ماعرفتوني .. كثر .. ما عرفني ..

[Princess]

دقايق الا هم في بيت حيدر... حيدر دخل السياره بالكراج..
ــ انزلوا..
فارس..
ــ ويش عندك انا مانى داخل مالي خلق بيوت ابغى هواا..
رائد..
ــ أي والله .. خذ لك هذا... الحين تطلعنا من بيتنا وتجيبنا بيتكم,, لا وبعد ناقصين زياده .. لا اتشابق ويا امك احط الحرقه فيها..
ــ ههههههههههه يا زفت .. ويش دخل امي..
رائد يتحنطب..
ــ مو بتتعيلف فينا هي.. مالي خلق ها..
حيدر..
ــ ومين قال ليكم بدخلكم البيت..
رائد..
ــ نعم..؟؟ بتخلينا برى يعني؟؟
ــ ايييي.. دقايق وباجيكم...

دخل حيدر البيت..
فارس..
ــ انا مانى رايق لخالك هاا.. ويش عنده..
رائد..
ــ ما ادري به.. صبّر ونشوف..

دقايق معدودات الا حيدر جاينهم.. بصندوق عدة.. ومسجل في ايده تبع سياره..
رائد..
ــ وااااو.. حيدروووه..
حيدر وهو ينافخ من التعب ويشدخ بصندوق الحديد على الأرض..
ــ قوموا.. عاونوني..
رائد يدق صبع..
ــ حلووو.. ياهووو..
فارس سااكت ومفهي...
حيدر..
ــ قومواااااااااااا..
فارس..
ــ ويش بتسوي؟؟
حيدر..وهو يفر المسجل بيده..
ــ ويش شايف.. بنركب هالهدار هذا..
رائد.. وهو يدق صبع..
ــ هههههههههههههه حلو حلو
فارس..
ــ وهذا من وين لك؟؟
حيدر..
ــ هذا مسجل سيارتي .. بدلته بدي في دي.. وبدال لا ابيعه خليته عندي ينفع.. وهذا هو بينفع..
فارس..
ــ ركبه بس بشرط..
حيدر وهو يحوس بالعده ويطلع سكاريب وعفايس..
ــ اللي هو..؟؟
فارس..
ــ اعطيك ثمنه..
حيدر التفت لفارس وهو رافع السكروب..
ــ تبغى اخبق عيونك به.. مستعد.. ثمن ويش مع وجهك..
رائد فاتح بوزه.. وفباله..
ــ اف اف حيدرررووو طلع له لسان..
وصار رائد يضحك ويضحك..
فارس..
ــ من صجي انا اتكلم ما امزح .. بتركبه خذ ثمنه والا لا تركبه..
حيدر حمق ورمى السكاريب..
ــ ليش يعني .. انا غريب عنك.. شمعنى.. لو رائد بتاخذ ثمنه من عنده..
فارس سكت شوي.. وقام يطالع في رائد..
رائد..
ــ تبغاني ادوس فبطنه..
فارس..
ــ لا رائد ما اعطيه ولا يعطيني ..
حيدر ولع وشب حريقه..
ــ ولويش بالله .. ادري هو حبيبك وخويك وكل شي بحياتك الله يديم المحبه ويحفظكم لبعض .. يا اخي زين ما قلنا شي.. بس يعني ويش فيها لو ما اخذت من عندك انا.. لويش يعني ما تعدني خويك.. زين اقلها لا تجاملني .. افف ويش هذا انتون.. تدروا .. جان تبغوا الصراحه... احس روحي غريب وعذول وثقله وغثه بينكم.. حرقتوا دمي ..
رائد ..
ــ بل بل بل كل هااادااا.. هدي يا خال ويش قاعد تقول..
فارس..
ــ أي والله اعصابك حيدر.. والله انك اخو وغالي وعزيز ولا اجاملك ولا شي..
حيدر..
ــ اقول .. كثروا منها بس فالحين خراط علي..
فارس..
ــ والله العظيم انك خوي وغالي وحبيب ولا انت عذول ولا غريب ولا ثقله ولا شي.. حق ويش تقول كذاا..
حيدر..
ــ ويش الدليل هاا.. قول لي ...
فارس سكت.. ورائد بعد..
حيدر..
ــ هههههههه والله ثم والله وقسما بأيات الله.. ان ما ركبت هالمسجل بهالسياره الحين.. لا عاد تكلموني ولا تجوني.. اذا اجتمعوا انتون الإثنين مع بعض.. انا ما ابغى اصير ثقله على احد.. بتجوني تعالوا مفرق لا تجوني جمله لو سمحتوا..
رائد..
ــ هههههههههههه ياعلي حيدرووه.. مانا قادر عليك.. ولا مفرق بعد.. بنجيك.. وجمله ...وغصبن على خمشك..
ــ انا حلفت وقسمت والحلف والقسم مو لعبه..
فارس ابتسم..
ــ خلاص ركبه امرنا لله..
حيدر..
ــ ياهووو الحين انتون كذاا اوكيي.. يللا حرررك رائدوه جيب السكروب وانت تعال ركب معاي..
قام فارس ويا رائد يحوسوا مع حيدر...
فارس يحس بسعاده بشعور مهو عارف كيف يوصفه
يطالع في رائد وهو يستهبل على حيدر ويركبه غلط يبغاه بس يحمق عليه .. ورائد ميت ضحك مستانس بحمق حيدر اللي طلع فجأه ومستغرب منه.. وصاير يتلذذ بتعصيبه..
من جد حس فارس بطعم الحياه مع رائد وخاله اللي حسه مثله ولد اخته في الطيبه والحنيه والتعاون..
خلصوا تركيب المسجل...
حيدر..
ــ خلونا نجربه يشتغل لو لا..
طلعوا شريط.. وحطوه..
الا بالصدفه كان مشاعر للأكرف
ــ احب ابي وكفيه واهوى قلبه الحاني انا قُبل لرجليه تؤدي فرض احساني
ابي يا اكبر النعم رضاك عليا ياحلمي فإن هواك في قلبي صلاة داخل الحرم..
رائد,,
ــ وااااو.. عشقي الأكرف ... حيدرووه علي الصوت...
ويعلي حيدر الصوت لحده...
فارس حاسس بضيقه.. كل مره يوصل لهالأنشوده يا اما يعديها اويطفيها .. ويوقف عندها الشريط ولا مره تأمل معها كلماتها.. يكفي انه درى بها عن الأب ولا حب يسمعها ..
ظل ساكت.. ورائد ينشد ويا الأكرف .. ويقول لحيدر..
ــ اسكت انت اخاف تنشد وياي وتغطي علي خخخ...
وظلت الإنشوده تصدح..
ــ تعبت معي تربيني الى ان شد بي عودي ..
فارس فباله.. وبغصه..
ــ تربيني.. لو اشوفك ما عرفتك..

