قصة بحرانية (منقوله)

**طفله مثل القمر** · 07-01-2009, 01:04 PM

..
لما رجعووو من السفر .. صار ليهم يومين .. كان علاوي قاعد بروحه في غرفته مو عارف وش يسوي .. قال ماليي الا افتح ايميلي الثاني الي ضفتها فيه

علاوي : السلام ..
.....: عليكم السلام ..
علاوي : شخبارش .. وش مسوية .. ليش وحشة ..
......: الحمد لله بخير .. شلون ليي وحشة وانت ثاني مرة تكلمني ..
علاو ي: لا مو اول مرة .. انا علوووي .. اذا تذكريني ..
واستغربت من يوم قال علوووي ..
....: علوووووووي !!!
علاوي : أي علوووي .. وش فيش مستغربة ..
......: مستغربة لان اخر يوم كلمتك فيه .. في ذاك الايميل .. ما توقعتك ان انت تكلمني مرة ثانية ..
علاوي : وانا بعد ما توقعت نفسي ان اكلمش .. بس مادري ذاك اليوم ما حصلت احد غيرش اشكي ليه همي ..
.....: وليش اني بالذات يعني .. ليش مو احد غيري ..
علاوي : ما دري احس بشعور غير اتجاهش ..
....: شعور شنو .
علاوي : ماعرف شلون اشرح ليش .. او شلون اقول ليش ..
....: ما يحتاج تشرح ولا شي .. قول بالمختصر ..
علاوي : مرة ثانية بقول ليش الحين ما اقدر ..
......: ليش ما تقدر يعني ..
علاوي : بس مشغووول اختي تبغي تقعد ع النت ..
....: اوك ع راحتك .. سي يووو علوي ..
علاوي : سي يو توو ..

قالت في خاطرها .. معقولة يعني .. معقولة ان علوووي يحبني !!
لا لا لا ما اعتقد ان هو يحبني .. علوي من النوع الي ما يحبون ولا يحسون .. لو بيحبني او بيحس فيني انجان حباني من زمان مو من الحين .. يالله بنشووف مرة ثانية وش يقول ..

في المسنجر :
احمد: مريمووو وش فيش حاقرتني ..
مريم : احمد مو حاقرتنك بس مشغولة شوي .. وش اسوي يعني .
احمد: مشغولة في وي .. تكلمين احد يعني ..
مريم : لا ما اكلم احد .. قاعدة اقرأ ..
احمد: تقرين وي ؟؟
مريم : ما اقدر ع الفضوول .. اقراء قصة .. في منتدى
احمد: انزين وش اسمها القصة بروح اقراها انا بعد ؟؟
مريم : اوووووووف صدق مللتني احمد .. وعطته الوصلة مالت القصة ..
احمد: اييييييي هذا انتون يا البنات موتكم تقرووون قصص الحب والخيانة والهرار ..
مريم : ههههههه وش ورانا احنا يعني ..
احمد: وراش عقب اسبوعين مدرسة .. قومي برزي اغراضش احسن من مقابلة هل القصة ..
مريم :والله كيفي اني.. مريول وفصلت ليي .. باقي عليي شيلات وهرار يعني ..
احمد: انزين وهل الهرار متى ناوية تشترينهم ..
مريم : واني وش دراني ماعندي احد يوديني .. بروح ويه نورووو
احمد: افااا انا موجود وتقولين ما عندش احد يوديش..
مريم :جيف عندك ليسن واني ما ادري ..
احمد: او انتين ها .. لزماً تفشليني .. يعني عندي اخوووي يوديني اذا ابغي .. او سايق علاوي هع هع ..
مريم : مالت عليك .. الحين اني اروح ويه اخوووك ؟؟
احمد: اييييييي انا وياش مو بروحش وياه ..
مريم : لا استحي وتدري فيني ..
احمد: لا ما ادري فيش اول مرة اسمع مريمووو خجووولة ههههه خبري وجها بليته هع هع ..
مريم : الحين كف ع خشمك ..
احمد: ما تقدرين .. ويووووووو
مريم : لا اقدر .. بس اشوفك براويك .. والله .. صدق ما تستحي ع وجهك ..
احمد: جيف شايفتني وي الا تقولين ليي هل الحجي .. باااااي ..
مريم : يه يازعم زعلت ..

