الجزء الثامن ...

قررت مزون انها تسترجع نفسها وقوتها الي تربت وعاشت عليها قالت بسم الله وصحت حس عليها صقر لكنه عمل نفسه ماانتبه وهي مرت من عنده وقالت السلام عليكم ودخلت للحمام ..
طلعت وغيرت ملابسها وعدلت نفسها وناظرت نفسها بالمرايه وابتسمت بخبث وراحت عنده وعند الباب ..
مزون ..تبي فطور او شئ اجيبه لك
رفع عينه صقر لها وركز عليها ثواني وقال.. خلينا نفطر هنا
مزون وهي بتطلع..انا مو مشتهيه شئ بجيب لك الفطور الحين
طلعت مزون وانقهر صقر منها بس قال اذا رجعت يصير خير ..وفعلا رجعت مزون وحطت الاكل عنده وتوها بتطلع..
صقر..تعالي مزون ابيك شوي
جلست مزون وكأنها آله يحركها صقر فطر صقر واخذت مزون كأس شاهي وجلست
صقر..بالنسبه للي صار امس اتمنى مايتكرر حتى لو امي الي عطتك الموافقه
سكت صقر وشغل له دخان ومزون عينها عالكوب الي بيدها ولاهي مظهره اي رد فعل الا لما شمت ريحة الدخان رفعت عينها عليه بااشمئزاز
صقر..طبعا الي صار شئ غصب عني لاني ماكنت اعرف
مزون ساكته مافيه اي تعليق
صقر..افهم من سكوتك ان الموضوع انتهى
مزون ووقفت ..عمر الموضوع ماراح ينمحي من عقلي ولاقلبي وتأكد ياولد عمي اني اعرف اصونك مثل ماصنت ابوي بحياته وبمماته
صقر وحس انها معصبه..من قال انك ماتوصنين او جاب هالطاري
مزون ..والي عملته شو يعني قولي يكفيني صوتك الي سمعه كل الي بالبيت ماكان له مبرر كل الي عملته
صقر وعصب..عاادي عندك تطلعين من غير مااعرف
مزون ..بس امك الي قالت
صقر وبصوت حاد..وانا ماكنت اعرف
مزون وتأخذ نفس كامل ..الله يخليك طفئ هالقفر كتمتني
انصدم صقر من كلامها وناظر الدخان واستغرب منها اول مره يعرف انها تكره وطفى الدخان
مزون.. مزون..حتى ماكان لازم تتصرف بهالطريقه ابدا
صقر..اوكي انا غلطان بس الخطأ الاكبر عليك انتي الي وصلتيني لهالدرجه
مزون بقهر..الحين انا الغلطانه
صقر..انتهينا خلاص مشكله وصارت غصب عنا
قاطعته مزون بغضب..لا لاتتخيل انها مشكله وبتعدي ابدا بالعكس بتكون شرخ بعلاقتنا ولاتنسى انك رفعت يدك وحسستني
جلست مزون وطاح قناع القوه ونزلت دموعها
وقف صقر لاهو قادر يعتذر ولايتحرك مزون تصيح من مين منه هو صوره وحده شافها قدامه اجبرته يتقدم منها صورة عمه عبدالله
جلس قريب منها ..افا بنت عبدالله تصيح بسببنا حقك علينا هالمره لحظة غضب وتأكدي انك غاليه ولانرضى بزعلك
سكت صقر ما عارف شو يقول ولاهو قادر يحط الخطأ كله عليه عشان ترضى
صقر بعد ماسكتت مزون وقف وحط يده على كتفها ..مزون الي صار غلطه مو مهم من سببها المهم انها درس لنا الاثنين اتمنى ماتشيلين علي وصدقيني ماقصدت احسسك انك مهانه او من غير سند لا ابدا لاني اعتبر نفسي مو زوجك بس اتمنى تنسين الي صاار اذكري الله وقومي وانزلي عندنا تحت
طلع صقر وترك مزون بحالة غضب منه ومن موقفه الي موو راضي يعترف بخطأه ..وتذكرت كلامه وعرفت ان صقر مازال يعاملها على احساس التقدير لعمه المرحوم مو من اجل مشاعر خاصه يحملها لها ..لكنها قالت بقوه ولاانا احمل اي مشاعر ليه ازعل وقامت بعد ماقررت انها تطنشه وتعيش عااادي جدا

