كيف استعادة صديقتي زوجها وحياتها وروحها؟؟!!

[ضوى]

السلام عليكم جميعاً
اليوم جايبة ليكم قصة منقولة ولكن بتشوفون العبرة اليي فيها
وأتمنى تعجبكم
وهي عبارة عن صديقة تتحدث عن صديقتها

يالله نتوكل على الله ونبدء

عندي صديقه من مدة كم سنه

تزوجت من رجل ( متزوج قبلها 12 وحدة)

في البداية عانت معاه وااايد

كان يقارنها بغيرها

وصارت لها معاه مشاكل نفسية

حست انه مو متقبل جسمها وشكلها

ولا يحب يقرب منها

وكان على ذمته زوجه يحبهااااا من قلب

ويقول لو تفارقني اموووت

حاولت تاخذ قلبه وتعيش معاه عيشه لطيفه

قبلت بأشياء وااايد لكنه مو مقتنع فيها

وتطلقت منه

عاشت أيام أليمه

صكت على روحها الباب

وجابلت السجادة والقبلة

ولجأت لرب العالمين

وبعدين؟؟؟؟؟؟؟؟؟؟

ردت عليه

ماهي معاناتها؟؟

ولماذا ردت له ؟؟

وكيف استطاعت ان تستبدل حياة النكد والشقاء الى حياة الهناوالسعادة؟؟

هذ ماستعرفونه من خلال مقابلتي لها

خليكم معاي

[ضوى]

القصه صارت قبل سنوات طويــــــــلة

كانت علاقتي معاها قوية جدا

هي بنية كبيرة تعيش وضع صعب جداا مع امها

وحياتها ملخبطة وتحتاج الى الزوج اللي يضفها

كانت بحاجه لبيت تستقر فيه وزوج يشعرها بالأمان

وخطبها ...

رجل صالح تقي مشهود له بحسن الخلق والسلوك

وصاحب خيــــــــر ( مادي ومعنوي)

وكان فيه مشكلة وحده ...

انه مزواااااااج

ولماسألو عنه اخوانها

وعرفوحسبه ونسبه واخلاقه ودينه

وعقله وثقله حبوه وايد

بس كانومترددين لأنه اكبر منها ب

30 سنه تقريباً

المهم البنيه كانت تستخير وتستخير وقلبها

يميل له

لماقررت ان توافق عليه

و في وقت الملكة

جاها اخوها

وقال لها تدرين انه اكبر منك ب 30 سنه ؟؟

وعنده على ذمته زوجتين ؟؟

أم عياله و وحده ثانية ؟؟

تقول تفاجأت ...

لكن خلاص الناس متجمعين والعشا جاهز وانا اتجهز بالمكياج والتسريحه

والذي منه

فقلت الخيره فيما اختاره الله

و وافقت

وانتقلت الى عش الزوجية ...

[ضوى]

تقول :

حطني ب بيت بسيط جدااا

وانا مو هامني المهم عندي اني اعيش حياة زوجية مستقره اشعر فيه ابالأمان

لكن مع الأيام حسيت انه ما يرغب بالصرف علي ابداا

واذاحسسته اني محتاجه لأي شي يشتريه بنفسه

ويقطه علي ( ملابس ممن بو دينار ونص)

وانامتقبله ومو هامني

اهمشي عندي انه رجل صالح وحبيب وخلوق

والماده شي ما يهمني ابدااا

فاجأني انه ما يبي اي احد من اهله يكون له احتكاكمعاي

ماشفتهم ولا اعرفهم

وبحكم ان رجل كبير في السن

أمهوابوه واخوانه متوفين

واسرته هم زوجته العوده و عياله

صرتله الممرضه والزوجه والصديقه

والأخت الحنونه

اطبخ والبس واتسنع

وأستقبله بالحب والود

ومااشوف منه اي تقبل

بديت اسأله اش فيك ؟؟

يقوللي مو مرتاح اقول له ليش ؟؟

يقولمادري

واشوفه يروح يوم عند ام عياله ويوم عنده زوجته الثانية ويومعندي

ويقول ان ام عياله ماله اي علاقه معاها وماتكلمه

أماالثانية يمدحها مدح ويمووووت عليها ويقول لو تزعل ولا تقولطلقني

راحامووووت ما اقدر اعيش بدونها يوم واحد

تقولاسمع كلامه وقلبي يطبخ

اقولوانا ؟؟ ليش ما اخذت قلبه ليش ما حبني

شنواللي ينقصني ؟؟

معالأيام صرت اداحره ( اناقشه)

وبشده واقوله اب حقوقي الشرعيه

ابيك تصرف علي ابيك ........

