رائد معرق ومخنوق ويحس بحراره.. ودوخه واصوات.. فتح عيونه شوي شوي.. لقى فوقه رسوم واحد يعرفه .. دقق النظر وتأكد انه بحضن عبد الله .. صار يطالع في عبدالله وهو مستانس حده وطاير من الفرحه.. وفباله :
ــ انا ويش جابني هنا..؟؟

كان عبدالله يطالع في الشارع.. خلى واحد من اخوياه يسوق بداله وقعد بالكرسي اللي جنبه وبحكم ان السياره ورا مليانه شباب حط رائد معاه قدام بحضنه..

التفت عبدالله لرائد.. رائد غمض عيونه بسرعه...
ابتسم رائد .. وضرب خشم عبدالله زي التيله على خفيف :
ــ هااا .. تسوي حالك نايم .. يابطل..
رائد ابتسم وفتح عيونه .. والفرحه مهي سايعتنه... عبدالله يكلمه ويقول له بطل
<< متأثر واايد بعبدالله .. ومو مصدق عمره..وظل ساكت ما رد عليه...
عبدالله .:
ــ يعورك شي..؟؟
ــ لاااء..
ــ متأكد ...
وصار يتفحص في رائد.. لين وصل لذراعه اليمين.. هنا رائد قال :
ــ ايي..
عبدالله رفع قميص رائد .. ما شاف شي.. شويه جروح من الطيحه ..
لمس الذراع ..
رجع رائد : ايي
رجع دلكها على خفيف .. ورائد ما عنده نغمه الا : ايي..
قصيره.. وبصوت واطي..
عبدالله ابتسم..:
ــ تعور هذي شكلها انكسرت.. انا مكانك باقول : ايييييي..
هااا.. يا بطل لا تسوي حالك ..
رائد ما رد اكتفى ببتسامه..
رجع عبدالله :
ــ ويش اسمك انت ؟؟
هنا.. نور وجه رائد .. ابو العبد يسأل عن اسمه بيتعرف عليه ..
ــ رائد فاضل الــ..... ,,, سبق هالتعريف ابتسامه عريضه..
ــ ههههه ياحلاتك والله .. طالب مدرسه مجتهد الإسم الثلاثي بالكامل عفيه عليك..
رائد حس عبدالله يتمسخر فتغيرت ملامح وجهه
عبدالله حس عليه انه زعل..
ــ ويش فيك يا فاضل..؟؟
رد رائد:
ــ مو فاضل انا رائد ..
عبدالله ضرب راسه :
ــ اوووه .. السموحه يابطلنا.. والله ما قصرت علي صكيتني اسمك كامل .. انا كسلان ما احفظ بسرعه <<< يبغى يلطف الجو فغلط في اسمه
ضحك رائد..
عبدالله ضحك وياه :
ــ ايه يا حلاتك..
وسكت عبدالله شوي وسرح بحزن وهو يطالع وجه رائد وقال له:
ــ تصدق .. ذكرتني بأخوي .. كنت ما اسميه الا البطل .. بس هو اصغر منك بشوي..
الشباب اللي معاهم بالسياره كانوا يسولفوا وازعاج.. يوم جا طاري اخو عبدالله
سكتوا.. هدوووء..
رائد استغرب .. سأل:
ــ ويش اسمه اخوك.. يدرس بمدرستنا ؟؟ << رائد كان يعرف اغلب الطلاب بمختلف المراحل ..
عبدالله ابتسم بحزن :
ــ اسمه مهند ...لااا ويش يدرس الله يخلف ..اخذه الخبيث وعمره 6 سنوات..
رائد تضايق من نبرة عبدالله وهو يجاوبه ..وسكت .. بس مهو فاهم ويش يعني الخبيث .. ( يا دافع البلا اجرنا يامجير)وصلوا المستشفى .. ونزلوا .. قام عبدالله بيحمل رائد .. رائد ما رضى..
ــ لا تحملني اعرف امشي ايدي المكسور مو رجولي
ابتسم عبدالله :
ــ تعجبني انا قايل... بططططل...
رائد ابتسم ومره مستاااااانس..
دخل عبدالله ويا رائد المستشفى... كشفوا على ايد رائد .. وسألوا .. عبدالله ويش يصير له .. قال ليهم ولد خالته... قالوا لازم له جبيره لأنها انكسرت..
وبين ما هم يجبروها له.. طلع عبدالله جواله من مخباه .. كان محطوط صامت وبدون هزاز ويلاقي 50 اتصال من البيت .. عبدالله خاف .. ابوه رجال كبير وعايش لحاله في البيت .. دق البيت على طول .. رفع ابوه :
ــ الووووه..
ــ قواك الله يبه .. ويش فيك..؟؟ << قالها وهو مختلع ..
ــ لا ياولدي ما فيني الا العافيه لا تخاف .. بس هذا فاضل من فريقنا ابو الصبي اللي وياك.. جاني البيت يدور على ولده .. الا ويش صاير وويش سالفة هالصبي؟؟

