الجزء الحادي عشر

وتمت مريم تفكر وتفكر طول الحصص يا ترى من الي كلمته وعطيت معلوماتي كلها له هل هي بينة او صبي اففففففففففففففففف الله يستر
ولما رجعت البيت مريم سيدة بدلت ثيابها وصلت ودخلت على النت وسوت حذف الى الايميل الي كان عبالها مال عقيلة وطلعت من الحجرة عشان بتشوف وش الغدى,, راحت المطبخ وقامت تعسعس وشافت ان الغدى سمج هوامير نجفت ولا تغدت وراحت تسوي واجباتها,, ودخل عليها محمد
محمد: ها اشوفش صايرة شاطرة اليوم
مريم: لا ومن متى صرت كسلانه عشان اصير شاطرة
محمد: اول مرة اشوفش فاتحة الشنطة وتحلين واجبات
مريم: خبرك اخر كورس لازم شوي نجد على روحنا
محمد: هيك يعني
مريم: ايوة هيك
محمد:ما دريتين,, ردوا عليي له
مريم: وش ردوا
محمد: رفضوا
مريم: توقعت اقولك مغرورة,, بس ما قالوات السبب
محمد: يقولون تبي تكمل دراستها
مريم: ويه عشتو احين لو فعلا تبي تكمل دراستها انجان ليش بعد امس متصلين ليك ويستفسرون عنك,, ياخوك الشغلة والمعاش ما عجبهم
محمد: ادري فيهم بس شنسوي بنات هالايام ما يسوون من يتقدم ليهم اصلا لين تقدموا ليهم قالو بنكمل دراستنا وما نبي عرس ويتعيززون ,, واذا محد تقدم ليهم قالوا عنسنا بس يستاهلون التعنيس هالنوعية من البنات
مريم: يالله مو من نصيبك احسن ليك ما تستاهلك
محمد: ربش كريم
مريم: انزين واحين؟؟
محمد: دوروا ليي غيرها
مريم: اني اعرف بنية حليوة من عالي وطيبة بس مادري موافقة على فكرة الزواج احين او تبغي تكمل المدرسة بعد
محمد: عندش رقمها
مريم: أي
محمد: اتصلي ليها
مريم: أي والخساير عليي وش اكل حتى اغرم
محمد: عشان اخوش يالله حبيبتي
مريم: باليس معروفة
محمد: انزين اتصلي اتصلي
واتصلت مريم على البنية
مريم: الووووو مرحبا زنوب
زينب: هلا والله شصاير اليوم طالعة الشمس من وينه
مريم: هههه من الغرب عيوني
زينب: اممممممم احس انش تبين تقولين شئ
مريم: بالضبط بخش وياش في الموضوع دايركت
زينب: الله يستر
مريم:خير خير الموضوع وما فيه ان اخويي يبي يخطب وشفتش انتين المناسبة بس مادري انتين موافقة على مبدا الزواج حاليا
زينب: امممممممممم فاجاتيني
مريم: ادري بس شنو أي او لا؟؟
زينب: بصراحة ابي اكمل مدرسة اول
مريم: افا خسارة يالله ما لينا في الطيب نصيب
زينب: مسامحة
مريم: لا عادي كل واحد ما ياخذ الا نصيبه اوكو يالله اخليش
زينب: اوكي مع السلامة
مريم: باي
بندت التلفون
محمد: النتيجة مفهومة من كلامش
مريم: بالضبط توقعت انها ما تبي تزوج احين
محمد: اففففففففففففففففففففف خلاص شكلي بنجف
مريم: توك في بسمي ناس يتقدمون لسبع وعشر ويدشون مقابلات وانت الا في بداية الدرب
محمد: واحين؟؟
مريم: انت ليش مستعجل هذا زواج عدال عدال مو هوي هوي
محمد: يالله بقوم انام
مريم: الله وياك
وراح محمد نام ومريم كملت واجباتها وراحت تطالع تلفزيون في المجلس فرت على ستار اكاديمي وقعدت تطالع الا وجاينها مسج من ختها اتقول انه في الليل بيطلعون العايلة كامل بيروحون صخير ويمكن يبيتون لان يوم ثاني عطلة عيد العمال
في المغرب مريم برزت روحها وسوت لروحها سفتي عدل
لبست شيلتين ودلاغ وثلاث فانيلات وبانطلون ولبست بالطوها وحملت وياها جاكيت احتياط وركبت ويا اخوها محمد وامها ويا علي ,, ومحمد مشغل السات( مسجلة بس فيه شغلات واجد تخليه يصير صوته عالي) حده ومطول عليه ويمشي سريع حده شاق الارض شق مريم تصارخ عليه لان ادونها انبطت تبيه يقصر عليه وهو مو راضي,, ويوم وصلوا قريب الخيمة قصر عليه عشان خيلانه ما يكلمونه ودخلت الخيمة
