رجع للبيت دخل سلم على جدته وحب راسها.,, وسألها عن الصندوق اللي مسوتنه هي لدفع البلا.. كلما بين فتره وفتره تحط فيه اللي تقدر عليه..
استغربت ام حسين سؤال ولدها اول مره يسألها عن هالشي .. خافت عليه...
ــ ويش صاير اللهم ادفع عنك البلا..
فارس ما حب يضايق جدته..
ــ ولا شي بس بقايا مصروفي ريالين بحطهم فيه << الريالين تبع ابو مصيبه .. ما حب فارس يخليهم مرمين بالشارع .. نعمه الله .. شالهم وبيدفعهم دافعة بلا..
حطهم بالصندوق وحط معاهم ريالين من عنده.. وطلع لجدته القناطي ..
ــ امااه جبت لش قناطي ...
ــ وي .. على عمري .. ما بقى لك شي اجل.. تغديت يا غناتي..
ــ ههههه لا تخافي اكلت سندويشة فلافل وشربت لي عصير .. ويش باصرف انا يعني ..
ــ وي على عمري لويش تاكل فلافل وانت فيك فقر هالدم.. الحين راسك بعورك..
فارس فباله ..
ــ من دون شي راسي معورني من ابو مصيبه..
ــ فارس.. امي.. منت يوعان.. متأكد ..
ــ لا ابد امااه صدقيني اذا يوعان با قول لش..
ــ وي عساني بالغه فيك .. من زمان ما اكلت هالقناطي .. هههه.. عاد من زين هالضريسات طاحوا الله يخلف علي .. بامص الحلاوة وبرمي النخجه .. ههه ويش يقدرني على طحانها..
ــ ههههههه .. لا يمااه مو لهالدرجه..
ــ هههه يوووه يا ولدي .. كبرنا وضبعنا..
ــ الله يطول بعمرش ولا يحرمني منش يارب
ــ ويبلغني فيك يا ولدي ..
ــ ايه صدق اماه تسلم عليش ام ابراهيم جارتنا ,..
ــ الله يسلمك .. لويش وين شفتها..
فارس خاف لا تدري جدته بجبهته .. كان مغطيها بشعره .. ان درت خافت وصارت تحوس وتحاتيه على ضربة مهي مره قويه..

بس للأسف انسدح اخذ له غفوة في الحوش .. وهي تمسح على شعره رفعته وشافت الضربه..
ــ وي .. وي ..فارسي اقعد..
قعد فارس مختلع .. ويش صاير اماه..
ام حسين ومره خايفه على ولدها..:
ــ هذي ويش هالضربه..من مين..؟؟
فارس حطته جدته قدام الأمر الواقع .. علمها السالفه .. وطمنها انها ما تعوره .. وام ابراهيم قامت باللازم..

وبعد اسبوع..

يوم الخميس الصباح... رائد ينتظر عبدالله يمر عليه حق طلعة السوق.. وفي قلبه يهلوس :
ــ الحين انا ويش يفكني من هالفارس اللي ما ادري من وين طلع لينا.. اكيد عبدالله الحين من روحتنا السوق لين رجعتنا بيعسكر عنده .. اففف.. لكن ما اخليه ..
وصل عبدالله وركب رائد معاه .. ورائد ساكت.. وماد البرطم شبر.. << يحاتي ويش بيصير .. وكيف بيتصرف لو طنشه عبدالله وصار ويا فارس..
وعبدالله كلما سأله ويش فيك.. يتحجج له انه متشابق ويا اخته وزهقان... !! << خووش تصريفه
وصلوا سوق الخميس... الا الناس متجمعه .. والحاله قايمه...
عبدالله خاف .. وبصوت عالي :
ــ اكيد فارس.. اكيد ابو مصيبة سوى له شي...!!
رائد على الرغم من غيرته من فارس..
بس يوم شاف التجمع والناس اللي تركض .. خاف عليه .. قال لا اكيد في شي قوي........
عبدالله وقف السياره وبسرعه نزل ... حتى ما انتبه لرائد.. انه وياه,,
رائد فهى وهو مكانه .. وبنفس الوقت خايف من الموقف والناس المتجمعه و محمق وشاب حريقه على تطنيش عبدالله ونزوله يركض ..


والى اللقاء غدا... واعذروني على تقصيري