موضوع للنقاش..نسيان الأصدقاء ونكرن الأصحاب لبعض

[*زهرة البنفسج*]

السلام علي احلي أعضاء ومشرفين المنتدى الغالي....

اليوم جايبه معاي موضوع للنقاش..

يعني هشي أصير في مجتمعنا وصار لي من احد الأصدقاء

وهو

نسيان الأصدقاء ونكران الأصحاب لبعض

_يعني لو صار لك موقف وابتعد عنك احد أصدقائك فماذا سيكون ردة فعلك؟

_لو كان هذا الصديق صديق مصلحة فقط فماذا ستفعل؟

وماذا سيكون تعاملك معه؟

_وهذا الشخص دائما أسويك أنت الغلطان وهو في الأساس الغلطان بس مايعترف بغلطه ومستحيل أقولك هو الغلطان

فكيف ستفهمه هو الغلطان ؟وهو في الأساس مايعطيك فرصة تتكلم وتقول له انه غلطان ؟

_يعني أذا ماعطاك فرصة فمعناها قفل الخط في وجهك؟

وإذا أنت أتعاملت مثل تعامله وقفلت الخط في وجهه يزعل

ويقلب الدنيا وقومها؟

_بالمختصر المفيد كيف نتعامل مع هلئشخاص؟

وبالنهاية أنا حلي صرت أحقر والحقران اقطع المصران

يعني المشكلة في البنت مريضه نفسيه أعتبرها

يعني تقعد شهر اتفكرني أني الغلطانة وتنتظر إنا اتصل إليها

مو أول مرة انسي إليها هذا الشي فصارت بزيادة

فقلت مالي أله أحقر وأشوف أخرتها طلعت نسايه درجة أوله

ولا كأنها تعرفني حتي لو أشغال الدنيا فوق رأسها ماتنسيها أصحابها

أنتظر ردودكم ورأيكم؟

[MOONY]

اولا: مشكوره زهور لطرح الموضوع
ثانيا: الأصحاب نادرا من يكون صاحب بدون مصلحه الكل يخذ مصلحته منش وبعدين ولكأنهم يعرفوش اسألين عنهم لأني مجربه هالنوع من الناس وخاصة بنات الدراسه في الرياض اذا بغو شي يسلمو ولما ايبغو شي يمرو وكان الي جنبهم حيط
والقليل من يوقف معاك اذا صادفك موقف فرح أو حزن الكل ينسحب واذا سألتيهم يتعذرو واني صرت احقرهم ولا أسأل فيهم
تحياتي لكِ

[*زهرة البنفسج*]

أخت موني لاشكر علي واجب
وهذا فعلا اصير واجد
ومثل ماقلتي نادر اتحصلي اصحاب يوقفو معاك
يسلمو علمرووو

[.:روح وريحان:.]

يسلمووو زهوورة على الموضوع الحلو
واني بالنسبة لي لو حصل لي مثل جدي
احاول اعرف السبب اذا مانفعل
يقول المثل "الا يبيعني برخيص ابيع بتراب"

[ام الحلوين]

مشكوره اختي ويعطيش الله الف عافيه موضوع رائع
بالنسبه لسؤال الاول ردة فعلي اول شى بشوف اذا كانت عنده ظروف ومنعته بعذره
اما اذا تركنى هوايه (من عافنا عفناه لوكان غالي)

لوكان صديق مصلحه فمالي به(صديق الطعمه خوان صديق القلب راضي)

اذا كان غلطان وما اعترف ويقط غلطه علي دائماً هذا شخص مريض انصحه بالعلاج

صبراً جميل وبالله المستعان ولاحول ولاقوة الابالله( الصبر مفتاح الفرج دائماً)

[القلب المرح]