وطلع احمد من المسنجر .. وقالت مريمووو في خاطرها .. من صدقه يعني زعل اووووووووف .. خلى يولي بقرأ القصة احسن الحين عقب شوي بدش ..وكملت قصتها .. وشاركت في المنتدى .. واحمد للحين ما دش ع المسنجر ..

مريم : وش اسوي اني الحيييين .. ماليي الا نورووو حلالة المشاكل بروح اتصل فيها ..

نور: هلا والله بالغايبين ..
مريم : هلا حبيبتي .. نوروووو ابغي منش خدمة ..
نور : أي ادري اني ما تتصلين مني والطريق قولي الي تبغينه ..
مريم : ابغيش تتصلين حق احمدووو ..
نور : ليش اني يعني اتصلي انتين ..
مريم : اني زعلان مني .. مادري ع ويه ..
نور : ههههههههه مالت عليش حسبالي فيه شي مهم الحين ..
مريم : ويعني هذا مو شي مهم ..
نور : مهم عندش يمكن ..
مريم : قولي ما تبغين تساعديني ..
نور : اساعدش في ويييييييه ..
مريم : تتصلين فيه .. وتشوفين اذا هو زعلان مني او لا ..
نور : مريم .. صدق انش فاضة .. اني مو فاضية حق هراركم ..
مريم : لا مو هرار ..
نور : هرار .. وتدرين ان مو اول مرة يصير جذي ..
مريم : بس هل المرة طول في الزعل ..
نور : يزعل لوقت الي يبغي .. بس في النهاية بيجي يكلمش وتدرين مريم : اوك مشكورة ما ابغي منش شي ..
نور : طنقرتين يا زعم .. ههههههههه
مريم : لا .. بااااااااي ..
نور : باي

(في بيت حمد )
ريم : حموووود ..
حمد: عيونه انتين .. امري تتدللي ..
ريم : ما جبت الحلويات حق الليلة نسيت له ..
حمد: لا ما نسيت .. بجيبهم عقب صلاه المغرب ..
ريم : انزييييييييين .. قوم ساعدني في العشاء ..
حمد: تامرين امر .. جم ريمي عندي انا ..
ريم : احم .. احم..

وبرزووو العشاء .. لان الليلة عازمين .. ام ريم .. وام علاوي .. وابو علاوي .. وعلاوي .. ومروة .. وام حمد .. وفاطمة .. يعني عزيمة الاهل .. وحمد قال الى صديق العمر .. اسمه وليد .. ما يقدر ما يقول اليه .. يعتبره واحد من الاهل ..

عاد فطمووو كانه منزهقة على هل العزيمة .. فاضحة امها من الصبح تبغي تروح بيت اخوها .. لان الله يسلمكم .. من هواياتها الطبخ و الاكل .. والعزيمة فيها اكل واااجد من جذي ما تبغي يفوتها .. هع هع..

فاطمة : ياربييييي متى تصير المغرب ..
ام حمد: بسش طحنة على راسي .. انفجر راسي منش ..
فاطمة : اتمللت واني احارس .. واحشيني ابغي اشوفهم بسرعه ..
ام حمد: واحشينش .. لو واحشنش الاكل ..
فاطمة : جيف شايفتيني .. منزهقة مو شايفه اكل من قبل .. او ما عمري اكلت ..
ام حمد: بتي واعرفش ام الاكل ..
فاطمة : بعد وش ورايي اني غير الاكل والنوم والنت .. ههههههههه
ام حمد: اييي ما وراش شي .. خب شغل البيت كله عليي اني لو اموووت قدامش ما قمتين شلتين خلقة ..
فاطمة : أي أي عندش انتين كله ما اسوي .. كل الشغل الي اسوي اليش ما اشتغل ..
ام حمد: مادري وش مسوية ليي .. حتى غرفتش اني ساعات اروح وارتبها ..
فاطمة : ما صار يومين عدلتينها ليي ..
ام حمد: يومين ها .. بس صبري يا ناكرة النعمة براويش ..
فاطمة : هع هع غلبناها ويوووووووو .. وع طووول ركضت غرفتها ..
ام حمد: عمرها ما بتكبر هل لبنية .. الله يخلف عليها بعقل ..

وصار وقت العزيمة .. اذن اذان المغرب .. وصلووو .. وراحووو كلهم بيت حمد ..

