يوم الجمعه الصبح الكل تقريبا نش الضحى..من التعب اللي تعبوه امس... نورة اول مانشت ودخلت تتسبح وبعد ما خلصت تلبست كندورة حرير مفصصه وشيلة بيظا وحطت شوي غلوس وشادو.وخلت فطوم راقده.. ونزلت تعاون امها... بيت عمها كلهم معزومين عالغدا عندهم اليوم...واكيد امها مرتبشه...يوم نزلت حصلت حصة وشيخه وامنه وعليا اختها سابقاتنها... قعدن يرتبن الصالة ..وطرشن البشاكير يرتبون الميلس..لانهن طبعا مايرومن يسيرن.. ام خالد امرت نورة تروح تسوي دخون وادخن البيت... وطلعت نورة من البيت سايره صوب المطبخ... حطت اليمر على الضو وقعدت تتريا لين مايولعن...واول ماخلصن حطتهن في المدخن ...سارت صوب حجرة امها عشان تاخذ لبان من عندها وادخن....بس وهي سايره صوبها نزلوا عبدالله وسعيد متسفرين ومتكشخين ودهن العود يفوح منهم... وتوهم قايمين من النوم ..وكانت الساعه 12 ذيج الساعه وقراب صلاة الجمعه... يوم شافها عبدالله..قال.
عبدالله: تعالي تعالي....شو عندج؟
تحجبت نورة بسرعه ويت صوبه...وهي قلبها يدق بسرعه.. محلاك ياسعيد وانته متكشخ...بس حرام عليك اللي سويته فيني والله.... تنهدت ومسكت اعصابها..
نورة: صح النوم... ماعندي شي الا يمر..
سعيد كان يحس ان دقات قلبه تنشاف من ورا الكندوره..وخاف ان حد ينتبه عليه وعلى ويهه المتلخبط والمتلهف على هالحماره اللي فاهمتنه غلط... عشان جي ابتعد شوي عنهم ووقف عند الباب..اونه عاد يحشم ...
عبدالله: شو حاطه فيه؟
نورة: ماحطيت شي ..امبوني بحط لباااان عشان ادخن البيت...
عبدالله: لا..حطي عود وتعالي دخنيني...بنسير المسيد...
نورة: ان شاء الله..
سارت نورة صوب حجرة امها وحطت عود معطر وردت صوب عبدالله.. وعطته المدخن.. ادخن شوي سفرته وعقب عطاها المدخن..
عبدالله: حطيه تحت كندورتي لو سمحتي يعني...
نزلت نورة ودخنت كندورة اخوها لين ماقالها بس... عقب شل المدخن وسار صوب سعيد..
عبدالله: اندوك ادخن...
شل سعيد المدخن وادخن شوي ورده عليه..
عبدالله: هات بحطه تحت كندوورتك..
سعيد: لالالالالا ..بسّي من الدخون خلاص قمنا نروح...
عبدالله: ورففففففففففجه..... عنبووو صلاة الجمعه ماتدخن عدل..
نزل عبدالله وحط المدخن تحت كندورة سعيد... وتموا سعيد ونورة مجابلين..سعيد حاط عينه على ويهها وهو مرصص عيونه وميت قهر...من متى نورووه تنزل عيونها للارض وترفض اطالع فيه يوم تسمح لها الفرصه..!!!... ماشي فايده منج...مابتتفاهمين فبيتكم...التفت عنها يوم حس ان عبدالله خلاص بينش..
وفعلا نش عبدالله ورد المدخن على نورة وروحوا سايرين صوب المسيد... ردت نورة ودخلت حجرة امها حصلت ابوها مخلص سبووح ومتلبس وقاعد يحط العقال على راسه...يت نورة ووايهته...
نورة: هاا ابوويه ساير المسيد؟؟
بو خالد: هي بنتي بتلاحق الصلاة...
نورة: عيل اندوك ابويه ادخن...
