هلا..بطلع اجيب لنا شئ من المطبخ
طلعت هلا وكملت نجود كلامها..تكلمي مزون
مزون..مافيني شئ بس سبحان الله من ايام كنا نجمع المكأفاه والحين شوفي شلون
نجود وبدموع ..مزون كنا نجمعها ولاتكفي لعلاج امي وخلاص امي راحت وربي عوضنا خير والا انتي مو مرتاحه مع صقر
مزون وتبتسم..ماامداني ارتاح او لا لكن مبدئيا كل شئ تمام على فكره اعطاني بطاقة ودخل فيها مهري
نجود ..احلفي
مزون..والله
نجود..فيه الخير والله
مزون..مع انه حقي لكن مثل ماقلتي لو واحد غيره ماعملها
نجود..اسمعي انا بطلع الحين احس اني تعبانه بنام واخاف بعد يجي صقر بكرا لنا كلام ثاني يالله تصبحين على خير
مزون..تلاقي الخير
طلعت نجود لهلا بالمطبخ وراحوا غرفتهم اما ام صقر دخلت تنام لانها متعوده تنام بدري بعد ماتأكل شئ خفيف مابقى غير مزون الي احتارت شو تعمل بالاخير شغلت التلفزيون وجلست تتفرج
صقر كان مع سعود بالرسم وكان ناسي الوقت ولاانتبه الا لما قاله سعود
سعود..صقر خلاص ايام زمان راحت زوجتك بالبيت
ارتفعت عين صقر عالساعه الي كانت حول 12 ..الله تأخرت
سعود باابتسامه..مسكينه بتقول هذا اولها
صقر..ايه والله الله يستر
سعود..شكلك مايطمن
صقر ويتنهد..خليها على الله فمان الله
سعود..الله معك

وصل صقر للبيت ودخل بهدوء توقع الكل نايم لكنه اتفاجئ بنور الصاله وكانت مزون غافيه عينها وهي تتفرج حست بصوت الباب وبسرعه صحت
صقر..السلام عليكم
مزون بصوت تعبان..وعليكم السلام
صقر..اسف تأخرت بس غصب عني
سكتت مزون ماردت لانها ماعرفت شو تقوله
صقر..تفضلي نطلع ننام الا اذا ماودك
سكتت مزون وطلعت مع صقر لغرفتهم تنام ..
دخلت مزون بهدوء قبل صقر للغرفه تلقائياً جلست عالكنبه من غير احساس حاولت تضم نفسها بيدينها ..دخل صقر قفل الباب التفتت ووقف مكانه..منظر جمده مكانه للمره الثانيه يشوف الدموع بوجهها للمره الثانيه يحاول يشوفها كمرأه كزوجه للمره الثانيه يرفع عينه حتى يشوف زوجته ملامحها شكلها لكنه ينصدم بدموعها لكن هالمره غير ..هالمره الدموع كانت غزيره الالم يحاول ينطق ظل دقيقه واقف مو عارف شو يعمل حاول يتقدم يقرب عندها وبصعوبه جلس قريب منها نوعا ما..
