ماعرفتوني .. كثر .. ما عرفني ..

[أمل الظهور]

يالله عليك اموره يالغلا

الاحداث جنان

رؤى مهي عارفه وين تروح من الخلعه غطت وجهها بالفوطه ودارت تركض واقرب لفه ليها غرفة رائد.. دخلتها وقفلت عليها الباب..فارس حس بإحراج وزخه العرق ..
ــ يا الله كله مني المفروض استأذن.. اقول يالله.. ياربي اسف وربي مو قصدي..
رائد وهو مرتبك ويبتسم ومهو عارف ويش يرد..
ــ لا مني انا ما عليك.. انا الغلط مني ما قلت ليهم.. انا اللي دخلتك مالك ذنب.. حصل خير..

وربي عورت قلبي مسكينه واخوها ابد مافيه احساس عااااد

ــ حقش علي خيه .. خلاص حصل خير.. فارس هذا.. مهو غريب تعودنا عليه..
وبلا وعي رؤى تحضن اخوها وتصيح..
رائد حاسس بإحراج اخته خبره بحضنتها من يوم هم صغار .. مهو عارف ويش يسوي وكيف يتصرف .. صار يهديها.. ولبسها عباتها.. وطلع قدامها..

وياعيني ياعيني على اللي تفكر بالكاشخ بالشماغ




يلا امورر ننتظر الباقي اوكيك

[Princess]

يسلمووو على التفاعل الجميل
واعذروووني على التأخير بس وربي مزحوووومه .. اسألكم الدعاء

بالنسبه لسؤالك خيي ياسر
يتحنطب = يتحمق = يتذمر .. :) ويا هلا فيك وتسلم
تفضلوا الجديد

[Princess]

وشوووي.. رائد وهو حماس..
ــ والله شي هالكبده.. حيدروه تسلم
فارس ..
ــ أي والله يعطيك العافيه... ويش فيك ما تاكل..
حيدر :
ــ لا باكل لبنه وجبن.. مالي خلق الكبده..
رائد .. وهو ياكل ويبلع..
ــ اه.. هذا وانت اللي طالبنها لينا.. ويش فيك.. ما تبغاها الحين .. ترى الكبده زينه للحنجره تقوي الحبال الصوتيه << يتمسخر على حيدر لأنه بينشد في الحفل
حيدر..
ــ شفت اللبنه والجبنه وصار نفسي فيهم كيفي.. خخ حبالي قويه ما يحتاج ليها كبوود..
فارس..
ــ .. هههه كح .. كح شقال قال تقوي الحبال.. بس صدق .. احد.. تحصل له كبده كذا اوكيه وفوق الأوكيه.. وياكل جبن صدق انك مزااج..
حيدر..
ــ اكلوا بس وما ليكم شغل فيني..
ويووم خلصوا ونظفوا الصحن ومصوا اصابعهم..
حيدر. .. وبلهجة مسخره..
ــ حلووه الكبده موو..
رائد ..
ــ أي والله بس خبري كبدة مطعم الــ.... مهي كذا.. غيروا الشيف عندهم يمكن..
حيدر.. وهو رافع حاجب وحاجب ويبستم بمسخره..
ــ لا ما غيروا الشيف..
رائد..
ــ اجل تطوروا..
حيدر..
ــ هع,, ولا تطوروا..
رائد وجهه مستغرب..
ــ اجل ويش ..
حيدر ..
ــ لأنها مهي من مطعم الـ.... ..
رائد .
ـــ اهااا وانا اقوول .. يا اخي قول من الصبح مو من عندهم.. طالعه رهيبه على الكيف تقول لي مطعم الــ......
حيدر.. بهمس مسخره..
ــ لو تدروا بس من وين..
فارس..يشرب ماي..
رائد ..
ــ من وين خلينا نشتري كل مره..
حيدر ..
ــ بفففف هههههههههه من بوووفية امينوووووووووه...
رائد :
ــ كحححححح
فارس.. طفر الماي اللي في بوزه وسبح العالم..
رائد حممق..
ــ وما حلت لك الا بوفيه هالتعبان..
حيدر ..
ــ عناد فيكم اشوفكم ما تشتهووه ودينكم دينه.. ولو يحصل ليكم قطعتوه قطع اصغر من هالكبده.. مع انه اكبر منكم بـ 7 سنوات.. ما ادري ويش فيكم عليه.. قلت زي ما قهرتوني وانا انتظركم اقهركم واجيب ليكم كبده من اللي تلوع كبدكم منه...
رائد..
ــ جعله الصاقعه انت وياه زين
حيدر ..
ــ بل بل افا .. لهالدرجه..
فارس ضرب الطاوله..
ــ لهالدرجه ولهالعلامه بعد...انا هالمخلوق ما اطيقه دم ضروووسي.... شوف عاد فعايله وبلاويه ما ادري من وين سوى هالبوفيه بتقنعني من حلال..؟؟ الا حرام وستين حرام..
رائد..
ــ حسبي الله على شرك من خال .. بيعورنا بطننا من القهر.. قلت البوفيات.. والله لو جايب من بوفية وحيدوه الهندي اللي يحوس بخشمه ارحم من امينوه
فارس..
ــ وعوووه عليك انت بعد الا وحيدووه هالهندي عمى ويش كفيله هذا ما كنسل اقامته للحين.. لو انا من زمان سفرته.. ما يعرف الإختراع اللي يسموه نشاف لوع الله كبدكم على هالصبح.. اففف..
حيدر ..
ــ ههههههههههه خلاااص المره الجايه من عند وحيدوه حق الإسهال..
رائد..
ــ لوعت قلبنا بهالكبده لا تعيدها ها..
حيدر..
ــ لا ما بعيدها.. بس ويش فيكم على امينوه.. كل هذا على شان حركاته الصايعه لول يوم احنا صغار..
رائد.. وهو يطالع على جنب
ــ خخ ليش كبر وعقل.. زادت بلاويه .. ولا بعد متزوج 2 ويلي الواحد يالله على وحده..
فارس ..
ــ هههههههه بل عليك وويش عليك منه جعله ياخذ 10 خليه يولي .. والله انكم نكد.. خربتوا المزاج بهالهدره...

