ماعرفتوني .. كثر .. ما عرفني ..

**Ro7 AlM7bA** · 01-02-2008, 01:13 AM

اولا : القصه مررررره روعه وشهادتي فيش مجروحه بصراحه ..

اسجل اعجابي بكتابتش واسلوبش المشوق..

وانا من المتابعين وبشغف >> خلف الكواليس

اتمنى لكـ ِالتوفيق

وبالنسبه للقصه ياعلي حرام اميروه >> مطيحه الميانه هالبنت

ماترجعي فارس ورائد قلبي متقطع عليهم

ولا تتزوجي هالعله حمزوه من رلوئ مايستاهلها ..

فديتها الاموره الشيخه ادري راح تتطاوعيني..

اني الي قاهرني رائدو هالعله لو جنبي نتفته يشك في خويه ياحيف الصداقه..
بس امباهم يرجعو بس لازم فارسو يزعل >> الا تعقد المسأله هالبنت ..

بأنتظار الجزء القادم على احر من الجمر ..
لاتتطولي علينآآ خيووهـ ..

تقبليـ مروريـ ^^

**جنة الحسين** · 01-02-2008, 01:19 AM

الأحدااث مره روووعه بس حزينه

و فارس مسكين ما سيستاهل اللي يصير فيه

ان شاء الله يرجع قبل لا يعقدوا و يصلح الامور او رؤى ما توافق ياارب

مشكووره على الجزء الحزززين

ننتظر التكمله و يعطيش الف عافيه

**ارجوان** · 01-02-2008, 02:11 AM

الف شكر خيتو على الجزء الروعة>>>>>>>> ياااااارب يااااااااارب مااتواافق روئ على الخطبة

الله يوفقك بالامتحانات ووفقنا معاك ياارب يااكريم

**جنة الحسين** · 01-02-2008, 02:26 AM

نسيت ما اقووولش

الله يوفقش في امتحاناتش و ينجحش

بس برضووا ننتظر التكمله على احر من الجمر

موفقه بحق محمد و أهل بيته الطاهرين

**زهرة البنفسجي** · 01-02-2008, 06:08 PM

الله يوفقك أختي أميرة في إمتحاناتك ويوفق الجميع

بصراحه الأحداث كلما جا ليها تحلو

اتوقع ان سلمان بيخطب سمر ورؤى بتوافق على حمزة بس بعد مابيتزوجوا بيطلقها وبتتزوج فارس وهذا تفسير الحلم الا حلمه فارس

بانتظارك يالغلى مع الجزء الجديد

تحاتي القلبية

**دموع الوحدة** · 01-02-2008, 08:51 PM

أميروووه مافيه جزء ويش اسوي خميس وجمعه خخخخخخخخخخخخخخخخخخخخخخخخخخخخخخخخخ<<< خلي البنت تذكر مسكينة
عاااااد اذا تقدري حطي جزء صار لي اسبوع استنى خميس وجمعه علشان استانس اهئ اهئ
ابغى جزء
ننتظرش اختي والله يوفقش
جــــــــــــــاري الإنتــــــــــظار

دموع الوحدة

**Princess** · 01-03-2008, 03:16 PM

ههههههه ياااحبكم لجاري الإنتظار
واني جاااري الركضه..
تسلموو مليوون
ودي اهدر واشكر اكثر
ودي اعبر عن سعادتي بتفاعلكم .. بس ماني عارفه كيف وويش اقول

يعطيكم العافيه منوريني والله
وتفضلو الجديد..

