمد: مالت
مريم: عيب ما اسمح لك
محمد: يالخاينة من يومين عرفتينه وصار اغلى مني افا ما هقيتها منش
مريم: امزح انت ما اقدر اعوضك يا احلى واغلى اخ
محمد: انا زعلت خلاص باليسش ما عاد ينفع
مريم: افا اني اختك هاك ةبوسه على الراس
علي: الله لينا
محمد: حرة
علي: يالله مشينا مشينا مريوم عن هالاشكال
محمد: في امان الله
علي: مسامحة كنت امزح ها
محمد: لا عادي خوك
علي ومريم: مع السلامة
محمد: الله يسلمك