بيوم الاربعاء (( ليلة الحفلة )) ..
كل شي كان مرتب ومنسق .. وعلى ذوق مشاعل واختيارها ..مشاعل كانت بهالليلة قمر .. لابسة تنورة جينز قصيرة تحت الركبة بشوي ومطرزة .. وبلوزة وردي مدرج وروعة .. ومكياجها ناعم وكيوت بالمره ..
والحفلة بتبتدي الساعة عشرة بالضبط ..والبنات كلهم وصلوا ماعدى ريم الي تأخرت بسبب اخوها فيصل والي اصر يوصلها بنفسه ..
من بعد ما مر فيصل واخذ اخته علشان يوصلها .. ومن بعد ماوصلوا على باب بيت عمهم .. شافت ريم سيارات كثير ..
ريم : شفت انك اخرتني البنات كلهم هنا
فيصل : متى الحفلة تبتدي ؟؟
ريم : مو اقل من الساعة عشرة
فيصل : طيب الحين الساعة عشرة ونص , يعني كلها نصف ساعة
فتحت الباب ريم علشان تنزل بس فيصل ناداها ..
فيصل : لحظة ريم ...
ومد لها كيس احمر ..
فيصل : وصليه لمشاعل ..
ابتسمت ريم وقالت : يوصل للحبايب ..
ابتسم فيصل بدوره .. دخلت ريم البيت فسخت عبايتها ورتبت نفسها .. الا بجية مشاعل ..
مشاعل : هلا والله وينك جالسين ننتظرك ..
ريم باستها وحضنتها : هلا فيك .. اولا" كل عام والقمر بالف خير
مشاعل : وانتي بالف خير حبيبتي
ريم : ثانيا" فيصل اخرني اصر الا يوصلني بنفسه ..
مشاعل حست بربكة : البنات كلهم ينتظرونك اصروا ما نبتدي بدونك ..
ريم : بعد قلبي والله .. بس قبل لا نروح ..
ومدت لها ريم هديتها : هذي احلى هدية لاحلى مشاعل ..
مشاعل : تسلمين والله جيتك احلى هدية ..
ومدت لها كيس فيصل وغمزت بعيونها : هذا من فيصل ..
مشاعل ارتبكت : مشكور .. ماكان له داعي ..
ريم تر نيابة عن فيصل : العفووو
مشاعل تبي تصرف الموضوع : البنات جالسين بروحهم يالله مشينا
ريم حست فيها : اوكي مشينا
طبعا" بعدها اجتمعوا البنات حول الطاولة الي كانت مفروشة بورد احمر وبوسطها قالب الكيك الكبير الي كان هدية طلال لمشاعل .. غنوا الاغنية المعتادة (( سنة حلوة ياجميل )) <<<< موذاكرتها زين ههههههه
ومسكت مشاعل السكين الي كانت مربوطة بشريطة حمراء وقطعت اول قطعة ..
بعدها قام الرقص وانواع الهبال من البنات وعدت الليلة على خير ..
****************************
فيصل من بعد ماوصل اخته لبيت عمه .. راح للاستراحة الي كان مواعد طلال فيها ..
فيصل وهو داخل : السلام عليكم
طلال : وعليكم السلام .. وينك ابطيت علي ؟؟
فيصل : لا ابطيت ولا شي دوبي وصلت اختي لبيتكم وجيتك على طول
طلال : ................<<< ساكت ويفكر
فيصل : الا اقول خلصت اوراقك مع ماجد ..
طلال : ايه خلصتها رحته اليوم البيت واخذتها .. وليتني مارحت
فيصل استغرب : ليه وش الي حصل ؟؟
وبدى طلال يحكي له الموقف الي صار وشلون طلع من الصدمة ونسى مفاتيحه ..
فيصل : هههههههههههههههههههه بجد والله
طلال : لا جالس اكذب عليك
فيصل : وماجد درى ؟؟
طلال : لا وياخوفي لو درى ..
فيصل : ليش ياخوفك انت ماكنت تدري وماحسيت فيها .. وهي اكيد ماكانت تدري لانك تقول انها كانت تناديك باسم اخوها ماجد ..
طلال : صحيح , مسكينة البنت اكيد ارتعبت من شوفتي
فيصل : ماتنلام شايفة جني هههههههههههههههههههههههه
طلال : اقول تراي موفاصي لمزحك الماصخ
فيصل : افااا ماصخ حط لك شوية ملح هههههههههههههههههههههههههههههه
طلال : اوووووه وبعدين معك ..
فيصل : خلاص خلاص بطلنا .. طيب والحين بتظل سرحان وتفكر بلي صار على طول ..
طلال : موقادر انسى ولا حتى اتجاهل .. كل ما اتذكر نظرات البنت احس برعشة تسري بجسمي ..
فيصل : ليش البنت حلوة لهد رجة ..
طلال : ماقصدي بنظراتها كذا .. بس كانت من جد مرعوبة خفت لا تكون من الرعبة انشلت لانها ماقدرت تقوم ..
فيصل : الله لهدرجة ..
طلال : لو صاير لك ماقلت كذا ..
فيصل : ياليت ..
طلال : طالع شيقول وربي انك واحد ماتستحي من جدك تتمناها ..
فيصل : امزح معك .. يالله خلاص اتركنا من هالموضوع واطلب لي واحد قهوة على حسابك ..
طلال : ليش جبتك ونسيتك على حسابي ..
فيصل : خلاص على حسابي ولا يهمك ..ولا تعصب .. هههههههههههه
طلال : ابتسم غصبا" عليه ..و حس براحة لما خبر فيصل.. كان محتاج يصارح احد بلي حصل وطبعا" ماكان عنده اوفى من فيصل ولد عمه واخوه واعز اصدقاءه ..