السلام عليكم
لايجب علينا ان نحكم عالصديق بانه قد نسى فان مشاغل الحياة تهلك الانسان لتجعله يقوم بشئ فوق طاقته ولايستطيع بأن يحك شعر رأسه من كثرة اشغاله
وبعضهم يعيش النسيان لعدم التواصل بينهم وكل شخص ينتظر الثاني يسألن عنه وكانها مسألة عناد ماسأ عني مبسأل عنه وبعدها تصير الفراق والنسيان << وهذهِ تحصل كثيرا

لنجاوب على اسئلتك
_يعني لو صار لك موقف وابتعد عنك احد أصدقائك فماذا سيكون ردة فعلك؟

من عادتي حتى ان ماسأل احب أسأل ماحصل ليي الفراق مع اصدقائي والحمد لله لكن ان حصل وابتعد لابد فيه اسباب تجعله يبتعد ومن واجبنا ان نسال عن الاسباب ربما تكون عذرا للابتعاد ونعذره عليه لكن ان كان بدون سبب فبراحته انا لا اجبر الغير بالجلوس معي بل اجبرهم بان يحترموني حتى من بعد الفراق واجباري يكون باحترامي لهم
_لو كان هذا الصديق صديق مصلحة فقط فماذا ستفعل؟

اصارحه ان كانت صداقته لمصلحه اقول له صداقتك انا ما ابيها لانها ماتنفع ولا فيها مضمون للصداقه اصلا
وماذا سيكون تعاملك معه؟
تعاملي لن يتغير ساحترمه واقدره لكن لا اعتبره صديق دربي بل صاحب يمر علي بالسلام وينتهي باللقاء مره اخرى
_وهذا الشخص دائما أسويك أنت الغلطان وهو في الأساس الغلطان بس مايعترف بغلطه ومستحيل أقولك هو الغلطان
فكيف ستفهمه هو الغلطان ؟
اعطيه الادله التي تثبت غلطه ومو عيب الانسان يغلط العيب يستمر في غلطه
وهو في الأساس مايعطيك فرصة تتكلم وتقول له انه غلطان ؟
والله مو بكيفه مايعطيني فرصه مثل ماعطيته فرصه للكلام يعطيني وكلن منا له الحق يبرر موقفه وماحب اسكت ابدا ان كان احد غلطان عليي وناكر غلطه لااااااااااااااازم يعرف غلطه
_يعني أذا ماعطاك فرصة فمعناها قفل الخط في وجهك؟
ماعطاني اروح ليه وجها لوجه امسكه واعلمه هالحركات للجهال يسويها مو ليي واكلمه بكل وضوح وصراحه ينحل الا بيني وبينه بسلام ورضاء للطرفين
وإذا أنت أتعاملت مثل تعامله وقفلت الخط في وجهه يزعل
ويقلب الدنيا وقومها؟
اكيد بقومها بس هالاسلوب ابدا مايجيب نتيجه مرضيه هالاسلوب يعكس لنا شخصية الطرف الاخر بانه عدييم الاحترام ولا عنده اي سلوكيات للحوار
_بالمختصر المفيد كيف نتعامل مع هلئشخاص؟
لا اقول نعاملهم مثل مايعاملونا بل لنظل على احترامهم وان لا نسكت عنهم فالساكت عن الحق شيطان اخرس وان الشخص بغى البعد فله مايريد الحياة لاتتوقف على صديق واحد فالحياة مستمره مع الصديق او بدونه واللي مايبينا عسى الزمن لايجيبه لينا

شكرا لك اختي الكريمة ع الطرح
بارك الله فيك
تحياتي للجميع بالتوفيق

[*زهرة البنفسج*]

أخت روح وريحان يسلمو حبيبتي علمرورر
واذا السبب تافه طلع
يعني أنا مو أول وحده تنساها علعموم
مثل ماجبتي المثل "الا يبيعني برخيص أبيع بتراب"
يعني ئلي ابيعني ابيعه..

[*زهرة البنفسج*]

أم الحلوين يسلمو عزيزتي علمرور الرائع منك
لفتني شي قلتيه وهو ...

