/
/
طلــع وكله امــل يرجع والهنوف له ..
وصل لبيت الهنوف .. ماقدر ينتظر لليل لازم يكلمه الحين لازم ينهي الشي .. يبي يرتاح ..
دق الجرس ..
طلع له رجال غزى شعره الشيب ممتلي شوي .. توقع انه خال الهنوف ..
طلال : السلام عليكم
ابو احمد : وعليكم السلام
طلال : الاخ ابو احمد
ابو احمد : نعم آمر؟؟
طلال : مايامر عليك ظالم انا جايك وابي اتكلم معك بموضوع خاص بعد اذنك
ابو احمد : موضوع خاص تفضل داخل ونتكلم ..
دخله لمجلس الرجال ....
ابو احمد : ممكن تخبرني بالموضوع الخاص ؟
طلال : انا ياخال بدخل بالموضوع على طول وبدون اية مقدمات انا سمعت بخبر خطوبة الاخت الهنوف وبصراحـة ضايقني
ابو احمد باستغراب : ضايقك ؟؟
طلال : ايه ضايقني ياخال انا كنت حاط عيني عالهنوف من حياة اخوي ماجد الله يرحمه وكنت منتظر تتحسن ظروفي واتقدم لها .. بس للاسف ظروفي زادت سوء بزواجي من بنت عمي الي انجبرت ارتبط فيها غصب دون ادنى رغبة مني ..
وكنت مخطط بداخلي اذا ما استقر لي حال معها بطلقها .. وبآخذ الهنوف .. الي كلي ثقة بتكون الشريكة الي احلم فيها .. بس لما سمعت خبر خطبتها انصدمت وتضايقت .. وانا جايك الحين اطلبها منك ..
ابو احمد كان مصغي لكل كلمــة وبدون مايقولها طلال عرف انه حبها ويبيها ..
ابو احمد : بس انت متزوج ؟؟
طلال : الشرع محلل لي اربع ياخال وسبق وقلت لك اني بزواجي الاولي مجبور
ابو احمد : بس خلاص حنا اتفقنا مع الرجال ؟؟
طلال : تقدر تدور أي حجة وتتراجع
ابو احمد : ما اظنها تكون حلوة بحقي وانا اعطيت الرجل كلمة وحددنا المهر
طلال بإصرار : ابعطيك ضعف المهر وازود بس الهنوف لا تاخذه
طلال دق على الوتر الحساس لابو احمد ( الفلوس ) ..
ابواحمد بباله : مئتين الف تصير اربعمئة الف ويمكن ازود .. آخ ليت الهنوف بنتي
ابو احمد : خلاص انا اكلم البنت واطلب رايها .. والي تقوله يمشي .. اذا كان لها رغبة فيك فالله يهنيكم واذا لا كل شي قسمة ونصيب ..
طلال : صار
/
/
قريب آذان الظهر ..
رجع طلال .. وهو كله امــل من بعد كلمة خال الهنوف .. يارب تكون من نصيبي
دخل البيت وابو طلال وام طلال مع اشواق جالسين بالصاله ..
طلال : السلام عليكم
الكل : وعليكم السلام
ابو طلال : تقول امك طلعتك من الصباح فيصل قال انك مامريته وين اختفيت ؟
طلال : كان عندي شغل خاص خلصته ورجعت
ابو طلال : اها شغل خاص .. ومن متى كانت فيه خصوصيات بينا بالشغل ..
طلال : الشغل الي خلصته ماله علاقة بشغلي الاساسي ..
ابو طلال : طيب .. اقول مو ناوي على شي يعني مو ناوي تجيب لنا طفل يملي علينا البيت والا مثل اختك مشاعل وزوجها مأجلين الموضوع
اشواق ناظرت بطلال نظرات فوز وكأنها لقت الخيط الي تروي فيه غليلها من طلال وتوها بتتكلم .. قاطعها طلال ..
طلال : ايه مأجلين الموضوع ماصار لنا شي من تزوجنا بدري على وجع الراس وقلة النوم
اشواق انقهرت بداخها تمنت لو يدري خالها عن المخفي ..
ناظر ابو طلال لاشوا ق الي كانت ساكتة
ابو طلال ببتسامه : اخاف بس اشواق ودها بطفل وانت جابرها بكلامك ؟
طلال ارتبك وام طلال تغير لونها .. تعرف اشواق ملسونة ويمكن تخرب الموضوع بدقيقة وتقلب البيت لمعركة ..
اشواق ببتسامة مصطنعه ماتخلى من الخبث : لا ياخال مو جابرني انا الي يريح طلال يريحني
طلال الي كان متوقع انها تبوح بكل شي وتعلم عليه اندهش من كلامهــا بس كان متاكد ان فيه شي ببالها والخبث لزيمه ..