ريم : توه منور بيتنا ..
فاطمة : أي ادري منور بوجودي ..
مروة : يالله عاد .. بوجودي اني ..
حمد: ههههههههه مالت عليكم .. منور بوجود الكل ..
فاطمة : انزين ولمتى بعد بتعشونا ..
حمد: بل بل عليش هذ الي هامنش .. حارسي شوي بعد ..
فاطمة : وحق وي بعد نحارس .. اكو الجماعة موجودة كلها..
حمد: لا ناقص وليد ..
فاطمة : من هو هذا وليد بعد ..
حمد: اذا وصل بتعرفينه ..
وتوهم مخلصين الحجي الا سمعووو الجرس يرن ..
ريم : والله ان هو ولد حلال..اكو وصل ..
وراح حمد علشان يفتح اليه الباب ..

ودخلوووو بعدين على الجماعة الي قاعدين .. وسلم وليد عليهم .. وبعدين راحووو كلهم غرفة الطعام وقعدووو ع طاولة الطعام .. وقامووو ياكلووون .. وهم ياكلووون .. اكيد سوالف .. ولما وليد يتكلم .. فطوووم تقعد وطالع فيه .. كل كلمه كان يقولها .. تعجبنها .. وهو بعد عجبها ..وقالت في خاطرها ..
خوووش صبي .. تفكيره حليو .. وشكله حليو .. وطيب .. واخلاق الف وحدة تتمناه .. مالت عليي اني .. وش فيني قاعدة افكر فيه ..
قطعت تفكيرها مروة ..
مروة : فطوووم ..
فاطمة : هااا ..
مروة : وش فيش ساعه صار فيني اناديش ..
فاطمة : وش تبغين ..
مروة : طاوليني صحن التبولة ..
فاطمة : هاااش متفرغه .. مافي الا اني اطاولش وياه ..
مروة : انزين اكلتيني .. اسفه ..
ومروة ذاك الوقت ما عجبتها طريقة كلام فاطمة وياها .. ولما خلصووو من الغذاء .. راحووو الصالة علشان يشربوون شاي .. ولاحظ علاوي ان اخته فيها شي ..

علاوي : مروة .. وش فيش مو طبيعيه ..
مروة : مافيني شي .. بس اكلم فاطمة وماعجبتني طريقه كلامها ويايي .. كاني قاعدة اطر منها شي ..
علاوي : وش عليش منها .. تعفسين مزاجش ع شي ما يسوى ..
مروة : لا ما احب احد يكلمني جذي ..
علاوي : انزين يمكن مو قصدها.. خلاااص عشاني انا انسي الي صار ..
مروة : اوك علشانك انت بس ..

صارت الساعه .. 12 تقريبآ كل واحد راح بيتهم .. وعلاوي ع طول على النت .. واستانس يوم شافها اون لاين ..

علاوي: هلا ..
....: وغلا .. شخبارك
علاوي : الحمد لله بشوفتش ..
.....: دوم مو يوم ..
علاوي : يدوم عزش ونبض قلبش ..
......: انزين علوووي .. قررت تقول ليي وش الي كنت بتقولة ..
علاوي : ايييي ..
....: يالله انتظر اني ..
علاي: انا صراحه بدون مقدمات .. وبدون لف ودوران .. احبش ..
لما شافت الكلمة .. انصدمت ..
.....: تحبني ؟؟ !!
علاوي : ايييييييي احبش ..
.....: تدري اني من ؟؟
علاوي : لا ما ادري .. بس الي اعرفه ان انا احبش ..
......: متاكدة لو عرفت اني من ما بتحبني ..
علاوي : لا لو من تكونين بظل احبش ..
.....: اني فاطمة .. بت خالتك ..
بيه وذاك الوقت علاوي .. حصل صدمة كبيييييييرة .. كلش ما توقعها ان تكون هي .. وظل ساااكت مدة..
فاطمة : وش فيك علوي سكت ..
علاوي : مافيني شي .. بس منصدم من السالفه حدددددددي..
فاطمة : وها للحين عند كلامك ان انت اتحبني ؟؟
علاوي : ايييييييي عند كلامي ولا بغيره ..
فاطمة : بس فات الاوان علاوي ..
علاوي : فاات الاوان لييييش ؟؟
فاطمة : لاني اني ما ابادلك مثل الشعور ..
علاوي : لا مو معقووووووولة .. تحبيني انتين وانا متاكد..
فاطمة : كنت احبك .. بس الحين حبك صار ماضي بنسبة حقي ..
علاوي : لاااااااااا انتين وش قاعدة تقولييين ..
فاطمة : قاعدة اقول الصدق .. والواقع .. انت حبيت شخصيتي المجهولة .. ما حبيتني لاني فاطمة ..
علاوي .....
فاطمة : شفيك سكتتت .. كلامي ما عجبك .. اسفه علوووي اني ما اقدر ابادلك مثل الشعور ..
علاوي : انتين مو فاطمة الي اعرفها ..
فاطمة : فاطمة الي تعرفها اتغيرت .. وانت الي غيرتها يا علاوي .. انت الي خليتني احبك .. واعيش سنين .. واني احبك .. وانت ما كنت تحس بإحساسي .. بس الحين بتحس .. بااااااااااي

