رواية سعودية جريئة وممتعه (عافك الخاطر) للروائية هجير الشوق ..

[دنيا الأحلام]

حنونه ياعمري انتي
الله يسلمك يالغلا...
كمليها واقريها كلها زين....
يسلمووووووووووو

[دنيا الأحلام]

تسلمي نغومة عمري
مكملة ولا يهمش...
يسلموووووووووو

[آهات عاشقه]

القصه مره مره مره


تجنن


تسلمي يالغاليه على القصه الحليوه


وابغى التكمله بسرعه


الله يعطيش الف الف عافيه

دمتي لنا

[دنيا الأحلام]

/
بعـــد اسبــوع ..
مشاعل : واخيرا" اليوم تطلع نتايج التسجيل ريمووه خايفة
ريم : ليش
مشاعل : افرضي ماقبلونــا
ريم : لا وش مايقبلونــا 98 وماننقبل لا لا بننقبل إن شاء الله
مشاعل رافعه يدينها : يارب
اشواق : انـا مدري ليه تتعبون انفسكم الوحده يالله تفتك من سالفة المدرسة والدراسه تقوم تبلش نفسها بجامعة
انقهرت مشاعل من تفكير هالحيــة .. وردت
مشاعل : ما اوافقك بهالشي الشهادة بهالزمن سلاح
اشواق : كلام افلام
ريم اضحكت من رد اشواق ..
مشاعل : لا مو كلام افلام هذا الواقع لا اهلك ولا زوجك دايمين لك ولا تدرين بكره وش يصير
اشواق : اقول الله يطول بعمرهم إن شاء الله
مشاعل : آمين ماقلنا شي
ريم تساسر مشاعل : اتركيها عنــك الحين
مشاعل : على قولتــك .. يبي لي ادق على الهنوف اسئلها عن تسجيلها وش صار فيه
ريمـ : ايه صح صارلي زمان ماشفتها وش رايك تعزميها ..؟؟..
مشاعل : فكـرة .. خل ادق عليها
/
/
بجهــة ثانيــة ..
حنان شوي وتموت من القلــق .. خايفة لا تروح تعبتها بالامتحانات ..
حنان وهي رايحة وجاية بغرفة الهنوف : ياربي ياربي ياربي ياربي
الهنوف : وجع اركدي دورتي راسي بروحتك وجيتك
حنان : قلقانة يالهنوف خايفة لا تروح تعبتي وما انقبل
الهنوف : لا إن شاء الله بتنقبلين نسبتك حلوة
حنان : شوي وينفجر راسي احس هاليوم اعظم من يوم نتايج الثانوية
الهنوف : ههههههه الله يعينك
حنان : وانتي مريحــة الي يشوفك مايقول تنتظرين شي
الهنوف : يمكن اكون اعظم منـك بس حابسه القلق داخلي كفاية انتي
قربت منها حنان وجلست جنبها عالسرير ..
حنان : اقول بعدك تفكرين فيـه والا
الهنوف بنظرة حزن : ما ابالغ لو اقول اكثر من اول ..
فجـأة دق جوال الهنوف .. والمتصله مشاعل ..
الهنوف : هلا والله
مشاعل : هلا بك كيفك؟
الهنوف : الحمدلله بخير انتي كيفك؟
مشاعل : بخير ناقصني شوفك يالغلا
الهنوف : الله يسلمـك
مشاعل : هاه وش صار على التسجيل طلعت نتايجكم انتي وحنان ؟
الهنوف : لا فتحنا عالموقع بس فيه تصليحات وبيعرضونها الساعة 8 بالليل
مشاعل : صدق وانا على بالي طلعت صارلي ساعة اشاور عمري افتحه والا لا خايفة بس يالله على خير وإن شاء الله مقبولين
الهنوف : كلنــا إن شاء الله
مشاعل : اقول الهنوف وش رايك تجين يوم عندي والله مشتاقة لك وكمان ريم ودها تشوفك صار لها زمان ماشافتك
الهنوف : وانا كمان مشتاقة لكم والله
مشاعل : خلاص وش رايـك بكـره على الغداء ..
الهنوف : لا مشكلة بس خليها جلسة قهوة بلاهـا الغداء
مشاعل : ليش تكفين خليها غداء علشان يصير بينا عيش وملح هههههه
الهنوف : هههههههه خلاص ولا يهمــك
مشاعل : وبلغي حنان تراهـا معزومة معاكِ
الهنوف : اوكـي
مشاعل : يالله مع السلامة
الهنوف: الله يسلمــك
حنان : عازمتــك ؟
الهنوف : ايوه وانتي كمان معزومة
حنان : وبتروحين عادي ؟
الهنوف : ايه وش المشكلة
حنان : وطلال ؟
الهنوف : طلال شي وانتهى خلاص لازم اعيش حياتي وواجهه بدون مشاعر ..
/
/
بالليــل .. طلعت النتايج
مشاعل وريم وحنان والهنوف كلهـــمـ انقبلوووا بالقسم الانجليزي ..
امنيتهم واتفاقهم انهم يدخلون نفس القسم .. والحمدلله تحققت ..
/
/
ببيت ابو طلال ..
وبالصــاله ..
طلال : الف مبروك عالقبول شعولة
مشاعل : الله يبارك فيك الي مفرحني ان انا وريم والهنوف وحنان كلنا بنفس القسم
طلال اهتز قلبــه لاسمهــا .. آه يالهنوف
اشواق لاحظت شرود طلال وقهرها بادرتها ..
اشواق : اقول حبيبي طلال وش رايك نطلع نتعشى برى
ام مشاري : ايه صحيح من ملكتــوا ماطلعتوا مع بعض
طلال بلا اهتمام : مالي خلق اطلع ابي اتعشى بالبيت
ام طلال خافت لا تصير مشكلة وقالت ..
ام طلال : مافيها شي ياوليدي اطلع مع خطيبتك غيروا جو برى
طلال : إن شاء الله
صعدت اشواق علشان تتجهز وطلع طلال للسيارة .. طلعت وراه مشاعل تشوفه ..
ونادته قبل لا يركب سيارته ..
مشاعل : طلال
طلال : هلا
مشاعل : تكفى لا تضايق نفســك ياخوي
طلال ببتسامه ماقدر يخفي مرارتها : لو اجتمعت علي جبال من الضيق بعد الهنوف ماعاد يهمـ .. خلاص
مشاعل فرت دمعـه منها قرب منها طلال ومسحهــا ..
طلال : هالدمعــه ماتنزل وطلال موجود
مشاعل : الله يريح بالك ياخوي .. على فكره الهنوف بتجي بكره عالغداء
طلال لا شعوريا" : صدق والله
طلعت اشواق لقتهمـ واقفين ..
اشواق : مشاعل هنـا خير ليكون ناوية تجين معنــا
مشاعل بإستحقار : لا
طلال : يالله اركبـي وبلا كثرة حكي
/