ودخن بو خالد الغتره وردت نورة تحط المدخن تحت ثيابه بعد... وبعد ماخلصت طلع ابوها وسار المسيد هو بعد...بعدها تذكرت نورة خالها..فديتك ياخالي محد دخنك..وربعت صوب حجرة الضيوف وين كان خالها اروحه يتلبس لانه حرمته كانت ويا امها...وحبته وسولفت وياه ودخنته وردت تطلع عنه..وردت صوب حجرة امها..طلعت نورة العوود وحطت بدالها لباان..وخطفت عالبيت كله ادخنه... وهي كله بالها مشغول بسعيد...ليش قلبها يقولها ان سعيد صدق يحبها؟؟... عنبوو ماسد اللي سمعته من خوله...؟؟؟ البنت مكلمينها عن خطبتها وظامنه هالشي...اللي مزعلنها ان فطوم ماخبرتها ولا نبهتها على هالشي..وهي تعرف انها مهتمه بسعيد...يمكن مسكينه ماتدري ان سعيد مرمس خوله عن خطبتها...ماتقدر تلوم البنت بعد...اللوم كله يطيح على راس سعيد...ومابتسامحه عاللي سواه فيها ابد....!
كملت مشوارها صوب حجرتها ووعت فطيم عشان تتسبح وتصلي الجمعه... وماخلت حد ثاني ماوعته...بيوونهم بيت عمهم وماتبا حد منهم راقد...فظيحه...وفعلا عالساعه 1 الا ربع جي وصلوا بيت عمهم ماعدا عنود اللي خلها في البيت اروحها حليلها....دخلت ام سلطان وحريم عيالها مريم ومنى وعيالهن البيت عند باقي الحريم..اما بو سلطان وسلطان وحميد وخليفه وحمدان كلهم دخلوا الميلس الكبير وين الرياييل كلهم متيمعين...
خليفه وحمدان كلهم عيونهم على سعيد..وااحد منقهر وواحد منحرج... خليفه يقول في خاطره هذيلا بعدهم ماراحوا؟؟؟... وحمدان يقول في خاطره يالفظيحه..لو يدري الريال شو مسوي باخته بيييب آخرتي.. ..
المهم يلسوا وتغدوا وسولفوا..ونفس الشي عند الحريم... وبعد الغدا على طول احتشروا هل الشارجه يجهزون ويبون يردون بيتهم...حاولوا وياهم منيي منيي انهم يتمون لين العصر بس هلال ماطاع... يقول وراهم اشغال وايده...
انقهرت فاطمه من هالخبر.... مرن يومين ومارامت ترمس نورة في السالفة... حليلك ياخوويه مالك نصيب..
.وخلال ساعه كانوا هل الشارجه متيمعين كلهم في الحوش يسلمون ..سعيد عيونه متعلقه بنوره اللي واقفه عدال حصه...
وخليفه شوي وبيكفخه على راسه على باله انه يطالع حصه...وكان بيدزه دز لسيارته عشان يفكه من حراق الاعصاب هذا...
وحمدان دارن عيونه على البنات كلهن وعرف البنت اللي شافها واللي كانت متغشيه وواقفه عدال حصه ونورة.....ياحي هالطووول والله...وفطوم انتبهت له وعرفته... وقعدت تتحرطم عليه بصوت واطي وحصه ونورة يسمعنها وميتات ظحك...حمدان بثقته الزايده بنفسه عرف انهن يرمسن عنه وان البنت تقول شي وهن يظحكن عليها وعليه...رفع ايده وسوالهن باي باي من بعيد وهو يبتسم لهن ابتسامه حلوه....بس عشان يقولهن انه يعرف انهن يطرنه هو...رفعن نورة وحصه ايدهن وردن له نفس الحركه...
وفطوم اطالع وهي تفور مكانها... وتقول في خاطرها..مسود الويه يسوي هالحركات وسعيد عاطنه ظهره..لو مجابلنه ما بيييسر يطالع صوبهن حتى....
سعيد انتبه على نورة انها تسلم على واحد من عيال عمها....وفااار من غيظه هو بعد...شو السالفه ان شاء الله؟؟؟... احين ودرتيني وحطيتي عينج على اللي اصغر عنج؟؟؟...بس رد وطرد هالفكره من باله.. نورة مب من هالنوع ابد...بس ماعليج والله دواج عندي والايام بتثبت هالشي... تتعمد تحرق اعصابي وتنرفزني..وتسوي عمرها مب حاسه....بس ماعليه...!
وخليفه بعد انتبه على هالحركه..ويوم صد وراه عرف ان حمدان مصدر هالربشه اللي عند البنات.وهو واقف وعينه عليهن ويتبسم لهن....خسك الله ياحمدان شو تسوي؟؟..قسم بالله دواك في البيت يالطويل...وماغار منه لهالدرجه لانه يعرف انه مثل اخوهن وهن يحبنه لانه دوم اييهن ويسوولف عليهن... بس انقهر لانه حصه عاطية حمدانووووه اهتمام اكثر مما عاطتنه هو ....