صقر..سامحيني مزون تأخري كان
تقاطعه مزون وتوقف..انا مااصيح لانك تأخرت
دموعي صرخه تعبير عن الم وجروح بداخلي ياولد عمي دموع تعاني من ايام وشهور ودها تتحرر من عيوني ..التفتت مزون له وكملت..ياولد عمي لكل شخص نقطه تحول مهمه بحياته لكن انا غير انا عندي نقاط عندي جروح ماات ابوي وتغيرت نظرتي للحياة ظلمنا عمي واكل حقنا وتغير المفهوم الى ان القوه الي المنتصره سواء عادله او ظالمه ماتت امي وعرفت ان كل شئ صح بحياتي كان خطأ لان الاخلاق والاحترام ماهي مع الظالم اهاني عمي وزوجته وكنت خدامه وعرفت ان الموت من اجل الحياة احيانا له معنى لكن لما ساوم حتى على الموت خلاص ماات احساسي تدمر
صقر ومصدوم من كلامها..ساوم على الموت
مزون..ايه انا كنت ميته ببيته لاانت ولا غيرك ممكن يتخيل الاهانه الي كنت اعيشها واداريها عن نجود
ببيت عمي اخو ابوي كنت خدامه كنت مهانه كانت زوجته ترميني بأبشع الكلام وابشع التهم كانت تذبح كل يوم احساسي لحد مامات وكنت راضيه اموت بس نجود ماتحس ماكنت ابي اموت انا وهي كنت اتمنى وحده من بنات عبدالله الرجل الطيب تعيش وتشوف جمال الحياة بالرضى والعدل والامان ..ياولد عمي عمي حتى وانا ميته ساوم علي باعني خسااره على ايام شفته فيها قدوه شفت فيه صورة الاب خساره على الايام الي افتخرت فيه لكن مااقول الا حسبي الله ونعم الوكيل سامحني ياولد عمي لكن صبر له حد ولاعدت اتحمل بداخلي نار تحرقني
سكتت مزون وسكت صقر وبعد فترة صمت تكلم صقر بصوت هادي ومتزنصقر..اسمعيني يابنت العم انا ماالومك على كل كلمه قلتيها لكن بقول لك شئ واسمعيني بمنطق وعقل بنت عبدالله ..زواجي منك طريقته خطأ بنظرك
قاطعته مزون..وبنظرك كلنا انجبرنا
صقر..اوكي نقول خطأ بنظرنا لكن هل يعني اني ارفضه بعد ماحصل ..هل انكر انك زوجتي بعد مااخذت المبلغ ..وهل ممكن ترجعين لبيت ابوي ..يامزون انا نفسي بعد الي سمعته مابرضى احنا تزوجنا وزوجنا كان نتيجه مرضيه لي ولك واحتمال يكون زواج ناجح او على اقل تقدير تقليدي مزون عن نفسي احول اتكيف مع وضعي ونعم احتاج وقت وانتي حاولي وحطي ببالك نجود بالنسبه لي مثل هلا وامنى انك ماتنسين نفسك عيشي حياتك اختك بينا ومعنا ولاراح يصير لها شئ صدقيني اتمنى ترضين بواقعك وتقبلينه حتى لو كنت مو الشخص الي تتمنين ترتبطين فيه
سكتت مزون وسكت صقر وهذا يدل على قبول الموضوع من الطرفين بهالشكل والطريقه ..

عالساعه سبعه صحت مزون ماعرفت شو تعمل تصحي صقر او لا لكنها قررت تسأل هلا طلعت لها ..بعد مادخلت الغرفه
مزون..صباح الخير
هلا ونجود..صباح النور
مزون..هلا بسألك صقر كيف دوامه يعني اصحيه او لا
هلا باابتسامه..دوامه يطلع عالساعه تسع يعني اتوقع بدري
مزون..من بالعاده يصحيه
هلا..الساعه واذا تأخر اكيد امي ترسل له الخدامه
مزون بااستغراب ..الخدامه
نجود..بس اكيد ماتدخل لاتخافين
ابتسمت مزون وطلعت لغرفتها وشافت جوال صقر مضبوط عالساعه ثمان كملت لبسها وطلعت للجامعه ..
