اليوم الخميس ...الساعة 5 الفجر .. ام حسين قاعده بالحوش بعد الصلاة.. .. على التاوة تخبز خبز.. تمسح التاوة بيمينها بالعجينه.. تسبقها بسم الرحمن ..و بكل خفه وسرعه.. والإبتسامه مرسومة على وجهها السمح .. وبصوتها اللي يرسم البسمه وتعيش معه جو الماضي لحظه بلحظه..:
ــ أماه امبى لقمة **** واللقمة من البرمة
والبرمة من الحطب **** والحطب يمبى قدوم
والقدوم عند الحداد **** والحداد يمبى فلوس
والفلوس عندالعروس **** والعروس تمبى ريل
وترفع ايدها اليسار .. وبنبرة الملهوف المشتاق :
" ياارب يالله تبلغني فيك يا فارس يا ولدي .. عساني اشوفك معرس .. على ديك العروس القمر ..واغسل رجولكم يا كريم "
وتنهدت من قلب والإبتسامه ما فارقت شفتها وترجع تكمل اغنيتها ..
والريل يمبى أولاد **** والأولاد يمبوا حليب
والحليب عند البقر **** والبقر يمبى حشيش
والحشيش من المطر **** والمطر من عند الله
لا اله إلا الله **** محمد رسول الله *** علي ولي الله...
وتخلص خباز .. وتكيس الخبزات في الأكياس.. وتصفهم بترتيب في ..
" المغطس" " الطشت" " السحلة" <<<<< ههههه بأغلب لغات القطيف لو اعرف زود قلت ..
وتتوسد الأرض بأياديها تقوم.. تعدل الشيلة.. وتتوجه لغرفة حفيدها فارس.. وهي تلهج بالتسبيح .. تطق الباب.. وتفتحه بهداوه .. وعلى صوت صرير الباب القديم
يفتح فارس عيونه...
ــ امي فارس.. قعدت.. ؟؟
فارس يتمغط ويمسح وجهه وبأبتسامه:
ــ ايه امااه.. صباح الخير
ــ صبحك الله بالنور والسرور والخير يا بعد ابوي .. يللا قوم بالصلاة على محمد تمسح وصلي مدة اسوي لك لقمة.. قبل لا تروح سوق الخميس..
ــ ان شالله اماه..
ويقوم فارس يعدل منامه.. يتمسح ويصلي.. ويطلع لجدته اللي جهزت له.. الحليب الصاخن.. وقرص البيض مع الخبز,,
يبوس راسها قبل لا يقعد:
ــ يعطيش العافيه امااه .. ولا يحرمني منش ..
وترفع ام حسين ايدها للسما..
ــ ولا يحرمني منك يا بعد روحي بلغني الله فيك ..
ــ ان شالله فيني وفي اولادي واولاد اولادي
تمسك ام حسين الشيله وتغطي وجها بها :
ــ يؤه .. ههههههههههه.. ويلي ياولد لأولاد اولادك بعد.. الله يخليك يا بعد روحي
ــ ويخليش يا أحلى ام وجده ومرة بالدنيا.. انا اذا كبرت وبتعرسيني ابغى وحده زيش..
ــ هههههه.. ضبعه.. ويش لك بالضبعان...
ــ هههههههههه احلى ضبعه..
تمسك ام حسين طرف شيلتها وتضرب بها فارس :
ــ غربل الله شرك..
ويصيروا يسولفوا وهم يفطروا سوالف زي العسل .. تشرح القلب بعيده عن الهموم والضيقه والمشاكل .. سوالف تتخللها كل دقايق ادعيه من اصدق القلوب في الدعاء...
ــ الحمدلله رب العالمين
ــ عوافي يا ولدي .. يالله تديمها من نعمه وتحفظها من الزوال ..
ــ يارب .. الله يعافيش اماه... يللا باغسل ايدي .. عشان الحق ابسط بالسوق
ــ يللا امي .. اني برزتهم لك بالمغطس..
------------------------------------------
فارس .. عمره وقتها 12 سنه... ولد مرضي .. طيب وحباب .. الكل في فريقهم يحبه.. خدوم ويساعد الغير .. يضحي بكل شي يقدر عليه.. رغم ضيقة الحال اللي هم فيها .على الله وعلى الشؤوون... الا انه كان يكافح.. ويحاول قد ما يقدر ...
كان ذكي وشاطر.. كان ايام دراسته .. يرجع من البيت وعلى طول يخلص مذاكرته.. ويروح يعلم اولاد بالإبتدائيه لواحد بطران في فريقهم كان يعرف جده المرحوم .. سمع بذكاء فارس وبحالتهم المادية فحب يساعده بطريقة ما يجرحه ويحرجه فيها.. ويوم الخميس يبسط بسوق الخميس يبيع خبز تاوة وماي مثلج..
------------------------------------------
حمل فارس المغطس على راسه.. وطلع يتمشى للسوق .. وقلبه بالمره مليان رضى وقناعه .. لاهو متذمر .. ولا هو متضايق..