وابيك...........

وابيك.........

وطلبت سلسلة من الطلبات والشروط

وبدت المشاكل ...

وصارينتقد كل شي فيني

حتى اجزاء جسمي صارت بعينه ( مشوهه)

وكان يقول لي انا اكره فيج ( .......) و (.........) و(.....)

ياربي هذي خلقة الله شسوي

حاولت اضعف واتزين

واتجمل بس تبقى اشياء ما تتغير

ومع الايام مليت

وصارت النقاشات بينا حاااااده

هويعيب وينتقد ويحرم

واناارد عليه بالمثل

انت فيك وفيك وفيك

وقام صوتي يعلو ويعلو

وصرت انتفض واعصب

لماجه يوم وقال لي شوفي يا بنت الناس

انارجل كبير بالسن والمكانه

ورجل صالح

ومااقبل على نفسي باللي تسوينه

تصرفاتج جدا سيئة معاي وانا بصراحه بطلقج

واحتدت النقاشات كلمه مني وكلمه منه

وشبت الناااااااار

وطلقني ورديت بيت اهلي بااااااااائسه وحزينه

يتبع
.
.

[ضوى]

وبعدين ؟؟
تقول :رديت لبيت اهلي ولأمي القاسية واخواني المشغولين
امي ما تبيني التزم بالدين وباليوم عشرين مره تسبني بأقذع الأسباب
وتوصفني بكلمات وصخه جدااااا وما تنقال وانا قلبي يدمي
و اعتكتفت على ذاتي سويت لي منهج خاااص لحياتي
وقمت افكربذاتي وبحياتي واكتشفت اخطائي مع زوجي واخطاءه معاي
وقمت اتعقل اكثر واكثروافكر بحياتي واخطائي وصفاتي اللي تحتاج تطوير
وقمت اطور شخصيتي واتردد على المحاضرات والدورات
واغلب وقتي بين مصحفي وسجادتي وصلاتي وقيامي
وصرت انسانه ما لها هم الا الله والدار الآخره
وقمت اتذكر هذي الجمله ( ارجعها فإنها صوامه قوامه)
وقلت بقلبي :يا رب رد لي زوجي وسنع حياتي معاه فإني صوامه وقوامه يا رب

رد علي زوجي

وتميت على هذا الحال شهووور طويله

وكنت كلما اشوفها او اتصل فيها تقول لي انا واثقه جدااا اني برد على زوجي
اقول لها والله ماشاء الله عليج واثقه من نفسج
ترد علي :واثقه بالله
وفي يوم حصلت المفاجأة اتصل زوجها بأخوها
وقال له انا ما اقدر اعيش بدون اختكم ابيها يعني ابيها لازم اردها
وكتب لها رساله مثل المراهقين وحطها على سيارتها
وتفاهمو على كل شي وفي وقت الرده قال لها راح اعطيج مهر 10 دك فقط

تقول ما عجبني الوضع

فقلت ما عندي الا ربي رفعت ايدي لسما وقلت يا رب ما راح اسقط في الاختبار
بقبل بالقليل من متاع الدنيا