وسكرت ايميلها.. وصار علاوي مجرد ماااضي .. وانتهى .. والحين تقدر تشوووف حياتها .. من غير علاوي .. .. وقامت تصيييييييح .. مو لان كسر خاطرها علاوي .. لا لان ولد خالتها .. وهي ما تبغي تخسر محبة خالتها اليها من ذا السبب ..

اتمنى عجبكم البارت .. انتظروووني في البارت الاخير

**بحور العشق** · 07-01-2009, 05:14 PM

صج فن الاحداث
مشكورة وما قصرتي يالغلا
ننتظر اليديد

**fofe** · 07-01-2009, 10:44 PM

يلا خيووو ننتظـــر ...!!!

**طفله مثل القمر** · 07-01-2009, 10:51 PM

يسلموووو ع المتابعة .. اترككم مع البارت الأخير

بعد مرور عدة اشهر .. حال علاوي حالة .. من ذاك الوقت الي قالت اليه فطوووم ما اتحبه .. وهو كاره حياته .. وكاره شي اسمه حب .. وقال بعد ولا احب ولا ابغي اتزوج بعد .. وش فيني انا ويه الحب كل ما احب وحدة قالت ليي ما تحبني .. انزييين كانووو يحبوني .. بس كله مني انا ومن غروري .. بس برجع مثل قبل علشان ما احب واتعذب جذي .. بس ما تدرون يمكن مع الوقت يلاقي الي تحبه ويحبها ..

قطعت تفكيرة ام علاوي ..
ام علاوي : علوووووووووي ..
علاوي : هااا اماااه ..
ام علاوي : الليلة عازمينا بيت خالتك ام حمد ..
علاوي : عزيمة ويه بعد .. وش المناسبة الي يسووون عزيمة ..
ام علاوي: اليوم بيتعادلووون ع بت خالتك فطوووم ..
وعلاوي ذاك الوقت انصدم الصدمة الثانية من فطووم .. وتوه بيقول الى امه ان هو مابيروح .. بس غير رايه .. علشان ما تقول فطوووم ان انا للحين متعلق فيها .. او فازة عليه .. لا مو علاوي الي تهزمة بنية ..
علاوي : اوك .. الساعه جم بتروحين ..
ام علاوي : خلك بارز ع الساعه 9 اوك ..
علاوي : اوك .. اتفقنا ..

تدرون فاطمة بتتزوج من .. بتتزوج وليد صديق حمد اخوها .. مثل ما قلت ليكم .. من اول ما شافته في بيت اخوها .. انعجبت فيه .. وانعجبت في اخلاقه ..في طريقه كلامه .. ويه الايام .. تعرف وليد ع فاطمة .. وشافها ان هي الوحيدة الي بيتقدر تفهمه ويفهمها طووول العمر .. ما بيلاقي شريكة حياته احسن من فطوووم .. وفطوووم وافقة ع وليد .. لان شافت فيه مواصفات الزوج الي تتمناه ..

