البارت الاثنا عشر
صدفة ومن بين كل الناس علقني من يوم شفته وعيني جت في عينه حسيت شي بعيونوا حيل يجذبني لما ابتسم وبانت بوجهي تلاوينه ..

هذه الاغنية الى كانت تسمعها فطوووم وهي قاعدة على النت .. وامها خربت عليها ..

ام حمد: فطمووووو ..
فاطمة : نعم ..
ام حمد: عاد بندي هل الاغاني .. عورتين راسنا ..
فاطمة : اووووف حتى في غرفتي ما يخلوني ع راحتي ..
ام حمد: انزين يا طايحه النصبة .. اتصلي حق اخووش .. من رجع من شهر العسل ما شفناه ولا اتصل الينا ..
فاطمة : بعد وش يسوي فيش من زمان حصل المرة .. بعد حقويش يتصل فيش..
ام حمد: مالت تتصلين لو كف الحين ع راسش..
فاطمة : اوووووف عورتون راسي .. حنة حنة حنة ع راسي .. هذا الي فالحين فيه ..
ام حمد: فطمووو .. بعد كلمة بتشوفين شي ما شفتينه ..
فاطمة : هااااش التيلفون اتصلي .. فكيني ..
ام حمد: فطموووو مافيه سفر خلااااص ام اللسان ..
فاطمة : لا كلشي ولا السفر .. خلااااص سوري مامي .. وراحت تبوسها ع راسها ..
بعدين اتصلت ام حمد الى ولدها ..

حمد: هلاااااااا باختي القمر ..
ام حمد: لا مو اختك امك ..
حمد: هلااااااااا بامي الحلوة ..
ام حمد: أي أي تدري يعني ان عندك ام .. وينك انت لا تسال ولا تمرنا ؟؟
حمد: وش اسوي امااه الحين اسبوعين مريضة ريم .. مادري وش فيها ..
ام حمد: لا يكووون حملت الجاهلة .. وتخفقها من الدراسه ..
حمد: هههههههه .. لا مو حامل .. بس مصخنة حدها ..
ام حمد: بااااااااال اسبوعين فيها اصخونة .. بتموووت الجاهلة ..
حمد: وش نسوي بعد .. تروح وترجع عليها ..
ام حمد: مو تسكت قوووم ودها المستشفى ..
حمد: وديتها بس مافيه فايدة ..
ام حمد: يووووووو .. عجل احنا اليوم العصر بنجي نشوفها ..
حمد: تعالووو البيت بيتكم ..
ام حمد: يالله اكو فضحتنا فطمووو .. تقول خلص الكردت .. مع السلامة ..
حمد: الله يسلمش ..
فاطمة : بل بل 10 دقايق وانتين تهدرين ويه ولدش ..
ام حمد: 10 دقايق يعني وااجد .. مالت بس ..
فاطمة : لا شوي .. طار الكردت ..
ام حمد: بلا رزالة عليي .. بشحن ليش بعدين ..
فاطمة : ابغي 20 دينار ..
ام حمد: ماتبغين 20 كف ؟؟
فاطمة : اوووووووف .. وهي مغاورة عن امها .. وكملت مشاركتها في المنتدى ..
ام حمد: صبري لكن بقطع عليش واير النت .. بخليش تصيحين .. يا ام السان .. وطلعت عنها ..