غسلوا وخلصوا.. وطلع فارس يحمي السياره...
رؤى يوم درت فارس طلع.. طلعت وشافت خالها حيدر ويا رائد بيطلعوا..
قامت نادت عليهم .. وعطت كل واحد منهم حرز صغير كتبته وطوته ولزقته بلزقه..
رائد.. يمزح..
ــ ويش هاااداا سحررر..
ــ سحل وجهك خخخ هادا حلز الإمام علي عليه السلام يعمي عنكم العين
حيدر..
ــ الله الله سلام الله عليه.. تسلمي والله خوش بنت اخت الله يخليش..
ــ ويخليك خالي ..
رائد..
ــ شوووكرننن
رؤى :
ــ عفوووون..

طلع حيدر وهو مبتسم سبق رائد .. وقرروا قبلها ان كلهم بسياره فارس يروحوا المدرسه ..
رائد يفتح باب الطريق ويشوف المفاجأه
ويضحك من قلب.. فارس بسيارته.. وملزق على النوافذ صور لرائد .. و كاتب في ورق حركات بخط حليو.. مبرووك التخرج لأغلى غالي.. ومزين السياره.... وجامة السياره ملزق عليها على جنب صورة جماعيه له ولرائد وحيدر .. معاهم المرحوم عبدالله .. وكاتب .. في قلبنا يالغالي وما ننساك وكل لحظه نعيش وياك..
رائد يضحك وعيونه تدمع مو عارف ويش يقول.. حاس روحه كنه معرس.. عجبته الحركه.. ولا عاد الصوره الجماعيه رجعته ذكريات لورى...

عبدالله ..
ــ ويش رايكم نصور صوره جماعيه.. وكل واحد اعطيه نسخه حركات.. يللا انا ابغى اصور مع اخواني...
وفي الإستديو على كنب طويل ..
رائد..
ــ انا ابغى على يمينك عبدالله مالي شغل..
فارس ..
ــ اه حجز اليمين اجل انا اليسار..
حيدر
ــ افاا وانا وين بتقطوني..
الفلبيني ..
ــ تعال هنا...

قعد حيدر قدام عبدالله على الأرض خلاه يرفع ركبه وحده ويحط كفه عليها..

وتكك.. صوووره...

الدمعه طاحت من عيون رائد.. فتح باب فارس ومسكه من ذراعه وسحبه برى..
وحضنه وهو يفلص فيه..
ــ مشكوور يالغالي ..
فارس يزيد الضم لرائد..
ــ العفو حبيبي اقل شي اسويه لك عقبال ما اسوي هالحركه بعرسك يارب..
حيدر واقف يطالعهم ومره متأثره منهم..
ــ ااه الله يخليكم لبعض يارب ولا يحرم كل واحد فيكم من الثاني...

وركبوا.. ووصلوا المدرسه...


دخلوا لقوا بوجههم حسن.. كاشخ وحركات.. وحاط وشاح التخرج على الدراعه..
رائد يتمسخر..
ــ حسنووووووه ماااركه مسجله..
ويرفع حواجبه ويضرب بطن حسن ويمسح عليه وايده تمر على الشال..
ــ ممممممم علاااامة الجوووده..
حسن ..
ــ ههههههههه غربلك ربي غربال.. روح بس انت وخالي اخذوا الشال حقكم ويالله البسوه..
رائد..
ــ احسسسه مسخره.. ولا اصفر بعد.. ويععع.. كان سووا لينا احمر..
حيدر..
ــ احلى يالرومنسي.. ما تبغى وردي بعد..
رائد..
ــ مالت عليك ويش عرفك.. على شان طقم ويا الشماغ..
حيدر..
ــ دخيل الله كحلي .. صدق ويش هاللون يعور العيون..
فارس ..
ــ احمدو ربكم.. خخ يللا تحركوا...
شوي الا المشرف ينادي على حيدر.. على شان يرتب معاه دوره بالحفل..
رائد يضرب كتف حيدر..
ــ احلى يالبزنيس بدى الشغل يللا حررك حررك..


تابع>>

[Princess]

حيدر ..
ــ خخخ مالت عليك.. يللا موفقين..
فارس ورائد وحسن..
ــ جميعا..
فارس ..
ــ انا باروح اقعد ويا الضيوف يللا الى اللقاء..
رائد وحسن..
ــ حياااك..
رائد..
ــ الا حسنووه.. ولد عمي حمزاوي ما شفته..
حسن رافع حاجبه..
ــ وانت تسألني عن حمزاوي هذا.. ويش مدريني عن اراضيه..
ــ اوه اوه نسينا.. افاا ولا بتعتدلوا... انا صدق اميل لك اكثر.. بس هو بعد ولد عمي ومن زمان ما شفته.. ما عندي الا هو ..
ــ ليش واخوه علي وين طيرته..
ــ الله لا يرده.. هذا ماهو ولد عمي..
ــ اه.. اجل ويش..
ــ بس كذا بالإسم فقط..
ــ كيفكم ولاد العم انا ويش دخلني...
رائد يضرب دبة حسن..
ــ يللا بس مشينا..
راحوا يتمشوا ويسلمو على الربع .. الا حمزه مقبل من بعيد.. يمشي ويا ارض انهدي ما عليكي قدي..
حمزه كان متفوق وشاطر.. ومتوقع نفسه ياخذ المرتبه الأولى بهاليوم على طلاب الأدبي..
حسن..
ــ خذ لك سيد سفن اب.. لاعب على روحه ومتشمغ.. افا بس مساميره مغطنها اليوم بالشماغ.. الحمدلله ما طلعوا تقول اسياخ بنايه .. اما لو طلعوا من الشماغ بقول لااا.. مو راس هذا..
رائد..
ــ ههههههههههه بل بل .. ويش هالوصف.. كل هذا غيران من التسريحه.. يا اخي غرشة جلي وتؤدي الغرض..
حسن..
ــ والله لو اعبي راسي جلي ما بيوقف زيه..
ــ مو لأنك فلافل..
ــ عدال يا الحرير.. لا يحوشك..
ــ اححححححح.. ويش حلاته..

