الجزء الثالث عشر

وطلعت الام وخلت مريم في دوامة من التفكير كلش ما توقعت انه فعلا يتقدم لها هالشخص ومادري ليش اهي مترددة انها ترفضه مع انها ما تحبه بالعكس تحسه مغرور ومتكبر بس يمكن تبي تحس بالانتصار لان البنات كلها تحبه واهي الي قدرت تاخذه
بس قالت هذا زواج ما تبي تفكر جذي تبي تفكر بمهل وبعقلانية
وبعدين اتخذت قرار وقالت ما بتتنازل عنه,, قالت في قلبها اهم شئ دراستي وما بفرط فيها لو مهما يكون ولكن قالت بترد على امها في الليل,,
في الليل
الام : ويش يا بتي اتخذتين قرار؟؟
مريم: أي
الام: ها بشري ترى القرار راجع ليش هذي مصيرش اتمنى انش اتخذتينه بعقلانية
مريم: اني موافقة بس لازم اكمل دراستي الجامعية بس هذا شرطي
الام: هذا شئ لازم,, والله وكبرتين يا مريم احين بزوجش وبتنزاح عني حمل البنات ثقيل
مريم:افا جذي تقولين لهلحد اني ثقيلة عليش وتبين تتخلصين مني
الام: لا فهمتيني غلط اني ابي ازوجكم واستر عليكم
مريم: بس خايفة لكن
الام: من شنو خايفة؟؟
مريم: مادري احس روحي اتخذت قرار هذا مصيري يعني
الام: لازم يا بتي البنية مصيرها تروح بيت رجلها
مريم: متاكدين انتون عنه زين
الام: أي زين واجودي وبنسال محمد وعلي وخيلانش
مريم: يالله على خير بروح اني الحجرة
الام: بسش تفكير
مريم: هه لا ما بفكر
الام: صدقتش
مريم راحت حجرتها وشعورها غريب جدا متقلبة ساعات تقول ليش قبلت افففففففف مو قادرة تركز على قرار واحد
الام اتصلت الى محمد وعلي وسالتهم عن علي وكلهم قالو زين وكذلك الخيلان محد قال عنه شئ مو زين وبعدين توكلت على الله وتصلت الى ام علي
ام مريم: هلا ام علي
ام علي: هلا بيش بشري يا وخيتي
ام مريم: البنت موافقة بس شرطها تدرس ,, وانتون طبعا حددوا أي وقت حق المقابلة والمعادل
ام علي:بشاور ابو علي وعلي وبرد عليش(( واستانست من الخاطر وراحت تبشر ولدها الي قاعد في قلق))
ام علي: علي اتصلت ام البنية
علي: هاااااااا وش ردت؟؟؟
ام علي: البنية تبي تكمل دراستها(( تبي تفور دمه عليها حركات بعد))
علي: ( سكت ونزل راسه وكل هموم الدنيا كانها انصبت فوق راسه راحت لهفته وحماسه بردها)
الام: وش فيك يا ولدي لا تضجر الي خلقها خلق غيرها
علي: بس انا خاطري فيها
الام: تحبها؟؟؟
علي: وش الفايدة احين
الام: الفايدة ان متى تبي تروح عشان تسوي مقابلة ونتعادل
علي سيدة قام وشقح ويناطط والله ما اوصف لكم شعوره لو تشوفونه كانه طفلوحضن امه فترة طويلةةةةةة بعدين قال
علي: انا زعلت اماه تسوين فيني جذي اهون عليش
ام علي: امزح
علي: من متى قمتين تمزحين
ام علي: من قلت انك بتزوج
علي: لهلحد تحبيني اماه وتحبين سعادتي
ام علي: واكثر لحين ما عرفت محبتي ليك شكثر
دمعت عيون علي وحاول انه ما يبينها بس الام شافتها ومسحتها وباسته على جبينه وراحت عنه
