ببيت ابو فيصل ..
فيصل كان جالس مع ابوه وامه بالصالة .. يشربون شاهي .. وفيصل لقاها فرصة علشان يفاتح ابوه بموضوع خطبته لمشاعل ..
فيصل : اقول ابوي ..
ابو فيصل : آمر وانا ابوك ..
فيصل : انا نويت اتزوج ..
ام فيصل بفرح : صدق يمه ابركها من ساعة .. هاه ومين السعيدة ؟؟
فيصل : بنت عمي مشاعل ..
ابو فيصل فرح باختيار ولده : نعم الاختيار ياولدي ..
ام فيصل : مشاعل ما شاء الله عليها جمال ودلال وأدب .. ويكفي انها بنت عمك
فيصل : ابيك يبه تفاتح عمي بالموضوع ..
ابو فيصل : إن شاء الله ياولدي .. ليلة الخميس بإذن الله نسير عليهم بالبيت وافاتحه بالموضوع ..
ام فيصل : والله وكبرت يافيصل ..
ابو فيصل : اجل تبينه يصغر .!!!
ام فيصل طاحت دمعتها غصبا" عنها ..
فيصل لما شاف دمعة امه : شفيك يمه تبكين ؟؟
ابو فيصل : ههههههههه متأثرة ..
ام فيصل : لا تلومني .. وحيدي وكبر وبشوفه معرس إن شاء الله ..
فيصل : الله لا يحرمني منك يالغالية ..
ام فيصل : ولا يحرمني منك ياوليدي ويحرسك بشبابك قل آمين ..
ابو فيصل وفيصل : آمين
*********************************


بالليــــــل ..
الهنوف كانت جالسة بغرفتها .. عندها إمتحان جغرافيا ((دوري)) .. وجالسة تذاكر .. فجأة دق الجوال .. طالعت الرقم لقته رقم غريب ماتعرفه .. فضلت انها تحقره وماترد .. استمر الرقم يدق ويدق ويدق .. بالاخير قررت ترد وتشوف مين الحمار الي زاعجها ..
الهنوف بتعصيبة : الو خير ..
عبد الرحمن : يؤ أعصابك ياحلو
الهنوف : جعل ما تحلى لك دنيا مين ؟؟
عبد الرحمن : وشلون ماتحلى وانا جالس اسمع صوت القمر
الهنوف : صدق ماتستحي ..
عبد الرحمن : تارك الحيا لك يابعدي ..
الهنوف اشتعلت بداخلها من وقاحته : اقول ياوقح لا ترجع تدق والا مايصير لك طيب
عبد الرحمن : اعصابك يالهنوف ..
الهنوف انصدمت .. من وين يعرف اسمها اصلا" من هو ..
الهنوف : مين انت ؟؟
عبد الرحمن : مستغربة اني اعرف اسمك صح؟؟..
الهنوف : مين انت بسرعة ؟؟
عبد الرحمن : جايك بالكلام , لا تستغربي انا اعرف اسمك واعرف كل شي يخصك .. لا وشايفك بعد , أنا خوي عبد الرحمن سلمان ..
الهنوف : ومنين جايب رقمي ؟؟
عبد الرحمن : خلينا من سالفة منين جايب الرقم , وبعطيك من الاخير انا داق ابي اتعرف عليك .. بالعربي ابيك تكونين خويتي ..
الهنوف : روح دور لك وحده خايسة مثلك تقبل تكون خويتك ..
وتوها بتقفل الجوال بوجهه استوقفها بقوله ..
عبد الرحمن : وإذا قلت لك صورك بتنتشر بكل مكان ..
الهنوف : بقول انك واحد كذاب وسافل وحقير ..
عبد الرحمن : تحسبين يوم نطلبكم تفتشون وجوهكم بالشقة لله كذا , لا علشان آخذ الشي الي يضمن لي الثمن ..
الهنوف باستهزاء : ووشو الثمن إن شاء الله ؟؟
عبد الرحمن : والله لا قابلتك تعرفين وش هالثمن ..
الهنوف : اقابلك باحلامك ..
عبد الرحمن : انصحك تفكري زين ولا تتهوري ..
الهنوف على طول قفلت بوجهه .. دارت فيها الدنيــا وجلست تلعن ببالها الساعة الي وافقت فيها تروح مع حنان ..
رجعت مسكت الجوال ودقت رقم حنان بعصبية ..
حنان : الو الهنوف
الهنوف : ايه الهنوف اسمعي ياحنان انا صدق طلعت معك ذاك اليوم ووافقتك بالشي الي سويتيه بس نصحتك مليون مره وقلت ياحنان لا تسمحي له يمسك عليك شي ..
حنان : الهنوف شفيه وش صاير ؟؟
الهنوف : تسوين نفسك ماتدرين على بالك ما ادري انه انتي الي عطيتيه رقمي ..
حنان : آسفة يالهنوف بس عبد الرحمن هددني بالصور الي تخصني والي بسبب غبائي عطيتها ياه ..
الهنوف : عطيتيه الصور ؟؟!!!!!!!!!!!! شقلت انا ذاك اليوم مو قلت لا تعطيه الا الصور ياحنان الا الصور ..
حنان : شسوي هددني اذا ماعطيته صوري بيتركني على قولته مايتحمل يجلس مع انسان ويحبه مثل السراب حتى صورة وجهه مايعرفها
الهنوف : جعل سراب يمحيه من هالدنيـــا .. يعني قدر السافل الحقير يمسكنا من اليد الي توجعنا .. لا وربي ما اخليه
حنان : عبد الرحمن صعب يالهنوف وإذا ما اخذ الشي الي يبيه بيقلب الدنيا ..
الهنوف : دامك تعرفين انه بهالحقارة ليش ظليتي معاه ليش ؟؟
حنان : الي صار صار يالهنوف ولا تكثري اللوم .. يكفيني مافيني ..
الهنوف : الظاهر البحر الي حذرتك مليون مره من غدره غرقتي فيه ياحنان لا وغرقتيني معك فيه ..
حنان وهي باكية : سامحيني يالهنوف ..
الهنوف : اسامحك ؟!!!! أحكمي علينا بالضياع .. سلام
قفلت الهنوف من حنان .. وهي تحس هموم الدنيــا فوق راسها .. رمت نفسها عالسرير .. وبدت تبكي .. .. ..
باليوم الثاني ..
راحت الهنوف على المدرسة .. وبما انها ماذاكرت بسبب المصيبة الي طاحت فيها هي وحنان ما حلت زين ..
وصاحباتها نوال والبتول لا حظوا تغير الهنوف وشرودها .. وكل ما سئلوها عن السبب .. كان السكوت هو الرد الوحيد ..
اما حنان .. ماداومت .. قفلت على نفسها باب غرفتها .. وغرقت ببحر دموعها تلوم نفسها والظروف الي رمتها بهالمصيبة ..
******************