**Princess** · 01-03-2008, 03:17 PM

مرت ثلاثة ايام.. ثلاثة ايام محسوبه من العمر .. باقي على رؤى من اسبوع تفكيرها 4 ايام.. وفارس هالثلاثه ينتظر فيهم حسم الأمر...
وعدى اليوم الثالث.. والساعه 9 الليل تفاجأ فارس بجرس البيت يطق ..
قام وفتح الباب وهو متوقع انها زينه .. لقاه رشيد..
ــ السلام عليكم..
فارس بإبتسامه مليانه امل ,,
ــ وعليكم السلام ياهلا تفضل ..
دخل رشيد وقعد .. فارس مرتبك مو عارف اول مره احد يزوره في البيت قام بيجيب له ضيافه,, مسكه رشيد :
ــ اجلس يا فارس ,,مابديش حاجه.. والله خجلان منك ومش عارف ايش اقللك..
فارس قعد وقلبه ناغزنه :
ــ خير يا خوي .. ويش صاير ,,..؟؟
رشيد : ــ البارح بالعشيه .. عيط عليا صديقي القلتلك عنو .. وقال ميقدرش يجي قريب ,, عندو شغلات ,, بس بقيت فيا حالتك وقلت اسأله ..<< عيط عليا = اتصل فيني ’’ بقيت فيا = كسرت بخاطري ,,
فارس بعفويه وهو يمسح على راسه بكفينه يقاطع رشيد :
ــ رشيد حبيبي لو سمحت ممكن نتكلم مع بعض بالعربيه الفصحى وبشويش ,, مو قادر الحق على كلامك واستوعبه .. ممكن يجزاك خير
رشيد ابتسم : ــ حاضر ولو انه عربيتي الفصحى مانهاش عال العال لكن بحاول .. كنت اقول لك .. اتصل بي صديقي اللذي اخبرتك عنه ,, وخبرني انو ما بيرجع قريب عنده شغل,, بس اااا << وقف عند بقيت فيا مو عارف يجيب معناتها بالفصحى.,
فارس وهو فاتح عيونه المليانه امل وحزن ..
ــ ايه,,؟؟!!
رشيد : ــ لا ادري ماذا اقول ,, ولكن ارشدني الى حل وحيد .. بدل الفاقد لا يصدر الا من بلدك هناك تستخرجه.. هنا فقط تحقيقات و سوف يطول المده .. اقترح علي ان ارشدك الى البيرو حق الترحيل وهما يتكفلو باللازم,,
فارس : ــ البيرو .. ويش البيرو؟؟
رشيد : ــ اااا ,, الأووفيس حقهم..
فارس : ــ اهاا .. مكتب الترحيل << قالها بغصه والم..
رشيد حس عليه انها صعبه يروح مكتب الترحيل ويرحلوه وكأنه عبء لو ثقل في البلد ويللا فارق بلدك..
ــ سمحلي يا فارس والله كان بودي اساعدك بس سبحان الله المكاتيب اجت هاكا..
<< سمحلي= اسمح لي ... المكاتيب = القدر .. هاكا = كذا..
فارس نص الكلام ما استوعبه بس مشى حاله لأن تفكيره كله على حالته وويش بيسوي ..
طلب من رشيد يتصل بزينه.. واستأذن من رشيد يعطيه رقم جواله للتواصل في الضروره ..
وجت زينه وياهم .. ويوم درت بالحل تأسفت على حال فارس ..
زينه : ــ الله يكون بعونك يا فارس .. خلاص انت ارجع لبلدك وانا راح نكمل اجرائات ورثك بس وقع على الأوراق وبعد كذا راح نرسل لك حقوقك بالبوسطا...
<< البوسطا = البريد..
فارس ساكت والحزن مخيم عليه ..
زينه : ــ ولو يا فارس مناش ثقه..؟؟
فارس : ــ لا والله عالعين والراس انا همي من هالحل مو قادر اتخيل اروح مكتب الترحيل .. ههههه كني هندي في بلدنا بدون اقامه ويرحلوه.. اففف..
رشيد ابتسم : ــ وش بغيت ندير, حبيت اساعدك بس للأسف , ماباليد حيله..<< ندير = نسوي ..

وقع فارس على الأوراق اللي عند زينة حق تقوم باللازم .. وقرر يوم ثاني يروح لمكتب الترحيل ...