ويتقربوا من بعض حمزه ورائد.. ويصفقوا كفوفهم سلام..
ــ هلااااااااااا زعيموووه..
ــ هههههه يقطع سوالفك هلااا ابو عنتر..
ــ عنتر وجهك.. اخبارك يا مغيب وين طاير من زمان ما شفت رقعتك..
ــ حشاا كفر مو ادمي ويش رقعتي.. زين الحمدلله انت اللي غايب ولا تنشاف اللهم ادفع البلا ما كنك ولد عمي..
ــ يللا ظرووف ودنياا..
والتفت حمزه بسرعه لحسن.. ورفع حواجبه ورقبته و اصابع ايده السبابه والوسطى حركة هلا سريعه .. بدون كلام

حسن قهرته الحركه.. ولا رد عليه..
حسن..
ــ رائد انا بروح اشوف حيدر تعرف حنا وين زين..
رائد ..
ــ اوكي..
حمزه فباله ..
ــ روحه بلا رده غثه من جد

وراح حسن..
حمزه,,
ــ ويش فيه هذا ولد خالتك شايف روحه على ويش هالبرميل..
رائد..
ــ حدك عاد ولد خالتي ما ارضى عليه..
ــ زين زين .. غلطنا ومنك السماح..
ـــ أي انتبه لا تعيدها ..
ـــ اخبارك واخبار اختك.. << حمزه جرئ مره وكل شي عنده عاادي
رائد استغرب.. وغمض نص عيونه ويطالع في حمزه بحركه بما معناها ما سمعت..
ــ هااه.. ويش قلت..
حمزه..
ــ اخبارك واخبار رؤى..
رائد..
ــ بـــــعد..رؤى .. زين..
حمزه..
ــ ويش فيييك..؟؟
رائد..
ــ لا ابد سلامة قلبك..!! انا بخير.. واختي بخير.. بس ويش جاب طاريها الحين..
ــ حشاا ويش فيك شبيت.. هي الا بنت عمي عادي.. مافيها شي لو سألت عنها..
ــ ايه.. زين..
ــ صدق ويش مسويه.. تخرجت اجل.. اسمع امي تقول بتفوق ما شالله.. تستاهل اكثر.. بلل من زمان خبري بها.. من تقريبا سنتين..
رائد رافع حاجب وحاجب..
ــ انا خبرك بي من متى.. وما اشوفك تسأل عني ومهتم فيني هالكثر .. استحي اقول بس..
ــ هههههه ويش فيها تغاار هاا.. ..والله عقده.. هي الا بنت عمي..
ــ انت اللي ويش فيك قوية عيونك.. اسأل ما قلنا شي بس يعني مو كذا..
ــ زين بس خلاص بطلنا.. بس سلم عليها..
ــ اه .. خذ لك هذا .... والله انك رايح فيها... اقول عطيتك فيس باي ..
ــ ههههههه يخرب عقلك على هالمخ العقد .. باي..

حمزه كان يحب رؤى ويميل ليها من يوم هم صغار.. بس رؤى ما تطيقه وتقول عنه دايم انه نفخه وشايف حاله على خراط.. ويتفلسف في اشياء ما يفهم فيها .. ودوم تلعب عليه.. العبقلينو... " العبقرينو"


تابع >>

[Princess]

راح رائد لحسن وحيدر.. لقى حيدر ماسك الورقه.. ويراجع الأناشيد كانت قصيده للتخرج حصلها من النت... وانشوده لفراق الأصحاب والأحباب... وصوته طالع شي.. وحسن يحوس يعدل ويا المشرف ومعاهم كم طالب يحوسوا..

ربع ساعه وابتدى الحفل بالقران الكريم.. وكلمة المدير كالعاده ترحيب بالأباء واولياء الأمور..
وهلوسوا شوي مسرحيات وقرقره.. وجا وقت التخريج..
وقف حيدر على المنصه.. والأضواء عليه وبدى ينشد...

لِننطلق إلى العُــــــــــلا
لِنَأتِ دَومــــــًـــــا أَوَّلاً
لِنَطْلُبِ العُلومَ نَغـــــــــتدي بِها مَشاعـــلا
فالكَوْنُ شاءَهُ الـــلـــــــــهُ أنْ يَكونَ مَعْمَلا
والمرءُ طولُ عُمْـــــرِهِ ماعـاش يَحْيى أمـــلا
هيا انشُرُوا مَعَــــــارفاً هيا انْـشُرُوافَضائِــــلا
وأَظْهِرُوا تَفَـــــــــــوَّقًا واشْتَــهِرُوا بين الملا
لاتَكْسَلُوا فَكُلُّ مَـــــــنْ سارَ بِجِدٍّ وِصــــــــلا
قُوموا انظُروالِنَمْلــــةٍ تـَــــــــدْفَعُ دَومًا ثِقـلا
ثُمَّ انظُرُوالِنَحْلَـــــــــةٍ كَيْـــــفَ سَقَتْنَا عَسَـلا
فَنَمْلَةٌونحلـــــــــــــــةٌ أقـــــــسَمَتا أن تَعْمَـلا
ألمْ يَحِنْ لنابــــــــــأن نَكْسَبَ مِنها الحِيَـــــلا
هيا إذًا فَمِنْهُمـــــــــــاتَعَلَّمُوا تَكامُــــــــــــلا
ومُنْهُما تَعَــــــــــودواتعـــــــــــاونًا يا نُبَـلا
الشَّرقُ في عُلومِهــــا بالأَمْسِ غَـــذَّتْ دُوَلا
والغربُ مِنها اقْتَبَسَتْ يومًا أَقَلَتْ زُحَــــــلا
هيّا إذًافَجَــــــــــدِّدُوا حُسْنَ اقْتِداءٍ بالأُولـى
ثُمَّ امْنَحُوا لِمَن رَعَـى تَفَوُقًا كُلَ الــــــــــوَلا

والطلاب يمشوا طوابير يركبوا المسرح..
وفارس يصور بالجوال حيدر وهو ينشد والطلاب وهم يركبوا المسرح ومركز على رائد.. رائد انتبه له من بعيد فصار يعدل في شماغه وحالته..

خلصت الإنشوده والكل ودهم لو كانت اكثر .. صوت حيدر طالع فظييع. ... التصفيق قام والتصفير.. وحركات...
وبعدين صار المدير يخرج الطلاب.. بدى بالمتفوقين من علمي.. وكان حيدر المركز الأول ما شالله عليه و رائد المركز الثاني .. طالع على خاله.. فارس من قالوا اسم رائد قام يصفر.. ومركز الجوال على رائد.. افرد له مقطع خاص بإسمه وتفوقه وتخريجه.. ولأنشودة حيدر مقطع خاص ..