فيصل كان مبسوط حيل لانه واخيرا" بيرتبط بالانسانة الي حبها من صغره .. بس كان بنفس الوقت خايف ..
خايف من ردة فعل مشاعل وموقفها منه .. فعلشان يستريح طلب من اخته ريم تهاتف مشاعل وتمهد للموضوع ..
مشاعل : هلا والله بريومة .. وينك مختفية ؟؟
ريم : هلا فيك ههههههه لا مختفية ولا شي بس تعرفين مدارس ومن طلع هالنظام الجديد وهم هالكينا بهالامتحانات الدورية ..
مشاعل : ايه وربي صادقة كأنهم ماصدقوا على الله .. إمتحان ورى إمتحان ..
ريم : ههههههههههه شكلك متأزمة ..
مشاعل : ههههههههههه الا متأزمة ونص ..
فيصل كان جالس بجنب ريم .. ولما سمعها طلعت عن الموضوع .. فلصها علشان تنتبه له ..
ريم : آآي

مشاعل : وشفيك ؟؟
ريم : لحظة مشاعل ..
وحطت ريم يدها عالسماعة علشان لا تسمع مشاعل وجلست تكلم فيصل ..
ريم : وجعتني شفيك انت ..؟؟
فيصل بلهفة : آسف ريوم تعرفين اني احبك وماارضى عليك بس لماشفتك طلعتي عن الموضوع انجبرت افلصك , تكفين اسئليها الحين ..
ريم : طيب اصبر شوي اقدم للسؤال .. مايصير اسئلها خبط لصق كذا ..
فيصل : طيب بس عجلي بمقدماتك تكفين ..
ريم : ههههههه طيب ..
ورجعت حطت السماعة بإذنها .. وحاكت مشاعل ..
مشاعل : شفيك قبل شوي ؟؟
ريم : ههههه مافي شي بس خبطت رجلي بالسرير ووجعتني ..
مشاعل : يؤ سلامتك .. ثاني مرة فتحي عيونك هههههههه
ريم : ههههههههه إن شاء الله .. الا بقولك مشاعل ؟؟
مشاعل : سمي ..
ريم : سم الله عدوك .. أنا في وحدة من صاحباتي اخوها يبي يتقدم لبنت عمه وهو يحبها من صغرهم وميت عليها بس هو خايف ترفضه خصوصا" انها ماتعرف بحقيقة مشاعره ناحيتها او يمكن تعرف بس تتجاهله وبصراحة هي طالبتني حل .. وحبيتك تشاركيني بحلها ..
مشاعل كانت مصغية للموضوع زين .. وماحست انها المعنية بالموضوع ابدا"
مشاعل : مافي الا حل واحد ..
ريم : الي هو ؟؟
مشاعل : يصارحها بحبه وبرغبته فيها ..
ريم بفرح : رايك كذا ؟؟
مشاعل : ايه اذا لقاها متقبلة مشاعره ومستعدة انها تبادله نفس المشاعر يتوكلون على الله واذا لقى العكس ..... الله يكون بعونه
ريم : خلاص بدق عليها الحين وبقولها .. مشكورة مشاعل ..
مشاعل : العفو حبيبتي .. ماسويت شي ..
ريم : يالله اشوفك على خير ..
مشاعل : وانتي من اهله .. خلينا نشوفك
ريم : إن شاء الله .. سلام
مشاعل : الله يسلمك
من بعد ماقفلت ريم الخط مع مشاعل التفتت لفيصل وخبرته بكل الي قالته مشاعل واقترحته ..
فيصل : عطيني رقمها ؟؟
ريم : رقم مين ؟؟
فيصل : رقم مشاعل عطيني ياه بسرعة ..
ريم : ليش وش ناوي تسوي ..
فيصل : مو هي اقترحت عليك ان اخو صاحبتك يصارح بنت عمه بحبه لها ..؟؟
ريم : ايه
فيصل : وانتي ماكان قصدك من سؤالك أنا وهي ؟؟
ريم : الا صحيح
فيصل : خلاص انا ابي رقمها علشان اكلمها واصارحها ..
ريم : ماتخاف يامجنون ..
فيصل : قلتيها مجنون وشلون ا خاف ..
*******************************************