[دنيا الأحلام]

ببيت ابــو نواف ..
نواف : تو مانور البيت يا ام نواف الحمدلله عالسلامة
ام نواف : منور بنورك يالغالي الله يسلمك
سلمى : يوووه يمه طولتي مابغيتي تجين
ام نواف : شسوي اخوك مشعل لزم علي اجلس معاه اكثر من اسبوعين
نواف : شخباره هو ووش اخبار حرمته والبيبي ؟
ام نواف : كلهم بخير .. متى بعد اشوف عيالك يانواف
سلمى بغمزه لاخوها نواف : قريب يمه
ام نواف بفرح : صدق ؟
نواف : ايه صدق يمــه
ام نواف : والله اليوم السعيد المبارك يوم الي اخطب لك ياوليدي من بكرى إن شاء الله ادور لك بنت الحلال
سلمى : لا يمه ترى نواف وفر عليك التعب والعروسة جاهزة
ام نواف : مين هي وبنت مين ؟؟
حكــت سلمى لامهــا سالفة الهنوف معاهمـ كلهـــا ..
ام نواف : والله باينتها بنت اجاويد متى تبينا نروح نخطبها ؟
نواف : انا حاليا" مأجل الموضوع شوي
ام نواف : براحتك ياوليدي ومتى مانويت بلغني
نواف : تسلمين يالغالية ..
/
/
بالمطعــمـ
طلال جالس مع اشواق جسد بس ..
اشواق : طلال حبيبي حاكني شفيك ساكت
طلال : وش تبيني اقول
اشواق : قول أي شي الي يشوفنــا مايقول خطيب وخطيبته
طلال : مالي خلق اتكلمـ
اشواق : مالك خلق طلعه وقلنا معليش هالدور مالك خلق تتكلم طالعه معك اكلم روحي
اكتفى طلال بالسكــوت ..
اشواق : بجد وضعنـا لا يحتمل تطنيشك لي بالبيت حتى بالمكالمات تطنشني وبالطلعة تنطنشني
طلال : مو أنا اختيارك ورغبتك مو انتي الي اصريتي تاخذيني بالرغم من انك تدرين اني ما احمل بقلبي لك غير الكره خلاص تحملي الي يجيك
اشواق : اخذتك لاني ابيك وكذلك قهر لهــا انا عارفة انك تحبها وتفكر فيها لكن وربي لو تذوقني جمر ماتركتك لها
طلال : مو غريبة عليــك الخبث منك وفيــك
اشواق : قول الي تقوله انت ملكي ومستحيل اتركك
طلال : قسم بالله لو ماحنا بمكان عام وريتك كيف اكون ملكك .. مو طلال الي تخططي يكون خاتم بيدك ياهانم .. قومي خل نمشي
اشواق : والعشى ؟
طلال : اطفحي سم بالبيت سديتي نفسي
/
/
ام مشاري : هو قالك كذا ؟
اشواق وهي تبكي : ايه يمه طلال مو حاس فيني وبالطالعه والنازله إهانات فيني
ام مشاري : الي مايستحي لكن انا اوريه قليل الخاتمه
اشواق ببالهـا : هين ياطلال وربي لاذوقك سمـ ماذوقتني ,,
طبعـا" ام مشاري عمة طلال ماسكتت وطيران عند ابو طلال الي من سمـع كلام اخته شبت النار داخلــه ..
/
/
طلال : بس يبــه .......
ابو طلال : وحطبـه , هذا كلام تقوله لخطيبتك وبنت عمتــك ماوطيت راسي بأخذ بنت اختي تبي تفشلني معها
طلال : انتو الي جبرتوني على هالشي قلت لكم اني ما ابيها ما ابيها ومستحيل اني احبها .
ابو طلال : عمرك لا حبيتها إن شاءالله بس على الاقل احترمها جاملها مو تهينها
طلال : انا ما اهنتها قاصد هي الي جبرتني على هالشي بوقاحتها معي
ابو طلال يبي يهدي الوضــع مايبي يخانق ولده ..
ابو طلال : اسمع ياطلال ترى اشواق لساتها بزر سايسها وجاريها تكسبها ولا تحط بالك على كل كلمه تقولهــا
طلال : إن شاء الله يبه
ابو طلال : يالله تصبح على خير
طلال : وانت من اهله
من بعد ماطلع ابــوه اسند نفسه عالكنبــة وجلس يفكر بباله ويقلب بين اصابعه جواله ..
محتــاج لها .. محتاج لصوتها .. آه يالهنوف .. بكرى بتجين هنــا وربي ماراح اطلع ببقى انتظــرك وانتظر جيتك .. ابروي عيني من شوفــك يكفيني حرمتي قلبي منك ..
خل اتصل عليها .. بس اكيد ماراح ترد خل اجرب بجد محتاجهـــا ..
دق على الهنـــوف .. الهنوف بهالوقت نايمــة خصوصا" ان وراهــا غداء ببيت مشاعل يعني لازم تصحى بدري ..
وهي بالنــوم سمعت صوت الجوال ..
الهنوف وهي تاخذ الجوال : اوووف مين هذا الفاضي
طالعت الرقم وانقزت .. حكت عينها يمكن جالسة تحلم . .
الهنوف : وش يبي داق علي ياربي
طلال : ماترد اكيد نايمــة والا تشوفه وماتبي ترد
بعد فتـرة ..
الهنوف لا زالت جالســـة عالسرير ومتلحفة وجنبها جوالها تناظره وهي تفكر فيه ..
جاءها مســج من رقمه ..


مــاســألتـنـــي ..؟..!
ليـه أمـوت الـفيـ 2000 ـين مـرهـ
لا طـريتـــكـ .. ؟؟؟
وليـه احس القـلب .. يطـلع
بس .. لامنـّي بكـيتـك .. ؟؟
ما سـألتي .. ليـه يعـني .. !!
وكـل طـاري / هـم / من بعـدك .. ] تبعـني [ .. !!
ايـه .. والخـالق .. ~ أحبــك ~ ..
حـتى اوجـاعي .. تحـبـك .. !!
حتى ،، اسمـك ،، لا بغـيت انطـقـه ..
يطـلع لي :: أحبــك :: ..
.. يــا ..
×× .. " أحـبـك " .. ××
هزهــا الشوق من كلمـــاته .. جاءهــا مسج ثاني منــه ..