دخل صقر لصاله ولاكأن فيه غير امه ومشغله الرادوا على اذاعة القرآن سلم وحب راسها وجلس
ام صقر وتناظره ..خير يمه مارحت لدوامك فيك شئ ..؟؟
صقر باابتسامه..سلامتك بس عندي موعد عالعشر قريب من هنا قلت اطلع مره وحده
ام صقر..زين اجل مزون وينها مو عادتها
صقر مستغرب..هي نزلت وجابت لي فطور فوق ماشفتيها
ام صقر..يمكن لما كنت بغرفتي
سكت صقر وارتاحت ام صقر لانها مابتطلع له الفطور فوق الا اذا خلاص تراضوا جلس صقر منسجم مع الاخبار ودخلت مزون وسلمت على خالتها وجلست جنبها وهنا بدت تشك الخاله فيهم لان وضعهم مو ناس عادي واضح انهم زعلانين
ام صقر ..يمه صقر بنروح لبيت اخوي بكرا تغير جو
صقر..براحتكم
مزون..وانا اروح ممكن ..؟؟
التفت صقر وناظرها وعرف قصدها ..ايه ممكن
ام صقر..اذكروا الله
صقر..لا اله الا الله يمه ابوي متصل امس ويقول تعالي ابيك العصر
ام صقر ..خير ان شاء الله
صقر باابتسامة ..لا مو خير لاني ضربت بنته
شهقة ام صقر وخافت مزون..ضربتها وليه ومتى
قال لهم صقر السالفه
ام صقر..لا حول ولاقوة الا بالله انا قايله لهلا اختك بتجيب لنا المشاكل بس ماسمعت كلامي
صقر..ماهمتني والي يصير يصير
مزون ..بس ماكان المفروض تضربها
صقر ورافع حاجب..ايه المفروض اصفق لها
وقفت مزون..بكل الحالات مابيعجبك رائي اذا تشوفني ماني محترمه
طلعت مزون ورفعت ام صقر يدها لولدها..بذبحك انا ياابوي الحرمه ماينفع معها هالكلام
صقر ويبتسم لها..اجل ايش ينفع
ام صقر..اللين خلك لين معها يمه هذي بنت يتيمه ولالها احد تشكي له الا ربها والله انها كسرت خاطري امس حتى اختها ماتدري عن الي صار انت تقدر تعمل اي شئ بس هي تسكت لان مالها حيله
صقر..يمه خليتيني مجرم
ام صقر ..طلبتك وقول تم
صقر وحط يده على راسه..ليه يمه مااقدر اردك لاتقولين لي شئ مااقدر عليه
ام صقر..اذا تحبني روح سمح خاطرها بكلمتين ياابوي
صقر وانقهر بس ابتسم..اوكي بنجرب اللين ونشوف
طلع صقر للغرفه وحصل مزون ترتب الغرفه دخل وتمدد عالسرير
ناظرته مزون وانقهرت منه ماتحب ترتب وهو يراقبها لكنه قرر يستفزها قبل مايراضيها وشغل له دخان ورفعت بسرعه عينها لما شمت ريحته ولاحظ صقر انها معقده حواجبه وهذا يعني ماعجبتها الريحه كملت شغلها ..
صقر..مزون
مزون من غير نفس..نعم
صقر ووده يضحك..نعم الله عليك انتي تعرفين تطبخين ..؟؟
مزون وهي ترتب اغراضها..يعني
صقر..ليه ماعمري شفت طبخك
التفتت مزون..طبخت اكثر من مره بس انت ماميزت
صقر..غريبه والله طيب شرايك تطبخين لي اليوم
مزون وتغلي منه..ان شاء الله
صقر..طيب ماسألتيني شو مشتهي
مزون..تفضل
صقر..الظاهر ماودك تطبخين صح
مزون..اذا تبي طبخت ماتبي مابطبخ
صقر وجلس عالسرير ..شوفي اذا بتطبخين لي وانتي كذا ماابي
مزون وتناظره..كيف كذا وضح..؟؟
صقر ويأشر لها بيده الي فيها الدخان..تعالي ممكن اكلمك وانتي جالسه عورتني عيوني
مزون ولاودها قربت وجلست بطرف السرير..ايوه
صقر ويدخن ولفت مزون وجهها ..الي اقصده انك معصبه وكرهتني ولا لك خلق تشوفين رقعة وجهي واخاف تحطين لي شئ بالاكل
غصب ابتسمت مزون..ماوصلت لهالدرجه بس ممكن اوصلها
ضحك صقر بصوت عالي بضحكته الي تجرها تبتسم ..