حسن طلع المركز الأول على طلاب الأدبي.. وقام التشجيع .. وحمزه المركز الثالث.. حمزه مولع ومبين عليه القهر.. مكشر وحالته حاله..
حسن من الفرحه بطريقة ..عفويه صار يتميل بالشماغ يمين وشمال وهو رايح لرائد .. ورائد وياه يتمايل .. شوي ويقلبوها رقص ...
وحمزه يطالع فيه ويتحنطب فباله...
ــ خبل ومهرج.. كيفا اخذ الأول ما ادري

بعدين النهايه.. وقت الوداع.. .. بين الأصحاب.. حيدر نشد انشوده قالوا الفراق..
عن الفراق بين الأصحاب .. اللي بيسافر بعد التخرج بعثات واللي بيلهي بظروف الدنيا والمراكض ورا الرزق او تكملة الدراسه .. ومستقبلهم المجهول...
قـــــــــــــــــــــااالوا الفراااق...
اول ما بدى حيدر بهالجمله.. وكانت قويه ومع الصدى وحنجرته صافيه والصوت شي.. فارس حس بقشعريره.. وبنفس الوقت رائد.. حس بحنين للغالي عبدالله..
ويكمل حيدر..

قالوا الفراق يدق دوما بابه..
فسألتهم هل للفراق سوابق..
فتسمروا عجبا لقولي سائلا ..
فأجبتهم قلبي كسير مشفق ..
اخشى الفراق وسنة الرحمن جاريه ولكن ارجو صبرا يسبق...
فلتسمعوا مالحب عيبا انما لذاك الكأس كل منا ذائق ..
يا صحب قولـــــــــــوا هل حلاوة وجدكم تقوى على مر الفراق وترفق..
اني لأرمق مطلعا ارنو له حتى اعيش به سأبقى ارمق..
اصداء ما صدحت به كلماتكم في القلب مسكنها به تترقرق..
عفوا فأني قد اطلت بوقفتي..
سأسير اسأل والسؤال يؤرق..
مالي افكر بالفراق لو اتي هذا سؤالي ان سؤلي محرق
لولا علمت بأن فراقكم امل يطل وفجر يشرق
لظللت باااق جاعل همي اللذي يضني الفؤاد مسربلا لا ينطق..
قالوا الفراق يدق دوما بابه..
فسألتهم هل للفراق سوابق..

قـــــــــــــــــــــااالوا الفراااق...

وقاام التصفيق.. وحيدر مره يحس روحه صخن ومنحرج.. بس كان ابداع..

وطالع فظيع احلى من المنشد الأصلي بملييييون مليوون مره..

فارس مع هالإنشوده.. دمعته طغت في عيونه.. من جد الفراق صعب يا عبدالله..
التفت لرائد.. لقاه من بعيد مبين عليه ماسك على اعصابه.. وشاد عمره.. مبين عليه فيه شي..
فارس خاف عليه..
ــ ياربي ويش فيه رائد..

والى اللقاء بالحلقه القادمه

[ســحرالقوافي]

جزء حركاااااااات

روعه يسلمووو هالديااااات

مسكين فارس و رائد
مقلب الكبدة شي

خخخخخخخخخ

واعلى قلبي فارس يوم قلنا الدنيا بتضحك له تروحي تحطي له هالحمزوة في الوسطه

شوفي عاد عبود وتوفى وصبرنى بس عاد لا تكسري خاطر هالمسكين تراه يتيم

قمت اهدد

خخخخخخخخخخ

بس والله فارس يكسر الخاطر لو يفقد رؤى

بنتظار القادم

دمتـــ بود

[mrboch]

قلم ملون بألوان أبداعيه رائعه
ماأجمل ماكتبتي أخيتي
لك مستقبل واعد أن شاء الله

أختي أميرة المرح
تراني أخت مربووش متابعه قصتج الأولى أسف عليك ياحبي مو عليك ياقلبي
والحين أتابع معاج قصتج ماعرفتوني كثر ماعرفني
كل يوم أفتح المنتدى ولا عشر مرات أنتظر تكتبي جزء
وأعضاء شبكة الناصرة ماشاء الله عليهم والردود الحلوة
حمستوووني أكتب لكم قصتي قريب أن شاء الله وأسجل بعضوية جديده

تسلم أيدج أختي أميرة المرح
والله يبعد عنج عيون الحساد
موفقة خيتوو
والله يحقق كل أمنياتج بحق محمد وآل محمد

[فرح]

امـــــــــوووره
روووووووعه وتسلم يدينك
ويعطيك العااافيه
جـــــــاااااري الانتظاااار

[..انين الروح..]

انا اتوقع بيحضنون بعض وبيقلوبنها مناحه

تسلمين اموور عليش مقالب ولا احلى

[الأمل البعيد]

الله حلو مقلب الكبدة
احين صار حيدر ذكي قال ليهم ينسوه هههههههههه
ضحكني موقف رائد يوم يطيح زي رؤى ههههههههههه
بس عورت فادي مسكينة كل يشوفها فارس لو اني مكانها اتفشل فشيلة مازيها فشيلة
وزي ماقالت سحر القوافي

واعلى قلبي فارس يوم قلنا الدنيا بتضحك له تروحي تحطي له هالحمزوة في الوسطه

شوفي عاد عبود وتوفى وصبرنى بس عاد لا تكسري خاطر هالمسكين تراه يتيم

حلو الجزء مرة
ماشاء الله عليج امورة الله يبعد عنش عيون الحساد تف تف >>>> ماي ورد هههههههه
والله يخلي لج اياديج و المخرف كمبيوتركم عشان تكملي لينا القصة خخخخ
مشكورة مرة ثانية وتسلمي ع القصة الرائعة والله احلى قصة قريتها في حياتي
بس شرايش تكتبي لينا خمسة اجزاء مرة وحدة >>> سكتى احسن لج لاتذبحش اميروه يكفي اياديها تعبانة
ننتظر الجزء باحر من الجمر
تحياااااتي

[كبرياء]

يسلموووووووو اميرووه

طلع حيدر وهو مبتسم سبق رائد .. وقرروا قبلها ان كلهم بسياره فارس يروحوا المدرسه ..
رائد يفتح باب الطريق ويشوف المفاجأه
ويضحك من قلب.. فارس بسيارته.. وملزق على النوافذ صور لرائد .. و كاتب في ورق حركات بخط حليو.. مبرووك التخرج لأغلى غالي.. ومزين السياره.... وجامة السياره ملزق عليها على جنب صورة جماعيه له ولرائد وحيدر .. معاهم المرحوم عبدالله .. وكاتب .. في قلبنا يالغالي وما ننساك وكل لحظه نعيش وياك..
رائد يضحك وعيونه تدمع مو عارف ويش يقول.. حاس روحه كنه معرس.. عجبته الحركه.. ولا عاد الصوره الجماعيه رجعته ذكريات لورى...