علي في هذا اليوم شعوره ما ينوصف حس روحه بغى يطير من الفرحة بصراحة ردات فعله وحماسه قاس له أي كثر يحب مريم يقول في قلبه شلون حبيتها وانا ما شفتها خذت عقلي بكم محادثة بسيطة وياها يا ترى شلون شكلها تغيريت او لا,,, تساؤلات وافكااااااااااار ما تخلص
ومريم من صوب ثاني متخوفة وعايشة في اضطراب وقلق ما تدري ليش هل لانها تحس روحها بعدهي صغيرة وبتدخل عالم غريب ما تعودت عليه تعودت على الاتكالية والحركات الطفولية واحين لازم بتودع كل هذولا الاشياء وبتصير مسؤولة ,, قطع تفكيرها تبطيلة الباب الا واخوانها وخواتها كلهم جايين
علي: هلااااااااااا بالعرووس
مريم: توه الناس عليي بعدي عزابية خلوني اتهنى
فاطمة: ودعيها خلاص قولي ليها باي باي
مريم: لا تحزنوني ان شاء الله انجف
محمد: نجفي يالله انا ابيش تنجفين ادري ما تقدرين بروحش مايتة على العرس
مريم: مالت عليك عبالك مثلك (( كل من يرى الناس بعين طبعه))
هدى: عجل نبرز لينا فساتين من احين ونسوي الميزانية بتفقرينا الله يفقرش
مريم: طالع احد قال لش تعدلي ,, مول وانتين بتتعدلين ليي ,,بتتعدلين لرجلش ويا هالوجه
فاطمة: من قدش بتاخذين واحد وسيم وحليو
مريم: اني احلى منه
هدى: عشتووووووووو
مريم: يالله احين فارقوني ابي اقعد بروحي
فاطمة: مو زين التفكير واجد ترى اني اخاف عليش
مريم: قلبي وجهش خليني اتهنى مثل ما انتي تهنيتي
فاطمة: يا زعم تغني(( يا بنات لا تصدقون ان الزواج راحة,, اول سبوع في البيت مرتاحة وثاني سبوع سكر وتفاحة وثالث سبوع في الارض سداحة ورابع سبوع في الارض مساحة...))
مريم: انجان قلتين لروحش هالكلام وبعدين خربطتين في الاغنية خربتينها قومي قومي والي يعافيش
علي: اقول مريم
مريم: ها
علي: شسمه ناسي اسمه سمونة
مريم: احفظ الكلام بعدين تعال
علي: انتين احين رافعة خشمش علينا الى ويه
مريم: من حقي قوموا براجع للامتحانات
هدى: عاد مو احين ما تدرسين عدل والله ما بنزوجش
مريم: هاهاهاهاي انتون تعايروني على ويه جنكم انتون الي جايبين ليي الرجال قلبوا وجوهكم لا احين بنادي امي تقومكم
فاطمة: نقوم بكرامتنا احسن لينا
هدى: يالله يالله خلوها تراجع راجعي ها مو تفكرين
مريم: يالله الله وياكم
وقبل الامتحانات في العطلة مالت الدراسة جوا اهل علي عشان تصير مقابلة عشان اذا كل واحد شاف الثاني ووافق في نفس الوقت يتعادلون ,,
يوم المقابلة صاير البيت كله حركة الابو راح السوق واشترى قدعات وفواكه ومن هذا القبيل ومريم لبست تنورة سودة على وردي وبدي حليو ناعم وردي وصارت ناعمة بدون أي اضافات على الوجه خلت روحها طبيعية الشعر خلت ليها قذلة ولفت شعرها بطرقة حلوة وخلت مشبك(( العضاضة اسميها اني))
وبعد الاذان بنص ساعة جو اهل علي,, الرجال ابو علي وعموم علي ثلاثة,, والنسوان ام علي وجدة علي وبس,, استقبلتهم الام ودخلتهم مجلس النسوان وقعدوا سوالف بعدين قالو نادي على مريم ودخلت مريم وهي فعلا مستحية ما تحب احد يركز فيها وخبرش الجدة تطالعها وتمسح على شعرها واستلطفتها مريم