بالجامعه التقت مزون جواهر وبدت تحكي لها كل شئ صار لها
جواهر..يعني انتي الحين عروس
مزون باابتسامه..شفتي الدنيا
جواهر بصوت واطي..اسكتي لااحد يسمعك فضحتينا عروس ومداومه اسمعي مزون انا امنيات صح لكن خليني احقق بعض امنيات فيك بكرا اوراقك توصاني واقدم لك اجازة زواج وعيشي حياتك على كلامك ولد عمك محترم وشكله طيب ليه تبدين حياتك كذا
مزون..ياشيخه هو تزوجني عشان الفلوس
جواهر..حتى تقدرين تخلينه يعرف انه من الصفقه ماكسب الا مزون
مزون..ههههههههه تعبت من احلامك تصدقين تذكريني بالروايات الي كنت احلم وانا اقراها واتخيل ان بالدنيا شئ اسمه حب
جواهر وتقاطعها..صار مافيه الا وهم الحب حفظتها مزون ارحمي نفسك وقلبك عذبتيه حرام
مزون..وليه اعيش بكذبه
جواهر..الحب ماهو كذبه مزون
مزون..بحياتي مافيه الا عاطفه وحده حقيقه الي عاطفة الاب والام اما غيرها ماشفت واستحاله اصدق انه وجود كل الي يستخدمون الحب كذابين يأخذونه وسليه للوصول لغايه كذابه حقيره صدقيني الحب كذبه
جواهر..تعرفين امنيتي تحبين صقر ويعشقك حتى يتبدل مفهوم الحب عندك
مزون..هههههههههههه كل كلامك امنيات وهذا يدل ان الحب مابيتحقق المهم تعالي قولي لي كيف وضعك بالبيت
جواهر..عاادي اليوم مثل بكرا وبكرا مثل اليوم
مزون..الله يسعدك
جواهر..آمين
بالبيت صحى صقر ماحصل مزون عرف انها طلعت للجامعه لكنه سأل نفسه سؤال ماحصل له اجابه قال يسأل هلا اتصل عليها وكانت بالمحاظره وبصوت واطي ردت
هلا..نعم
صقر..ههههههههه ليه تردين بالمحاظره المهم مزون كم رقم جوالها
هلا..مامعها
انصدم صقر..مامعها هو فيه احد بوقتنا الردي مامعه
هلا..ايه
صقر..بااي اذا شفتيها خليها تتصل فيني
هلا ..طيب
سكرت هلا وبسرعه قالت لنجود وارسلوا مسج على جوال جواهر وكان مقلب حلوو منهم
فتحت جواهر المسج وقرته " مزون اتصلي بصقر ضروري معصب عليك مررره لانك طلعتي ماقلتي له "
مزون..بدينا شفتي الحب
جواهر..طيب حجه يمكن اشتاق لك المهم كلميه واعتذري منه
مزون ومعصبه..على ايش اعتذر
جواهر..اعتذري وبس
مزون ..هاتي اشوف
جواهر..طيب بروح اشتري لنا شئ نأكله
اتصلت مزون واستغرب صقر الرقم ورد ..
صقر..الو نعم
مزون بخوف..هلا صقر
صقر باابتسامه..هلا مزون
مزون..اسفه صقر بس توقعت انك عارف اني بروح الجامعه ماكان قصدي اطلع من غير مااقول لك
صقر مستغرب..شفيك مزون انا ماقلت شئ على روحتك للجامعه
مزون بعفويه..البنات يقولون انك معصب لاني رحت ماقلت لك
صقر...اي بناات
مزون..نجود وهلا
صقر..ههههههههههههههاي لايهمونك كذابات
مزون وغصب عنها ابتسمت ..طيب تبي مني شئ صقر
صقر..الظاهر مستعجله
مزون..لا مو قصدي بس
صقر يقاطعها..عموما مزون وانا راجع بطلع لك رقم اوكي
مزون وبعد تردد..ياليت يكون لنجود رقم
صقر..ولايهمك المهم متى راجعين
مزون..احتمال انا بعد ساعه البنات عندهم تاخير
صقر..اوكي خير ان شاء الله فمان الله
مزون ..الله معك
امل صحت عالساعه عشر وظلت تطلع من مكان لثاني ومن غرفه لغرفه ماهي عارفه شو تعمل دخلت مرسم سعود وظلت تتفرج على لوحات واحزانها حاولت تشوف لوحة امل او فرح ماشافت الا السواد والاحزان طلعت ونزلت وحصلت نوره زوجة اخوها ابراهيم
امل..السلام عليكم
نوره بالابتسامه المعهود..وعليكم السلام ورحمة الله وبركاته
امل..شلونك نوره
نوره..الحمد لله انتي شفيك
امل..ماعندي شئ اسويه مليت
نوره..الله يرزقك بوظيفه
امل..ان شاء الله
لحظة صمت حاولت نوره تكلم امل لكنها شافتها سرحانه وتركتها لحد ماامل قررت تقطع الصمت
امل..شلون عمي والبنات وخالتي
نوره..كلهم بخير ونعمه شرايك تروحين معي الاربعاء
امل..بشوف الا اخوانك شلونهم
نوره باابتسامه..بخير لكن اذا تحبين تسالين عن احد معين
امل ماقدرت ترفع راسها لكن نوره طيبه وكملت ..بخير تطمني امي تقول مكلمهم من ثلاث ايام تطمني وطمني قلبك
طلعت نوره وتركت امل بحيرتها والمها واحزانها ..