(في بيت ام حمد)
فاطمة : اماااه .. قلتين الى خالتي ام علاوي ..
ام حمد: اييييييي قلنا ليهم ..
فاطمة : وش قالت بجي ..
ام حمد: أي بجي .. هي وعلاوي وابو علاوي واكيد مروة وياهم ..
فاطمة : اهااا ..
ام حمد: وش فيش انزين .. كانش مو مستانسة ..
فاطمة : اكييييد مستانسة .. مثل الوقت خايفه ..
ام حمد: والله وكبرتين يا فطوووم وبتصيريين عروس .. وان شاء الله نشوووف اولادش ..
فاطمة : توها الناس ع الاولاد..
ام حمد: الله يعطيني العمر .. واشوووفهم ..
فاطمة : ان شاء الله .. انزين اني بقوم اروح فوق علشان اشوووف وش البس الليلة ..
ام حمد: بل توش بتشوفين وش بتلبسين .. اول مرة فطوووم ماتبرز من قبل قبليين ..
فاطمة : امبله برزت اني .. بس محتارة وش اختار .. الحين بروح اختار .. ههههه

وراحت عن امها فوق .. وهي تفكر في الليلة .. شلون بتقابل علاوي بعد الي صار .. بس قالت في خاطرها .. مفروض ان اني خلاااااص ما افكر في هذا الشي .. لان حتى لو فكرت ما برجع شي من الماضي .. بشووووف حياتي ويه ولييد ولا بفكر في شي ثاني غير سعادتنا ويه بعض .. لان خلااااص ماليي غير ولييييد .. واختارت وش بتلبس الليلة .. اختارت فستان ناعم .. واكسسوارات تناسب الفستان .. وقالت بتخلي شعرها مفلوووول .. وبتخلي فيه اكسسوارات ناعمه .. حتى العطر الي بتخلي منها برزته .. ههههههه .. كيفها هي كيفها ..

(مريم ونور ع التيلفووون )
مريم : هلا نورووو ..
نور : هلا ريمي ..
مريم : سمعتين اخر خبر ..
نور : ايييييي
مريم : حلفي سمعتين ..
نور : وحق وي احلف سمعته .. هندي في المختبر .. ههههههه
مريم : ههههههههه مالت عليش .. مو خفيفة .. دبوووو وحدة ..
نور : مو امتن منش اني .. انزين وش هو الخبر .. ياام الاخبار ..
مريم : فاطمة .. الليلة بيتعادلووون عليها ..
نور : أي فاطمة بعد ..
مريم : بت خالت علاوييييي .. مالت عليش نسيتينها .. ومن جم شهر قايل لينا احمدووو عنها ..
نور : اييييييييي الي قال حباها علوووي .. بس هي رفضت حبه ..
مريم : اييييييييي يالهبلوووش ..
نور : انزين .. من بتاخذ ؟؟
مريم : بتاخذ صديق اخوها .. اسمه وليد ..
نور : الله يبارك اليها ان شاء الله ..
مريم : ويبارك ليي اني بعد هههههههه ..
نور : ويبارك ليش انتين بعد ليييييييش .. جيف فيه شي من ورايي يعني ..
مريم : لاااا اكلتيني امزززح وياااش .. هدويه انتين ..
نور : حسبالي بعد .. بتعرسين من ورايي .. ههههههههه
مريم : مالت انزييييين هههههههههه .. يالله سي يووو .
نور : سي يووو تو .. هبلوووش ..

جت المغرب .. وقلب فطوووم كل ما يتقدم الوقت .. يرقع ازيد وازيد .. اول ناس وصلووو بيتهم هم بيت علاوي ..