مريم: سللاااااااااااااااااااام جميعا
الكل: عليكم السلام
حميد ((خال مريم)): هدويش سلمي بالايد
مريم: (( اتفشلت)) لا قلت ناس واجد وش يخلصهم
حميد: أي ما عليه
وقامت سلمت على واحد واحد,, بعدين راحت قعدت ويا بت خالتها علياء قعدوا سوالف
علياء: ها وش الاخبار
مريم: والله اخباري مغبرة ما في شئ جديد وانتين ما عندش شئ يمين يسار مني مناك
علياء: اختكي مثلكي
مريم: ما منش فايدة
علياء: جوعانة حدي
مريم: وش بيشوون هني والله ويش
علياء: هادلين وجهم وجه شواي بلة عليش بروحهم مطلعين الطلعة حزة الحزة
مريم: عجل ويش بياكلونا
علياء: بعدين الساعة حدعش بياخذون من كل عايلة فلوس وبيشترون تكة الصبيان
مريم: ونااااااااااااايبة احدعش اني جوعانةبعد
علياء: امرنا لله
مريم: يالله امشي نطلع برة نقعد صوب النار
علياء: ورو النار؟؟(( يعني شعلوها))
مريم: أي جيتنا كانت مشتغلة
علياء: بس بتصير ريحتنا كلها حرايق
مريم: قومي قومي انتين جاية صخير وين يعني جاية
علياء : جليقا(( قمنا))
وراحت مريم وعلياء وقعدوا على الكراسي عند النار
علياء: سمعي بسمعش الموسيقى الحليوة الي قلت ليش عنها ديك المرة اكي في التلفون
مريم: اوكو
وقعدوا ثنتنهم لازقين ببعض وحاطين التلفون في ادونهم والجو كلاسيك عندهم ويجي محمد خالهم ويعطيهم ضربات على الراس عن مزحة يعني وينزهقون
مريم: اوهو عفست شيلي
علياء: دفش اني مو قايلة ليك لا تسوي هالحركات
محمد الخال: انتون ما ينفع وياكم الا جدي
مريم: الاخ ما كلين حلاله
علياء: متملل قال يجي يتسلى فينا
محمد الخال: توكم تدرون
مريم: من زمان ندري , الا من زمان ما تطلعنا والله راحت ايامنا؟؟
محمد الخال: ما في بيزات هالايام فقر في فقر , الا يشوف وجوهكم ما يشوف الفقر له
مريم: قصدك العكس
محمد الخال: بقوم عنكم
مريم: وين بتروح
محمد الخال : بنروح نستاجر لينا هذيلين السياير الصغار الي مثل نوع الموتر سيكل مال البر
مريم: الااااااااااااااااي خاطري اركبه خلوني اركبهم
علياء: مشي بوزش تركبينه
محمد الخال: اكي ردت عليش
مريم: : عاد امشوا عدل مو تفشلونا
محمد الخال: اعجبش انا بتشوفيني انا احسن واحد فيهم يالله بار بار
علياء ومريم: باي
وراحوا استاجروا ليهم النص ساعة بخمسة دينار والله ما يسوى المهم وجوا صوب الخيام يستعرضون ويطفرون تراب على البنات بعدين الا محمد الخال يبغي يسوي روحه كلش يقحص ويمشي فلت,, :47_47: ويدعم البيبات وتتقلب السيارة عليه ويتشدخ تشدخ وسيدا راوحوا ليه ومحمد اخو مريم ركبه السيارة وبيودونه ,, بس مريم ما تطوف هالموقف عليها راحت ليه
مريم: ها ويش يالخال تقحيصة : عدلة ها :
محمد الخال: متفشل)) ههههههههههههههههه :
مريم: تعورت واجد؟؟
محمد الخال: كله شماميخ بس شماميخ عدلة الله يستر
مريم: المفوشر وما يسوي
محمد الخال: : جاية تتشمتين ها يالله مناك قلبي وجهش
مريم: ما تشوف شر يا احلى خال
وراحت مريم عنهم وتموا شوي تعشوا وبعدين رجعوا كل من راح بيته,, ومرت الايام وعلي صار له زمان وما يشوف مريم تفتح مستغرب وخلاص قال الا لازم يقول الى بيتهم عشان يخطبونها ليه ,, من خلال هالفترة عرف انه عن جد يحب مريم حب صادق
وش بيصير بعدين علي فعلا بيتقدم لمريم والله كلام الليل يغيره النهار
ومحمد حصلوا ليه بنت الحلال او لا؟؟
كل هذا بتعرفونه في الجزء القادم