بس اشترطت ... انه يتصلح معاي وتصير حياتنا سعيده

ما تصدقون بعدين اش صار عقب فتره انا تزوجت وانشغلت مع بيتي وعيالي
واهي انشغلت مع زوجهاوكانت بين فتره والثانية تتصل واحس انها مرتاحه وسعيده
ومن سفره لي سفره صحيح سفرات بسيطه و دول قريبه
لكن زوجها كان ما يستغني عنها ابدااالازم تصاحبه في السفرات
وقام يقضي معاها اوقات طويــــــــــــــــــله
ومره سألتها غريبه احس ريلج على طول عندج فردت علي اي ما عنده غيري
سألتها وحريمه وينهم ؟؟قالت ام العيال على حالها ماتحاجيه ولاتكلمه
وعايشه في البيت الكبير مع عيالها وجناينهاوما لها اي علاقه معاه
سألتها : و الثانية ( اللي يمووووت عليها ) ؟؟اصدمتني لما قالت : طلقها

شلوون ؟؟
قالت والله ما ادخل بخصوصياته اللي اعرفه انه بينهم مشكله حاده
وانهم اتفقو على الانفصال قلت لها سبحان الله والله دنيا غريبه
اللي كان يضرب بها المثل ويحبهاويقول لو اطلقها اموووت ؟؟؟
وانتي شلونج معاه قالت اوووووه سكتي بأحسن حال

سألتها شلون ؟؟

تقول انا تغيرت وهو تغير وصارت حياتنا حلووووة ومريحه
ومفعمه بالحب الحـــــــــــــــــــــب
الله يا حلو الشعور كلميني عن الحــــــــــــب شلون دخل حياتكم وغيرها
عقب ما كان ما يحبج و ينتقدج ويعيب على كل شي فيج
لا عيوني هذا الحجي ما يبي مكالمه هاتفيه اش عندج العصر ؟؟
قالت ما عندي شي واتفقنا انها تسير علي الساعه 5نشرب شاي ونسولف
لما صارت الساعه 5 الا جم دقيقة
اتصلت باطمئن انها دلت بيتي ( الجديد )
جان تقول انا جدام بيتج وطقت لي هرن ( طاطاطاط) تأكيد انها جدام الباب
عجبتني بالتزامها الدقيق بالموعدفتحت لها الباب
ودخلت صالة الاستقبال وبدأنا الحوااار العجيــــــــــــــب
عن الحـــــــــــــــــــــــب بين الزوجين

[ضوى]

قالت :

في حياتي مع زوجي قبل الطلاق

ما كنت اعرف الحب بالمعنىالصحيح

ولا كنت ادري اني (اجهل حقيقةالحب)
ما كنت اعرف نقطه مهمه
وهي ان شدة الحب والتعلق وملاحقة الزوج
تطفش
كنت اظن ان الملاحقه
والجدال والنقاش واللصوقبالزوج
تزيد من الحب

وتقرب زوجي لي

لكنه نفر مني وسمعني كلام مؤلموطلقني

وعقب ما انفصلنا

رجع كل واحد منا لنفسه

وفكرنا بحياتنابعمق

وعرفنااخطاءنا

ونوينا اصلاحها وردينا

على بعض

تدرين يا المستشارة الحكيمةهو تزوج قبلي 12 وحده تقريبا

من جنسيات متعدده اصغر منيواحلى مني

وحده منهم حبها بقوة وعاش معاها 14سنه

وبعدين صارت له مشكله وقرروا الانفصال

طبعا انا ما اعرف مشكلتهم لأنه ما أحب أتدخل بمشاكل غيري

حتى لو شريكتي - فهذا لا يعطيني الحق بالتدخل

و ما قعد الا عندي ليش؟؟

يتبع
.
.
.

[بوفيصل]

هلا أختى ماتكملين بسررررررررررعه يسلموووووووو على القصه حلوووه

مع خالص تحياتي بوفيصل

[ضوى]

تشكر أخو ي أبو فيصل على تفاعلك مع القصة
وربي يوفقك

[ضوى]

فهمته - واحترمت احتياجاته - حرصت علىاشباعها
واهم شي حــــــــــــــبيته بس ما خليته كل همي

المحبة العظيمه للزوج توصل الى مرحلة تضعف الايمان بالقلب
فالاعتدال بالحب مطلوووووب