والرجال سوالف عن مواضيع عامة وبعدين الام نادت مريم عشان تدخل المقابلة ,, لبست مريم بالطوها وشيلتها وهي ترتجف ودخلت حجرة اخوها محمد,, الاودقايق دخل عليها علي
علي: سلام
مريم: (( يادوب ردت السلام حدها ترتجف)) عليكم اسلام
علي دقيقة يطالعها ودقيقة ينزل عيونه بس هالدقيقة الي يطالعها فيها يخزها خز وهي مسكينة من ترفع عيونها وتصطدم في عيونه سيدة تنزلها ما عطها مجال المجرم انصدم ما توقعها بهالحلاوة اهو كان راسم صورة كلش عادية ومو حلوة ليها واحين تغيرت مليون في المية خلاه يدوب في دباديبها اكثر,, بعدين علي قطع الصمت
علي: طبعا تعرفين اسمي علي وعمري 23 سنة واشتغل وادرس في الجامعة مسائي خبرش انا طموح
مريم ابتسمت: ............
علي: اشتغل في بابكو ادخل معلومات معاشي 300 طبعا لين ما اتخرج بيعطوني منصب احسن يناسب تخصصي وبيرتفع المعاش وبس شتبين تعرفين عني بعد اذا عندش اسئلة؟؟
مريم: (( تجرأت وتكلمت)) ابي اعرف عن شخصيتك
علي: شنو يعني؟؟
مريم: مثلا عصبي واطباعك يعني
علي: (( ابتسم يقول في قلبي خايفة البنية)) لا مو عصبي واجد بس شوي
مريم: اخاف من العصبية
علي: (( وهو يمزح)) يعني اقوم ما تبيني
مريم: لا سوري مو قصدي
علي: انزين بعد شتبيني اقول ليش انا واجد حنون فعلا ومدام عندي ما ابخل بالعكس كريم واحب البنت الي ما تعاند وتقول ان شاء الله
مريم تقول في قلبها ويه عشتو حنون مغرور ومن احين يبيني اقول ان شاء الله نغزة يعني الله يستر
علي: شفيش سرحتين
مريم: ها لا ولا شئ انت عندك اسئلة ليي
علي: شنو بتاخذين ان شاء الله في الجامعة؟؟
مريم: مادري يا بنكنغ او تكنلوجيا بس سمعت يقولون صكوه يعني لحين متحيرة
علي: انتني مواليد كم؟؟
مريم: (( طالع جاي متقدم الهبل شكله حتى عمري ما يعرفه)) 88
علي: صغيرة يعني كتكوتة
هاهاهاي يتظيرف
مريم(سكتت))
علي: انا ما عندي اسئلة اذا انتين
مريم: اوكي خلاص بقوم
علي يقول في قلبه طالع هاذي بتقوم وبتهدني ,, بس مريم قبل لا تروح
مريم: ترى الدرب فاضي عشان تروح المجلس
وقام راح علي المجلس ساله ابوه وش الوضع قال اوكي قام طلع علي اخو مريم يسال اخته
علي: مريم ها ويش موافقة او لا
مريم: وش تقول انته
علي: بعطيش كف بسرعة قولي مو تدلعين
مريم: يالله توكلنا على الله
علي: يعني أي
مريم: أي
وراح علي وقال لجماعة ان البنت موافقة وتعادلوا خب معروفة هني عندنا المهر الف دينار والضيفة خمس مية دينار (( رخاص بنات البحرين مو؟؟ قصدي اسعارهم بس هم جوهرهم غالي)) وتم المعادلة على احسن ما يكون وطلعوا بيت علي على اتفاق انه بعد الامتحانات تصير الملجة وبعد اسبوع من الملجة يصير الخطوبة عشان تقدر تجهز روحها