(نرجع الى بيت علاوي (
علاوي وهو نازل من على الدرج : امااااه ..
ونزل الصالة ما شافها هناك .. شاف بس مروة .. وهي قاعدة صوب التيلفزيون ..
مروة : هلا علوووي ..
ما عطاها وجه.
مروة : وش فيك ؟؟ خالتي مو هني .. نايمة في غرفتها ..
علاوي : اهااا .. مشكورة .. وتوه بيركب فوق مرة ثانية ..
مروة : علوووووووي ..
علاوي : نعم ..
مروة : ليش يعني ما تبغي تقعد ويايي .. مو عاجبتنك قعدتي وياكم ؟؟ اذا مو عاجبتنك من الحين بروح بيتنا ..
علاوي كسرت خاطره : لاااااااا .. هذا بيتش مثل ما هو بيتنا ..
مروة : عجل ليش احسك متضايق مني .. اني وش سويت ؟؟
علاوي : ما سويتين شي .. بس انا متضايق شوي من شي خاص فيني..
مروة : انزين يصير تقول ليي وش الي مضايقنك .. يمكن اقدر اساعدك ..
علاوي : لا ما يحتاج لان انحلت المشكلة ..
مروة : انزين وش رايك اليوم نطلع ويه بعض نروح نتعشى ؟؟
علاوي : اوك .. وهو يبتسم ليها ركب فوق ..

مروة حست بارتياح لما قال ليها اوك .. قالت الحين شوي شوي بتقرب من اخويي .. لان ماليي غيره بهل الدنيا .. ولا هو الي اخت غيري .. ان شاء الله يعتبرني صديقة واخت .. الي يشكي اليها همه .. وتشكي اليه همها ..

الساعه 5 العصر ..راحت ام حمد ويه فطووم .. بيت حمد علشان يشوفون ريم .. وشافوها وسألووو عن احوالها .. وقعدووو وياهم يمكن ساعه جذي تقريبا .. بعدين رجعوووا بيتهم ..

عقب صلاه المغرب دقت مروة الباب .. ع اخوها علوووي ..
علاوي : من ..
مروة : هذه اني .. مروة ..
علاوي : دشي الباب مفتوح ..
مروة دشت الغرفه .. اني جاية اذكرك علشان نطلع ..
علاوي : انا ما نسيت .. بس الحين ادش اسبح واتبرز .. ونطلع ع طووول ..
مروة : واني بعد عجل بروح اتبرز ..
علاوي : اوك خلال ساعة تقريبا.. بنطلع اتفقنا ..
مروة : اتقفنا وهي تعمز اليه في عيونها ..

وعقب ساعه .. طلع علاوي ويه اخته مروة .. وراحووو مجمع البحرين .. وقعدووو هناك يتمشووون ويه بعض .. ويدخلووون المحلات الي هناك .. واشترت مروة ثياب .. ونعل وشنط من هناك .. وعلاوي بس اشتره اليه .. عطر من الحواج .. بعدين راحووو جيان علشان يشترووون ليهم اغراض السفر .. وعقب ما خلصووو من التسويق راحووو وقعدووو في المطاعم وطلبووو ليهم باستا من يم يم تري .. وبعدين راحووو البيت .. وشافووو ام علاوي في الصالة تحارسهم ..

مروة : هلا خاله ..
ام علاوي : هلا بتي .. ها استانستووون ..
مروة : اييييييييي .. اول مروة احس استانس جذي ..
ام علاوي : دوووم ان شاء الله هل الطلعات مو يوم ..
علاوي : هههههههه لا ان شاء الله على امرش كل يوووووم ..
مروة : احم .. من قدي بعد .. اطلع ويه واحد قمرر الكل يحسدني لاني امشي وياه ..
علاوي : ههههههههه عاد مو لهل الدرجة ..
ام علاوي : ههههههه .. انزين يالله روحووو نامووو لان باجر علينا سفرة من الصبح ..
مروة : ان شاء الله .. وراحت وباستها على راسها .. وقالت ليها تصبحين ع خير ..