حيدر ما راح عن باله فارس .. دايم التفكير فيه .. قرر يدق عليه .. وفعلا اتصل به.. فارس الدنيا تنور عليه من يشوف احد متصل من البلد .. يرد بلهفه.. وشوق :
ــ هلا حيدر .. هلا بالغالي ..
حيدر : ــ هلا فيك .. اخبارك وويش مسوي ..؟؟!
فارس بحزن : ــ اخباري .. ويش اخباري ياخوك .. بكره بروح مكتب الترحيل وبجيكم ان شالله قريب كني هندي ..
حيدر : ــ توتوتو .. لا حول الله. المهم توووصلنا بالسلامه وحشتنا يالغالي . هونها ياخوي وتهون..
فارس : ــ الحمد لله على كل حال . عاد انا كان بودي ازور قبر امي اسلم عليها بسوريا.. تعبان مره ياحيدر.. خلاص الجواز يبغى لي بدل فاقد اذا رجعت البلد اشوف صرفه وشوف عاد متى يطلعوه على حد علمي ياخذ 5 سنوات,. ايييه ويش اخبارك انت واخبار راائدووه النحيس اللي حارق قلبي ومزود همي ابدا لا يتصل ولا يسأل..
حيدر هو حاس بأسى على فارس ورائد وحالتهم : ــ ايييه الحمدلله عايشين ,, ورائدوه عاد ههه ما بغيته الا الحين يفتكر .. مشغول بخطبة اخته..
فارس زي الصعقه الكهربائيه سرت في بدنه.. كن احد كب عليه ماي حااااار ..
ــ هاااا..
حيدر حس عليه مختلع .. : ــ فارس ويش فيك الله لا يروعك.!!!!!!!!!.
فارس : ــ مين .. اللي انخطب ..؟؟
حيدر : ــ رؤى بنت اختي ..
فارس بعفويه وانفعال مقهور :
ــ ومين اللي خطبهاااااا؟؟
حيدر اختلع :
ــ فارس ويش فيك .. هدي حبييبي ..
فارس : ــ حيدر حيدر .. حيدررررر .. ميـــــــــــن؟؟!
حيدر حاس برعب ولا هو داري ويش صاير :
ــ فارس ,, فارس ويش فيك ..حمزه ولد عمها اللي خطبها..
ما يسمع حيدر الا صوت تكفيخ ... فارس كفخ تحفه قريبه منها وشلخها ,, وصار ينافخ .. وبصوت متكسر الحروف يالله طلعت من مخارجها ..
ــ متى..؟؟ وخلصو لو لسا ..؟؟ << قالها ودموعه تصب على خده..
حيدر حاسس بتأنيب الضمير لو يدري بيصير كذا ما اتصل .. وهو الثاني دموعه نزلت..
ــ فارس هدي وصل على محمد.. ويش فيك يا خوك..
فارس بنبرة مخنوقه..
ــ حيدر .. حيدر انا جيت المغرب على شانها.. حيدر .. انا قلت اكيد ابوي بيرحم بحالي وبيتغير حالي .. فعلا .. تغير الحمدلله .. عندي املاك ما شالله وبرجع ليكم قريبا.. حيدر .. انا احبها.. احبها.. اسمح لي عالجرأه بس احبها وابغاها.. ما تفارق خيالي ولا دقيقه ولا ثانيه .. بس بس خلاص راحت .. رااحت..
حيدر خلاص حاس بإنهيار مو طبيعي وصار يصيح وصوته مبين عليه :
ــ هدي .. هدي فارس .. هي بتفكر اسبوع.. وبعدها ما تقرر ..
فارس : ــ والإسبووع كم باقي عليه..؟؟
حيدر : ــ اربعة ايام..
فارس وهو يضرب فخذه,, : ــ خلاص ههه رااحت,, راااحت..
حيدر : ــ ويش درااك انها رااحت ... يمكن ما توافق عليه,,
فارس : ــ وليش ما توافق عليه .. ولد عمها اولى من الغريب .. وغني و يشتغل و
طووط طووط طووط
حيدر طالع جواله ..
ــ يلعن تاريخك وقتك يخلللللص الرصيييييييييييد
فارس يطالع جواله هو بعد .. ويش صاير ؟
واتصل هو على حيدر ..
حيدر : ــ هلا ياخوك .. اسمح لي خلص الرصيد..
فارس : ــ مسمووح.. وربي انك غالي وعزيز الوحيد اللي تتصل فيني وتسأل علي انت وسلمان.. ومخسرين روحكم علشاني..
حيدر : ــ لا تقول كذا ياخوك ... ثاني شي المكالمات الدوليه النص بالنص لا تخاف مو كلها علينا .. عسى بس ما نكلف عليك..
فارس عصب : ــ حيدرررررووه ..
وبصوت متكسر : ــ ما تتصور فرحتي اذا واحد منكم اتصل وسأل عني ,,
وبصوت هادي : ــ حيدر .. رائد ويش ردة فعله على خطوبه اخته..
حيدر : ــ تبغى الصراحه..
فارس : ــ ايه ولا شي غيرها,,
حيدر : ــ احسه متحمس ..
فارس انصعق : ــ مت.. متحمسسس !!!
حيدر بصوت كله اسى : ــ صراحة ويلعن صراحتي .. بس ياخوك ما ابغى اكذب عليك.. هذا اللي صار ..وانا نحيس لو ادري ماتصلت وكدرت عليك وزدت هم على همك..
فارس ودمعته انسلت على خده .. وهو يمسحها مبتسم..
ــ لااا.. فيك الخير .. ويش ذنبك انت.. انا اللي اشكرك وتسلم ما تقصر .. انت عيني اللي تشوف عني هناك.. وحاس فيني وبكل خبر توافيني .. رحم الله والديك ما قصرت..
حيدر في حلقه غصه يحاول يبلعها مو قادر :
ــ ووالديك..
فارس : ــ يللا مع السلامه..
حيدر مو عارف ويش يقول : ــ الله.. الله يسلمك..