[دنيا الأحلام]

" كم تمنيتك يتيمـــهـ وخافقي دار التبني ؟!
تسكني داخل ضلوعي وتستغيثي من هواها "
" كم تمنيتك ولايهـ واسكنك من صغر سني ؟!
واقصد بـ شعري دخيل العالم اللي في ذراها "
" كم تمنيتك وليتهـ ينفع اليوم التمني ؟!
كان شفت اللي يرد الروح لـ انفاسي لقاها "

ماقدرت تتحمــل حرارة الشوق وداعبــت جفونهــا دمعــة .. آه ياطلال ليتني رديت عليــك وسمعتــك ..
/
/
بيــوم ثانــي ..
الظهر
صحت مشاعل بدري .. وجاتها ريـــمـ علشان يجهزون ..
ريمـ : على الساعة كم قالت لك بتجي ؟
مشاعل : الساعه 1 بتكون موجودة بس صارت وحده ونص ومابينت مدري ليه
ريم : يمكن متأخره كذا
مشاعل : إن شاء الله بس كذا
ريمـ : اقول شعولة وش عنده طلال جالس بالبيت ماوراه شغل
مشاعل : ههههه لا وراه بس طنش كل شي لاجل عيونها ماتشوفينه جالس بالصاله يحتريها
ريم : آه ياقلبي عالحــب
/
/
بعد عشر دقايــق ..
وصلــت الهنوف وحنان .. استقبلتها مشاعل وريم .. وصعدوهــا لغرفة مشاعل
مشاعل : هلا وينك مابغيتي تجين ؟
الهنوف : معليش ماصحيت الا متأخره ههههههه
ريم : كل هذا نوم مين الي مسهرك ؟
الهنوف ببالهــا : الي جالس بالصاله وعيونه مافارقتني
مشاعل : بقوم اطلب من الخدم يجهزون الغداء تحت قومي ريم معاي
ريم : طيب
حنـان : ماشاء الله غرفتها حلوة
الهنوف : مشاعل ذوقها جدا" راقي
حنان : الاخ جالس بالصاله وحنا نصعد ماشال عينه من عليــك
الهنوف : وش دخلني انا الي قلت له ناظرنــي
حنان : ههههه لا القلب هو الي قال ( اديني ولو نظره )
بعد فترة ..
تغدوا البنات وسط الضحــك والسوالف .. وبعدها جى وقت الشاهي .. مشاعل اقترحت انهم يشربونه بالحديقـــة ..
حنان : الجو جدا" رائع
مشاعل : اول مره احس بالربيــع بالعاده مافيه الا صيف وشتاء
الكل : ههههههههههه
الهنوف حست بحاجتها للحمام لعد هالاكله الحلوة .. وطلبت من مشاعل تدلها عليه .. دلتها دخلت وقبل لا تطـــلع ..
جاءهــا طلال الي كان مراقبهــا اول مادخلت مع مشاعل تدليها .. وقف جنب الباب ينتظرهــا وماكان خايف احد يشوفه والا لا كل همــه .. يصيدهــا ويتكلم معهــا ..
ودام اشواق وامها العقربة طالعين يعني الجووو خالي .. ويقدر ياخذ راحتــه ..
خلصــت جات بتطلع واول مافتحت الباب .. طلع بوجههــا
بدون شعور اطلقت صرخـة من الخلعة حط يده على فمهــا ودخلهــا مره ثانية الحمام ودخل معهـــا وقفل الباب ..
الهنوف شوي وتطيع من الصدمــة وترجف من الخوف ..
الهنوف : وش قاعد تسوي ؟
طلال : لا تخافين ماراح اسوي لك شي انا اضر حالي ولا اضرك بس حبيت اشوف واتكلم معــك
الهنوف : بالحمــــــام ؟!!
طلال : ههههههههه شسوي هي جات كذا كان دخلتي المطبخ
الهنوف : هههههههه
طلال : تسلم لي هالضحــكة وراعيتها .. وربي احبك ومشتاق لك
الهنوف اكتفت بالسكوت ورخت راسهــا حياء ..
طلال رفع راسها وجات عينها بعينه وناظرها نظرة عتاب : ليش تعذبيني يالهنوف ؟
الهنوف : انا عذبتــك ؟
طلال : ايه انتي رفضــك لي لما صارحتك بحبي عذبني الا ذبحني
الهنوف : انا مارفضتــك انا صارحتك بالواقع انك مو لي ولا راح تكون لي
طلال : ومين قالك هالكلام .. انا كلي لــك
الهنوف : واشواق ؟
طلال : لها الجسد بس القلب تحلم فيــه .. قلبي مثل قبري مايحتمل اثنين .. والهنــوف من زمـان اخذته واحتلته وتربعت على عرشه .. أحبك يالهنوف
الهنوف تمت ساكته مو عارفه ترد .. ضاع الكلام من حرارة انفاســه ..
الهنوف : خلني اطلع تكفى ..
طلال : طيب بخليك تطلعين بشرط
الهنوف : وشو ؟
طلال : تعطيني بوســة
الهنوف : لا احلف هذا الي ناقص
طلال : ههههههههه لا امزح معــك وربي .. قصدي سمعيني كلمــة احبـك
الهنوف : مقدر
طلال : ليه ؟ ترى بجد مالك طلعة اذا ماقلتيها
الهنوف : بصارخ وبلم الدنيا عليك
طلال : عيني بعينك تسويها ؟
الهنوف ببتسامه : لا
طلال : يابعد قلبــي خلاص بخليك تطلعين
فتح البــاب تأكد ان ماكـو احد برى وطلعهـــا ..
بالحديقـــة ..
حنان وهي تشوف الهنوف جاية
حنان : كل هذا بالحمام اخاف معك ذاك الي يسمونه ( اسهال ) ؟
ريم ومشاعل : هههههههههههه
الهنوف : ههههههههه تستخفين دمــك لا مو مسهله

[دنيا الأحلام]