موقف جد روووووووووووعه حلوووو مرررره حركااات


حمزه كان يحب رؤى ويميل ليها من يوم هم صغار.. بس رؤى ما تطيقه وتقول عنه دايم انه نفخه وشايف حاله على خراط.. ويتفلسف في اشياء ما يفهم فيها .. ودوم تلعب عليه.. العبقلينو... " العبقرينو"

موتني ضحك هذاا عبقلينووو


خخخخ ههههههههههه هذي كبرياؤووه والي معاهاا

[*زهرة البنفسج*]

الله يعطيك العافيه امورة يالغلا

اخبار بطنك من الضحك من ديك الليلة دبوه

ننتظر التكمله

[Princess]

تسلمووا جميع منورين وتعاليق تفرح قلبي وربي وتدفعني للمزيد

وياهلا بأخت مربووش منوره بنتظار تسجليش حبابه وتسلمي فيش وفي اخوش الخير من ذوقش

زهور خخخ بطني .. اححح كلما اتذكر يرجع يعورني من الضحك

متباااركين بهاليوم
وتفضلوا الجديد

[Princess]

فارس مع هالإنشوده.. دمعته طغت في عيونه.. من جد الفراق صعب يا عبدالله..
التفت لرائد.. لقاه من بعيد مبين عليه ماسك على اعصابه.. وشاد عمره.. مبين عليه فيه شي..
فارس خاف عليه..
ــ ياربي ويش فيه رائد..

ويوم انتهى الحفل.. قام فارس بيشوف رائد.. ما لقاه في مكانه... سأل حيدر..
ــ وين رائد.,.؟؟
ــ قال بيروح الحمام.. ويش هذا لا مبروك ولا شي على طول سألت عن الحبيب الغالي..
ــ اووه اااسف.. اسمح لي.. عالبركه تستاهل والله.. وصوتك وربي فلله من جد شي..ما شالله عليك
ويضرب فارس كتف حيدر على خفيف بكس..
ــ قايل لك جرب حظك و صدقني بتطلع رادود كذاا حركات,,
حيدر..
ــ تسلم والله من ذوقك..
ــ الله يسلمك .. باروح اشوف رائد...
حيدر:
ــ هههههه أي ما تقدر حبيب القلب ما زولا .. الله يخليكم لبعض ..

فارس و هو بطريقه للحمام قابل حسن ولد خالته وبارك له.. ووصل للحمام .. دخل ما لقى احد..
صار يطق الأبواب باب باب.. ويفتح فيهم لين وصل لواحد مقفل..
طق طق طق..
صوت واحد متضايق مبحووح ..
ــ احمممم .. نعم..
فارس..
ــ رائد انت هنا..
رائد سااكت..
فارس ..
ــ رائد رد علي ويش فيك..
فتح رائد باب الحمام.. ووجهه احمر.. وعيوني متورمه اثر واحد حابس دموع شديده.. وببطئ تقرب من فارس وحط راسه على كتفه.. فارس حضن رائد.. وصار يمسح على ظهره..
ــ ويش فيك يالغالي.. مبروك النجاح والتفوق بيضتها والله..
فارس حس بصخونه على كتفه ورطوبه..
عرف انه رائد بدى يصيح.. ما حب ينهاه خلاه يطلع حرته اللي فيه..
شوي الا بجية حيدر.. شاف حالتهم وقف على باب الحمام الخارجي.. وفباله..
ــ اكيد على عبدالله... رائد وفارس واعرفهم عدل
فارس تركه على كتفه ولا تكلم معاه لين هدت اعصابه.. وشال راسه عن كتفه وغسل وجهه بالماي,, وظل واقف على المغسله..
فارس حط كفينه على كتفين رائد من ورى.. وصار يطالع فيه بالمرايا وعين رائد على الماي اللي يصب..
سكر فارس الماي.. ورفع لحية رائد.. خلاه يطالع في المرايا.. وصار يطالع في عينه .. من وراه..
ــ انا داري هالحزن اللي فيك على ويش,, لأني حاسس بنفس الغصه والألم..
عبدالله.. صح تذكرته..
رائد..
ــ ليش انا انساه
فارس تنهد من قلبه.. رجع طالع المرايا لقى رائد يطالع فيه بعمق وعيونه فيها لمعه...
رائد صار يشوف صورة عبدالله في فارس..
فارس ابتسم..
رائد دار رائد عليه وحضنه حضنه قويه
ــ الله يخليك لي ولا يحرمني منك يا اخوي..
فارس طغت دمعه في عيونه وظلوا متشابكين..
حيدر متسند على جدار الحمام من برى.. ودمعته طاحت.. من الموقف المؤثر.. رفع نظارته بيمسح الدمعه.. وطاحت بالغلط على الأرض..
انتبهوا فارس ورائد.. وطالعوا اتجاه الصوت..
لقوا حيدر نازل بياخذ نظارته.. ومبتسم.. لبسها ودخل ليهم وهو مبتسم..
ــ اسف على التجسس يعني بس جيت ابطمن على رائد.. وشفتكم على هالحاله قلت لا اتليقف..
فارس..
ــ لا ابد منت ملقوف .. منا وفينا انت لا تقول كذا
رائد..
ــ هاا خاال.. هاا يا كشووخي ويش هالصووت يخززي العين..
الا بدخلة حسن عليهم..
ــ يخززي شوو العين .. متجمعين هوون مع وجيهكم.. وانا لحالي برى اقول وين راحوا النسايب...
رائد..
ــ ييي.. يخزي الدبه.. شوو هيدا يا حسن.. شو وين حاطط الشهاده.. تحت باطك.. منا مبينه .. غطيتها..
فارس يمصع اذون رائد على خفيف..
ــ ما تيووز عن المسخره هاا..
حسن..
ــ ههههههه خله يعيب بكره يصير برميل اعظم مني خخ خليه ..
رائد..
ــ لااااااا اسف اسف .. استغفر الله
حسن يصفق راس رائد بالشهاده اللي عنده..
ــ صااقعه لا تتمسخر هاا.. ههههههههه
رائد يدلك الضرربه..
ــ زيين خلاص سماح اخر مره خخخ
حسن..
ــ ويش عندكم.. نبغى نطلع ونتغدى في مطعم على حسابي مناسبة التخرج
حيدر..
ــ انا ولا شي..
رائد..
ــ اه.. والله عززومه حاصله لينا... انا على حساب قلت غدى بيتنا اليوم علي.. ويش رايك فارس..
فارس رفع كتوفه..
ــ ما ادري اللي يريحك...
ــ لا غدانا في البيت اليوم.. بكره عزومتك حسنووه..
حسن يضرب دبته..
ــ صاار.. اتفقنا..
طلعوا كل لسيارته متوجه لبيته.. رائد وفارس وحيدر.. وهم بالسياره,,, وقفوا عند اشاره.. الا واحد رجال داق هرن عليهم.. كان واقف على اليمين.. ويأشر يفتحوا النافذه..
فتح رائد النافذه..
ــ خير يا اخوي امر..
الرجال ..
ــ ما يامر عليك عدو.. هذا الأسمراني اللي ورى.. هو نفسه اللي من شوي بمدرسة الــ.... الثانويه.. ينشد بحفلة التخرج والا انا غلطان..
كان حيدر متكي راسه على ورى.. وشعره طايح على عيونه الغافيه.. ازعجته الغتره فشالها..
رائد يطالع في حيدر وهو مبتسم..
ــ ايه هذا هو..
فتحت الإشاره.. بس كان الوقت ظهريه والشارع فاضي.. ضلوا واقفين شوي بيشوفوا الرجال ويش يبغى..
الرجال ومبين عليه السماحه في وجهه ..
ــ انا السيد جعفر الـ.. ابو موسى .. معاكم بالمدرسه بس بسنه اولى.. جيت على شان ولد اخوي المرحوم تخرجه معاكم.. وسمعت صوت هالولد ما شالله تبارك الرحمن.. عندنا حسينيه.. وموكب عزاء في المناسبات.. ومحتاجين رواديد صوت واخلاق.. باين عليه خوش ولد.. وان شالله ما يرفض طلبي..
رائد ابتسم.. والتفت يساره لفارس اللي كان مبتسم اعظم منه..
ودار لحيدر النايم.. ويطقه على فخذه..
يطفر حيدر..
ــ هااه ويش فيك وصلنا..؟؟
رائد..
ــ لا اا يا ردادونا.. افتح نافذتك واسمع..
فتح حيدر النافذه وابستم للرجال اللي كان مبتسم..
الرجال..
ــ هلا ولدي.. ابغاك تكلمني على هالرقم ضروري اذا ما عندك مانع.. يللا بمشي انا وعلموه بالموضوع.. الإشاره من زمان فتحت لا يجينا المرور.. في امان الكريم ..
رائد وهو شاق البوز شبر..
ــ حيااك الله..

