/
بيـوم ثاني .. بيوم الثلاثاء ..
ام نواف شافـت ولدها نواف طالع ..
ام نواف : هاه رايح ؟؟
نواف : ايه يالغالية دقيت على خالها وهو ينتظرني
سلمى : ماتبينا نروح معـك ؟ ودي اشوف الهنوف واسلم عليها
ام نواف : وانا بعد يعلم الله خاطري اشوفها قبل الملكة
نواف : خلاص تجهزوا على بال ما اشغل السيارة
/
/
ببيت الهنوف ..
ابو احمد : الرجال على وصول ويقول جايب اهله معه يشوفونك خليكِ جاهزة
الهنوف : إن شاء الله ياخال
بدور : الهنوف بتتزوجين وتتركيني ؟
الهنوف ناظرت بأختها نظرات كلها حنان : بتزوج ايه بس بتركك لا
ابتسمت بدور وحضنت الهنــوف .. ورجع الدمع يعانق خدهــا ..
/
/
ببيت ابو طلال .. وبغرفـة طلال ..
طلال كان منسدح عالسرير وغارق بافكاره عن الهنوف .. واشواق جالسة جنب التسريحة تعدل بمكياجها ..
اشواق : اقول طلال
طلال بقرفه المعتاد : نعم
اشواق : ممكن توديني بيت صاحبتي فاتنة ؟
طلال : مو توك معها الامس
اشواق : ايه صح بس انت بتطلع وخالي ومرت خالي طالعين اجلس بلحالي ؟
طلال : الليله عندنا عزيمة ببيت عمي
اشواق : معليش ودني الحين وقريب المغرب تعال خذني
طلال بعدم اهتمام : ماني سواق عندك ولا فيه طلعه
اشواق بقهر : طيب
قربت منـه اشواق وجلست جنبه عالسرير بس كان طلال مغمض عينه و ماتحرك من مكانه .. ظلت جنبه ساكتة وتفكـر ودها تسوي شي بس خايفه من ردة فعلــه تجاهها .. قربت يدها من يده وامسكتها .. طلال على طول وخر يده .. واستوى جالس عالسرير
طلال : خير ؟
اشواق : ابي افهم انت ليه كذا .. ليه كل ماقربت منك وتوددت لك تبعدني
طلال بقساوة : بإختصار لاني ما اطيقك
اشواق : بس انا زوجتـك ومن حقي انك ......
قاطعها طلال : رجاء" لا تفتحين معي الاسطوانة الي امك حفظتها امي علشان تصك راسي فيها .. هذا الي اخترتيه وتحملي الي يجيك
اشواق : لو كنت ادري انك بهالقساوة وهالبرود ما اخذتك كنت افتكرك رجال مثل غيرك
طلال شبت نار بداخله من كلمتها وصرخ فيها
طلال : رجال غصبا" عنك ياعديمة التربية .. واذا مقياس الرجولة عندك بس بالفراش .. دوري رجال غيري
ناظرها بنظرات كلها حقد وكره وقرف .. اخذ شماغه وطلع .. اما هي ماباغتها ندم على كلامهــا وحلفت الا تشتكي عليــه عند امهــا .. >> كالعاده
/
/
ببيت الهنوف ..
نواف وامه واخته وصلوا .. دخل نواف مع خال الهنوف للمجلس علشان يتفاهمون على كل شي ..
ابو أحمد : يعني خلاص الملكة يوم الخميس ؟
نواف : ايه يوم الخميس
ابو احمد : بس كم المهــر ؟؟
نواف : انا حاضر للي الهنوف تطلبه ..
ابو احمد بباله : الهنوف تطلبه لا الي خال الهنوف يطلبه ..
ابو أحمد : خلاص انا اسئل البنت دقيقة عن اذنك
بالصالــة ..
ام نواف : بسم الله ماشاء الله قمر قمر قمر
الهنوف ذابت حياء من تعليقات ام نواف الي من شافتها وهي تسمي وتمدح ..
سلمى : ماقلت لك يمه نواف عرف يختار ..
ام نواف : ايه والله انه عرف يختار جمال ودلال وادب ماشاء الله
الهنوف بحياء وهي مرخية راسها : تسلمين
ناداها خالهــا و استأذنت منهم علشان تشوفه وش يبي ..
ابو احمد : الرجال يسئلك كم تبين مهرك ؟
الهنوف : مهري ؟
ابو احمد : ايه مهرك خلصينا كم تبينه ؟
الهنوف : الشور شورك ياخال
ابو احمد : دام الشور شوري خلاص انا الي بحدده ومهرك مئتين الف ..
الهنوف انصدمت : مو كانه كثير ياخال
ابو احمد : ماهو بكثير .. غيرك مهورهم توصل لفوق المليون ..
الهنوف ما استغربت كلام خالهــا .. تعرفه زين ..
/
/
رجـع خالها لنواف الي كان ينتظر إجابة .,.
ابو احمد : انا سئلت البنت وشاورتها وهي طالبة مئتين الف
نواف انصدم من كبر المبلغ .. صحيح هو مقتدر والهنوف تستاهل بس ما توقع ابدا" يكون المبلغ بهالضخامه ..
نواف : تستاهل الهنوف تستاهل ..
/
/
من بعد المغرب ..
ببيت ابو فيصل ..
ابو فيصل عزم اخوه ابو طلال وعياله على العشــاء وتجمعوا كلهمـ ..