بالبيت رجعت مزون وجلست مع خالتها اما البنات كان عندهم تأخير ..
ام صقر..شوفي مزون ماابي تحسين انك غريبه هذا بيتك من اليوم فاهمه
مزون..الله يخليك ياخالتي
ام صقر ..والله خالد معورني قلبي عليه اتصلي عليه يمه وعطيني اكلمه شوفي الرقم عندك
مزون ..ان شاء الله
اتصلت مزون لخالتها وطلعت لغرفتها بوقت وصول صقر..
صقر..السلام عليكم يمه
ام صقر..وعليكم السلام وراك تأخرت جوعتنا
صقر..ههههههههههه ماتأخرت انتي الي جايعه اليوم لايكون مافطرتي
ام صقر..لا فطرت على الوجيه الزينه
صقر يبتسم..من وجيهه
ام صقر..وجه زوجتك
صثؤ ويلتفت..الا صدق ماصلت
ام صقر..الا وصلت توها طلعت من عندي يمكن راحت تبدل ملابسها
صقر..طيب سعود بيمر عليك اليوم
ام صقر..الله يحيه البيت بيته
صقر..يالله وين الغداء
ام صقر..اصبر لين تنزل زوجتك
صقر..ان شاء الله
مزون..السلام عليكم
صقر..وعليكم السلام جوعتينا على قولة امي ههههههه
مزون..ثواني ويكون الاكل جاهز
ام صقر..اجلسي الخدامه تجيبه
مزون..لاخالتي انا بجيبه ماعليه
طلعت مزون والتفتت ام صقر..مشاء الله عليها من جت عندنا كل شئ هي الي تعمله شكله ماتحب شغل الخدامات
صقر مبسوط..والله عندك دقة ملاحظه يمه معلومه خطيره
ام صقر..شتقول انت
صقر..سلامتك
بالقصر المليان بالخدم ..المليان بالفرغ العاطفي ..القصر ..الفارغ من الاحساس الاسري..القصر الي من كبره تحس كل شخص ساكن ببيت لحاله..بيت ابو صقر الي كان هالبيت من اخر اهتماماته ..
اما ام صقر ماكانت تعرف شو يعني مملكتي بيتي عيالي ..كانت تعرف تلبس عبايتها وتطلع من بيت لبيت ومن زواج لثاني من سوق لمجمع وهذي حياتها ..انسانه استغنت عن الاجمل والاهم والاولى ..وذهبت خلف المظاهر الزايفه هذي ام بدر ..الي ماتعرف ان ولدها هايم على وجهه شايف الحياة بالمقلوب كل القيم عنده عقد وكل المبدي خرافات ..مايعرف شو يعني احترام ولا يعرف يعني شو حقوق وواجبات ..انسان تخلى عن واجباته تجاه ربه بالتالي من الطبيعي يتخلى عن كل الواجبات الاخرى..اما غاده البنت الجامعيه الي ماتعرف من الجامعه الي تجمع البنا ت والانخراط مع صديقات الفساد او مايسمون بالشلل المميزه وكان حلمها ان تكون شله تكون هي الاساس بها وبدت تسعى لهالشئ وحققته وماكانت تعرف ان التقليد الاعمى هو اقصر الطرق للوقوع بالاخطاء ..
بغرفه مغطاه بالدخان فتحت الشباك غاده وهي تكح من كثرت الدخان الي توها مبتدءه فيه ..
غاده..كح كح يالله ..بس لازن اكون اقوى واقوى حتى اكون رئيسة الشله بجداره ههههههههه
طلعت من الغرفه بعد مالبست عبايتها الي تحتاج عبايه وراحت للمقهى تقابل شلتها ..والام والاب في عالم اخر ..