ابو طلال : والله كفو ببنيتي اشواق هذا قول المراه السنعه ..
اشواق تحس نفسها منتصرة بس تمنت يكون الانتصار بشكل ثاني : تسلم لي الله يخليك لنا
ابو طلال : يالله اذن للصلاة .. نروح المسجد ياطلال؟
طلال : اكيد يبه يالله مشينا
/
/
رجعت الهنوف من الجامعــة وتحس بتعب ..
استقبلها خالها الي كان ينتظرها بالصاله ..
الهنوف : السلام عليكم
ابو احمد : وعليكم السلام
الهنوف : كيفك ياخال ؟
ابو احمد : بخير انتي كيف يومك ؟
الهنوف استغربت السؤال مو بالعاده يسئلني : تعب بالجامعه مثل كل يوم ..
ابو احمد : الله يقويك ..
الهنوف : تسلم ياخال
ابو احمد : اقول يالهنوف اليوم جاني رجال وطلبك مني ؟؟
الهنوف منصدمه : طلبني منك ؟؟ لكن كيف وانا ....
قاطعها
ابو احمد: عارف انك انخطبتي وملكتك يوم الخميس بس هالرجال يقول انه من حياة اخوك ماجد وده فيك وانصدم يوم سمع بخبر خطبتك وبيدفع الي نبي بس تكونين زوجته
الهنوف : ومين هالرجال ؟
ابو احمد : طلال ال..........
اشهقت الهنوف .. ماتوقعت طلال يسويها ويتقدم لها ..
الهنوف : بس هو متزوج ؟؟
ابو احمد : مايضر دام الولد راغب فيك على سنة الله ورسوله والشرع محلل له اربع وغير كذا مو مرتاح مع زوجته ..
الهنوف ظلت ساكته تحاول تستوعب طلب طلال الي ماتوقعته .. كثر ماتوقعت ينفذ تهديده لها ..
ابو احمد : اسمعي ترى ملكتك بكرى ومافي وقت تفكرين فيه من الان اعطيني جوابك مين تبين فيهم ولا تنسين الي اسمه طلال بيدفع لك ضعف مهرك من نواف
الهنوف ببالها : هذا الي هامك ياخال الفلوس وبس
الهنوف : لا ماراح افكر كثير بس ممكن اصعد لغرفتي واختلي بنفسي شوي
ابو احمد : تقدرين بس ما ابيك تنزلين الا وانتي متخذه قرارك
الهنوف : إن شاء الله
صعدت لغرفتها .. محتــارة بتقتلها الحيره .. من اول مانبض قلبي بحب طلال وانا امنية اكون له ويكون لي .. انتظر اليوم الي انزف له عروس وهو عريسي .. ماتوقعت يجي هاليوم وانا بمثل هالظروف وهو مرتبط غيري ..
ياترى لو تراجعت عن نواف الرجل الطيب الي ماهان عليه وحدتي وقبلت بطلال حبي الاولي والاخير والي مستعد يضحي بحياته علشاني وش بيكون موقفي من نواف ..
/
/
بجهة ثانية
ام طلال انتظرت بنتها مشاعل ترجع من الجامعه .. وتعرف منها الموضوع .. موضوع البنت الي عذبت طلال وغيرته ..
ام طلال : اخبارك يابنيتي ؟
مشاعل : بخير يمه انتم اخباركم واخبار اخواني طلال وريان ؟
ام طلال : كلهم بخير يمه .. اقول مشاعل
مشاعل : آمري يالغالية ؟
ام طلال : انتي كنتي دارية ان طلال يحب قبل لا ياخذ اشواق
مشاعل ارتبكت : هاه من وين دريتي يمه ؟
ام طلال : هو الي قالي
مشاعل : طلال قالك
ام طلال : ايه بس ماعلمني مين تكون واكيد انتي تعرفينها طلال مايخبي عليك شي
مشاعل : وليه تبين تعرفينها يمه ؟
ام طلال : ابي اعرف مين الي قدرت تسلب عقل طلال وقلبه وتغيره بهالشكل
مشاعل : بس الي سلبت عقله وقلبها خلاص ملكتها يوم الخميس على غيره
ام طلال : صدق ومين هي ؟
مشاعل : صاحبتي الهنوف ..
ام طلال : الهنوف ال ......... ماغيرها
مشاعل : ايه هي مو غيرها
ام طلال : ومين الي متقدم لها ؟؟
مشاعل : والله مدري انا متزاعله مع البنت بسبب شغله صارت بالجامعه ولا مداني اعرف اسم الشخص الي تقدم لها بس على حسب ماسمعت كان صديق لاخوها الله يرحمه
ام طلال : اهــااا الله يوفقهم إن شاء الله ..