بعدين راحووو كل واحد ع غرفته .. علشان يناموون .. باجر عليهم سفرة .. ..
(الصبح في بيت ام حمد)
قعدت ام حمد .. وشافت فاطمة للحين نايمة .. وراحت اليها الغرفه .
ام حمد: فطمووووو .. ام النوم ..
ولا قعدت فاطمة .. في سابع نومة ..
ام حمد: قوووومي اكو الباص وصل .. لا نهرب عنش ..
من سمعت ان الباص بيهرب عنها نطت ..
فاطمة : يووووووو ولا يقعدوني بعد.. الحين شلون ابرز روحي .. ما يصييييير ..
ام حمد: قوووومي .. باقي ساعتين ويوصل ..
فاطمة : عجل وش فيش تزهقيني تقولين ليي وصل..
ام حمد: لو ما قلنا ليش جذي ما قمتين من نومش .. ام النوووم ..
فاطمة : يالله انزين بقوووم اسبح وببرز روحي ..

وعقب ساعتين .. راحوا بيت ام علاوي وام حمد .. شارع البديع .. مكان الي يوقف الباص .. وركبووو شنطهم .. وبعدين حارسوووا لما يكتملون الناس الي وياهم .. ومشوووا .. على الصلوات ع محمد..


وصلووو عند الجسر .. وقفوهم الامن .. وقال الى السايق .. ما يصير ان انتون اطوفووون من الجسر .. لان مافيه الا سايق واحد .. انزين وبعدين .. اتصلووو حق واحد علشان يجيب .. ليسن واحد كان وياهم في الباص .. يازعم السايق الثاني .. بعدين يوم انحلت هذى المشكلة ..طلعووو ليهم حجة ثانية .. ان ماعندهم مطارق مال حريق ؟؟ يقولون علشان اذا صار حريق يكسرووون النوافذ ويطلعووون منها ( فلم هندي هو ) هههههههه .. انزين وبعدين انحلت المشكلة .. واصلوو طريقهم الى سوريا .. الحين صار وقت صلاه المغرب .. وقفوهم عند المحطة علشان يصلون ويتعشووون .
عقب ما خلصووو من الصلاه .. تعشووو .. بعدين واصلووو الطريق .. الا عقب ساعه من مشى الباص .. من المحطة .. الا مرة وحدة ما سمعووو الا مروة تقول ..

مروة : يووووو .. ما تشتمووون ريحة وايرات ..
وهم كانووو اخر ناس قاعدين ..
ام علاوي : اييييييييي .. عفر حريقة ..
ماسمعووو الا وحدة من النسوان تصارخ وتقول .. وقفوووو الباص حريــــــــــــــــــــــــقة ..
سمع السايق .. وقف الباص مرة وحدة وسط الشارع .. ويقول : نزلووووووو بسرعه (صار فلم هندي عدل )
وبعدين كل واحد نزل بسرعه بسرعه .. الا وحدة نزلت بدون نعال .. والثانية بدون حجاب .. وحدة عليها للحاف بس .. صارت حالتهم حالة .. وحدة نزلت بدون ما تنزل بتها الصغيرة النايمة .. ههههههههه صارت حالتهم مأساوية .. فلم هندي حقيقي .. خخخخخخخ.. وبعدين ركبووو الصبيان فوق الباص وشافووو ان البانكة محترقة .. وفصلوو وايراتها .
علاوي : يالله خلااااص ركبووو مافيه شي ..
فاطمة : لاااااااااا ماني راكبة .. لان حلمتي الي حلمتها ما صارت كامل .. صارت نصها .. .. يرجعونا البحرين احسن .. بعدين ينفجر علينا الباص .. وتتحقق الحلمة .. ماني .. أني كنت حاسة ان بيصيدنا شي ..وصار..
مروة: يرجعونا او يغيرون لينا الباص .. اني وحدة مابركب بعد ..
علاوي : وش فيكم انتون .. قلنا ليكم مافيه شي ركبووو خلصونا .. خلونا نروح بالسلامة ..وبلا هرار واجد .. حاسة وهرار .. صلووو على النبى ولا بيصدنا شي..
فاطمة : الموتة وحدة .. وركبت الباص بالغصب ..

