يا حجّة الله غيبتك صارت بطـيّـه *** عجّل علانـا الجور يا شمس المضيّه
يمـتى على العالم يشع مـن غـرّتك نـور
بـيه العدل تنشر وتطوي الظّلم والجـور
امْن السّامري والعجل من جزله المسعور
الصّخره الاساسيّه الدهت كل البريّـه
------------------------
ياطالب الـثّارات دنهض جم إلـك ثـار
مـن يـوم حـيدر والحـبل والضّلع والنّار
والضّربـة اللّي عمّمت هامة الكرّار
ومن دم راسه اختضبت الشّـيـبه البهيّه
------------------------
ويلاه ياهضم الحسن ومصاب سمّـه
بـن هـند غاله و فاتت الاعدا ابدمّه
يَـمْ قـبر جـدّه سْهامهم نشـبت ابجسمه
امصيـبه و يهوّنـها مصاب الغاضريّه
------------------------
أعجز شعدّد مـن مصايب يوم لطفوف
جم طفل بيها وجم شباب انذبح ملهوف
ياما انقطعت روس بيها وطارت اجفوف
و يامـا اجسادٍ رضّضتها الاعوجـيّه
------------------------
منعوا علىحسين الورد وانذبح عطشان
وظلّت الخـيل اتجول فوق اعضاه ميدان
والهضم يـبن العسكري ضيعـة النّسوان
و اطـفالها الرضعت مـن اسهام المنـيّـه
------------------------
وجدّك علي السجّاد بعـد اليسر والذّل
يقضي العمر لـيلـه و نهاره دمعـه ايـهل
مَيشوف غـير ايتام تـتضوّر و تعول
وينظر منازل كل هله منهم خلـيّه
------------------------
و يقضي ابسمّه و بعـده الـباقر تـباريـه
بالضّيم وانواع البلايا عيون اعاديـه
عرفت بنو مروان اصلها وجارت عْليه
وذاك السّرج سبّب لـه اسـباب المـنيّه