ترررن.. ترررن... تلفون بيت فاضل يرن.. الساعه 10 الصباح..
ــ الوو.. <<< رؤى...
ــ السلام عليكم ... <<<< عبدالله.. اخذ الرقم من عند رائد " للتواصل"
ــ وعليكم السلام ..
ــ ابوش نايم.. والا قاعد..
ــ لا قعد..
ــ طيب نادي لي عليه..
ــ ان شالله..
ــ يبااااه.. في واحد يبغاك في التلفون...
ــ ميين؟؟
ــ ما ادري .. ما قال لي ..
ــ يمكن رضا عمش << يسميه اخوي بحكم الجيرة والصداقه القديمه..
ــ لااا مو عمي .. صوته غير..
ــ خير ان شالله .. اشوف الحين
ــ الو.. مرحبا..
ــ مراحب هلا اخوي ابو رائد..
ــ هلا .. هلا عبدالله..
ــ هلا فيك.. اخباركم عساكم بخير
ــ بخير الله يسلمك اخبارك انت واخبار الوالد...
ــ بخير الله يخليك يسلم عليكم
ــ الله يسلمك وياه من الشر
ــ اخبار رائد كيف صارت ايده..
ــ بخير الحمدلله..
ــ الحمدلله... ااا...ابغى اطلبك اذا ما عليك امر ولا كلافه..
ــ اطلب ياخوي .. امرني
ــ ما يامر عليك ظالم .. بس اليوم الخميس وحبيت اخذ رائد اذا ماعندكم مانع اتمشى وياه بالسوق ..
ــ لا ..عادي غالي والطلب رخيص.. حياك الله
ــ تسلم الله يحييك...
-------------------------------
عبدالله .. من ثلاث سنوات ما طب سوق الخميس .. كان مهند يحب يروح يتمشى معاه.. فمن فارقه اخوه.. فارقت رجوله تراب السوق.. وماعاد يروحه..
بس يوم عرف رائد.. حس الروح رجعت له.. وحب يسترجع الذكريات معاه...
--------------------------------
سكر فاضل السماعه.. وراح لزهراء خبرها بالموضوع .. فرحت.. وطلبت من ابو رائد يرجع يدق على عبدالله يعزمه على الغدا عندهم هو ويا ابوه ..
فاضل سوى اللي قالت عليه زهراء.. وبالموت رضى عبدالله .. بالحلف عليه...
ولو ما ساومه فاضل على طلعة رائد.. اما يتغدى والا ما في طلعه ..
استسلم عبدالله وضحك ووافق...
فاضل يدري هالشي بيفرح رائد.. راح له غرفته لقى المعركه قايمه.. وشوي تجيه كوره ..طاااخ .. على وجهه..
ــ اااه.. ويش هذا..؟؟
الا رائد مطلع راسه من السقيفه...
ــ يؤه .. يبااه .. ههههههه اسف .. بس ادور حاجه..
ــ تدور شي تسوي هالمعركه...
ــ هههه زهقان.. عادي تالي ارتبهم
ــ ترتبهم هاا.. اذا مو اختك والا امك تعلمني عنك...
ــ خخ .. لااا.. ادري ..
ــ المهم عندي لك خبر.. بيطيرك من الفرحه..
رائد نط من السقيفه وهو متلهف .
ــ. خبر ويش ؟؟
ــ عبدالله..
نور وجه رائد من سمع اسم عبدالله وبلهفه رد::
ــ أيـــــــــــــــــــه ويش فيه..
ــ خمن.. ويش؟؟
ــ مو قادر اخمن.. ويــــــــش؟؟
ــ ههههههههه اعصابك.. اموت واعرف ويش مسوي فيك هالعبدالله ساحرنك
ــ ههههه لا سلامتك يبه بس احبه .. اخوي الكبير هذا..
ــ اوه اوه.. والله حركات... الله يخليكم لبعض...
ــ يارب.. يباااه .. ويش فيه..
ــ ههههههه ايه صدق.. جهز نفسك بيطلع وياك سوق الخميس..
رائد من سمع هالخبر .. طار من الفرحه وضم ابوه وصار يناقز
ــ ياهوووو .. بيروح وياي سوق الخميس .. هيه هيه هيه..
ــ هههههههه غربل الله بليسك .. عساك دوم مستانس والله يجزاه خير من كان السبب..
نص ساعه .. تجهز رائد ومر عليه عبدالله...
ركب رائد السيارة.. وهم بالطريق .. تفاجأ عبدالله برائد يطلب منه ينشد له الأنشوده اللي نشدها له البارح..
عبدالله لبى له الطلب... وصار ينشد... شوي تداخل مع صوت عبدالله صوت رائد..
ابتسم عبدلله وكمل .. ماحب يلتفت لرائد لا يحرجه.. ويسكت ...
لين وصلوا سوق الخميس...
وصاروا يتمشوا.. عبدالله شابك ايد رائد.. ورائد مهي سايعتنه الأرض من الفرحه..
شروا حلويات.. واكل.. وصاروا يسولفوا وهم مستانسين..
يتبع>>>
المفضلات