/
/
طلال من بعد مارجع من المسـجد صعد غرفتــه .. رمى بنفسه عالسرير وتنهد تنهيده قوية .. كلها شووووووق وووله للهنوف ..
طلال بباله : اكيد الحين رجعت من الجامعه وكلمها خالها ياترى هل بتوافق وتفسخ خطبتها والا تصر على رايها وتكابر .. والله اذا اصرت على رايها لانفذ الحلف ...
/
/
حنان : فرصتك وجاتك لحد عندك ليه تضيعيها ؟؟
الهنوف : بس على حساب نواف .. ؟؟ ..
حنان : نواف بيقدر وضعك وبيتفهم والله يرزقه ببنت الحلال الي تسعده وتحبه هاه وش قلتي ؟؟
الهنوف : مدري احترت احترت احترت ..
حنان : مافي مجال للحيرة الحين .. لازم تتخذين قرارك ..
اسكتت الهنوف وغرقت بافكارها لازم تخير نفسها وتتخذ قرارها
/
/
اما خال الهنوف .. بدون لا ينتظرها تبدي رايها .. دق على نواف وخبره برفض الهنوف وتراجعها واسفه لعدم تحقيق مبتغاه في ان الهنوف تكون زوجته .. انصدم نواف وانشلت افكاره كيف وهي كانت موافقة وحتى المهر تحدد .. ماعاد يحس باي شي حوله .. احلامه بالهنوف كلها تحطمت قدامه ..
نزل للصاله يشوف الدنيا سواد من بعد مكالمة خال الهنوف ..
ام نواف لاحظت تغير ولدهــا : خير يمه شفيك ؟
سلمى : الوانك متغيره يا اخوي ؟؟
ام نواف : نواف زوج اختك فيه شي ؟؟
سلمى قلقلت اكثر ..
نواف تنهد تنهيده حاره : لا مابه الا الخير بس الخطوبة انفسخت
ام نواف وسلمى بصوت واحد وبصدمه : ليش ؟
نواف بيأس : مدري اتصل علي خالها وبلغني يقول انها تراجعت ليش مدري
ام نواف حزينة لحال ولدهــا .. وسلمى حزنها اكبر وهي تعرف قدر الهنوف عند نواف ورغبته فيها ..
ام نواف : لا تحزن ياوليدي ولا تشيل ببالك وربي لا خطب لك احلى واخلق منها
نواف : دخيلك يمه سكري الموضوع هذا نهائيا" والزواج انسيه عن اذنك
قال هالكلام وصعد لغرفته .. كان عنده معاينة بالمستشفى واعتذر عنها .. اكتفى بالجلوس بغرفته والغرق بافكاره يحاول يلملم شتاته وحطام احلامه فيها ..
/
/

خال الهنوف بباله : الي يدفع اكثر يكسب ..
نادى على الهنوف الي كانت بغرفتها ..
ابو احمد : الهنوف
الهنوف : جاية ياخال
ابو احمد : اتخذتي قرارك والا لا ؟
الهنوف : بصراحة ياخال محتارة
ابو احمد : حيرتك مالها داعي انا دقيت عالرجال وخبرته بان ماله نصيب عندنا وهو تفهم
الهنوف انصدمت : أي رجال فيهم ؟
ابو احمد : نواف ال ........
الهنوف رغم صدمتها حست براحــة كانت متوقعته طلال .. لكن ليه حست بالرحة جلست تساءل نفسها ووعرفت اخيرا" ان قلبهـــا يبي طلال مايبي غيره ..
ابو احمد : عقب شوي بدق عالرجال الثاني وبخبره بموافقتك طبعا" انتي تدرين انه متزوج واحتمال زواجك منه يكون بالسر
الهنوف : عارفة ياخال
ابو احمد : ايه علشان بعدين لا تقولين خالي رماني بجحيم هذا انتي تدرين بالموقف الي راح تحطين نفسك فيه .. بإذن الله موعد الملكة ماراح يتغير بكرى .. ادق عالرجال وابلغه
/
/
صعدت لغرفتها وطيران دقت على حنان .. وخبرتها فرحت لها حنان من قلب .. وفرحت اكثر لما شافت فرح الهنوف الي مافرحته من يوم توفوا اهلها ..
اما طلال لما دق عليه خال الهنوف وبلغه بالموافقة وان الخطوبة السابقه انفسخت
شوي ويرقص من الفرح لو ما الحيا والشنب كان زغرت من فرحته ..