اذا كان غلطان وما اعترف ويقط غلطه علي دائماً هذاشخص مريض انصحه بالعلاج
بالفعل هذا ئلي كنت اقصده يعني دئما اتقط الغلط علي شافتني اسكت قالت مالي ئله اقطه عليها

[*زهرة البنفسج*]

وعليكم السلام أخ القلب المرح

مثل ماقلت أخي مشاغل الدنيا وعدم التواصل ووو لكن اذا كانت ولأحاجه من هلشيئين يمنعها
يعني تتعمد بسبب مشكلة صغيرة وتقطها عليك وان هي معصومة من الغلط
ومثل ماقلت كل شخص ينتظر الثاني يسأل عنه وهي من هلنوع تنتظر أني اسأل عنها
ياما انسي إليها هلشي بس ترجع وتسوي نفس الحركة

_أخي أنت قلت تعطيه الأدلة التي تثبت انه غلطان وإذا كانت ماتعترف بغلطها وطلعك انت ئلي غلط
يعني ماتتفهم احد ينصحها أو احد يقول أنها غلطت يعني مريضه يبيلها علاج
مثل ماقلت أخي الساكت عن حقه شيطان اخرس فتعلمت من هلمثل أن لااسكت عن حقي
وان الحياة لاتقف عليه فقط من خلقه خلق غيره
ومثلك عجبني سوف أخده بعين الاعتبار>واللي مايبينا عسى الزمن لايجيبه لينا
تسلم علمروور الرائع منك أخي وعلي إجاباتك..

[بنت النور]

مرحبا اخت زهرة البنفسج

كثير من البنات امثال صديقتك فلاتستغربي بعضهم يصادقوش لمصلحة والبعض الاخر يصادقش لمدة معينة ويستمل منش ويدور له عالجديد والله هالبنات عليهم حركات غريبة انا مثلك كان عندي صديقة ومن تزوجت انقطعت وانقطعت اخبارها وصارت في السنة مرة تتصل وتسال صحيح مشاغل الحياة وزحمة الدنيا بس مو لهالدرجة اتصال 5 دقايق ماياخد من وقتش شي وانصحك اختي بان تتركيها كما يحلو لها وعامليها مثل ماتعاملك ترى الدنيا ماشية بها وبدونها والصديق الحقيقي المخلص هو اللي تشوفيه واقف معاش في الفرح والحزن ويهمه اخبارش ويخاف عليش مثل مايخاف على نفسه
واكيد عندك صديقات وفيات غيرها يعني مابتتعطلي عليها
واذا حصل يوم وكلمتيها كلميها عادي ولاتلوميها وتصرفي بشكل طبيعي عشان لاتعتقد ان بفعلتها هذي قدرت تأثر عليش او تلفت انتباه لتصرفاتها معاش واضحكي وامزحي معاها ولاكأنها قاطعتنش من فترة ........
وبالتوفيـــــــــــــق

[إيلاف]

_يعني لو صار لك موقف وابتعد عنك احد أصدقائك فماذا سيكون ردة فعلك؟
طبيعي راح أسأل عن سبب البعد والتغير .. واذا كنت اني اللي غلطانه .. ممكن أعتذر وأصحح غلطي .. بس لو كانت هي اللي غلطانه .. راح اعاتبها وانتظر منها تتغير ..واذا ماتغيرت ممكن اكلمها مرة او مرتين او ثلاث .. واذا مالقيت اي نتيجه راح اسكت عن الموضوع واتركها على راحتها .. لأن الشي اذا مايصدر من الأنسان نفسه .. مو حلو يصير بالطلب .. اما اذا كانت سبب بعدها هي الظروف ومشاغل الحياه .. فهذا الشي مايكون بيدها وواجب علي أقدر ظروفها .. لأن اكيد راح تصادفني ظروف مثلها وهي المفروض تقدر هذا الشي بعد ..

