رائد عرف ويش فيه فارس هالحين .. تذكر كلام حيدر .. خلاص اسودت الدنيا في عيونه.. مهو عارف ويش يسوي .. راح بعفويه لفارس ..
وكان عاطيه ظهره .. حط كفه على كتفه اليمين وضغط عليها ...
ــ فارس .. شد حيلك .. فارس .. بكلمها.. ايه بكلمها.. بقول ليها انت تبغاها.. بخليها تغير رايها عن حمزه...
ما شاف رائد الا ردة فعل مهي متوقعه من فارس ..
دار عليه بسرعه وعطاه كف ورم وجهه,, وبصريخ توقعه يكون من شوي,, لكنه طلع الحين :
ــ انت ويـــــــــــش ..؟؟ بني ادم ..؟؟؟ المشاعر في ايدك لعبه.. الحين عقب ما عطيتو حمزه كلمه .. وخليتوه يحس بالسعاده.. بتسلبوها منه.. انت تسمي روحك رجال .. افا بس .. ما الومك .. اذا انا واللي كنت افكر روحي اقرب مالك ,, طلعت ابعد بعيد .. و تفكيرك فيني تفكير واحد غريب .. ليش ما اتوقع منك حركة هالنذاله ويا حمزه... انت وياه اولاد عم.. تنجازو.. لا تدخلوني في النص .. ولا تكلم اختك على حسابي .. مهي لعبه هي . تجاره بيع ومشترى .. بعد ويه الحين خلاص حللو والنتيجه بعد اسبوع.. لو تحس حسيت من قبل وما سمحت لنفسك تفكر فيني أي تفكير قبل لا تتأكد بنفسك ... انا ما عاد لي حساب في هالدنيا.. ولا احد عنده علي حساب ..
رائد :
ــ ااا..
فارس حط ايده على فم رائد :
ــ خلاص .. ما بيننا كلام.. تيسر يسر الله عليك...
رائد :
ــ ما اوصلك..؟؟
فارس :
ــ رحم الله والدين التكاسي ...
رائد :
ــ توك طالع ومافي جيبك ريال .. فارس تكفى..
فارس صرخ:
ــ كفايه شفقه .. كفايه عطف .. شفقتك هذي مانى محتاجها.. اذا عرفت تشفق على روحك وترحمها من هالأطباع الخايسه.. تعال وكلمني .. ابغى اقعد لحاااالي لو سمحت..
ــ فارس .. انا خايف عليك.. وربي خايف عليك.. لا ما تقعد هنا لحالك .. بوصلك...
ــ هه خايف علي من ويش .. انتحر مثلا واغرق روحي .. مانى بهالضعف .. مهما صار الله موجود.. ويصبرني ..
ــ فارس ارجووك.. حلفتك بغلاة كل غالي .. بغلاة عبدالله.. ورحمته الغالي تركب اوصلك بس .. لا تكلمني احقرني بس اوصلك..
فارس غمض عيونه.. وسالت دمعه.. واشر على رائد .. يروح :
ــ زين .. قدامي...
رائد فرح مثل الطفل .. ركب السياره بسرعه.. وركب فارس ..
رائد بنبرة خوف :
ــ امي من يوم تدق علي . تحمدت لك بالسلامه .و قالت لي اجيبك بيتنا نتغدى..
فارس ساكت ويطالع في النافذه مو عاطنه وجه..
رائد مو قادر..
ــ فارس رد علي..
ــ الله يسلمها .. بس وديني بيتنا..
رائد وبألم:
ــ ان شالله...
وصلو الزرنوق .. ونزل فارس .. كفخ الباب .. وحتى مع السلامه ما قال...
رائد حط راسه على الدركسون ودموعه تصب ما طاحت دموعه في حياته كلها كثر هاليوم...
وصل فارس باب بيتهم.. طالع على اليسار .. الجدار اللي عليه السب والشتايم من الصبيان يوم هو صغير ,, وشخوطه عليهم بالفحم ليخفيهم,,
ضحك في باله :
ــ هه.. اخفي ويش لو ويش .. قدرك يا فارس من صغرك مأكول حقك .. وملعون خيرك.. حسافه على الطيبة في زماننا..
تذكر فارس ان مفاتيح البيت في شنطته عند حيدر ..
ــ افف.. تعبان الحين انا...
قعد على باب بيتهم.. وسند راسه عليه..
ــ بعدين اروح بيت جارتنا ام ابراهيم.. واتصل على حيدر يجيبها...
رائد مشى .. بس قبلها اتصل على سلمان ,,
سلمان كان بالمؤسسه مع رضا..
سلمان : ــ عن اذنك عمي هذا رائد مادري ويش فيه..
رضا : ــ خذ راحتك يا ولدي ..