حيدر يطالع في الرقم..
رائد داير عليه..
ويضرب في رجوله..
ــ والله وقاام حظك يا حيدووور هلا هلا..
فارس مستانس..
ــ عدل عاشوا هلا هلا...
وعلموا حيدر بالموضوع ووصلوه بيتهم ..
رائد..
ــ حيدروه روح لأمك شوي خلها تبارك لك.. احنا بنرجع البيت بنصلي الظهر وبنريح.. وبعدين بنطلع نجيب امي ام حسين وغدى وبنمر عليك.. زين..
حيدر..
ــ ان شالله..
ونزل حيدر..
رائد يطق صبع..
ــ ايوه.. هلا.. اخيرا بيتحرك الخال..
فارس..
ــ ههههههه زين الحمدلله الله كريم..

حيدر يسولف لأمه.. وامه شاقه البوز شبرين..
ــ وي يا بعد قلبي.. عمت عين الحسود عنك.. هفففف <<< تهف عليه,,,
قل اعوذ برب الفلق* من شر ما خلق *ومن شر غاسق اذا وقب * ومن شر النفاثات في العقد* ومن شر حاسد اذا حسد* هففففففف .. اللهم صلي على محمد وال محمد.. هففف..
الا بنزلة ابو كرار..
ــ اللهم صلي على محمد وال محمد.. ها ولدي جيت..
ام حيدر..
ــ أي جا بعد طوايفي وي وي.. ماني مصدقه..
وتعطي ولدها بوسه وهي حاضنتنه..
حيدر مستحي وخجلان..
ابو كرار..
ــ هههههههههه ويش صاير ويش هالحب..
حيدر بمسخره..
ــ يباا تغااار..
ابو كرار ينغز ام حيدر بعكازته...
ــ اغاار.. انا اغاار.. اغار على مين.. هالضبيعه.. ههههههههه
ام حيدر حمقت..
ــ اهوووو تحب تتعيلف .. لا تعصبني وتخرب فرحتي بولدي... اللهم صلي على محمد وال محمد.. الا متفوق الأول على المدرسه.. الا بيصير رادود.. هففففف يابعد قلبي هالولد متى تجيب لي مرت ولد..
حيدر تلون .. ومو عارف ويش يرد..
ابو كرار .. مستغرب..
ــ رادود وييش..؟؟
ام حيدر علمته بالسالفه.. وتهلل وجه ابو كرار..
ــ السيد فلان الفلان... ما شالله صار عنده ولد بالثانويه.. والله سنين.. رحمة الله على ابوه كان نعم الرجال كفايه نسل الأطهار سلام الله عليهم..