انتهت المكالمه.. اللي معاها انتهت احلام فارس بنهايتها, وفي باله:
ــ رؤى ما تدري عني ولا عن غلاها بالنسبه لي ويش يخليها ما توافق على ولد عمها وهو اللي مبين اهتمامه,, راحت عليك يا فارس راحت,,

وكالعاده .. الكنبه رفيقه عمره انسدح عليها.. وطلع ملفع امه المرحومه.. رفعه ,, ضمه.. فتحه وغطى به وجهه.. اخذ نفس .. وشبك كفينه على صدره.. تحسس قلبه.. حس كل نبضه تتخلل كفوفه وتسري ويا دمه.. دموعه صارت تصب بحراره.,.. وصار يتمتم بصوت هادي ..
ــ اغلى ما املك فقدته.. فقدتش يالغاليه يا يمه.. وفقدت حلم حياتي .. وفقدت الأمل ..يبه .. عمرك ما عرفتني .. يوم ذكرتني .. ما جتني من ورى ذكراك الا المصايب ,اااااااه, رحمة الله عليك.. ورحمة الله عليش يا يمه...

حيدر حاس بتأنيب ضمير مو طبيعي .. مو عارف ينام.. حاس بالذنب .. لو يدري ما دق على فارس وهو في غربه وعطاه هالخبر ..
يتذكر ردة فعله وكلامه اللي صار يرن صداه في اذونه..
ــ انا احبها.. احبها.. اسمح لي عالجرأه بس احبها وابغاها.. ما تفارق خيالي ولا دقيقه ولا ثانيه .. بس بس خلاص راحت ..
مو عارف ويش يسوي .. مسك جواله بيدق على رؤى .. واللي فيها فيها..
وفي باله : ــ رائد قسى بالمره على فارس .. ليش كذا.. انا لازم اكلم بنت اختي .. وااايد على الرجال مصايب .. ولعنة على حمزووه الكريييه..