مروة : هلااااااااااااا فطيييييم .. مبروووك حبيبتي ..
فاطمة : الله يبارك فيييييش ..
ام علاوي : بسش تراوي .. تباعدي بسلم عليها اني بعد له .. خلي لينا شوي ..
وراحت خالتها وسلمت عليها .. وهي تحظن خالتها .. شافت علاوي وراها .. وابتسم اليها .. وهي ابتسمت اليه ابتسامة خفيفة .. وبعدين قعدووو في الصالة .. وياهم ام حمد .. وريم وحمد .. بعدين استاذنت فطوووم قالت بتروح المطبخ علشان تشرب ليها ماي .. وتروح فوووق لان الحين بيجووون اهل ولييد .. ومايصير يجووون وهي تحت ..
راح وراها علاوي .. انزهقت يوم شافته وراها ..
فاطمة : بسم الله الرحمن الرحيم .. زهقتني ..
علاوي : اسم الله علييييش ..
فاطمة : انزين وش عندك جاي هني يعني ..
علاو ي: جاي علشان اشوووفش .. واسالش ..
فاطمة : تسالني وي ..
علاوي : ليييييش اخترتينة ؟؟ ما اختارتيني انا ..
فاطمة : اظن قلت ليك من قبل ..
علاوي : لاااااااااااا ابغي الجواب الحييييييين .. وهو مجود كتفها ..
فاطمة : انزين هدنيييييييي .. عورتنييييي ..
علاوي : جاوبيني اول .. ليش هو مو انا ؟؟ هااااااااا
فاطمة : هدني بعدين بجاوب .. وهي تحاول ان تتباعد عنه ..
علاوي : يالله قولييي وش تحارسيييييين ..
فاطمة : لان وليييييد حباني كفاطمة .. مو حباني كمجهووووولة .. مثلك انت .. انت ما حبيييت فاطمة .. حبيت الشخصية المجهوووولة بس ..
علاوي : بس بعديين حبيتش .. حتى لما عرفت انش فاطمة ..
فاطمة : حبيتني عقب شنووووووو .. عقب ما كرهتك وطلعتك من حياتي .. خلااااص علوووي انسى .. وشوووف حياتك .. لان الحياه ما انتهت .. شوووف حياتك مع وحدة غيري ..
علاوي : حياتي انتهت خلااااااااااص .. وطلع عنها ..

وراحت ع طووول غرفتها .. وقامت تصيييييح .. مادري الي سويته صح لو غلط .. اني ما اكرهه .. ليش قلت ليه اكرهك .. هو للحين ولد خالتي .. يعني ما اكرهه .. ولا عمري بكرهه .. لان من لحمي ودمي .. وقطعت افكارها مروة ..
مروة : فطيييييييم يالله بسرعه نزلي اكووو وصلووو الناس صار ليهم ساعة وشي ..
ومسحت دموعها بسرررعه ..
فاطمة : اوك الحين انزل بس اعدل روحي ..
مروة : وش تعدلييين احلىىى عروووووووس يالله ..

وعقب ما عدلت الكحلة .. نزلووو ويه بعض ..واول ما نزلت الكل قام يطالع فيها .. وقعدت صوب مروة .. وام وليد قامت تتسال فيها وكل الوقت فاطمة .. منزلة راسها مستحية .. وتعادلووو لرجال .. واتقفووو ع المهر .. وهل السوالف .. واتفقووو تكووون الحفلة عائلية وبسيطة .. وبعدين عقب ما تعادلووو وخلصوووو .. ام العروس قامت اجبب ..

ام حمد: كللوووووووووووش .. مبروووك يا بتي .. وهي حاظنتنها
فاطمة : الله يبارك فيش ..
وكلهم بعدين قامووو وحظنووو العروس .. ويباركووون ليها .. بعدين كلهم راحووو ع بيوتهم .. وراحت فطوووم فوق غرفتها .. وقبل لا تنام فتحت ايميلها :

فاطمة : هلا نورووو شخبارش ..
نور: اخباري من اخبارش يالعروووس .. مبروووك ..
فاطمة : الله يبارك فيش..
نور : عاد مو تنسين ما تعزمينا بعد ..
فاطمة : افااا اني انساكم ..
نور : اييييييييي نسيتينا .. حتى ولا قلتين لينا عن الليلة ..
فاطمة: لان كل شي صار بسرعه بسرعه .. ويش اسوي يعني ..
نور : انزين سامحناش هل المرة .. بس مو تعيدينها ..
فاطمة : انزين حبيبتي .. اني بقوم لاني تعبانة حدي .. صدق كان يوم متعب .. باااي ..
نور : بايي نوم العوافي ..
فاطمة : الله يعافيش باااي .

بعد خمس سنوات .. عاشت فطوووم احلى حياتها ويه وليد .. وعلاوي .. عاش وحييييد .. كاره حياته الى يومكم هذا .. ما يفكر في الزواج ولا شي .. بس اشتغل شغلة اوك .. عقب ما خلص دراسته برة في الاردن .. صار مهندس ..وكل ما تفاتحه امه في موضوع الزواج .. يقول اليها توها الناس .. ما يبغي يتزوج .. عقب فاطمة .. محد قدر يدخل قلبه ..وفطوووم حامل .. في الشهر الخامس .. يعني قريب وتولد .. وريم مرت حمد .. اليوم ولدت وجابت صبي .. الحين عاد كلهم راحووو اليها المستشفى .. امها وام علاوي وعلاوي .. وام حمد .. وفطوووم وليد ..