وبعدالتوصيات والسلامات ركبوا سياييرهم وساروا..وعليا وياهم طبعا... وفطوم وسعيد ميتين قهر...وخليفه مرتاح...وحمدان بكل بساطه اختفت الضحكه عن ويهه...
يوم ردوا الرياييل كلهم الميلس فتح عبدالله موضوع التيلفون مع عمه...وطلع هذا ماعنده اي اعتراض... اصلا الملجه كلها كانت عشان ان عبدالله يكلم عنود ويتفاهمون على حياتهم رباعه...واستانس عبدالله وطلب منهم انهم هم اللي يقولون لعنود عن هالقرار ..عشان ماتقعد تناقشه وتحشره... قوم بوسلطان صلوا العصر وردوا بيتهم..وتموا خليفه وحمدان ويا عبدالله...دخلوا البيت وماحصلوا حد..خلاهم في الصالة وروح فوق ..ودخل على نورة وحصل حصه وياها متسدحات ويسولفن..
عبدالله: نوروووه.. تعالي ركبيلنا الكيمره عالتلفزيون...
نورة: انته ومنوو؟؟
عبدالله: خليفه وحمدان تحت...
نورة: شو بطالعون؟
عبدالله: يوووووووه فاتحتلي تحقيق..بنطالع الرزفه مالت امس..
حصه: احلـــــف,,, يالله انته واعدنا انه بنشوووفه...
عبدالله: انزين شوفنه عقب...
حصه: لا نبانطالع وياكم..
عبدالله: وشمعنا يعني.؟؟؟
نورة: انتوا تعرفون الشباب الموجودين نحن مانعرفهم...
عبدالله: عنلااااااااااتكن زاد...وانتن شو تبن بالشباب عشان تخبرن عنهم؟..
حصه: مانباااهم بس الشوفه وياكم احلى ..السوالف والتعليقات... دخيييلك...
فكر عبدالله بالموضوع شوي... يعني هو خلاهن يشوفن فلم الدراجات ويا حمدان لانه اصغر عنهن..بس خليفه الصراحه يحشم اكثر من حمدان...
عبدالله: انزين ماعليه.. المهم نزلن ركبولنا هالكيمره...
لبسن شيلهن البنات ونزلن...خليفه فز قلبه يوم شاف حصه... اعتدل في يلسته واحترم نفسه.. سلمن البنات..ورحب بهن حمدان وفي عيونه نظره تظحك يبا يذكرهن بالموقف اللي صار الظهر... وتذكرنه بس كتمن الظحكه..وحصه في خاطرها تقول بمسكه عقب وبطلع منه سالفه فطوم كامله...شو ياينه عالبنت..!!..سارت حصه ويلست شوي بعيد..ونورة قعدت تعابل بالوايرات لين ظبطت الشريط وعادته من اول...ويلست عدال حصه..
الرزفه صراحه كانت فنانه... عبدالله كل شوي حد من الشباب يمسكه ويرزف وياه..بس اكثر شي كان مع سعيد...لانهم بنفس المستوى ونفس الطول والعرض فكانوا فنانين رباعه...طبعا قلب نورة حدث ولا حرج يرقص رقص..خص انها تموت على سوالف الرزف واليواله ...كيف عاد يوم تشوف حبيب القلب يرزف؟؟...مهما كان اللي مسونه بها..يتم حبيب قلبها وحياتها....
خليفه ماتفارقوا هو وسيف الشامسي ربيعه.... حصه والحق يقال كان اكثر شي مركزه على خليفه... بس يوم صدت تشوف اللي ايوول وياه شهقت...بس محد سمعها...عرفت الريال انه هو اللي شافته ذاك اليوم فبيت عمها وماخبرت السالفه لاي حد... قربت راسها صوب نورة وقالت...
حصه: تشوفين هذا اللي يرزف ويا خليفه؟؟
نورة: هي بلاااه؟؟؟
حصه: بخبرج سالفه عنه عقب....
صدت نورة صوب حصه مستغربه....وفي عيونها سؤال يقول من وين تعريفه؟؟؟؟.. ردت عليها حصه بدون ماتسال...
حصه: بعدين بعدين بخبرج...