/
/
قريب المغرب .. الهنوف مع حنان روحوا ..
طلعت مشاعل للصاله وشافت طلال جالس
مشاعل : اقول الحبايب روحوا ترى
طلال ببتسامه عريضة : الله يردهم بالسلامة
مشاعل : آمين بس ممكن نعرف سر هالابتسامه الي شاقه خشتك ؟
طلال : قلتيها سر ما اعلم فيه
مشاعل بغمزه : صار شي ؟
طلال يسوي نفسه يتذكر : اممممممم يمكن
مشاعل : آهااا علشان كذا تأخروا الحبايب كنت شاكه بالموضوع وصدق شكي الحبايب طايحين غراميات وحنا ياغافلين لكم الله
طلال : أحبها شسوي ؟
مشاعل : واشواق
طلال : شفيها ؟
مشاعل : لا تنسى ان اشواق خلاص صارت زوجتك وحبك للهنوف يعتبر .....
قاطعها طلال : عارف مايحتاج تذكريني عن اذنك
مشاعل : على وين ؟ آسفه اذا ضايقتك
طلال : لا عادي وانا اخوك .. يالله مع السلامة
/
/
بالليـــــل
الهنوف جالسة بالصاله مع اخوها ماجد ..
ماجد : هاه عسى انبسطتوا بالغداء ببيت ابو طلال؟
الهنوف : الا انبسطنا ونص مشاعل ماشاء الله عليها اكرمتنا
ماجد : فيهم الخير والله اقول الهنوف
الهنوف : آمر اخوي
ماجد : بغيت اقولك سالفه تخص حنان
الهنوف اخترعت : وش حاصل ؟
ماجد : شفيك اخترعتي
الهنوف : اخاف شي من طرف ذاك النذل بعد
ماجد : لا لا مايسترجي الخسيس من بعد االضربة الي اخذها
الهنوف : طيب وش الموضوع ؟
ماجد : انا ناوي اتقدم لحنان
الهنوف بفرح : صدق والله
ماجد : ايه صدق بس ما ابيك تقولين لها
الهنوف : ليش حنان تحبك وبيسعدها هالشي كثير
ماجد : بخليها مفاجأة لليوم الي اتقدم فيه
الهنوف : حركات والله زي الافلام يعني
ماجد : هههههههه انتي اخبر بحركات الافلام مني
الهنوف : طيب قلت لامي
ماجد : ايه قلت لهـا وإن شاء الله اذا رتبت اموري هالسنة بروح انا والوالده نخطبها
الهنوف : الله يوفقك ياخوي ويسعدكم انتم الاثنين
ماجد : الجميع يارب
/
/
بآخر الليل .. ( وقت العشاق )
فيصل : مشتاق لك حيل
مشاعل : مو اكثر مني
فيصل : ياقلبي انتي ايه صح اعملي حسابك بكره غداي عندك والا ناس وناس تتهنى بشوفة حبايبها
مشاعل : مسرع ماوصلك الخبر اكيد طلال ..
فيصل : ايه يالله اجهز نفسي للغداء بكره والا اتغدى عند امي
مشاعل : لا ياقلبي غداك عندي
فيصل : اروح وطي انــا اقول شعولة ترى زواجنا ابوي حدده وقبل نهاية الصيفية بأسبوع
مشاعل : ليش كذا مستعجلين ؟
فيصل : مدري بس ابوي جى وعطاني ياها بوجهي وقال انه بيكلم عمي ( ابو طلال ) على اساس يخلي زواجنا مع بعض
مشاعل : ماظنتي طلال بيعجبه هالكلام
فيصل : قولي مثل قولك حتى انا مافاتحته بالموضوع لما شفته عارف ردة فعله وهو جاني مبسوط وماحبيت اخرب عليه
/
/
بيــوم ثاني ..
ام مشاري : انا كلمت خالك ابو فيصل ووصيته يقترح على ابو طلال يخلي زواجكم مع فيصل جميع
اشواق بفرح : صدق يمه
ام مشاري : ايه صدق اقول شفتي طلال االيوم
اشواق : لا الامس ولا اليوم ولا حتى لمحت ظله
ام مشاري : طيب كلمتيه دقيتي عليه
اشواق : يطنشني ومايرد علي
ام مشاري بقهر : مدري وش اسوي بهالطلال أنــا
/
/
بجهــة ثانية ..
طلال : وليشه العجلة ابي افهم ماصار لنا شي من ملكنــا
ابوطلال : وشو له تطول الملكة تزوج وريح حالك وبعدين مو من عادة عايلتنا الملكة الطويلة والي مالها داعي
طلال : بس انت قلت لي ان الملكة نستعجل فيها بس الزواج على راحتي ماخبري فيك يبه تثني كلمتك او تغيرها
ابو طلال انحرج من كلام ولده
وقال بتردد : غيرت رائيي والا بتجلس حضرتك تحاسبني على كل كلمة اقولها
طلال : لا يبه ما اسويها بس ممكن اسئلك سؤال من بعد اذنك ؟
ابوطلال : تفضل
طلال : عمتي هي صاحبه هالاقتراح صح؟
ابوطلال : لا ليه هالسؤال
طلال : بإختصار ماكو غيرها مستعجله على تقييدي ببنتها ..
ابو طلال : عيب ياولد لا تنسى انها عمتك
طلال : مانسيت بس ابيك انت يبه ماتنسى اني ولدك
قال هالكلمــة وطلع .. وظل ابوه حاير بكلمتــــــــــه ..
/
/
ريمـ كانت جالسة عالنت ..
ريم وهي تكلم حالها وهي جالسة تشارك بمنتدى ..
ريم : سلطان الغرام ياعيني حركات الاخ الظاهر متأثر بالمسلسلات ههههههه
المهم خل نشوف المسن يمكن وحده من البنات جالسه واروح الطفش معها
/
/
اشواق تكلمـ فاتنة بالجوال ..
فاتنة : اخبار عروسة الهنا
اشواق : زفت
فاتنة : افاااا ليه ؟
اشواق : هالثور الي اسمه طلال مو طايق يطالع بوجهي مطنشني على طول فاتنة بسئلك انا شينه شي ؟
فاتنة : احلى من القمر
اشواق : الهنوف احلى مني ؟
فاتنه باستغراب : مين الهنوف ؟
اشواق : الواظيه الحقيرة الي شاغله باله وماخذته مني
فاتنة : طلال عنده علاقه بغيرك
اشواق بحزن مدلع : لا مو كذا بس يحب غيري
فاتنة : يحب الي اسمها الهنوف ؟؟
اشواق : ايه جعلها الموت ياخذها
فاتنة : ويلي عليك وعلى حالتك ووش ناوية تسوين ؟
اشواق : ابي اتخلص منها باي طريقة بس صعبه الحين مصيره يجي يوم واجيب اجلها
فاتنة : اشواقوه يمه منك تخوفين ؟
اشواق بغنج ودلع : تقوليني عني انا اشواق بنت الزين كله اخوف ههههههه
/
/
ببيت ابو نواف ..
ام نواف : هاه نواف ماصار جديد بموضوعك مانويت على شي
نواف : لا يالغالية حاليا" عندي سفره شهرين ونص ومأجل الموضوع لبعد السفره
ام نواف : الله يقدم الي فيه الخير
/
/
ضاقت به الدنيــا بعد كلام ابوه .. محتاج لهـا بقوة محتــاج يكلمهــا ويشتكي لها .. وهو الي بالاول كل ماضاقت عليه لجأ لفيصل بعد الله سبحانه .. صارت دنيته وحياته وسكنت وجدانه وذاته ..
دق عليهـــا ..
الهنوف كانت بالصاله مع اختها بدور تطالع التلفزيون واول مادق جوالها ركضت لغرفتهــا ..
الهنوف ببالها : ياربي رجع دق علي مترددة اكلمه والا لا بس حركة مو حلوة مهما كان هو غريب عني صحيح نحب بعض بس هذا مايعني اتخلى عن مبادئي واكلمه خل حبنــا يظل مكتوم بالصدور وتحكيه العيون بالنهاية ماله امل يشوف النور
تعب من كثر مايدق عليها وهي مطنشة .. بس هو محتاجها بهالوقت وبهالوقت ارسل لها مسج
الهنوف فتحت المسج وكانت متوقعة انه منه ..
( ردي علي يالهنوف ضاقت بي الدنيا محتاجــــك )
كسر قلبهــا وقررت ترد عليه هالمره بس .. دق عليها وكأنه عارف انها غيرت رايها رجع دق عليهاوردت ..
طلال بنبرة عتاب : ليه مطنشتني يالهنوف ؟ محتاجك
الهنوف : طلال شفيك ؟
طلال : حكم علي القدر ارتبط بوحده مالها أي قيمه وحرمني من الي كل قيمه بقلبي لهــا ليه يالهنوف يصير فيني كذا ليه مكتوب علي اعيش محروم منك ليه انكتب علي اتزوج بها هي مو انتي وفوق هذا كله زواجنــا بعد شهر ؟
الهنوف غصت بعبرتها .. السالفه كذا ياطلال .. ضيقتك وهمك لان زواجك منها قريب ..
الهنوف سكتت ماكان عندها جواب غير دمعــة انسابت على خدها بهدواه .. حس فيها وبسكوتها ... وبكى بصمت معهــــــــــا ..
₪₪₪
الا يا صبر قلي دخيلك ..
لي متى بتقوى !!
فراق الي نقش اسمه داخل اعماقي !!
اقول: يا قلبي لا تبكيه ..
ويقول لي : "يسوى" ..
ابذرف الدمع لعيونه ..
لو تذبل احداقي !!
يا خسارة ذاك الجنــون
وقلبٍ يعشق ويهوى
يبي قربي ولو ساعه
يبي يحس ..
بعناقـــي !!
انا ادري انك يا زمن
اغبـــر
ذبحت الحب وهو توّه
دخيــــلك يا زمن
اذبحني أنـــــــا وكمّــل الباقي