(في المستشفى )
فاطمة : الااااااااااااااااي يهبل الجاهل .. يشبه اخويي ..
وليد : أي ياخذ وااجد من حمووود .. بس بعد ياخذ من امه تشونة ..
فاطمة : ايي متى اجيب واحد مثلة ..
وليد : قريب له .. تبغينه يشبهني لو يشبهش ..
فاطمة : ابغيه يشبه الاثنين ..
ريم : انزين ذبحتين ولدي جيبي علشان ارضعه ..
فاطمة : بل بل بل عليش ..ما صار حملته تشونة ..
ريم : ماتشوفينه يصيييييح .. يبغي امه احم ..
وهني وصلووو علاوي وامه ..
علاوي : مبروووك ريم .. مبروووك حمد .. يتربى بعزكم يارب ..
عقب ما سلمووو قعدووو كلهم ع الكراسي .. وحمد يضيفهم .. يعطيهم الحلاوة.. ويصب ليهم الشاي والقهوة ..
ام علاو ي: انزيييين ما قلتوون وش سميتونة ..
حمد: للحين ما سميناه .. مو عارفين وش نسميه ..
ام علاوي : يووووو كل الاسامي مو عارفين وش تسمونة ..
ام حمد: ما عليش منهم كل يوم يتهاوشووون .. كل واحد يبغي يسميه اسم .. من جذي للحين ما سموووا ..
ريم : ههههههههه بعد وش نسوي اول واحد كله جذي نتحير وش نسمية ..
فاطمة : ليش تتحيرووون اني عندي ليكم خوووش اسم ..
كلهم: قولي له ..
فاطمة : سمووو علاوي ..
وذاك الوقت لف وجه علاوي الى فاطمة .. وابتسمت اليه .. وابتسم اليها .. وطلع عنهم .. وفاطمة استأذنت منهم بحجة انها بتروح تشتري ليها عصير من الكفتيريا اللي تحت .. ولحقت وراه ..
فاطمة: علاوي بتجي وياي الكفتيريا؟
علاوي ما كان يبي يروح بس ما يدري ليش قال بس اللي يعرفه ان فاطمة تبي تكلمه اكيد!: أي
وطول الوقت يتمشون مع بعض وكل واحد ساكت على الثاني .. وينتظر الثاني يبدأ الكلام .. وصلوا الكافتيريا .. واشتروا كل واحد عصير .. وكانت فاطمة بتدفع بس
علاوي: افا يا بنت الخاله .. انا قدامش وتدفعين؟
ودفع عنهم وطلع وياها يتمشون ..
فاطمة: اني ما لحقت وراك ولا جيت وقلت لك تعال ويايي الا لأني ابي اكلمك
علاوي: ادري
فاطمة: تدري؟
علاوي: أي بس ويش اللي تبين تتكلمين فيه
فاطمة: انت الحين كبرت .. وكل واحد في سنك تزوج وعنده ولاد .. وانت للحين حتى فكرة الزواج مو خاطرة على بالك .. امك تبي تشوف عرسك وتفرح فيك وفي ولادك الى متى يعني؟
علاوي: انا خلاص ما ابي اتزوج .. عفت الزواج وعفت عوار الراس
فاطمة تطالعه بنظرات استغراب: عوار راس؟
علاوي: أي الزواج مع وحدة غيرش اكييد بكون عوار راس .. لأني مستحيل بلقى وحدة تفهمني مثلش .. ولا بحب وحدة غيرش
فاطمة: بس اني خلاص تزوجت وحامل .. المفروض انك تتشجع اكثر لفكرة الزواج
علاوي: بس
فاطمة تقاطعه: لا بس ولا شيء واني بنفسي بدور لك العروسة
علاوي: قلت ليش خلاص .. ما افكر بالزواج .. يا من علمتيني احبش .. علميني شلون انساش ..

النهااااااااااااااااااااااااااااية
فرحوووووووووني بردودكم

**fofe** · 07-02-2009, 01:01 AM

واااااااااااااااااااااااااو قصــة أكثــــــــــر من روووعة ...!!!

ونهايتــها احلى من الحلاوة ...!!

يسلموو خيووو لانش كملتيها ..!!

تحياتــــي
فوفـــــي