ركبووو الباص .. ويوم ثاني الصبح .. وصلووو السيدة زينب .. وسكنووو في شقة فيها ثلاث غرف .. غرفه الى علاوي بروحه . وغرفه فيها فاطمة ومروة .. وغرفه الثالثة فيها ام علاوي وام حمد..
ومن السفرة .. صارت مروة صديقه فاطمة .. كانهم يعرفون بعض من زمان .. وعلاوي عرف شخصية فاطمة الي ما كان يعرفها .. الطيبة والحنان .. والحلاوة ..

كانو على الغدة كلهم يتغدون ..

علاوي : وش رايكم نروح يوم واحد لبنان ..
مروة : اييييي .. اني ربعي كانووو يتكلمون عنها وصار خاطري اروح ..
فاطمة : أي أي عاش ولد خالتي .. يالله متى بنروح عاد..
علاوي : ههههههه .. اول شي ناخذ موافقه ام علاوي .. وام حمد بعد له ..
ام علاوي : والله عليي اني عادي ..
ام حمد: اختي ام علاوي بتروح يعني اكيد اني بعد ..
علاوي : عجل اتفقنا .. الحين بس اروح احجز لينا تذاكر .. بنشوووف أي يوم نروح .. يمكن باجر او عقب باجر وش رايكم ..
فاطمة : خوفتي نروح البحرين واحنا مارحنا ..
علاوي : هههههههه مالت على فيسش انزين .. علاوي اذا يقول شي يسوي .. يعني يسوي .. قلت نسافر لبنان يعني نسافر ..
مروة : انزين عن الهرار الي ما يخلص انت الحين روح احجز لينا تذاكر .. واحنا بنروح الحرم الحين علشان نزور وبعدين بنروح نتسوق ..
علاوي : لا مافيه طلعه بروحكم .. حارسوني بروح وياكم ..
فاطمة : لا مو بروحنا بنروح ويه خالتي وامي ..
علاوي : امي ما تروح اسواق ولا خالتي .. يعني انا بروح وياكم .. مو مجنون انا اخليكم بروحكم
مروة : يعني تخاف علينا ..
علاوي : يعني اذا ما خفت على اختي وبت خالتي بخاااف على من ويالله انا اخليكم ونتلاقى في الحرم ..

وبعدين راح علاوي وحجز ليهم التذاكر وكان موعد السفر للبنان باجر . واستانسوو حدهم يوم قال ليهم ..

مروة : الاااااااااي ويلي على روحي اخيرا بروح لبنان ..
فاطمة : ويلييي عليي اني بعد .. صراحه خوووش سفرة .. اول مرة اسافر واستانس جذي ..
علاوي : تدرون انكم هبلان ههههههه ..
مروة : كيفنا احنا كيفنا ويوووو ..
فاطمة : متى يجي باجر ..
علاوي : خلكم من باجر الحين وخلونا نروح السوق .. لو ما تبون تروحون ..

بعدين راحوو السوق .. وتسوقووو .. علاوي ما اشتره ليه ولا شي .. يقول ما عجباه شي .. اما مروة وفاطمة .. اشترووو السوق كلها .. تدرون البنات اذا يروحون الاسواق ..
وخلصووو من التسوق .. وراحووو الشقة .. تعابة حدهم كل واحد راح ع غرفته ونام في سابع نومة .. وقعدووو يوم ثاني الصبح .. وركبووو في الباص الي بيوديهم لبنان ..
وقفهم الباص علشان يتريقون ..

ام علاوي : هدويه المكان الي جايبنة فيه ..
علاوي : وش فيه اكو وش حلاوته له ..
ام علاوي : مو على الحلاوة .. برررررد حده .. مو قادرة ..
علاوي : هههههههههه بعد حسبالش البحرين ..
ام علاوي : أي والله اكو عقب جم يوم بنروح الى الحر ..