وخلتني وهي تتكلم احس بأن قلبي طااااااااااير
وحسيت واحنا نتناقش انا راااااااقين جدا
والله قمت اتلفت واتأكد انا في بيتي
احس اني بحلم احس اني بعالم ثااااني
الله ما اجمل الصديقة اللي ترفع
روحانياتج وتقربج من الله شعور عظيم

[ضوى]

قالت :
الحب الروحي اعظم من كل شي
احب زوجي من الداخل يعني احب روحه ما ابي منه شي
احبه بدون شروط اتغاضى عن عيوبه واستمتع بصفاته الايجابية
وتمشي فيناالسفينه
قلت لها شلون خذيتي قلبه عقب كل اللي صار؟؟
قالت :
مو مني من ربـــي استجاب دعائي و وفقني لفهم زوجي وسددني
تدرين ان لحظات التقرب من الله واللجوء اليه تزيد من قوتي؟؟
قلت لها ماشاء الله عليج واااايدذكيه
قالت : تسمينه ذكاء؟؟
هذا ايمان ولجوء لله
كملت كلامها وقالت :الحب الجسدي حب مؤقت ياخذ وقت وينتهي
الرجل قد يحب كثيرات لكن قلبه ما يتعلق من الداخل الا بوحده
قلت لها : تظنين انها مسالة تعود؟؟
قالت : لا .......... احساس عميق من الداخل وحب منبعث من الدنيا ومتصل بالآخرة
احس انه هذا الزوج ربي عطاني اياه بالدنيا ويبي مني احسن اليه
( زوجك هو جنتكونارك )
اخلي حبي لله اعظم من كل حبه واخلي ربي هو المعبوداللي اذل نفسي له
واربط نفسي برضاه و افر من غضبه

نعود للحديث عن الحـــــــــــــــــــــــب الحقيقي

سألتها شلون علاقتكم مع بعض صارت قوية عقب ما كان نافر منج؟

حبيته

حبيته من قلبي

و لكن ما خليته كل همي

بالعربي الفصيح ما اناجره

ما اقوله غصب عرفني على عيالك او ودني عنداهلك

ولا اسأله عن تفاصيل ما قالها

المهم عندي انه يحبني واحبه

احترمت حقه بالخصوصية

مو يمكن في اشياء وجوانب من حياته ما يحب اني اشاركه فيها؟؟

هو حــــــــر وما لي حق اقتحمخصوصيته

ولذلك زادت مكانتي بقلبه

سألتها : انتو ما عندكم عيال بس لاحظتكم احيانا تطلعون بر او بحروتسافرون لأماكن طبيعيه

شلون تقضون الوقت ؟؟مو ملل بروحكم؟؟

نظرت لي نظرة استغراب

وقالت ملل ؟؟ لما تقضين وقت مع حبيب الروح منين يجيالملل؟؟

انا اطلع معاه المزرعه ونشوي وناكل ونسولف

واتدلع عليه

وألف اشعار بحبه

واتغشمر معاه

اغني الشعر اللي الفته بصوت عااااااالي

وهو يسكتني ويضحك

الملل يجي للي ما يحبون بعض

لكن اللي قلوبهم وارواحهم متآلفه

ما يملون

ما يهمهم العالم كله المهم عندهم انهم مع بعض

ومثل ما قال الشاعر :

فليتك تحلو والحياة مريرة

وليتك ترضى والأنام غضاب

قلت لها اللـــــــــــه

يا حلاة فلسفتج بالحياةرووووعه

سألتها عن الاختلاف في وجهات النظر :

- شتسوين اذا اختلفتي معاه بوجهة النظر؟؟

يتبع
.
.