عبدالله تنهد من قلب .. كان خايف على ابوه.. ابوه رجال كبير ومعاه القلب ..
ــ ايه اذا رجعت لك يبه اعلمك ورائد وياي الحين بمستشفى الــ.. .. انت طمنهم ما فيه شي بس ايده انكسرت يجبروها له وبرجعه البيت لا يختلعوا ..
ــ زين يا ولدي .. يعطيك العافيه.. انتبه لروحك.. الله الله بالسواقه العدله..
عبدالله ابتسم.:
ــ ان شالله يبه .. تامرني امر..
ــ يللا فمان الله
ــ مع السلامه..
دق ابو عبدالله على طول على رقم تركه فاضل عنده .. وبعدها طلع هو مع زهراء يدوروا في الشوارع ..
ويرن جوال فاضل ... ويقول لزهراء :
ــ هاا .. هذا رقم بيت يمكن ابو عبدالله .. ويرد :
الو مرحبا ..
ــ يا هلا فيك .. يا ولدي .. ولدك بخير لا تخاف .. بمستشفى الــ.... << وعلمه بالسالفه..
فاضل تنهد من قلب.:
ــ الحمدلله بشرك الله بالخير... تسلم ويعطيك العافيه ....... حياك الله..
زهراء من سكرفاضل تولته اسئله ..
ويش صاير ؟؟.. وولدي ويش فيه؟؟ .. ووينهو .؟؟؟. وويش الخير اللي حصل ..؟؟
فاضل صار يهدي فيها :
ــ استهدي بالرحمن .. ويش فيش .. مافيه الا الخير والعافيه بس ايده انكسرت
زهراء دقت صدرها :
ــ ويلي .. ويلي عليك يا ولدي ... وصارت تصيح..
فاضل قام يضحك .. وهو يهدي فيها ..
ــ ويش فيش الحين لويش الصياح.. الحمدلله جت سليمه .. كسر بيده ولا ضربة رصاص .. توش مختلعه واحنا ندور وفبالش رصاص الله يحفظ عليه .. يوم دريتي انه كسر صرتي تصيحي..
ــ ما ادري من الخلعه .. وين بأي مستشفى..
ــ بالــ .... هذا احنا رايحين..

وصلوا المستشفى... وسألوا الريسبشن .. وخبرهم بمكان عبدالله ورائد..
راحوا بسرعه وهم بالممر لاقوا رائد توهم مخلصين جبيرته .. بيده اليمين .. وعبدالله ماسك ايده اليسار .. وماشي وياه بيطلعوا من المستشفى.. زهراء من شافت رائد.. ركضت له وخذته بحضنها ..

ــ ويلي .. ولدي .. ايدك .. على عمري .. تعورك .. اسم الله عليك..

فاضل سلم على عبدالله وتشكره .. عبدالله كان مبتسم ومتأثر بموقف زهراء مع ولدها .. ذكرته بأمه المرحومه ..

زهراء رفعت راسها بتشكر عبدالله .. و أول ما شافته ..انقبض قلبها قبضه قويه ومخيفه .. رجعت بها الأيام على ورا 15 سنه .. تذكرت اخوها كرار .. اخر مره شافته فيها قبل الحادث..

ايه .. هذا هو واقف قدامها طوله.. رسومه... ابتسامته... يــــا الله..
اللهم جسم عبدالله رياضي .. معضل شوي واعرض ..

طغت الدمعه بعيونها .. وقالت بعبره مخنوقه :
ــ تسلم .. يعطيك العافيه يا خوي...
عبدالله :
ــ الله يسلمش ما سويت الا الواجب,,,

وطلعوا من المستشفى..
عبدالله طلب من فاضل وزهراء طلب .. تمنى يلبوه له .. اذا عادي ياخذ رائد مشوار وبيرجعه هو تالي للبيت.. وصار يطمنهم ويوعدهم انه ما بيصيبه شر...

زهراء كانت متردده .. بس ما تدري كيف ارتاحت لعبدالله .. لكن هالشبه مو كفيل يخليها تخلي ولدها يروح وياه... عقب اللي صار..

فاضل مو عارف ويش يرد .. هو عادي عنده .. بس على امه بعد ... شوي طلع صوت رائد اللي لاحظ تردد امه وابوه...:

ــ يباااه.. اماااه.. باروح ويا عبدالله .. عاااااااد..

اول مره بالتاريخ .. تسمع زهراء من ولدها كلمة عاااد..

فاضل ابتسم...ورد عليه :
ــ روح بس لا تطولوا ...

فاضل حس بالثقه في عبدالله على اللي سواه مع ولده وعلى هالعنايه والمداره فعطى ولده الحريه والفرصه دامه ترجى .. اول مره يسويها وما حب يخيب رجاه ... و عبدالله لزيادة الطمأنينه والثقه عطى فاضل رقم جواله حق يدق عليه كل شوي ويطمنه .. ومشى هو ويا رائد..

شوي يوم ركبوا فاضل وزهراء السياره الا زهراء داقه صدرها ..
ــ ويلي ... ويلي ...
فاضل اختلع :
ــ ويش فيش على هالدق والويلات اليوم..؟؟؟؟
ــ رؤى .. بتي .. ويلي ... طلعت عنها من الخلعه .. وما وياها في البيت الا حيدرووه .. هو بكبره يبغى له من يداريه ولا قفلت بيبان ولا شي
فاضل حمق عليها واول مره يصرخ من جد على زهراء ويهزأها :
ــ وانـــــــــتــــــــــيــــــ ـــــن مو صاااحيه .. تخليها بنيه لحالها في البيت ووجع .. انا توقعت وديتيها بيت رضا جارنا..
وصار يسرع بالسياره ..
زهراء ما اهتمت لصريخ فاضل حاسه بالغلط .. وتاخذ جواله من عنده وتدق على البيت . مره ومرتين وثلاث وعشر... وكلهم..
طووووووووووووط... طووووووووووووووط .. طوووووووووووط ...طوووووووووووووط .. طووووووووووووووط .. طوط طوط طوط طوط
ــ اااه ما احد يرد .. ويلي .. حسبي الله علي.. ويلي وحيدروه ما منه فايده

وتقعد تصيِّح .. وتنيِّح..



والى اللقاء بالحلقه القادمه...