اشكر الجميع على المشاركة

اختلاف الرأي لا يفسد في الود قضية

وانا ما عممت لكن ابد وذيك الليالي فضيعة وحلوة بصراحة وانا ما ادعو انهم يتركو الاحتفال بهذي المناسبات بالعكس وادري انها مصدر قوة لينا .. اما اذا قلت اخي ظل الظلام ما ادراك وهل شفتهم لو لا انا اقول لك انت شفت..

وحتى في التجمعات تشوف البنات يمرو بين الاولاد ولا كأنه شي صاير والموضوع طبيعي ..هذا مو فتنه؟؟؟

او الاولاد اذا مرو بنات مع سواق هندي او غيره يعني مو مع اهلهم تشوف الاولاد يدقو النافذة عليهم ...

وما خفي اعظم...

واحنا مو لازم نتستر على نفسنا دايما ونقول انا احنا الماس وماعلينا غبار اصلاً..
فهذا عيبنا اسمح لي ولازم نتناقش بهالمواضيع كان الله يهدي الناس اللي فيهم هالحركات اما اذا سكتنا عن نفسنا بنضيع خيي..

الموضوع حساس مرة ومأخوذ علينا وزي ماقالت الاخت نوارة الخير يخص والشر يعم يعني بكرة مابيقولو الناس هذي بس لا بيقولو عن كل المجتمع ...

احنا مانقول لا تفرحو ولاتلبسو الجديد بس بالنسبة للاولاد لو كل واحد احترم نفسه ولبس ثوب جديدة وتعطر وطلع يبارك لاحبابه وشارك بهذي الاحتفالات ماحد تكلم له..

ولو البنت تسترت وحضرت لاحتفالات باحترام ابدً ما حد يقدر ينطق عنها اي شي واحنا نشجع المشاركة بالفرحة بالنسبة للاولاد والبنات كل بمكانه الخاص..

اما هالمبالغة باللبس وتلوين الوجوه والرشاشات والدبابات والخرابيط هذي بتشوه اعمال اخوانا المؤمنين اللي قاعدين يتعبو بعمل اماكن الاحتفالات بالعكس بيلوموهم بعد كأنهم هم السبب باللي صاير..

والبنت تقول لاتحبسوني خلوني اروح اكركش او اقرقع او مادري شنو ..روحي بس باحترام ومشي زي الناس..

اعزائي الكلام الاول والاخير ان احنا مانبغي احد يتكلم عنا بشي وترا هذا الشي مايرضي الله عز وجل ولا الرسول ولا آله عليهم افضل الصلاة والسلام..

وآسف للاطالة وآسف والموضوع مو مبالغ فيه هذا اللي حاصل