مزون ..عجبتك
صقر..خطيره بنت عبدالله تهديد مباشر
سكتت مزون وطفئ صقر الدخان..ليه ماقلتي لي انك تكرهين ريحة الدخان
رفعت راسها متفاجئه..كيف عرفت
صقر وركز عينه عليها ..لاني اذا اتكلم مع زوجتي اركز على ادق تصرفاتها اعرف شو تحب وشو تكره
استحت مزون وحست انه يقصدها ولاقدرت ترد
صقر بااصرار..ليه ماقلتي لي عالاقل ماادخن عندك
مزون..حسيت انه مو من حقي امنعك من بيتك وغرفتك
صقر..لاحول ولاقوة الا بالله امنيتي افهم انتي متى بتدركين انك زوجتي مزون تعرفين شو يعني زوجتي جاوبيني
سكتت مزون وكمل صقر ..اسمعيني يامزون اشياء كثيره ماتعجبني فيك مثل مااشياء اكثر ماتعجبك فيني وهذا مو خطأ بالعكس هذا شئ طبيعي لكن بليز لازم نتجاوز هالمرحله الي صار امس مو سهل لاعليك ولاعلي ونحتاج وقت حتى نرجع لنقطة البدايه ونرجع نبدا بوضح لكن يد وحده ماتصفق اذا انتي شايفه ان زواجك مني شئ عادي وراح يصبح مع الايام روتيني انا اقول لك لا لان صقر مو هذا حلمه ابدا
مزون..مافهمت قصدك
صقر ووقف ..راح تفهمين لكن مو مني اذا عطيتي احساسك حقه راح تعرفين صقر لكن اذا اغلقتي على قلبك واحاسيك الباب مابتشوفين الا صورة ولد عمك الي تكرهينه
مزون بسرعه..بس انا مااكرهك
صقر باابتسامه..تحبيني....؟؟
نزلت راسها مزون ورفعه صقر..لاتستحين قوليها اكرهك بس مع الايام عالاقل راح تقبلين صقر واعتقد هذا كفايه والحين انا بطلع لشغلي وابي ارجع الاقي لي اكل من ايدك
ابتسمت مزون وطلع صقر وتركها بحيرتها

مر صقر على امه وابتسم لها وطلع مبسوط مايعرف ليه يمكن لانه رفض حياته معها وصرح بهالرفض او يمكن لانه شافها مبتسمه او لانه حاول يراضيها مايعرف الي يعرفه انه توصل لحل ان هو يرخي الحبل اذا شدته مزون ويشد اذا ارخت هي حتى ماينقطع التواصل بينهم ..
بالجامعه كانوا البنات جلسين يفطرون ومبسوطين
هلا..الله عندنا الحين شبكه
نجود..مالي خلق احضر بوقع واطلع
هنادي..ماعندكم مشرفه
هلا وتضحك..عندنا بس عادي بسرعه نلعب عليها
هناادي..ياحظكم انا عندي الحين هالعله اماني
نجود..الله يعينكم الا صدف فاتن متى زواج اخوك
فاتن..بعد اسبوعين بتجون ان شاء الله
هلا..بنجي بس بشرط اعزموا مزون عشان يوافق صقر
هنادي وفاتن..ليه شدخل صقر
هلا..ههههههههه مو تزوجها
علامة ذهول ارتسمت على وجيه البنات وضحكت نجود
فاتن..خساره تزوج اخوك المزيون بس يالله تستاهل مزون متى تزوجوا وليه ماعزمتونا
سكتت نجود وردت هلا بسرع..ماعملنا زواج
هنادي..اها طيب سلميني على مزون كثير وباركي لها
فانت..وانا بعد
نجود..هلا شوفي غاده دخل
شافتها هلا وقامت لها