تابع>>

**Princess** · 01-03-2008, 03:18 PM

حوريه شبكت المسنجر .. لقت سمر صاحيه..
ــ هلا سمووره..
ــ هلا والله حور ..
ــ اخبارش ..
ــ تمام الحمدلله.. اخبارش انتين..
ــ بخير الله يسلمش ..
ــ دووم يارب ..
ــ سمووره..
ــ عيونها..
ــ تسلم عيونش .. ما كتبتي شي جديد ..؟؟
ــ ههههه لا لويش ..
ــ احم.. لا بس في ناس عورو راسي .. ينتظرو كل جديدش بفارغ الصبر ..
سمر : ــ يوو مين ..؟؟
حوريه : ــ اخووي ..
سمر استحت وخجلت :
ــ ليش يقراهم هو ...!! متابع ؟؟
حوريه استحت وتفشلت : ــ ايه اسمحي لي طبعتهم وعطيتهم اياه يقراهم ..
سمر ساكته..
حوريه : ــ ضايقتش غناتي .. مو قصدي بس اخوي يحب يكتب وكتاباته حليوه ويتابع كتابات ,, قلت يشوف خواطرش اذا يضايقش غناتي خلاص ما اراويه مره ثانيه..
سمر : ــ ههههه لا غناتي ما يضايقني دون اللي في المنتدى .. اكم يتابعو ويعلقو عادي ..
حوريه : ــ أي منتدى..؟؟
سمر : ــ منتدى الـ......
حوريه : ــ اهاا.. وويش اسمش هناك..؟؟
سمر : ــ الم وامل
حوريه : ــ الله حليو اسمش .. عجبني ,, الم وامل .. زي خواطرش عميق ومليان اسرار .. بس صراحه اخوي معجب في كتاباتش ويمدح اسلوبش .. عاجبنه مره..
سمر : ــ ههههه تسلمي من ذوقش واخوش بعد من ذوقه يسلم..
حوريه : ــ الله يسلمش .,, يللا اخليش الحين بقوم ..
ــ اووكي ..
حوريه حطت بالخارج.. ودخلت المنتدى تشوف الم وامل ..
صارت تتصفح.. مواضيعها وكتباتها ..
الا بدخلة سلمان عليها..
ــ ووويش تسوووي .. << نبرة مفاجأه..
حوريه : ــ بسم الله على عمري ..
وطالعت في سلمان على جنب :
ــ اتصفح المنتدى..
ــ اوه اوه.. شيه مشاركه فيه ..؟؟
ــ لااا اني ويش يعرفني لهالسوالف ..
ــ اجل اكيد مطيحه في روايه وقاعده تقري فيها..
حوريه تحرك رااسها وتطلع صوت معناته لأ..
سلمان : ــ اجل ويش تسوي ؟؟
حوريه : ــ اقرى خواطر ..
سلمان قرب منها يطالع اللي تقراه :
ــ خواطر ...!!
وقرب اكثر وطاحت عينه على جزئيه من الخاطره ...
في دائرة مفرغه والإتساع بها يضيق .. ادور لوحدي يرافقني ظل الضيق..
انفاسي تتلاحق و تطلعي لغدي يزيد بي التشويق ..ويغويني عن الطريق..

