بالنسبه للشباب

1-شاب يقضي معظم وقته على النت ومافي في باله الا انه يدور بنات . يعني يستخدم اكثر من اسلوب لجذب انتباه الفتاة من كلام حلو شعر خواطر واذا مانفع حول اسلوبه الى صرقعه يعني يمشي على حسب مزاج الفتاة.

2- شاب يقضي معظم وقته في النت يتعلم على البرامج والهكر ويخترق اجهزه (الله يبعدنا عنه) اذا كان لتفجير واختراق مواقع يهوديه ومواقع مخله في الدين الله يكثر من امثاله.

3- واحد بس يسوي ابحاث ويدور مواقع علميه طالبينها منه الجامعه او الكليه او عمله يعني هذا النوع معقد ويقهر لابس نظارات..بس هو اللي عرف فايدة النت.

4- واحد يدخل يضحك يعني ما يهمه كون الشخص الي قدامه شاب ام فتاة شغلته بس يضحك وما يخلي احد في حاله هذا احسن نوع وهو المحبوب من الكل .

5- نوع ما يخلي البنات في حالهم يعني يمكن توصل لسب والغلط على البنت اذا ما عطته وجه ونوع يهين كرامته من اجل رضاء البنت عليه .

6- نوع يدخل بأسم بنت عشان يسحب الشباب على وجوههم...والا عشان يشبك مع البنات على انه بنت ويعطونه وجه بسرعه .



بالنسبه للبنات

1-بنت ما عندها اي شغله في البيت يعني تدخل النت توسع صدرها على قولتهم ونست ان وراها طبخ الغدا ويأتي زوجها ما يحصل غدا .. ما علينا هذا النوع الي ما يدور غير توسيعه الصدر لانها محبوسه في البيت .

2- بنت ما عندها اي شي الا انها تلعب في عواطف الشباب عاد شبابنا مو شايفين خير ما يصدقون بنت تكلمهم على طول حب ومشاعر وغرام ؟

3-بنت تدخل النت بس تحب تسولف عاد معروف في البنات يموتون في السوالف وتدور اي موضوع علشان تتكلم فيه وما تخلي موضوع الا تتناقش فيه حب دخلت الموضوع سياسه دخلت بعد يعني اهم شي تحلل فواتير اشتراك الانترنت.

4- بنت ساكته بس تطالع وهي بس ساكته وتسمع اغاني روحي اشتري اشرطه مسجل وفكي نفسج احسن من انج تشغلين خط التلفون .

5-بنت ما عندها غير انها تتحدي هي وخواتها كم واحد كلمت بالجات يا نوره كم وحده كلمتي خمسه وانتي كم يا هناء انا مكلمه اليوم سبع يعني تحدي الله يعينه الي يطيح في يدين البنات الي مثل النوع هذا ..

6- بنت تدخل باسم ولد وهذي أما عشان تسحب البنات وتلعب عليهم وتطلع فضايحهم والا عشان تبي تفتك من مضايقات الشباب وتدخل النت براحتها..بس المشكلة احياناً ماتسلم..

7- بنت تدخل عشان اتعرف شنو آخر اخبار الموضه او ادور ابحاث و اتشوف أخبار أخوها الي يدرس بره عن طريق الايميل وبعد عشان تطرح مواضيع متميزه في المنتديات .

بس والله في بنات يكسرون الخاطر الي يدخلون يبون يوسعون صدروهم والي يبون يتكلمون يعني يضيعون وقتهم ويأتيهم شباب ما يخلون البنت في حالها الكل يتكلم عليها واذا ما عطتهم وجه تعال وشوف الكلام الي في قله ادب وكلام ليه لانها ما عطته وجه.


منقول

واني بوجهة نظري هناك أنواع اكثر واكثر (5)(5)