ام حيدر مهي قادره من الفرحه.. قامت تصفق..
ــ افضل الصلاه والسلام عليك يا حبيب الله محمد محمد وال محمد صلوات كلووووش...
ابو كرار ..
ــ ههههههه اهدي هاداويش هالمره هاادي.. اصص فضحيتنا
ام حيدر ودموع الفرحه تطيح من عيونها..
ــ والله من الفرحه ماني عارفه ويش اسوي..
حيدر..
ــ قومي ارقصي اماه..
ام حيدر تصفق حيدر بمخدة الكنبه..
ــ ارقص وجهك.. ما رقصت يوم اني شباب ارقص واني ضبيعه..
ابو كرار..
ــ هههههههه انا ما قلت شي هي اعترفت الضبيعه..
ام حيدر..
ــ عااد يالشباب اسكت بس..
ابو كرار..
ــ كححححح كح كح .. اححح قالوا عين العذارى حسوده مو عين الضبعان .. ويلي بتقتلني امك..
حيدر ميت ضحك عليهم..

وصل فارس بيتهم ونزل يجيب امه ام حسين... جت ام حسين حامله على راسها زبيل " مثل الطشت شكله بس بخووص نخله مسوى يحطوا فيه الحوايج لول"
وحاطه فيه ريحاان واايد من حوشهم.. شاله فارس عنها.. وركبت ..
ــ قوواك الله ولدي..
رائد ياخذ نفس ريحة امه ام حسين الغاليه والريحان ترجع للطفوله وايامها و دار على ام حسين..
ــ هلاااا امااه هلا هلا.. ويش احوالش..
ــ بأحسن حال الحمدلله بشوفتك ويا فارس يا بعد قلبي..
رائد..
ــ الله يخليش.. ويحفظش وما يحرمنا منش..
ــ يالله ويوفقكم ويرزقكم ويفتحها عليكم يا كريم..

تابع >>>

[Princess]

وراحوا بيت رائد..
رؤى تحوس ويا امها في المطبخ.. يسووا سلطه ويجهزوا فاكهه..
الا بدخلة رائد..
ــ يالله يالله...
ودخل فارس ويا ام حسين وقعدوا في الصاله..
ورائد راح لأمه واخته وهو يرقص ويمرجح في شهادته..
ــ واخذت الثاني ياهلا.. على المدرسه ياهلا .. عاشوا عاشوا.. حيدوور الأول ياهلا.. وبيصير رادود يا هلا ..
رؤى تصفق.. زهرا تغسل ايدها وتنشفها بسرعه وتحضن ولدها وهي فرحانه ..
ــ وي الحمدلله بلغني الله فيك يا بعد عمري ..
رؤى..
ــ مبلوووك.. الف مبلووك.. تستااهل اخوي.. ويش قلت خالي حيدل بيصيل لادود..
زهرا..مستغربه..
ــ صدق؟؟
رائد علمهم بالسالفه.. ويوم خلص ..
رؤى ..
ــ الــــــــــــلــــــــــــــه بيصير خاالي لادوود.. حلكااات..
زهرا..
ــ ان شالله يا رب يا كريم توفقكم جميع..
رائد..
ــ ترى ام حسين برى ويا فارس..
زهرا..
ــ يؤ غربل الله بليسك ومخلنهم لحالهم وقاعد تهدر هنا ولا قلت لينا ..
رائد..
ــ أي روحوا ليهم وانا بكلم ابوي بابشره..

لبست زهرا مشمرها وطلعت لأم حسين..
ــ هلااا خاله قواااش الله..
ــ هلا بعد ابوي هلا امي.. يقويش..
باست زهرا راس ام حسين..
ــ ويش حالش..
ــ الحمدلله يا غناتي بشوفتكم والله بأحسن احوالي
ــ الله يخليش.. قوه فارس ويش حالك..
فارس ..
ــ هلا ام رائد حياش الله الحمدلله بخير..
رائد جا ليهم بعد ما كلم ابوه وطار ابوه من الفرحه .. ووراه اخته رؤى.. لابسه المشمر عدل تعقدت خذت ليها واحد طويل ومره مغطنها كلها..
ــ قواش الله اماه..
وباست راس امها ام حسين..
ام حسين..
ــ هلا .. هلا ببعد طوايفي قعدي منا تحتي ..
قعدت رؤى جنب ام حسين.. ام حسين بالنص ورؤى على يمينها وفارس على شمالها..
ام حسين وهي تمسح على كف رؤى..
ــ اجل تخرجتي امي من المدرسه..
رؤى بحيا وهمس..
ــ ايه الحمدلله..
ــ ويي عساني بالغه فيش عروس..
زهرا..
ــ وبالغه بفارس ياكريم.. الله يسلمش ويخليش..
ام حسين حطت كف ايدها الثانيه على كف فارس تمسح عليه..
ــ متى بعـــد..
فارس يطالع كفوف امه ام حسين.. كف ماسك رؤى وكف ماسكنه.. وبعفويه وبدون شعور بنفسه بداخل قلبه حس هواا ورااحه وسعه في الخاطر.. وفرحه وده يبتسم ويضحك.. وبقلبه وباله يردد.. يارب .. يارب..

قامت رؤى..
ام حسين..
ــ وين امي .. وين بتروحي..
ــ باقطع الجحه اماه..
ــ يعطيش العافيه بعد ابوي..
ــ الله يعافيش
راحت رؤى تقطع في الجحه.. وهي سرحانه.. تفكر بدون سابق انذار.. بحركة امها ام حسين.. حست بإحراج.. وصارت تقطع وهي مبتسمه.. وما انتبهت للسكين.. وجرحت صبعها..
ــ اححححح..
طلع الدم.. حطت السكين بسرعه.. وغسلت بالماي.. لفت الجرح بنشاف .. وطلعت الصاله .. تسأل امها وين لزقة الجروح علبة الإسعافات بالمطبخ ما فيها..
ــ امااه وين لزقة الجلوح..
ــ يؤ.. قصيتي صبعش..
رؤى وهي ماسكه صبعها وهو ينزف ..
ــ اييه.. وعلبة الإسعافات ما فيها لزقات..
ــ تعالي باشوف..
ام حسين..
ــ على عمري قصيتيه بقوه.. والا بس شمخ..
زهرا تطالع النشافه وهي مختلعه..
ــ وي على عمري.. نزف اكوو.. ما تنتبهي .. اضغطي عليه بالنشاف ..
ام حسين ..
ــ حطي عليه ملح..
رؤى..
ــ لاااا .. يحل هو كذا يعول ما ابغى ملح.. احس قلبي يدق بصبعي
فارس فباله وكالعاده عفويا..
ــ اسم الله عليش وعلى قلبش .. جعل اللي فيش فيني.. اففف ياربي .. << قلبه عوره ضاق خلقه على رؤى وجرحها..
ضغطت عليه شوي زين.. وخف النزف .. بس أي حركه غلط يرجع الجلد يتحرك ويطلع الدم.. فلفته بنشاف لين يهدى..