بمجلس الرجـال ..
ابو فيصل : هاه ياريان منت ناوي تساعد ابوك بشغل الشركة والا مثل طلال
ريان : لا عمي إن شاء الله شغلي مع الوالد
ابوطلال كـان مبتسم ويناظر بريان ..
ابوفيصل يبي يمازح ولد اخوه : والله كبرت ياريان اقول ماودك تعرس ؟
ريان ابتسم وطرت على باله .. مانســاها ابد .. يحبها ويبيها .. للحين يذكرها ويذكر شطانتها عليــه .. يذكر لعبهم ومزحهم .. ياآآه متى الوقت يجمعني فيك ياريم ..
طلال وفيصل كانوا جالسين بجهة لوحدهمـ ..
فيصل : والحين وش الي ببالك ؟
طلال : اتزوجهــا
فيصل انصدم : بس انت ..
قاطعه طلال
طلال : ادري متزوج
فيصل : واهلـك ؟
طلال : مابيدرون
فيصل انصدم اكثر من كلام طلال : وش تفكر فيه انت ؟
طلال : اول شي قصر حسك لا تفضحنا ثانيا" ايه بتزوجها بالسر وما اظن الشي غلـط مستعد اسوي شي بس الهنوف لا تاخذ غيري
فيصل : الله يعينا على جنونك والله بتضيعنــا
طلال : صدقني يافيصل ان ما اخذت الهنوف انا الي بضيع ..
/
/
بالصــالة ببيت ابو فيصل ..
ام طلال تساسر بنتها مشاعل : هاه يمة ماسويتي لنا شي ؟؟
مشاعل : افا يمه الا سويت لك الحلى الي تحبينه حلى التمر
ام طلال : يالخبله مو هذا قصدي
مشاعل باستغراب : وش قصدك يمه؟
ام طلال : قصدي مافيك حمال ؟
مشاعل بحياء : لا انا وفيصل مأجلين الموضوع لحد ماخلص دراستي
ام طلال : وجع بتقعدين اربع سنين بدون بزر يملي عليكم البيت وبعدين انا علمي يالرجاجيل يموتون على بال مايشوفون بزرانهم تتراكض وراهم رجلك هذا مدري وش فيه
مشاعل : فيصل متحضر يمه ومقدر وضعي ودراستي ..
ام طلال : ما اقول الا مالت عليكم وعلى هالتحضر
مشاعل ماتت ضحك من كلام امهــا : عندك طلال واشواق خليهم يجيبون لك بزر يسلونك فيه لحد مانقرر انا وفيصل
ام طلال : اخوك طلال اقول خليني ساكته بلاش اخرب العزيمة
مشاعل : ليه وش صاير يمه
ام طلال : وقت ثاني اقولك الحين مرت عمك جاية مانبي فضايح
ام فيصل : هلا والله تو مانور البيت يا ام طلال اسفرت وانورت
ام طلال : منور بنورك يالغالية الله يسلمك
دق جوال اشواق وهي بالصاله معاهم ..
اشواق : عن اذنكم
الكل : اذنك معك
طلعت من الصاله ..
اشواق : هلا فتونة
فاتنة : هلا بك وينك انتي ؟
اشواق : انا ببيت خالي عندنا عزيمة
فاتنة : مو على اساس العصر بتجينا
اشواق : الثور الي عندي مارضى يطلعني
فاتنة : والحل يزيد يبي يشوفك ؟؟
اشواق : قولي له مقدر اليوم .. احاول بكرى
فاتنة : اوكي يالله سي يووو
اشواق : سي يووو
/
/
فيصل : ومتى رايح ؟
طلال : ملكتها الخميس يعني بكرى لازم اكلم خالها ..
فيصل : متأكد من الي راح تسويه ياطلال ؟
طلال : متاكد ونص .. اسوي أي شي بس الهنوف ماتكون لغيري ..
/
/
الهنـوف لا زال تهديد طلال يتردد بمسمعها .. محتارة ماتدري وش تسوي .. حنان خبرت مشاعل بالسالفه حسب ماقالت لها بس للان ماوصلها شي معناه ان طلال مصمم على رائيه ياربي وش اسوي .. الله يهديك ياطلال .. كلما حاولت انهيك من حياتي تجدد الجرح بداخلي ..
/
/
بيــوم ثاني ( الاربعاء ) ..
طلال صحى من الصباح لازم ينهي الموضوع اليوم .. والخميس تكون ملكته على الهنوف مو ملكة غيره ..
ام طلال : صاحي بدري وطالع وين ؟
طلال : عندي كم شغله لازم اخلصها
ام طلال : طلال
طلال : خير يمه ؟
ام طلال : وش سويت مع اشواق
طلال فهم قصدها : ماسويت شي بس يصير خير يمه يالله في امان الله
ام طلال : في امان الكريم
ام طلال لا زالت تذكر كلام ولدهــا عن حبه الي حرموه منــه .. تبي تعرف مين البنت الي سلبت تفكير طلال وغيرته بهالشكل ..
خطرت ببالها مشاعل ..
ام طلال ببالها : ايه مشاعل طلال مايخبي شي عن اخته ..
ركضت للتلفوون .. وقبل لا تدق الرقم ..
ام طلال : يوه نسيت مشاعل الحين بالجامعه خل انتظر لين ترجع .