[ضوى]

قالت:
طبعا في حالتي ونظرا لفارق السن الهائل بينا
فهمت وعرفت اني اذا خالفته بينفر مني
وانا ما ابي الغي شخصيتي
لذلك
استمع لوجهة نظره وابدي اهتمامي بكلامه
واستمع له وانا اعبر عن الانصات بكلجوارحي
وبعدين عقب جم يوم ارد انقاش بالموضوع بصورة ذكية

قلت لها شلون ؟؟
قالت :
اتكلم عن الموضوع من جانب مختلف مثلا
اقول له ان صديقتي مرت بكذا وكذا منالمواقف
وصار لها كذا وكذا
او اقول له اخوي يقول كذا ولا الشيخ فلان يقول كذا
يعني ( يخالفون رأييه )

فأعبر عن رأيي بطريقه غير مباشرة
وأحسسه ان في ناس يخالفونه بالراي
قلت لها شلون تأمنينه وهو رجل مزواج؟؟
أتذكر لما خذاج قالج صديقه الشيخ ( فلان) :
- هذا رجل مزواج شلون قبلتي تتزوجينه؟؟

- ضحكت وقالت سألته مره :

الناس تقول عنك مزواج
رد علي:

أنا اتزوج بالحلال وحظي ان محد فهمني ومشى على مااحب
وما توفقت معاهم
ما يكفيج اني ما عندي اي علاقه بالظلام وهمري بحياتي ما ارتكبتالفاحشة
انا رجل طااااهر ما اقبل بتدنيس عرضي و شرفي
( واحل الله البيع و حرم الربا)قصدي احل الزواج وحرم الزنا

قالت:

أحيانا يطفرني اذا عارضته او قلت له ماني مسافرهمعاك

يقول لي بتزوج وحده تشاركني رحلاتي ( رحلاته متكررةجدا)

ارد عليه واقول له:

روح حاول اصعد وانزل ودور ولف اذا الله مو كاتب لك

ما راح تاخذ

يرد علي ( صدقتي)

واحيانا اقول له :

تزوج البنات واااايد اخذ احلى واجمل واصغر مني

راح تلقى وايد

بس هل تلقى وحده تحبك وتفهمكوتحترم رايك مثلي ؟؟

يرد علي لا والله ما القى

قلت لها ماشاء الله انتي وايد واثقه من نفسج

قالت واثقه من ربي

انا تعودت اني القي بهموميواحزاني والجا لربي

حتى احيانا لما يأذيني بتصرفما يعجبني

اقول له بصوت فيه دلع ودلال :

مابي مابي

واذا اصر

اقوله خلاص انا بشتكي عليك

واتوضأ جدامه واصلي واقوله

بشتكي عليك عند ربي

وهو يعم علم اليقين انهامقطوعة الصلة بالبشر

موصوله الصلة برب البشر

فيخااااااااف على نفسه

ويتدارك امره

ويصالحها

قالت لي تدرين انه من فترة سوى عملية خطيرة؟؟

قلت لها لاه سلامته

والله انا لهيت عنجسولفي لي شلون كنتي تزورينهبالمستشفى وهو ما يبيج تشوفيناهله

قالت آآآه

اولا هو فاجأني انه قرر يسوي العملية

ولما قال لي ما قدرت ارد عليه بس دموعي تخرررر

ولما شافني بهالمنظر خرررت دمعته اللي ما تخر لوشنو

وما تكلمت ولا حرف

ما قدرت اتحجى

وصلته المستشفى وقعدتمعاه ورحت

وطلب مني عدم التواصل معاه بحكم ان عيالهوجناينه واحفاده بيكونون معاه

وانا ما حبيت اضغطعليه وهو في وضع صحي ما يسمح

( لاحظو ذكاءها وحكمتها فهمتانه ما يبي يقلل من شأنها وان مكانتها محفوظه - وان هذا التصرف لا يعني انها ماتسوى عنده - واحترامها لنفسها انتشر على حياتها واحترمت رأي زوجها - لو وحده موواثقه من نفسها ولا واثقه من ربها جان قالت اي بس ما يبيني و تهاوشت معاه )