مر اسبوع على زواج صقر ومزون انتهى جناح صقر والنتيجه كانت مرضيه تدل على ذوق صاحبها ..اما علاقة مزون بصراحه عاديه جدا..نجود بااسبوع تكيفت على البيت واهله ولاحست انها غريبه بينهم ..وامل تقريبا كل يوم عندهم علاقتها بمزون صارت اقوى من اول ..وهالشئ اسعد مزون لانها حصلت انسانه تحكي لها عن صقر بحريه ومن غير قيود..
امل..مزون اقول لك شئ
مزون..قولي
امل..انتي محظوظه بصقر مو لانه ولد اختي لكن صقر فعلا مميز وانتي بعد لكن احسك مقيده نفسك
مزون..من ناحية صقر مميز اوكي لكن قيودي احتاج وقت تى اتخلص منها
امل..ماعلينا ماقلتي لي شلون صديقتك الي رديت عليها من يومين شكلها حبوبه
مزون..جواهر صديقة عمري حبوبه لكن حظها بالارض
امل..لكذا اسمها امنيات
مزون..ايه
امل..ياشيخه كلنا بالهواء سواء
مزون..خالد بيجي اليوم
امل باابتسامه..ماتشوفيني هنا من الصبح خالد مو ولد اختي لا خالد اخوي وصديقي وغير كذا مستشاري
مزون..لاحظة هالشئ من كلامهم
امل..خالد غير سعود وصقر الي تقريبا يشبهون بعض بكل شئ
مزون..الا الضحكه
امل..ههههههههههه شلون
مزون..ماادري صقر ضحكته مختلفه
امل..مزون كل شئ بصقر مختلف حاولي تتعرفي عليه بهدوء وبحب وصدقيني مابتندمين يالله بطلع اعمل لي قهوه اجيب لك
مزون..لا انا بطلع انظف غرفتي تعالي عندي اوكي
امل..اوكي
اجتمعوا الكل بالصاله صقر وامه ومزون وامل هلا ونجود الي بدت تتعود على جلستها وهي متغطيه بينهم شوي ودخل خالد بعد دق على صقر وطلع له ..
صقر بعد ماسلم على اخوه ..هلا شفيك ليه مادخلت
خالد باابتسامه..ماادري قلت اخاف زوجتك
قاطعه صقر..خالد مزون ونجود على طول بيكنوا معنا وصدقني بتعرفهم زين وبتعرف ان بنات عمي عبدالله ماينتظرون احد يعطيهم خبر بالعكس دائما مستعدين المهم تعال سلم عليهم
دخل خالد بعد ماتغطت مزون..
خالد وسلم على امه وهلا وامل وسلم على مزون..
خالد..مبروك مزون الله يسعدكم
مزون بصوت واطي..الله يبارك فيك
خالد..هلا ومرحب ببنت عمي شلونك نجود
نجود..الحمد لله
استأذنت نجود وطلعت بعدها مزون للمطبخ وجلس خالد مع اهله وطبعا بالاخير طلع مع امل برا ..
جلس خالد وحس ان امل مو على بعضها ..
خالد..اموله شفيك ..؟؟
امل..سلامتك المهم ماقلت لي شو اخبارك
خالد..لاجديد المهم كيف بنات عمي ان شاء الله كل شئ اوكي
امل باابتسامه..الى الان تمام البنات متربيات صح صدقني منطقهم حلو واسلوبهم احلى
خالد..شلون
امل..مافيه عقل طاغي على عاطفه ولا العكس
خالد..تتوقعين ان رأيك صح على حد علمي اي مرأه عاطفته متفوقه على عقلها
امل..اوكي صح بس بمواقف معينه باانفعالات شخصيه تعكس عاطفتها مو بشكل عام واو رأي شخصي
خالد..اموول تستاهلين هديه
امل..المهم تكون تسوى
خالد ويغمز لها..تسوى صدقيني
امل ..نشوف
طلع خالد جواله واتصل وامل تراقبه حط سبيكر وينتظر يرد عليه
بمجرد مارد المتصل وقال ..الووو حطت امل يدها على قلبها