يتبــــــــــــــــع ,,,

[آهات عاشقه]

والبـــــــــــــــاقـــــــــــــــــــــــي

متى

يسلمووووووووووووو يالغاليه


والله خوش قصه

حلوووه وتجننن

تسلمي دنيا الاحلام

وربي يعطيش الف الف عافيه

دمتي لنا

[دنيا الأحلام]

بعد شهر بالضبط ..
وبيوم الــزواج ..
فيصـل ومشاعل بهاليــوم الدنيا مو سايعتهم من الفرحــة واخيرا" بيجتمعون .. عكس طلال الي ضاقت فيه دنيتـه من صباح هاليوم .. والي زود الضيق انه بنفس الليله بيسافر مع اشواق شهر وهذا يعني حرمــانه من الهنوف كليا" .. اما مشاعل وفيصل فقرروا يأجلوا السفر خصوصا" ان مشاعل عندهـا جامعه .. عكس اشواق ..
//
مشاعل والكوافيرة تحوس بشعرهـا : امم افكر اخلي المكياج نفس لون الباقه اسمع البنات يقولون هذي الموضه
ريم : بجد الموضه تنسق الوان الباقه على وجه العروس ؟ ههههههه والله زمن عجايب
مشاعل : هههههههه وحنا مانصدق مع الخيل ياشقرا
ريم : ماسئلتـك الهنوف جايه والا ...
مشاعل : لا بتجي هو مو زواج طلال بس كمان زواجي والله لو ماتجي امصع رقبتها
ريم : بس اكيد بيكون صعب عليها
مشاعل : الهنوف على قولتها بتتناسى إحساسها وبتضغط على نفسها وبتجي
/
/
الهنـوف مجروحــة وينزف قلبهــا .. تمنت بأول حبها انها تكون عروس هاليوم بس القدر مشى عكس ماتمنت .. وحال طلال ماكان احسن منهــا .. طلال جسد بلا روح .. خلاص روحــه سرقتها الهنوف ..
اما فيصل وده يرقص من الفرح واخيرا" بيرتبط بحب حياتــه .. مشاعل ..
/
بالليل .. وبصاله الحريــم ..
بغرفــه العروس ..
مشاعل وصلــت قبل اشواق .. وجلست بالغرفــه لحين ماتبدأ زفتها وتدخل .. ومعاها الهنوف وريم وحنان .
الهنوف على الرغــم من بساطة منظرهــا الا انها بجانب مشاعل الي كانت ملكة بهالليلة احلى بكثير ..
الهنوف : اقووول مشاعل ياحظ فيصل بس
مشاعل : ليه ؟
الهنوف بغمزه : بياخذ القمــر
مشاعل بحياء : يوووه يالهنوف ياحبك للاحراج
ريم : هههههه ياعيني على الي تستحي
حنان : الا وينها العروس الثانية ؟
ريم : لسى ماوصلــت
مشاعل : تصدقون آخر شي توقعته اني اتزوج معاها بيوم واحــد
الهنوف كانــت معاهم وتسمــع ومع كل حرف تتقطع بداخلها مليوون مره ..
/
/
بصــالة الرجال ..
فيصل وطلال مع اهلهم واقفين ويسلمون على المعازيــم .. فيصل لاحظ ان طلال مكشر ..
فيصل : يا اخي شحط خدودك بلاها العالم تدري عن الخافي والا اشحطهم لك مثل الملكة
طلال : صدقني احاول بس حتى خدودي عجزت لا ترسم البسمه من الضيق
فيصل بعد هالكلمه اكتفى بنظرات اسى على حال طلال .. مافي كلمـه بقواميس العالم توصف حزن طلال وضيقــه .. مافي اصعب من ان مصيرك يرتبط بإنسان ماتوده وتنحرمـ من حبـــك ..
/
/
بعــد فترة ..
وصلــت اشواق وبدت زفتهـــا ,, اشواق وهي تمشي عالممر الهنوف تطالعهــا بحسره والم .. فجأة دارت اشواق وجهها للمعازيم وتلاقت العين ..و قرأت فيها الهنوف كرههــا لها ..
بعدهـا بدت زفة مشاعل الي كانت تمشي عالممر وهي تحس نفسها طايرة .. واخيرا" يافيصل بنجتمــع ببيت واحـــد ..
مضت الليله على خير .. وتوجهوا طلال واشواق للمطار .. الهنوف من طلعت من الصاله .. وهي دموعهــا مانشفت لحد ماوصلت البيت .. صعدت غرفتها قفلت على نفسها الباب .. وحضنت مخدتهــا .. بكت ونادتـه لحد ماغلبها النوم ..
وكأن طلال حس بلي تعانيــه قدر يختفي عن عيون مشاعل دقيقه بالمطار ودق عليهــا بس لا مجيب .. ورد بخيبة امـــل ..
/
/

