السلام حلو الموضوع اخوي بس الأسئلة طويلة كأنها اسئلة وزارة يمة اتخوف
يلا راح ابدأ ويمكن استبعد احد الأسئلة ما ادري يمكن يصعب عليي الجواب تعرف رمضان اتقل المذاكرة
1 - هل ترفضينة لأنه لا يصلى ؟
الصلاة هي عمود الدين اذا ما في عمود كيف راح ينبنى البيت
2 - هل ترفضينة لأنه يدخن ؟
ما اعتقد هذا مو سبب كافي للرفض ولا من الأساسيات الي ينبغى اني احطها يمكن هاي صفة ما تعجبني اني باسلوبي بعدين اخليه يقطعها
3 - هل ترفضينة لأنه يعاكس الفتيات ؟
اعتقد اي اذا كان الحين هم يعاكس ...بس في مراهقته اظن انها فترة وراح اتعدي
يعني على شخصيته اذا كان قابل للتغيير باخذه بس لو كان صعب يتغيير الله يعينه على حياة العزوبية
4 - هل ترفضينة لأنه بخيل ؟
هي صفة مو حلوة..اني بعد بخيلة اشوي فما منتعاشر
لفتة احب اقولها ( ان الأهالي رسمو لينا ان الزوج هو الي راح يطلع الوحدة من الفقر الى جنة فيها ما لذ وطاب و... الي اشوفه الحين ان الواحد ما يقدر يتزوج واذا تزوج سنتين وهو ضاغط على نفسه ما يقدر يعيش)
5 - هل ترفضينة لأنه مهزوز الشخصية ؟
يمكن ..لأني ابغى مين ياخذ ليي حقي
6 - هل ترفضينة لأنه لايعمل ؟
اكيد والف اكيد لأني ما ابغى اكون عاله على اهله وما ارضى اني ارتبط بواحد مو قادر يفتح بيت واني اعتبره في هالحالة مثل اخوانا (( بدون ))
7 - هل ترفضينة لأنه سيسكن مع أهله ؟
لا بالعكس عادي وهذا الي ابغاه لأني اخاف اجلس لحالي ها ها
8 - هل ترفضينة لأنه فقير ؟
ل الفقر مو عيب ( خذوهم فقراء يغنيهم الله ) واني عندي مشاريع وانساعد بعض
9 - هل ترفضينة لأنه مريض ؟
المرض مو عيب بس اذا كان مرض معدي او وراثي صعبة اشوي
10 - هل ترفضينة لأنه عصبى المزاج ؟
عصبي لدرجة لا تطاق يعني كل كلمة وطراق هذا اكيد ارفضة لكن عصبي بدرجة طبيعية عادي هذا ما قسمه الله علينا
11- هل ترفضينة لأنه يتلفظ بألفاظ سيئة ؟
يمكن اذا كانت مرة بدل حبيبتي تطلع حاجة قوية طبعا ما راح اوافق
بس اذا كان اهون من كده ينظر في الموضوع
12- هل ترفضينة لأنه لايهتم بمظهرة ونظافتة ؟ هذا دوري الحين اعمل لو استايل جديد
13 - هل ترفضينة لأنه سمين أو نحيف (المظهر) ؟ ما اعتقد هذا سبب للرفض يمكن اذا كان اقصر مني بحيث انشكل رقم عشرة يمكن هني ارفض بس النحافة والمتانة عادي
14 - هل ترفضينه لأنه يعانى من إعاقة ؟
(( شلل أطفال مثلاً أو لا يسمع أو لا يتكلم ))
صعب الجواب : السمع والكلام اليهم حلول اتوقع السماعات والكلام بالإشارة بس الشلل اذا كان مقعد صعب واجد والأهل راح يكون موقفهم جدا قوي
15- هل ترفضينه لإختلاف اللون ؟
طبعا لا لون البشرة مو مهم ( لا فرق بين اعجمي ولا عربي الا بالتقوى ) وش حلاوتهم السمران شكلاتة لذيذة ها ها
16 - هل ترفضينه لنسبه ؟
كيف نسبة : مثلا اذا اسم عيلتهم متجاهرين بالفسوق او معروفين بأنهم فلتانيين طبعا ارفضة
اذا كنت تقصد لقبه مضحك يعني هذا مو مهم اهمشي اخلاقه تمسح كل شي
17 - هل ترفضينه لو إشترط عليك عدم إكمال الدراسة أو العمل ؟
لا لأنو بعدين راح يفهمني وأفهمة وراح انشوف وين مصلحتنا وشو الي انقدمه وشي الي انأخره
18 - هل ترفضينه لأن والدته متسلطة ؟
صحيح هي راح اتخرب علي عيشتي بس في النهاية اني ماخدة ولدها مو ما خدتنها هي يعني اتزوجه وابعد نفسي عن المشاكل
19 - هل ترفضينه لأنك ترينه أخ لك ؟ (( إبن العم - إبن الخال مثلاً ))
يمكن
20 - هل ترفضينه لأنه غيور ؟ اذا بدرجة ما تنطاق اي
21 - هل ترفضينه لانه ملتزم ؟طبعا لا هذا المطلوب الحين والي يدوروه بالتفق
22 - هل ترفضينه لان المهر المقدم قليل ؟
طبعا لا لازم اراعي الظروف زي ما شفت اخواني كيف حالتهم لازم اراعي اولاد الناس
وما احلى مولاتي وقدوتي بمهرها البسيط والله راح يطرح فيه البركة
23 - هل ترفضينه لانه لايتماشى مع موضة العصر ( مايسمى رجعي ) ؟
لا الناس اذواق وهو لازم بعد العرس راح يتغير

ويلي اتعبت بس اهمشي يجي ويدق الباب مو انجاوب وخلاص