وبتساؤل عفوي :
ــ هذا مو لسمر ؟؟
حوريه وهي تطالع في الشاشه ومبتسمه من الأذون للأذون وفاتحه عينها حدها.. وشوي طالعت جهة سلمان على جنب وصارت تحرك حواجبها بخبث ..
ــ هااا .. ويش دراااك.. حافظنها ...!!!
سلمان :
ــ هاا.. صحيح ما عندش سالفه.. قريتها كذا مره . والتعبير حليو علق في راسي .. خير ان شالله..!!!
حوريه وهي مستمره بحركتها :
ــ هااااا .. ممممممم.. علينااا..
سلمان يمسك اذون حوريه ويمصعها.:
ــ حوريوه.. يوزي عني << يوزي عني = جوزي عني خليني بحالي
حوريه : ــ أي أي آآآآآآآي .. خلاص .. هههههه .. هد اذووني ..
سلمان تركها : ــ ايه حق تتأدبي مره ثانيه وانتين تكلمي اخوش الأكبر منك..
حوريه : ــ زين.. بس .. ممممم .. مستغربه منك شلووون حفظته...
سلمان: ــ حوريوووووه..
حوريه : ــ هههه ها ها خلاص خلاص..
سلمان : ـــ ما تقومي بقعد شوي على هالنت..
حوريه : ــ ليش من متى انت تقعد عليه...
سلمان : ــ حوريوووووه..
حوريه : ــ زيـــييييييين...حوريوه وحوريوه
قامت حوريه وهي تضحك..
ــ اخلي المنتدى والخاااطره مفتوحه لو اسكر كل شي ...
سلمان : ــ قومي بسرعه خلي كل شي انا بسكر اللي اسكره وبفتح اللي افتحه...
حوريه : ــ زين لا تعصب ..
وقامت وطلعت من الغرفه,,
سلمان يتأمل الخاطره,, يتأمل النك نيم..
ــ الم وامل ,,
وسرح يفكر في عمق الإسم..
شوي .. صدى ذكرى المأساه,,, يدوي لا ننساه.. أيــــــازهرااء.. لا ننساكِ
جاله مسج.. الهمه بإسم...
ــ مممممم صدى الذكرى ..
وسجل في المنتدى ..

الوقت يمر بسرعه بالنسبه ليها .. وبثقل بالنسبه لفارس ...
تفكيرها في حمزه لابد يقاطعه خيال فارس .. كانت تتعذب في اليوم مليون مره.. واذا طلعت من غرفتها لأهلها.. تشوفهم يعاملوها غير ودايم يتكلمو عن حمزه ويسألو وراه وويش طبعه ويا ربعه والناس ..
وهي من تسمع هالطاري تنسد نفسها وترجع غرفتها...
اتصلت لحنين .. حاسه بضيقه ومحتاجه احد يكلمها .. للأسف جوال حنين مقفل ..
قفلت المكالمه .. الا برساله .. فتحتها لقتها كول مي ..
الجوال في هالخدمه ما يطلع الإسم بس الرقم وهي ما تحفظ ارقام

رؤى : ــ مين هذا كول مي هالحزه.. ادق بسلعه واقفل واشوف يطلع اسمه عندي لو لا ..
دقت لقت .. خالي الغالي ..
رؤى : ــ يوو ويش فيه خالي عجيبه هالحزه داق و كول مي ..
رد عليها حيدر :
ــ هلا غناتي ..
رؤى : ــ هلا وغلا ..
ــ نايمه ؟؟
ــ لا وين يجي النوم..
ــ زين دقي على بيتنا تلفون..
ــ حق ويه..
ــ ابغاش بسالفه و ما عندي رصيد انا لا اخسرش ..
ــ زهقاانه اطلع بلى ,., ويش صاايل قول عادي ..
حيدر بتردد :
ــ رؤى .. ويش رايش بفارس.. قولي رايش بصراحه ..

رؤى مختلعه .. ويش هالسؤال المفاجأ .. وبنبرة مبين عليها التساؤل والدهشه:
ــ ليش يعني ؟؟
حيدر : ــ قووولي رااايش وبصراحه..
رؤى ..و الدموع طاغية في عينها..
ــ ..
الى اللقاء ..

**أميرة الشوق** · 01-03-2008, 03:51 PM

أميرة الجزء روعه مثل روعتك
مشكووووووووووووووووورة

**زهور الريف** · 01-03-2008, 03:57 PM

يالله
جزء
جناااااااااااااااااان
روووووووووووووووووعة
ابداااااااااااااااااااع

ماشاء الله

شببناش خيتو من عيون الحسود

اللهم صل على محمد وآل محمد

تقبلي مني أرق التحيات
ودمتي ودام ابداع قلمك

وننتظر جديدك على أحر من الجمر

زهور الريف