[دنيا الأحلام]

بعـد اسبــوع ..
حنان متألمه لحال الهنوف ..
حنان : كيفك الحين ؟
الهنوف : بخير
حنان : وجهك يقول العكس
الهنوف : خلي وجهي بحاله وقولي لي استعديتي للدوام بالجامعه
حنان : ايه استعديت وخلصت تدرين احسن شي ان مشاعل ماسافرت
الهنوف : صدق الوناسه ماتكتمل الا فيها ..
/
/
بأول ايام الدراســه ..
مــــــاجد ينادي : الهنوف بدور ماخلصتوو ؟؟
الهنوف وهي نازله عالدرج : خلصنــا
ماجد : وينها بدور؟
الهنوف : جايه وراي
ماجد : اوكي مشينا
بالسيـــــــــارة ..
ماجد يكلم الهنوف : اذا خلصتي محاضراتك دقي علي اجي آخذك
الهنوف : إن شاء الله
بدور : وانا طيب والا بس علشانها بالجامعه
ماجد : ههههههه خلاص ولا يهمــك امرك كمان كم بدور عندي انا
الهنوف تطالع بأخوهــا ..
ماجد : خير يالهنوف ؟
الهنوف : الله يخليك لنا ولا يحرمنا منك
ماجد ببتسامه بان الحنان فيها : ويخليكم لي يارب
وصل خواتــه لدواماتهــم .. وتوجـه للمكتــب .. الطريق مزحوم .. واصوات البوراي ماليه المكـــان .. قرر انه يطلع من هالطريق ويسلك طريق ثانـــــــي
وهو يلــف طاح مفتاح المكتب تحت رجلينــه .. انحنى يبي ياخذه وما انتبــه للسيارة الي كانت تدخل بالطريق .. و ..................................
التمــوا الناس على مكان الحادث .. وجات سيارات الشرطة والاسعاف بسرعــة بس المــوت كــــــــان اسرع ....... لمــــــــــــــــــــاجد .........
/
على نهاية الدوام ..
مشاعل : شفيك يالهنوف ؟
الهنوف بقلق : ادق على ماجد جواله مقفوول مدري وش فيه
مشاعل : طيب تعالي معي اوصلك وإن شاء الله مافيه الا الخير
الهنوف : إن شاء الله بس اخاف يجي ومايلقاني
مشاعل : ماعليك نبلغ البواب يخبره انك طلعتي معاي
/
/
بالبيـــــــــــت ..
ام ماجد كانت تجهز الغداء على رجعة اولادهـــــا .. بدور وصلت وباقي الهنوف وماجد الي على وصــول
دق التلفون وردت بدور ..
ام ماجد من داخل المطبخ : بدور مين الي بالتلفون ؟
بدور : رجال يمه
ام ماجد : عطيني بشوف مين ..
اخذت السمــاعه ..
ام ماجد : وعليكم السلام , ايه هذا بيته , وشو لا اكيد غلطان ولدي ماجد على وصول بس بيجيب اخته من الجامعه ..
الا بدخلــة الهنوف ..
ام ماجد : كاهي الهنوف وصلت واكيد ماجد معاها الهنوف ماجد معاكِ صح ؟
الهنوف : صارلي اكثر من ساعه ادق عليه جواله مقفول وش صاير يمه
ام ماجد صرخت بلا شعور : يمه وليدي
/
/
بالمستشفـــــــــــى.,,
ام ماجد والهنوف منصدمين .. ينتظرون الضابط يسمح لهم يدخلون لاجل يتعرفون على الشخص اذا كان ماجد والا لا .. الهنوف رافضــة بداخلها فكره ا نالي داخل ماجد ..
الضابط : تقدرون تدخلون ..
دخلت ام ماجد مع الهنوف واول ما انسحب الغطاء وانكشف وجه الشخص .. طاحت ام ماجد .. واصرخت الهنوف : لااااااااااااااااااااااااااااااااااا ماجد
ام ماجد طاحت طيحة قوية وحطوهــا بالعناية الفائقــة .. اما الهنوف غابت عن الوعي .. لما صخت لقت حنان وبدور جنبهــــــا والدموع مغرقتهمـ ..
الهنوف بحاله هستيرية : تكفين ياحنان قولي لي انه حلم .. ماجد لسى بالمكتب صح ينتظرني اخلص دوامي وبيمرني .. لسى بالمكتب
حنان انفطر قلبهــا لحال الهنوف .. الي انهارت نفسيتها وغاب وعيها ..
حنان بالم ودموع : اذكري الله يالهنوف
بدور بدموعها قربت من الهنوف : الهنوف صحيح اخونا ماجد مات
الهنوف بعصبيه : لا بسم الله عليه ماجد لسى بالمكتب ينتظرني اخلص دوامي ويمرني علشان نروح البيت نتغدى امي تجهزه
وسكتت كأنها تتذكر شي وقالت : امي وينها امي وينها
قامت وطلعت من الغرفـه ولحقتها حنان وبدور .. منعهــا الدكتور من شوفتها لان الهنوف ماكانت بوعيهـــــــا .. بس ترجته حنان يخليها تدخــل ..
دخلت وجلست جنب سرير امهــــا الي كانت الاجهزة مقيدتهــا .. مسكت يدهـا وبكت .. جلست تخاطبها وتكلمها علها تسمعهــا وترد ..
الهنوف بدموع : حاكيني يمــه قومي يمه قولي يالهنوف كل هذا حلم ماجد مامات
سكتت دقيقة وكأنها تنتظر جواب .. بس ماكن يرد عليها غير صوت جهــاز النبض ..
ولما ملــت سكوتهـــــــا نادت وهي تنتحب جنب امهـــــا ,,
الهنوف : طلبتــك يمه تقومين
قومي بعدك مالي معين
راح ماجد يا يمه
وتركني آنا والونين
قومي يمه وحاكيني
ضايعه بعدك سنيني
قومي لا تيتميني
وانا ذقت مر اليتم مرتين
قومي يايمه لا تودي جراحي
نجم الحزن بسما دنيتي لاحي
وخيـم ظلام فقده ولا رحمنــي
سكتت بعدهــا وانتحبت بحرقه والمـ .. فجأة جاءها الصوت الي اعلن رحيــل امها عنها .. صرخــت بعالي الصوت ونادت وهي تنتحب ..
الهنوف : كأنك يمه لعتـــــــــابي مليتي
واعلنتي رحيـــــــــلك عني ولا جيتي
طلبتــك ارجعي ..
جعل لساني القطــع لو لعتابي رديــــت
توجهــت لحنان الي كانت واقفه خلفهــا وتنتحب بصمت ..
الهنوف : حنان قولي لامي ترجع ترى ماعاد اعاتبها بس خليها ترجع
بس الواقــع اقسى بين يوم وليلــه صارت الهنوف وحيده لا اب ولا ام ولا اخوو ..
/
/
بعد اسبـــوع ..
الهنوف اظلمــت عليها دنيتها من بعدهمـ .. اعتزلت كل شي حتى الجامعــه .. تقضي ليلها ونهارهــا بغرفتهــا حاضنة صورهمـ .. تناجيهم وتخاطبهم .. تكلمهم وتعاتبهم بدموعهــــــــا ..
الهنوف وهي تناظر صورة مــاجد وتبكي : رحت ياعزي وسندي وتركتني هانت عليك الهنوف ياماجد هانت عليك
رجعــت ضمت صورة امها مع صورة اخوهــا ونادت بصوت حزنهـا : ليش رحتتوا وتركتوني .. كان وياكم خذيتوني .. وبوسط القبر ضميتوني ..
دخلت عليها حنــان .. لقتها بهالحال .. ركضت عندهـا وضمتها ..
حنان بدموعها : حرام عليك يالهنوف الي تسوينه ارحمي حالك
الهنوف : تدرين ياحنان ماجد كان يبي يخطبك ايه يخطبك كان يبي يسويها مفاجأه لك
حنان بكت بحرقــه ..
الهنوف : ليت الموت ياخذني ويرحني .. خلاص ماعاد بدنيتي شي يستاهل اعيش لاجــله خلاص ماعاد
دخلت بدور وهي تبكي .. بعد ماسمعت كلام الهنوف ..
بدور : اذا رحتي انتي يالهنوف من بيبقى لي
حنان بألم : انا يالهنوف فقدت امي بموتها فقدت ابوي وهو لسى عايش وفقدت الاخ والحبيب ما ابي افقــدك ما ابي افقد اختي ..
بكت الهنوف لكلامهمـ تقربت منهم وضمتهمـ وبكوا مع بعض ..
/
/
ببيت ابو طلال ...
ابو طلال : المشكله انه مالهم احد غير خال ساكن بالاحساء وهو حاليا" معاهم
ام طلال : الله يكون بعونهم
مشاعل حضرت العزاء ووقفت مع الهنوف .. تقطعت بداخلها لحالهـا وبكت معهـا
بس ماحبت تخبر طلال ونبهت ريان وفيصل مايخبرونــه لانه لو درى بيرجع وهو ماكمل شهر وهالشي بيجر مشاكل ماتنتهي ..
/
/



