/
/
بيــوم ثاني ..
سافرت حنان مع اهلها بعد وداع مع الهنوف وبدور ماخلى من الدموع ..
وبنفس اليــوم .. نزلت ام مشاري للشرقيــة بعد الحاح على ابو مشاري الي كان يطلبها تأجل الموضوع لبعد اسبوع علشان يقدر ينزل معهــا ويتطمن بدوره على بنته اشواق ..
وصلــت ام مشاري لبيت اخوهــا وهي تشتعل بداخلها ..
ام طلال : ام مشاري هلا والله وش سر هالزيارة المفاجئة ..
ام مشاري بعصبية مكتومة : بيت اخوي واجي وقت ما احب والا بتمنعوني بعد
ام طلال باستغراب : لا وش نمنعك البيت بيتك يا ام مشاري حياك باي وقت
ام مشاري : تسلمين ممكن تنادي لي ولدك طلال ..
ام طلال بخوف : طلال ليه ؟
ام مشاري : ابيه بكلمة
جـاءها الصوت ..
طلال وهو نازل : خير عمتي ؟؟
ام مشاري : عمتـــك الحمدلله بعدك معترف فيني ..
طلال : خير ياعمه وش الي حاصل ؟
طلال متأكد ان عمته وصل لها خبر هوشته مع اشواق وعلشان كذا طابه عليهم وهي شوي وتنفجر ..
ام مشاري : اسمع ياطلال انا لما زوجتك بنتي وصاتي كانت انك تحفظها وتصونها تحبها وتراعيها تدللها وتخاف عليها مو تهينها وتذلهــا والا علشان اني بمكان وبنتي بمكان قلت العب واشتغل مهانة فيها ..
طلال : عمتي بنتك هي الي جبرتني على هالشي وصلت فيها الجراه انها تشتمني وتجردني من الرجوله
ام مشاري : ماعليها لوم دامها تشوف وحش ماهمه الا الاهانة وضربها وش تبيها تقول طلال مافيه زيه رجال والنعم
طلال بقهر : عمتي انتي على عيني وعلى راسي بس رجاء" عن الغلط
ام مشاري وصلت حدها : الله اكبر تعلمني وش الغلط بعد ياولد اخوي
وفجأة ..
ابو طلال : وش صاير خير اصواتكم واصله الشارع .. والتفت لاخته ام مشاري
سعاد انتي هنــا ؟؟
ام مشاري : تعال يا اخوي شوف ولدك الي قام يعلمني الصح من الغلط
ابو طلال : طلال
طلال : نعم يبه ؟
ابو طلال : وشفيك مع عمتك ؟؟
ام مشاري : بعد اذنك يا اخوي خلني انا اتكلم ابنــك الرجال طايح إهانات ببنتي بعد ماحرمها من حقوقها وما كتفى بكذا قام يمد يده عليها ومنعها من الطلعه ..
ابوطلال ولعت نار داخله ,, وطلال ساكت وعيونه على عمتــه الي نشوة الانتصار بدت تسري فيها .. واشواق الي كانت واقفه عالدرج تسمع وتشوف والابتسامة شاقه وجهها .. اخيرا" ياطلال بآخذ حقي وبعلمــك مين تكون اشواق
ابوطلال : صحيح كلام عمتـك ؟؟
طلال اكتفى بالسكوت .. وام طلال قلبها شوي ويطيح على ولدهــا .. الله لا يوفقك يا سعاد لا انتي ولا بنتك ..
ابو طلال بصرخة هزت البيت : انطق صحيح والا لا ؟
طلال بقهر مكبوت : صحيح يبه .. بس الي قالته عمتي حقيقة ناقصـة ماخبرتها بنتها عن إهاناتها لي وعن طلعــاتها الي من الصباح لاخر الليل وزوجها غافل
ماخبرتها ان الكف الي ذاقته مني بعد ماغلطت علي لاني عصبت عليها بسبب رجعتها المتأخرة للبيت والي لا الدين والا العادات ولا حتى انت يبه ترضاها
ام مشاري تبي تفتح باب جديد قبل لا يصير الحق على بنتها ..