رائد..
ــ مشينا ابو الفوارس..
زهرا..
ــ ويناا..
ــ بنجيب الغدا..
ــ بدري الحين..
ــ بنمر على حيدر بعد..
ــ والله .. أي زين من زمان ما شفت هالأخو.. يطل طله وتالي طفاره وياه .. واحشني زين تسوي جيبه وياك..
ــ ان شالله ..

طلعوا من البيت.. مروا على حيدر.. طلع ليهم..
ــ هههههههه ويلي امي منقهره.. ويش عندك عزايم.. ما سوت غدى ابوي اكل خبز وخضار مسلوقه عن الضغط ونام.. وامي مهي مشتهيه.. زييين حصلت لي غدا والله ..
فارس ميت ضحك على حيدر وهدرته..
رائد..
ــ عاد ياالعصقل.. اللي يسمعك يقول فيل من الأكل.. ولا ادري وين تصرفه..
حيدر يأشر على راسه..
ــ هناا في المخ..
ــ عدال عالمخ.. اسكت بس.. خخخ أي مطعم تبغوا..
فارس..
ــ اللي يجي كل شي منك حلوو..
حيدر..
ــ مطعم الـ....
رائد..
ــ كحح.. اه يالدب.. غالي هذا.. يصقع فيسك.. بس يللا ما يغلى عليك غالي دام هذا طلبك ابشرر من عيوني..
حيدر..
ــ ههههههههه امززح اصلا ما احب اكله كله خرابيط وحمصتهم ثقيله... ابغى من مطعم الــ.....
رائد..
ــ هههههههه غربلك الله بس تبغى تشوفني بخيل لو لا.. هااا..
ــ يعني هيك شي..
ــ خخ وويش طلعت النتيجه..
ــ مو بخيل.. الا تجامل بعد..
ــ خخخخخخ يلعن فيييسك.. زين ابو الفوارس مشينا الى مطعم الــ.....

نزل رائد يشتري الغدا.. وجنب المطعم سوبر ماركت.. نزل فارس السوبر ماركت.. وظل حيدر بالسياره...
وشوي رجع رائد...
ــ وين فارس..
حيدر..
ــ نزل الماركت..
ــ ويش عنده..
ــ ما سألته..
رائد يدق على فارس..
ــ هلااا ويش عندك في الماركت..
ــ اشتري عصير وببسي.. ويش تبغى شي ؟؟..
ــ خخخخخخ الا تحط ايدك يعني في العزومه.. انا بطلع على حساب من المطعم وبشتري..
ــ اقوول..
ــ هلااا
ــ انثبر..
ــ ههههههه زين,,

طلع فارس والكيس فيه لبن وعصير وببسي وعفايس..
وصلوا البيت..

دخل حيدر.. سلم على اخته زهرا وباركت له هي ويا رؤى.. وسلم حيدر على ام حسين.. ام حسين تعدهم زي اولادها ما تتغطى عنهم.. فصايره بس زهرا ورؤى المتغطيين..
فارس حاس بإحراج ما يبغى يتغدوا جميع.. رائد قال له
ــ ويش فيك عادي بنفس المكان بنتغدى..
الحريم على سفره ويعطونا ظهرهم اللي يتغطوا .. انت من اهل البيت لا تستحي..
فارس ..
ــ تسلم الله يخليك..
راحت رؤى تجهز ويا امها وتطلع الببسي والعصير.. واللبن.. لقت بينهم في الكيس.. علبة لزقات جروح.. ابتسمت وفي بالها..
ــ يابعد عملي اخوي جاب لي لزقه...
فتحت العلبه ولزقت صبعها,, وجهزوا الغدا وحطوه
وقعدوا ياكلوا والمكان مليان فرح وسعاده وضحك ووناسه...
عادتهم يشربوا على الأكل.. فقامت رؤى تصب ببسي.. وعصير ولبن للي يبغى..
كانت عاطيه ظهرها لفارس.. يعني بينها وبينه متر ونص تقريبا..
وهي تصب الببسي متغطيه.. فرت ايدها لجهة الصبيان.. توزع عليهم كاسات الببسي.. بالغلط مال الكاس وانكب شوي.. وصاب دراعة فارس..
رائد..
ــ اففف.. هاداا ويش ما تنتبهي..
رؤى خجلاانه وبعفويه ..
ــ اسفه فالس ما ادلي اسمح لي
فارس :
ــ حصل خير عادي << وبداخل قلبه فرحان..متجنن على قولة فالس خخخ
رجعت رؤى ومدت كاس على رائد.. انتبه لصبعها عليه لزقه..
ــ تقولي ما عندنا لزقات جروح.. اكو صبعش لزقتيه..
رؤى مستغربه..
ــ انت اللي شليته..
رائد..
ــ انا... متى؟؟
رؤى..
ــ في الكيس ويا الببسي..
رائد يطالع في فارس وهو مبتسم..
ــ ههههه لا مو انا ..
ويضرب فخذ فارس بمزح..
ــ هذا ابو الفوارس.. تسلم يعطيك العافيه
رؤى استحت.. ووجهها تلون.. ومهي عارفه ويش تقول..
ــ شكلا..
فارس..
ــ الله يسلمك.. والعفو لأختك..
حيدر سرحان ماسك كاس الببسي وهو يفكر في السيد اللي عطاه الرقم..
رائد كالعاده يحب يخلع خاله..
ــ اووووه..
حيدر نقز..
ــ اااه.. وصاقعه..
وطفر الببسي على دراعته هو الثاني..
رائد..
ــ ههههههه تسبحوا جميع بهالببسي .. باقي انا..
حيدر منقهر باقي في الكاس قطره..
ــ ولا يهمك.. هاااك
ــ لاااااااا .. هههههههههه
وصاروا الكل يضحكوا ..
وبعد ما خلصوا الغدا.. قعدوا في الصاله.. يطالعوا تلفزيون.. شوي الا جوال رائد يدق...
طالع رائد الأسم..
ــ اووه غريبه ويش عنده هذا بعد..
فارس..
ــ مين؟؟

الى اللقاء بالحلقه القادمه