_لو كان هذا الصديق صديق مصلحة فقط فماذا ستفعل؟
وماذا سيكون تعاملك معه؟
امم .. يمكن اني اسكت والبي لها حاجتها مرة او مرتين .. في النهاية .. اني بشر واذا اعطي بدون مقابل .. مستحيل استمر .. راح يظل بينا الأحترام بس الأستمرار في الصداقه .. مااعتقد هالشي ممكن يصير ..
لأن اي صداقة تنبني على مصلحة مصير هالعلاقة الأنتهاء والزوال ..
_وهذا الشخص دائما أسويك أنت الغلطان وهو في الأساس الغلطان بس مايعترف بغلطه ومستحيل أقولك هو الغلطان
فكيف ستفهمه هو الغلطان ؟وهو في الأساس مايعطيك فرصة تتكلم وتقول له انه غلطان ؟
_يعني أذا ماعطاك فرصة فمعناها قفل الخط في وجهك؟
وإذا أنت أتعاملت مثل تعامله وقفلت الخط في وجهه يزعل
ويقلب الدنيا وقومها؟
_بالمختصر المفيد كيف نتعامل مع هلئشخاص؟

أكثر شي يزعجني أتعامل مع أشخاص بهالأسلوب .. اللي يسمعوا صدى صوتهم وبس .. وكل الناس عندهم غلطانين وهم الصح وبس .. بصراحه أعجز عن التعامل معاهم .. ويمكن أبتعد .. بدون ماأتكلم .. لحد ماتصير عندهم القدرة على سماع غيرهم .. يمكن في ذاك الوقت .. اقدر اتفاهم معاهم ..


زهووور ..
موضوع حلو للنقاش ..
الف شكر على طرحكِ ..
وان شاء الله أضفت شيء بسيط للموضوع ..
يعطيكِ ربي الف عافية ..
تحياتي .. إختكِ .. إيلاف ..

[*زهرة البنفسج*]

أخت بنت النور تسلمي حبيبتي علتواجد الجميل منك بين صفحتي
أي والله مثل ماقلتي هلبنات عليهم حركات غريبه ومن يتزوجو ينسوو عندهم اصدقاء
صحيح حتي لو دقيقة مابتعطلها عن اشغالها تسلم وتسكر عادي يعني
بس يالله الشكوه لله
شكرا اخت بنت النوررر

[*زهرة البنفسج*]

أخت ايلاف كم سرني تواجدك الذي قطعنا فتره
طيب حبيبتي واذا عاتبتها كثير بس ماتغيرت ابد ولاتعترف بغلطها ابد
يعني مافي حل وياها غير احقر
مثل ماقلتي عزيزتي ابتعد عن هلئشخاص
صداقة المصلحة ماتستمرر ابد
بالتوفيق ايلاف ويسلمو علتواجد

[Princess]

صديقتي... هي اللي توقف جنبي ..واذا غلطت افهمها.. واذا غلطت تفهمني وما نسوي من الحبه قبه على قولتهم..
ومستحيل تنساني.. في اي يوم ابدا مهما كانت الظروف تطري على بالي واطري على بالها

غير هالشي... هذي مهي صداقه..
هذي مجرد عابرة سبيل وكنت اني محطه من محطات حياتها .. ووقت ما بغتها جت ليها ووقت ما قررت ترحل رحلت عنها
وهالنوع... وجوده في حياتي مثل عدمه


وطنش تعش تنتعش
دمتي حبابه بحفظ الرحمن

[*زهرة البنفسج*]

هلا وغلا بكل الحلا امورة يالمتغبيا
كم سرني تواجدك عزيزتي
مثلك المعروف وئلي صرت احطه في بالي واجد
طنش تعش تعتعش
يسلمو علمرورر الرئع ومثل ماقلتي بتكون في حياتي عابر سبيل هذي مو صداقه