قلت لها شلون كنتي تطمئنين عليه؟؟

تخيلو شنو ردت علي ؟؟

تقول اروح المستشفىكل يوم واقعد مقابل دريشة غرفته

اشوف وجهه واكحلعيوني بشوفته واتطمن عليه

واريح قلبي بمتابعته من عبر الدريشة

لما نتبهت لي موظفه لي موظفه بالمستشفى

وسألتني : شسالفتج ليش مجابله الدريشة

فقلت لها انا زوجه ثانية ولا احب احرج زوجي معاسرته

ويكفيني اني اتواصل معاه بدون مايدري

هذا يا بنات الحب الحقيقي

الحب النابع من داخل الروووحوالقلب

الحب اللي كله رضا وقبول

الحب اللي ما فيه تشرط ولا مشاكل

يكفيها انها تحبه - ما تطالبه بأي شي

سألتها وبعدين ما زرتيه بالمستشفى؟؟

قالت كلمني وطلب مني ازوره بوقت محدد

ولما دخلت لقيت عنده ولده اللي كبري ( 50سنه)

واول ما دخلت وشفته عن قرب و تلاقت عيني وعينه

عقب ايام النظر من الدريشة

صبت دموعنا بدون وعي

حتى ولده انصدم لماشاف دموع ابوه

وقال يا جماعه ذكرو الله

وطلع وخلانا بروحنا بالغرفه

بقى شي مهم يا جماعة الخير

انا قلت لكم ان ظروف البنت صعبه
معاشها معاش تقاعدي
وما عندها اي مورد مالي
و امها تحتقرها ( بسبب تدينهاوالتزامها)
وما لها مكان اوبيت تلجأ له لو صار لها اي شي
اخوانها وحريمهم مو سنعين ولا عندهم تآلف
وزوجها من عائله كبيرة جدابالكويت
واظن انه ثروته بعشرات الملاييين
فاللي يتبادر الى الذهن ان تطلب منه ( بيت او شقه تضفها)
قالت لي:
وايد حريم يقولون لي ان زوجي عند خير وملايين
وانا ما اعرف كم يملك دينار ولامليار
وما يهمني ابدااا
واحيانا يقولون لي
طلبي منه يسجل بإسمج بيت
لكني واللــــــــه ما يهمني ولا اقدر انزل نفسي واطلب منه
شي مادي احس ان الحب والتقارب الروحي بيناقوي
ما احب افسده بالماديات
وبعدين عقب عمر طويل اذا صار فيه شي ( مات)
شنو بينفعني فيه البي او الفلوس عقب
ما افقده ؟؟ ولا ملاييين الدنيا تقدر تترس مكانه
عظيمه يا صديقتي ورائعه

هذا هو الحب الحقيقي

حب بلا عتاب
حب بلا الم
حب بلا شكوى
حب روحي لا يعرف الماديات
يسمو ويعلو فوق كل الهموم والمشاكل

وصدقت حين قالت
حب في الدنيا .... يتصل بالآخره

منقول

وأتمنى تنال على اعجابكم وربي يوفق الجميع

[اللؤلؤ المكنون]

قصة جميلة يا أخت ضوى ونتمنى لك المزيد من الكتابات والمواضيع المتألقة والبارزة بس والله ما توقعت أنها كبيرة لهاذي الدرجة بس والله قصة حلوة و جميلة

[ضوى]

هلا وغلا بأختي اللؤلؤ المكنون تو ما تنورت الصفحة بطلتش أختي
وتشكرين على تشجيعش المتواصل لي
حتى أنا مثلش اتفاجأت لما شفت العمر
بس تدرين اني عندي قناعة ان المرأة ممكن تظل تحمل مشاعر رطبة وشبابية
إذا تركت كل همومها جنب واتوكلت على الله والرجل كذلك
و ربي يوفق الجميع

[ضوى]

أوووووووووووووووه

كأن القصة ما عجبتكم!!!!!!!

بس تدرون بعد بجيب ليكم وحدة جديدة قريباً

وربي يوفق الجميع

[سمراء]

قصة رائعة تحمل في طياتها اسمى معاني الحب والوفاء
واهم شي انها توكلت على ربها في كل شئ
تسلمي خيتو ضوى عالقصة الرائعة
لاعدمنا جديدك الممـــــــــــــــيز
تحياتي لكِ

[ضوى]

هلا بيج أختي سمراء ونورتين قصتي اللي أتمنى إنها نالت اعجابكم
وربي يوفقكم