***************************
البنات كلهم راحوا .. وعم الهدوء المكان .. صعدت لغرفتها وهي هلكانة .. جلست على السرير .. طاحت عينها على الكيس الاحمر وتذكرت انه من فيصل .. اخذت الكيس .. ترددت تفتحه والا لا .. بس بالاخير فتحته ..
كان الكيس وسط واحمر .. وبداخله علبة حمراء صغيرة .. فتحتها وكان داخله خاتم ذهب وبوسطه ماسة صغيرة ناعمة بالمره .. ومع العلبة بالكيس كان فيه دبدوب صغير بوسطه قلب ومعلق برقبته كرت مكتوب فيه..
((كل عـــام وانت لقلبي النبض .. لعيوني النظر .. وعلى شفاتي أعذب اسم لاغلى البشــــــــــر .. فيصل ))
حست بحرارة تسري بجسمها من حرارة الكلمات الي بالرسالة .. ضمت الدبدوب بحضنها وانسدحت على السرير .. وجلست تفكر ...
معقولة بديت احبه وانا الي كنت اعتبره مثل اخوي .. لا لا بس ليش من اتذكره او احد يطري اسمه احس بقلبي يزيد نبضه وبحرارة تسري بوجهي وجسمي .. معقول اكون حبيته .. وبهالسرعة ..لا لا فيصل مثل اخوي ونظرتي له ماراح تتغير ..
حطت الدبدوب على الطاولة الي جنب سريرها .. وقامت من على السرير .. علشان تبدل ملابسها وبعدها تنام ..
******************************
نجي للهنوف نشوف وش حالها ..
الهنوف كانت جالسة مع اختها بدور بغرفتها ..
بدور لاحظت سرحان اختها الي زايد اليوم ..
بدرو : الي ماخذ البال يتهنى به .
انتبهت الهنوف لكلام اختها : ايش ماسمعت ايش قلتي ..
بدور : شفيك سرحان اليوم بزيادة ..
الهنوف : ومين قال اني سرحانة
بدور : انا اقول طالعي وجهك بالمراية ..
الهنوف قامت تطالع وجهها بالمراية ..
بدور : ههههههههههههههه شفتي ماقلتلك فيك شي
الهنوف حذفتها بالمخدة الي جنبها على السرير .. وقامت طلعت من الغرفة .. تمنت بداخلها لوتقدر تصارح اختها وترتاح .. بس كانت عارفة لو خبرتها بتفضحها عند امها واخوها ماجد هذا دون التعليقات الحلوة الي بتصبحها وبتمسيها فيها ..
*****************************
نجي نشوف سالفة حنان وحبيبها عبد الرحمن ..
حنان جالسة بغرفتها وماسكة بيدها الجوال .. مترددة تدق عليه والا لا .. بس الشوق ذابحها ودها تسمع صوته ..
الهنوف كانت موصيتها ماتدق عليه كم يوم وتتجاهله وتشوف هو وش راح يسوي ..
بس عبد الرحمن ماطق خبر وكانه كان يبي هالشي .. على عكس حنان الي كانت حالتها حاله بفراقه ..
بالاخير قررت تدق والي فيها فيها ..
بجهة ثانية كان عبد الرحمن جالس مع اخوياه بشقة واحد من الشباب ..
دق جوال عبد الرحمن وكانت المتصلة حنان ..
عبدالرحمن : مين الي طراها هالعلة الحين
سلمان : شفيك , مين الي داق عليك ..
عبد الرحمن : في غيرها الي عمرها ماشافت خير ..
سلمان : يا اخي اسحب عليها وارتاح
عبد الرحمن : بعد كل هالمكالمات والخساير بالساهل اسحب عليها لا مو قبل ما اقبظ الثمن
سلمان يغمز له : وعلى اي ثمن ناوي هالمره ؟؟
عبد الرحمن ببتسامته الخبيثة : اغلى ثمن ,, بس اصبرعلي ..
سلمان : وإن شاء الله لنا نصيب
عبد الرحمن : اكيد وانا عمري نسيتك ..
سلمان : بعدي والله
رجعت دقت حنان عليه .. وقرر يرد عليها ..
عبد الرحمن : هلا والله هلا بعمري
حنان والابتسامة شقت وجهها : هلا فيك حبي
عبد الرحمن :حرام عليك ليه تسوين فيني كذا
حنان باستهبال : وش سويت انا حبيبي
عبد الرحمن : يومين ما اسمع صوتك , ماتدرين اني امووت اذا ماسمعت هالصوت الحلو
حنان : يابعد قلبي بس دامك مشتاق لي ليش ما سئلت
عبد الرحمن بداخله انا ابي الفكة منك اقوم ادق عليك : خفت لا يكون جوالك مع احد ولا شي
حنان : يابعد قلبي
عبد الرحمن : اوعديني آخر مره تتركين رحومك بحاله ..
حنان : وعد يابعد روح حنونه انت .. عبد الرحمن ؟؟
عبد الرحمن : عيونه وقلبه
حنان : تسلم لي عيونك وقلبك .. تحبني؟؟
عبد الرحمن بداخله من قل البنات ما ادورك الا انتي احبك : وهذا سؤال تسئلينه ..
حنان بتغنج : ابي اتطمن ..
عبد الرحمن : كلمة احبك ماتوصف ذرة من بحر حبي لك ..
حنان طار عقلها ..
عبد الرحمن : وانتي حنونتي تحبيني ؟؟؟
حنان لا اراديا" : احبك احبك واموت فيك
عبد الرحمن : اذا صدق ابي إثبات ؟؟
حنان : إثبات !! كيف ؟؟
عبد الرحمن : اذا تحبيني بجد وواثقة .. خليني اشوفك ..
********************
رد مع اقتباس
المفضلات