ام مشاري : ليتك اكتفيت بضربها وإهانتها الا قمت تهيني بعد
ابو طلال بصدمه : وشو ؟
ام مشاري : الي سمعته يا اخوي .. ابنك قام يشتمني ويقول اني ماعرفت اربي وانه ناوي يربي بنتي من جديد
ابو طلال اقترب من طلال اكثر وصرخ فيه : هذا الي ربيتك عليه .. هذا الي علمتك ياه تغلط على اهلــك وتنفي احترامهم
طلال ناظر ابوه : لا مو هذا الي علمتني يبه .. واذا كنت غلطت فأنا مجبور بنتها ماخلت فيني عقل .. وعمتي صارت تزود السالفه ..
ابو طلال : ياولد لا تنسى انها عمتــك ؟؟
طلال : لا ماراح انسى بس لا تنسى يبه اني انا بعد ولدك الي اختك وبنتها جردوه من الرجوله وهو رباتــك وسندك ,,
قال هالكلمة وطلــع .. ترك ابوه بحيرة مايدري يحط اللوم على مين ..
ام طلال بكت بصمت وهي تشوف منظر طلال الي طلع مقهور .. ركضت لعند ريان الي كان واقف بعيد وترجته يلحق اخوه ..
ام مشاري تسوي نفسها متندمه ومتالمه لحال اخوها : سامحني يا اخوي بس ولدك ماترك لي حيله ..
ابو طلال يبي بس يهدي الوضع : حصل خير يالغالية ومايصير خاطرك الا طيب ..
/
/
طلــع وبداخله قهر يحرق ديرة .. ماطرى بباله غيـرها محتاجهــا بعد الله سبحانه وتعالى .. محتاج يشكي لهــا .. محتاج تضمه .... قرر يرجع لشقته او بالاحرى مملكته الجديده .. ولاميرته وحبه .. بعد ماطمن اخوه ريان انه راح يكون بخير .. وطلبه يرجع للبيت ويطمن امه ..
دخل للشقــة ولقــاها نايمــة عالكنبــة .. قفل الباب وراه بهدوء واقترب منهــا
جلس جنبها .. واخذ يمرر اصابعه على خدهــا الي يذكره بنعومة الــورد ..
حست فيه وصحت .. اول ماناظرته ابتسمت ..
الهنوف : طلال انت جيت
طلال : جيت يابعد عمر طلال شفيك ياقلبي نايمة هنـا
الهنوف : كنت انتظرك ..
طلال : ما اذكر اني قلت لك راجع الساعه كم
الهنوف ببتسامة : إحساسي خبرني ..
طلال : فديتك وفديت احساسك .. وينها بدور نامت
الهنوف : ايوه من زمان
طلال : اجل قومي بحملــك
الهنوف : تحملني وين ؟؟
طلال : للمطبخ تصدقين , يعني لوين بحملك اكيد لغرفة النوم
الهنوف : ليش ؟
طلال : يووه علشان تكملين نومــك
الهنوف : بس ؟
طلال ضحكـ على اسلوبها ..
طلال : قومي احملك الحين وبعدها نتفاهمـ على الباقي ..
استرخت الهنوف وجاء وحملها .. وطوقت رقبته بيديها ..
طلال : وووي توي ادري انك دبدوبة كذا
الهنوف : طلال
طلال : ههههههه خلاص آسفين يالنحيفة
مع الهنــوف طلال نسى المـه وقهره .. ولا كأن شي صار .. مجرد شوفتها بس تبعد همومه واحزانه .. يصير معها انسان ثاني .. انسان السعاده ترفرف فوقه .. والابتسامة دوم على ثغره .. انسان كله حيــاة ..
/
/