يتبـــــــــــع

[دنيا الأحلام]

خيتو آهات عاشقة


الباقي قريب إن شاء الله


الله يسلمك حبيبتي

يسلمووووووووووووووو

[آهات عاشقه]

متى قريب

الحين بعدين

بعد شوي

مـــــــــــــــتــــــــــــــــــى


بسرعه ابغاش تجيبي اليي كم جزء كذا


يعدلوا المزاج >>> حشى قدو

والله تسلمي يالغاليه

وانا في الانتظار

[دنيا الأحلام]

خيتو آهات عاشقة

الكاتبة بعدها تكتب فيها للحين ماخلصت وكل يومين تحط بارت

جديد..

الله يسلمك غناتي..

يسلمووووووووووووووووووووو

[دنيا الأحلام]

بيــوم ثاني ..
الهنوف ماعندهـا الا خال واحد وساكن بالاحساء .. خالهـا رجال بسيط وعلى قد حاله يالله يعيش عياله الي دوم حامل همهم .. وزاد همــه يو تيتموا بنات اختــه ..ومالهم غيره .. والبخل ابرز صفااته ..
ابو أحمـد : الهنوف ابيكِ تجهزي اغراضك انتي وبدور علشان تجون معاي الاحساء
الهنوف انصدمـت : والجامعــه ياخال ومدرسة بدور؟
ابو أحمد : مو مشكله بدور ننقلهـا للمدرسة القريبه من البيت وانتي ياتفصلين ياتكملين بالاحساء انا المسؤل عنكم الحين وصعب اخليكم
الهنوف تحسـرت على حالهـا بتفارق ديرتهـا وجامعتهــا والاعظم من كذا بيتهــا وذكرياتهــا .. ماكانت تتوقع انها تغادره الا لبيت زوجهــا عروس .. ماطرى عالبال تغادره فاقــده ويتيمــه ..
/
نواف سمــع بخبر وفـاة اخو الهنوف وامها ورجـع للديرة على طول ..
نواف : لا حول ولا قوة الا بالله والحين مين الي معاهم ؟ مين الي متكفل فيهم
سلمى بحزن : على حسب ماسمعت لهم خال ساكن بالاحساء وناوي ياخذهم معه
اقول نواف بعدك لك رغبة بالهنوف .؟.
نواف : لا زالت لي رغبه فيها وزادت بعد هالخبر مالها احــد .. لازم اشوف خالها واكلمه
سلمى : على خير يااخوي
/
/
زارت مشاعل الهنــوف .. وانفجعت يوم شافتهــا صارلها اسبوع بس من آخر مره شافتها وصار شكلها كذا .. الهنوف تغيرت ماعادت الهنوف ..ذابله وشاحبه
مشاعل بدموع تحاول تقاومها : الهنوف ليه كذا تسوين بنفسك مو شايفه شكلك كيف صار .. وربي حرام ترى لا اخوك ولا امك وقبلهم الله سبحانه يرضون بلي تسويه بنفسك ..
الهنوف تمت ساكتــه ..
مشاعل : شفيك يالهنوف .. ليه ماتتكلمين ؟
الهنوف : ماعندي شي اقوله ..
مشاعل بعصبيه : الهنوف شفيك ليه تسوين بنفسك كذا
الهنوف : ماعاد يهم وش اسوي .. حياتي ماعاد لها معنـى
مشاعل : لا حياتك لا زال لها معنى المستقبل قدامــك يالهنوف .. لا تنسين ترى اختك بدور تتعذب اذا شافتك بهالحال , المفروض تكونين سندها وتعاونيها على هالموقف مو تعذبين نفسك وتعذبينها , المسكينه دموعها على خدهــا , بدور محتاجتك يالهنوف راعيها
الهنوف تمزق قلبهــا .. صح بدور تحتاجنــي ماعاد لها غيري خلاص ..
الهنوف بكت غصبا" عليهــا اول مالاح طيف اخوهــا بذهنهــا ..
مشاعل بدموعها : خلاص يكفي يالهنوف لا تقطعين قلبي عليك زود
الهنوف : غصبا" علي تذكرت ماجد يامشاعل تذكرت حنانه وعطفه .. عذبني ذكراه آآآآآآه ليتهم ماراحوا وخلوني .. فقدت الابو والام والاخ وحتى الحبيب
ماعاد لي احــد
مشاعل : لا تقولين كذا عندك بدور وحنان وانــا كلنــا حولك كلنا اهلــك
/
/
دقــت سلمى على بيت الهنوف .. تبي تعرف متى بيغادرون للاحساء علشان اخوها يقدر يكلم خالهم قبل ..
سلمى : دقيت وقالت لي بدور بعد اسبوع متوجهين للاحساء
نواف : بعد اسبوع يعني يبي لي اكلمه قريب
/