سلمان : ــ هلا رائد
رائد وبصوت مبحوح:
ــ سلمان طلبتك..
سلمان اختلع:
ــ عطيتك,, ما يردك الا لسانك.. خير ويش صاير..
رائد:
ــ فارس وصلته بيتهم.. وهو تعبان,, ما عنده غدى ولا شي .. اذا ما عليكم كلافه ترسلو له غدى..
سلمان ابتسم :
ــ من عيوني ياخوك.. بس انا برى مع جاركم .. الحين اتصل بيتنا اقول لأمي تقوم باللازم لا تحاتي..
رائد ابتسم :
ــ تسلم يالغالي الله لا يحرمنا منك..
ــ ولا يحرمني منكم حاضرين وغوالي ..
اتصل سلمان لبيت جدته ام ابراهيم.. رفعته حوريه:
ــ الوو..
ــ هلا حوريوه.. ويش غدانا..
ــ ياعجب الله اول مره تتصل وتقول ويش غدانا
ــ انا لله .. اسمعي وبلا كثر الهدره ,, روحي وقولي لأمي تزيد الغدى وترسل لفارس في بيتهم تعبان.. زين .. يللا باي لا تنسوو ,, انا احتمال اتأخر لا تحاتو..
ــ زين .. بااي
راحت حوريه لأمها.. وقالت ليها.. حضرت امها صحن .. ولفوه حطته في كيس ..
حوريه :
ــ اني باوديه...
ام سلمان:
ــ تبغي اخوش يكسر راسش ..
ــ ويش باااسوي اني .. وويش دراه الا عاد اذا قلتي له..
ــ تبغي كف مني الحين.. مستعده..
ــ خلاص كل ظنكم ظن سوء .. روحي وديه انتين...
شوي الا ام سلمان :
ــ اوهوو عبااتي رطبه. توي غاسلتنها .. صاقعه..
حوريه بمسخره:
ــ البسي عباتي ..
ــ تسخري ويا ويهش .. ما هي على قياسي .. << الدرازيين تقلب الجيم = ياء
ــ البسي شيلة امي ام ابراهيم
ــ حوريه ,, عفر يبغى لش تأديب ..
ــ شدراني من بعادة البيت... اكو منا قبالنا بالزرنوق ..قاايله لش باوديه اني ..
ــ حريقه.. وديه بس ان صار شي دفنتش ..
ــ شييييه ويش باااااسوي...
ــ زين لا تحمقي لا احد عليش سلمان..
حوريه وبقهر وبهداوه:
ــ سلمانوه ما ينحد..
ــ حوريوه وصاقعه..
ــ زين خلاص ...
خذت الكيس ولبست عباتها وطلعت .. وظلت امها واقفه ورى الباب ..
فارس انتبه للباب انفتح.. وطلعت بنيه.. نزل راسه.. شوي حسها تتقرب منه..
حوريه كسر خاطرها فارس وعور بقلبها حق ويه قاعد على الباب .. سلمت ورد السلام..
ــ خيي هذا غدى تغدى..
فارس :
ــ تسلمو خيه ما كان في داعي..
ــ الله يسلمك..
ودارت حوريه بترجع بيتهم..
فارس :
ــ خيه..
حوريه اختلعت:
ــ نعم..
ــ الله ينعم عليكم.. بغيت اكلم تلفون اذا مافي احراج..
ــ لا ابدا لحظه بس اسوي لك درب..
راحت حوريه لأمها..
ــ اماه اماه..
ــ ويش فيش مصرووعه..
ــ يبغى يكلم تلفون..
ــ اخوش مو في البيت كيفا ندخله ريال وما ويانا احد..
ــ مادري .. مسكين اماه.. قاعد على باب بيتهم.. مادري ويش صاير ..
ــ يوه .. خير اللهم اجعله خير ..
لبست ام سلمان شيلة ام ابراهيم وسلمت امرها لله.. وتغطت وطلعت بس راسها..
ــ قوه امي فارس ..
فارس وقف :
ــ هلا .. هلا خاله..
ــ شحوالك ابوي ..
ــ حياش الله .. بخير
ــ الحمدلله على سلامتك
ــ الله يسلمش ...
ــ اسمح لي يا ولدي التلفون ما اقدر ادخلك تدري بيتنا كله حريم ويش اقول ما تصبر لين ييي سلمان..
فارس :
ــ خاله والله عارف وضعكم ومقدر بس مثل مانتين شايفه قاعد على باب بيتنا كني طرار مفاتيحي عند حيدر وابغى اكلمه..
ــ وي اسم الله عليك من الطراره.. خلاص الحين اخلي حوريه تييب جوالها وكلم
..
رد مع اقتباس
المفضلات