ــ تجوع لكي تغذيني بعطف غير محدود..
فارس فباله..
ــ جعت جوع غير محدود..
ــ الى ان رحت في الكبر .. ولا عذرا لمعتذر .. وعند الليلة الظلما يكون الشوق للقمر...
هالبيت.. جاب الغصه لفارس.. غصه مهي طبيعيه.. صار يوسوس في باله..
ــ رحت في الكبر.. من الصغر وانت الميت الحي.. ومين اللي يعتذر .. انا.. ما اظن.. اااه..
فتح ازرة دراعته..
رائد ما انتبه له.. مندمج ويا الأكرف.. والصوت عاالي.. الا بطلعة ابو كرار.. كان نايم في المجلس.. طلع ليهم بوزاره وعكازته..
ــ حيدرووه ولعنه ويش هالصجه هاادي.. ويش هالزلازل اللي قايمه .. علي ياا علي..
حيدر يقصر الصوت بسرعه..
ــ وي وي ابوووي نايم نسيته..
ابو كرار..
ــ وصااقعه .. ويش هالصبي هالمزعج.. ويش هالنوايب.. اذا ما صرت بغرفتك تناطح .. طلعت لي الحوش .. << غرفة حيدر فوق المجلس على طول.. وكله شدخ حوايج فيها وحوسه..
حيدر..
ــ اسف اسف يبه .. نسيت ان انت نايم..
ابو كرار..
ــ ههههههه هلا قواكم الله.. توني مفتح من النوم..
رائد وهو يضحك.. قايم لأبوه يحبه على راسه..
ــ هلا يبه.. السموحه اعذرنا ما ندري انا اللي قايل له يعلي الصوت.. والله خفت اقوم اسلم عليك وانت معصب تلوحني بالعكازه تشلخ بدني..
ابو كرار..
ــ ههههههه افا.. اشلخ بدن الغالي ولد الغاليه.. وخلاص دام انت اللي قلت يعلي الصوت . سماح..
حيدر يتحنطب وهو مبتسم..
ــ قالوها.,, وقمت اصدقهم.. ما اعز من الولد الا ولد الولد.. خخخ.. احح بس من قدك يا رائدوه..
ابو كرار ينغز حيدر بالعكازه..
ــ لعن ابو الغيررره .. ويش هالصبي هذاا,, هذا خالك رائد.. لو خالي ما بغيته..
فارس ميت من الضحك..
حيدر وهو يضحك ..
ــ افااا
رائد يبحلس على حيدر ويفرك اصابيعه.. حره حرقه..
فارس..
ــ قواك الله ابو كرار.. كيف حالك..
ابو كرار..
ــ هلا ولدي حياك الله.. مين انت..
فارس..
ــ انا خوي رائد وحيدر فارس اسمي..
ابو كرار ما شاف فارس الا كذا مره ونسى شكله واول مره يجي فارس بيت حيدر..
ابو كرار..
ــ هلا فيك يا ولدي .. فارس ويه ولد مين..
ــ فارس محمد الــ......
ــ والله ما عرفت ابوك.. من هنا انتون؟؟
فارس فباله..
ــ ليش انا اعرفه على شان تعرفه انت...
حيدر... لاحظ سرحان فارس.. فرد على ابوه..
ــ ايه يبا من هنا...
ــ حياك الله ولدي البيت بيتك..
فارس..
ــ تسلم ويرفع شانك..

دخل ابو كرار البيت.. وشاف قدامه ام حيدر..
ــ الا باقول لش تعرفي محمد الــ.... سمعتي بهالأسم..؟؟

تابع>>>