واخيـــــــرا" انتي لي يالهنوف ..
/
/
بعد المغــرب ..
اشواق طلعت مع السواق يوصلها لبيت فاتنة ومن هناك تطلع مع سواق فاتنة لشقة الشباب ..
بالسيارة ..
فاتنة : غريبة تركك تطلعي ؟؟
اشواق : مدري عنه ومن حسن حظي طبعا" والا وش ابي بمقابل وجهه
فاتنة : وربي تضحكون هههههههه
وصلوا للشقــة وكالعادة يزيد ميت على شوفة اشواق .. وباستقبالها ..
يزيد : هلا بعمر يزيد وقلبه
اشواق بدلعها : هلا فيك زيدوو
يزيد : طولتي الغيبة
اشواق : كلها يوم
يزيد : عندي سنة .. الليله ماراح اخليك تطلعين
اشواق : يوه لا زيدوو لا تنسى عندي بيت وزوج مقدر اتاخر
يزيد : اجلسي ولك وعد انسيك زوجك والي خلفووه
اشواق ببالهــا : حسبي الله عليك ياطلال محد بضيعني مع يزيد غيرك .. مقدر اقاوم رغبته ولا اقدر ارفضه ..
يزيد : هاه وش قلتي ؟؟
اشواق : بس مقدر اتاخر ؟؟
يزيد : اوكي ماراح اخليك تتاخرين .. عالخفيف ياقلبي ..
اشواق : اوكي
فاتنة : على وين ؟؟
يزيد : بلا لقافة
فاتنة : افاااا
اشواق ببتسامه : ماعليك منه
فاتنة : وين ماخذك
اشواق : على شقته الخاصة
فاتنة : انهبلتي
اشواق : ايه انهبلت يالله سي يوووو
/
/
ببيت ابو فيصل ..
طلال دق على اخته مشاعل ومن زود فرحته خبرها ووصاها الشي يظل سر بينه وبينهم ( فيصل ومشاعل )
مشاعل : على قد ماني فرحانه له على قد ماني خايفة من ردة فعل ابوي لو درى بيوم
فيصل : مو اكثر من خوفي والله المهم الله يسعده ويسعدها اهم شي نشوفها مرتاح طلال تعذب كثير
مشاعل : والهنوف تعذبت اكثر الله يسعدها
/
/
نوافـ جلس بغرفته وماطلع .. مايقدر ينكر حب الهنوف داخله .. سلبت كل مافيه من اول موقف معها .. حرام ينكسر قلبه ..
وده يفهم سبب رفض الهنوف .. قاتلته الحيرة خايف لا يكون وصلهم شي عنه والا صار شي غير النظرة ..
مسك جواله وابتدا يكتب رساله .. يكتبها بالم .. ارسلها لرقمها الي اخذه من اخته سلمى على اساس خلاص بتصير زوجته وحلاله ..
كانت جالسة بغرفتها غارقة بافكارها عن طلال ..
دق جوالها يعلن عن رساله .. توقعتها من حنان والا طلال .. فتحتها واستغربت من الرقم ..
مكتوب فيها ( ماضرني رفضك كثر ماضرني جهلي للسبب لكن كلمة وحده اقولها الله يوفقك ونواف بالخدمــة متى مالهنوف قلبه احتاجته )
هزتها كلماته واشعرتها بالذنب غمضت عينها وجلست تردد
( سامحني يانواف)
طلال طاير طاير طاير .. خلاص بكرى ملكته على الهنوف بكرى الهنوف تكون زوجته وشريكة حياته .. بكرى الانسانة الي حبها وحبته بتصير جنبه على طوول ومايفرقهم شي الا الموووت ..
/
/
وصلوا لشقتــه .. انتابها الخوف بالبداية .. بس بعدها حست ماله لزمــة .. يزيد يحبها وبيعوضها عن الحنان والحب الي رفض طلال يحسسها فيه ..
يزيد : تو مانورت الشقة
اشواق بدلعها الدايم : منورة بنور زيدو
يزيد جلسها وقرب منها .. مسك يدها وابتدا يشتغل بوس فيها ..
يزيد : صار لي كم وانا انتظر هاللحظة انتظر اللحظة الي يجمعني فيك مكان واحد .. مشتاق لك يا اشواق شوقي ..
اشواق : جد زيدوو
يزيد : جد الجد ياروح زيدوو احبــك احبــك
اشواق بدلع : كافي ترى اذوب
يزيد : يوه لا ذبتي هنا وش يلمك .. قومي لغرفة النوم وعهدا" علي لا اذوبك اكثر ثم المك لحضني ..
/
/

يتبـــع