[دنيا الأحلام]

ببيت ابو طــلال ..
ام طلال : وشلونك ياوليدي وشلون اشواق عساكم طيبين
طلال : كلنا بخير يمــه انتم وش اخباركم ابوي كيفه ؟
ام طلال : كلنا بخير ناقصنا شوفك ياوليدي متى ناوين ترجعون ؟
طلال بباله : لو الود ودي من اليوم
طلال : باقي لنـا ثلاث ايام وراجعين
ام طلال : الله يعديها على خير وترجعون لنا بالسلامه يارب
/
/
قفل من امــه وهو باله مشغول فيهــا .. محتاج لهــا محتاج يكلمهـــــــا ..
قطعت عليه افكــاره بصوتها . .
اشواق وحاطه يدينها على خصرها : هاه مو ناوي تطلعني اليوم والا كالعاده حبسه
طلال بقرف : مالي خلق اطلع تبين تطلعين اطلعي بحالك .. كأن من زين الطلعه معاك
قال هالكلمـه وطلع من الشقــه ..
عضت شفايفها قهر وقالت ,,
اشواق : يصير خير ان ماعلمت امي على سواياك فيني هين
/
طلع يتجول بالشوارع .. آه يالهنوف ياترى تفكرين فيني مثل ما افكر فيــك ميت ابي اعرف احوالــك .. محتــــــــاجك .. ادق عليــك جوالك مقفول ولا سئلت مشاعل ماتعطيني لا حق ولا باطل ..
كيف دنياك يالهنوف من بعــدي ..
/
بجهـة ثانية ..
الهنوف دنياها من بعــدك ياطلال مظلمــة كئيبــه .. ياترى ليه ماسئلت عني ليه تاركني .. ماوصــلك الخبر الهنوف اتوحدت وتيتمت ..
/
بيـوم ثاني ..
ام نواف : هاه ياوليدي خلاص نويت تبي تروح تكلمهم اليوم
نواف : ايه يمه بمرهم عقب صلاة العصر
ام نواف : على خير إن شاء الله
سلمى : الحين نفترض انه وافق خالها ووافقت ياترى اختها بتاخذها تعيش معكم
نواف : اكيد هي مالها الا اختها ولو طلبت مني هالطلب ماراح ارفض و افرق بينهم
/
/
ببيت الهنوف ..
الهنـوف كانت بالمطبــخ تحضر للغداء .. صحيح ماكان طبخها ذاك الزود بس على الاقل تعرف ..
جهزت الغداء .. وجلست وهاجمتها الذكريـات من جديد .. جالت بنظرها بالمطبخ .. ودمعه عانقت خدهــا .. وهي تسترجع مواقف امهــا بالمطبخ .. آه يمه ليه رحتي وتركتيني ..
بدور : الهنوف يقولك خالي الغداء جاهز ؟
الهنوف رجعت لواقعها : هاه ايه جاهز الحين بحطه ..
/
/
طلال طفش يدق على الهنوف وجوالها مقفوول .. واذا سئل مشاعل ماتعطيه لا حق ولا باطل .. حاس قلبه ان فيه شي مو مرتاح ..
ماله الا فيصل ..
فيصل : هلا والله هلا بطلوووول
طلال : هلا بك فصووول
فيصل : ههههههه اخبارك ؟؟
طلال : الحمدلله انتم اخباركم ؟
فيصل : كلنا طيبين وش اخبار السفر معكم
طلال : ضايق البال
فيصل : افااا في احد يروووح لندن ويضيق باله بلاهـا راحت علينا من اختك الله يصلحها
طلال : ههههههه هذا الي باطك انك ماسافرت
فيصل : هههههههه تقدر تقووول
طلال : بسئلك فيصل
فيصل : سم
طلال : سم الله عدوينك بسئلك واترجاك واحلفك بالله تجاوبني صدق ولا تكذب علي
فيصل : افااا ليه ياطلال متعود اني اكذب عليك
طلال : حاشاك لا والله بس دايم اسئل مشاعل عن الهنوف احسها تتهرب من شي الهنوف فيها شي ؟؟ ..
فيصل ارتبك ماعرف وش يقوول .. مايقدر يعلم طلال مشاعل منبهه عليه مليون مره مايقووول ..
طلال : شفيك سكت اسئلك انا
فيصل بتردد : هاه لا ماسكت الهنوف بخير وبعدين ليه جاي تسئلني انا وش دراني عن الهنوف
طلال : ترددك وسكوتك يكدولي انك مخبين علي شي .. حلفتك بالله يافيصل تعلمني
فيصل : بس ....
قاطعه طلال ..
طلال : فيصل ترى حلفتك بالله
فيصل ماله حل ثاني غير انه يخبره .. على الاقل الحقيقة المره افضل من الكذب ..
فيصل : اوكي بقولك وامري لله ويعيني الله على اختك مشاعل لا درت اني خبرتك
طلال زاد خوفه : تكلم بسرعه وش صاير ؟
فيصل حكـى لطلال كل شي .. ومع كل كلمــه تقطع بداخله على صاحبه وصديقه ماجد وحبيبته الهنوف ..
طلال بتأثر وانفعال : وليه ماقلتوا لي .. صاحبي واخوي توفى صار له اكثر من اسبوعين وانا آخر من يعلم ليه كذا
فيصل : ماحبينا نخبرك لانك لو دريت بترجع على طوول وانت لسى ماكملت شهر
طلال بعصبية : وشو ما حبيتوا تخبروني بكره بعد لا مات احد من اهلي قولوا ماحبيتوا تخبروني وعن المشاكل ومن هالكلام هذا صاحبي تفهم يافيصل والا لا
فيصل : اذكر الله ياطلال
طلال حاول يهدى : لا حول ولا قوة الا بالله
فيصل : تكفى ياطلال هذا انت عرفت .. بس اترجاك واذا لي خاطر عندك كمل هاليومين بعدها ارجع , اقطع حبل المشاكل مع زوجتك وانا اخوك..
طلال : إن شاء الله
/