بعدين اتريقووو .. وعقب ما تريقووو .. واصلووو رحلتهم الى لبنان اول ما وصلووو هناك .. ركبووو في قارب .. ودار فيهم وهم يدورون .. وذاك مشغل الاغاني حدها .. ويشوفون المناظر الطبيعية .. الي تسحر ..
فاطمة : ويلي ع هل المناظر .. تشرح الخاطر ..
مروة : أي والله .. كأنه محسرين ماعندنا هل المناظر في البحرين ماعندنا الا جبل الدخان .. لا ولا يسمى جبل بعد .. شوفي هل الجبال بس..
ام علاوي : بسكم عاد عقرة ع البحرين ..
ام حمد: ههههههههه وش دراني عنهم ولا كأنها بلدهم ..
علاوي : سكتووو عاد لو ويش قلتون .. لو وين رحتون مصيركم للبحرين .. ام المليون نخلة ..
فاطمة : لا ام مليون اشارة مرور ههههههه

عقب رحلتهم البحرية .. راحووو علشان يركبون في التلفريك .. اول ماشافته مروة قالت ..
مروة : بل ماني راكبة اخااااااااف ..
فاطمة : مالت عليش الا وش حلاوته تشوفين لبنان بكبرها منه ..
مروة : اييييي ادري بس يخوووف شوفيه انتين ..
علاوي انزين ماتبغين تركبين قعدي انا وفاطمة بنركب ..
مروة : لا بركب .. مو كل يوم اني بجي ..

عقب الكلام الطويل الي ما يخلص بينهم .. راحووو هم الثلاثة وركبووو في التلفريك .. واستانسووو حدهم .. اولهم مروة الي كانت خايفة بالبداية.. بس بعدين قالت ياريت كل يوم نجي ..
وعقب ما خلصووو من التلفريك .. راحوو مغارة جعيتا .. اول ما دخلوها ..
فاطمة : وااااااااااااو كشوووووووخي حدها ..
مروة : ماعندي شي اقوله غير روووووعه ..
علاوي : انزين خلونا نكمل طريقنا داخل له ..
مشووو شوي داخل المغارة .. شافووو نقعه ماي هناك .. والناس واقفين وبها ويفلتون فيها أي عملة عندهم ..

مروة : حق وي يعني يسووون جذي ..
علاوي : هذا الله يسلمش .. اذا عندش امنية تفلتين أي .. عملة عندش .. وتقولين الامنية الي عندش وتتحقق ..
فاطمة : هررراررر يعني .. وش عليش منهم امشي بس..
مروة : انزين هرار واحنا وش علينا اكو عندي ربية من البحرين .. بفلتها وبجي ..
فاطمة : مو بس انتين بجي وياش ..
علاوي : بل بل عليش توش تقولين هرار والحين بتروحين ..
فاطمة : كيفي ..
وراحووو وفلتووو الربابي الي عندهم وقالووو امنيتهم .. وكملووو الطريق ولما خلصووو .. في جزء ثاني في المغارة .. يروحون في قارب .. ماااااي .. وذاك الماي بااااااارد حده .. والمغارة بعد باردة .

علاوي :الحين بنركب بس حطوا بالكم
فاطمة ومروة: ان شاااااء الله
وعقب ما خلصووو من رحلة المغارة .. طلعووو برة وشافووو ام علاوي وام حمد ينتظرونهم .. وبعدين ركبووو الباص .. وداهم متحف المشاهير .. هناك شافووو المشاهير منهم .. اطول رجل في العالم .. ومشاهير واجد ما اذكرهم ..
بعدين رجعوووا سوريا مرة ثانية .. وقعدووو فيها يمكن اسبوع بعد .. بعدين رجعووو البحرين ..

ان شاء الله عجبكم البارت .. انتظروني في البارت الجاي .. بتعرفون وش بيصير بين علاوي وذيك المجهولة .. هل بتضل مجهولة او بيعرفها .. واذا تبغوون تعرفون من هي .. شوفوووني في البارت الي بعده