ماعرفتوني .. كثر .. ما عرفني ..

[Princess]

تسلمو عالمتابعه الحلوه
والله تشجيعكم داعم لأستمراري
يعطيكم الف عافيه
وبكم ارتقي الله لا يحرمني منكم

وتفضلو الجديد... طبعا هذا الجزء مو كامل له تكمله في وقت قريب بإذن الله

[Princess]

اخذ رائد الجوال من ايد سلمان.. حطه على اذونه..
سمع فارس :
ــ سلمان .. وينك ...؟؟؟
من سمع صوته حس بنار قهر تشب في قلبه.. حس وده يصرخ في وجهه لييييييييش .. وده يعاتب وده يواجه وده يسوي مليون الف حاجه..
صار يسمع فارس وهو يقول الوو والوو..
مد الجوال على سلمان .. وسلمان بعيونه يطالعه نظرات متأمل بس للأسف رائد صار يمد الجوال بالقوه.. ومغمض عينه وينافخ يبغى يتمالك اعصابه..
ماحب سلمان يضايقه اكثر .. واخذ الجوال .. وكلم فارس
ــ هلا فارس ..
ــ اهلين وينك ويش صار ؟؟
ــ لا بس الشبكه عفر ضعيفه ..
ــ تقول رائد وياك..!! وينهوو !!؟؟
سلمان ارتبك : ــ هاا لا قلت كان وياي .. قبل لا اكلمك ويوم طلع كلمتك..
فارس : ــ الله يهديك ,, واحشني مره وبعده زعلان علي على حساب جيت المغرب .. يالله ما درى عني وعن حالتي ,, والله يا سلمان نفسي عايفه الدنيا مره كل يوم تتقفل بوجهي اكثر واكثر
ــ افاا يا خوك .. خلك شديد واصبر .. وياجبل ما يهزك ريح.. والله يفرجها عليك يارب .. بقرب فرصه ..
ــ ان شالله نسألكم الدعاء وسلم على رائد .. ما يرد علي قاهرني ..
ــ علينا الدعاء وعلى الله الإجابه..يللا في امان الكريم ...
ــ حياك الله تسلم ياخوي..

انهى المكالمه.. وانسدح على ذيك الكنبه... يطالع بالسقف .. اللي كان قبه زجاجيه تدخل منها اشعة الشمس.. كان البيت اشبه بقصر مهندسه معماري فنان..

شعور بالوحده عنيف اختلج في صدره.. وده يذرف الدمعات بس عينه جفت..
تنهد من قلبه.. حاسس بإختناق ..
قام يبغى يغير جو يبغى يطلع.. طلع .. وهو يقفل الباب .. حس بشي من وراه طاح.. طالع الأرض لقى حمامه صغيره طايحه كانت بعدها ما تطير ..

رعشه صابت بدنه .. مر الموقف عليه من قبل .. اول سوء تفاهم بينه وبين رائد.. لقى فرخ عصفور طايح ورجعه لعشه.. تقرب من الحمامه.. انحنى .. لقاها ما تتحرك.. شوي حس فوقه شي يحوم .. رفع راسه لقى حمامه.. حس انها امها وملهوفه عليها.. انتبه لبيت جيرانهم ( بيت زينه.)فوق السطوح يربو حمام...

شال الحمامه الصغيره.. بس للأسف لقاها ميته من الطيحه ..

بدون استئذان .. طاحت دمعته.. العصفور كان طايح .. كان منتظر فارس يرجعه لعشه ولأمه.. ورجعه .. ورجع الأمل والحياه.. ولما رجعه لقى رائد قدامه ينتظره وبالأحضان.. وتصافت القلوب..

بس الحين هو في غربه.. صعبه وقاسيه.. وحيد .. واعز الخلق عنده ولا سأل عنه.. الحمامه ماتت وضاع الأمل بالرجوع لحضن امها.. ضاع الأمل يلقى حضن يضمه عن تشتته وحيرته.. نوح الحمامه على فرخها قطع قلبه تقطيع.. وهي تحوم وتنوح..

كان قاعد على ركبه وبين كفينه الحمامه.. قام وهو متضايق .. مسح دموعه بكتوفه وهو لسا ماسك فرخ الحمامه في كفينه.. طق باب بيت زينه.. ولما فتحت اختها الباب عطاها الفرخ وهو مبتسم..:
ــ ماتت..
اخت زينه خذت الحمامه وراحت ركض لأمها وهي تصيح:
ــ ماما ماتت..
خذتها ام زينه ودخلت بها داخل.. وسكرت الباب..

ومع تسكيرة الباب عصف بقلب فارس الحزن اصناف واشكال ...

ما اقساك يا زماني .. أي هم قد حمّلته اياي اثقل كاهلي واعياني.. هل هو فراق ..؟؟
ام لوعة اشتياق .؟؟. هل غدر حبيب .؟؟. ام خيانة صديق ؟؟.. لم اعد ادري ..؟؟؟

في دائرة مفرغه والإتساع بها يضيق .. ادور لوحدي يرافقني ظل الضيق..
انفاسي تتلاحق و تطلعي لغدي يزيد بي التشويق ..ويغويني عن الطريق..

.. لا اقسى من تشويه القلب الطيب بالجروح ..
احساس مؤلم .. ان تشعر بغربة الروح وجسدك في الأوطان..
يرافقه شعور لا يوصف حين تشعر انك قابع في الأركان..
تجلي غبارها و بلا هوية.. متمسك بشظايا ماضيك او خائف من حاضرك و مضيعا للعنوان..
امسك قد فات .. وانت اليوم وليد جديد.. فلا تلتفت للماضي وعش حاضرك بحلوه ومره..
ابحث عن ذاتك بذاتك .. ولا تعلق امالك بمن رحل عن حياتك .. وعش ايامك ...

ايا نفسي .. وفري نصائحك لنفسك.. فإني
الومك..
اوبخك..
اعاتبك..
وامقتك....

تنهد من قلب ,,
حوريه: ــ حليوه الكلمات مو..
سلمان : ــ وااايد..
حوريه: ــ صراحه ياخوي اول ما قريتهم قلت لازم اخليك تقراهم ..
سلمان وبإبتسامه : ــ ليش يعني ؟؟
ــ هههههه لأنك زي اللي كتبت الكلام .. كل تحاول تخلي اللي حولك فرحانين ومتفائلين ويفكرو بحاضرهم ومستقبلهم وينسو ماضيهم وانت للحين متمسك بماضيك..
سلمان ساكت ويطالعها..
حوريه : ــ لويش ساكت تكلم قول شي ..
سلمان : ــ من وين هالكلمات.. انتين كاتبتنهم؟؟
حوريه : ــ لاااا .. اني .. ويش يعرفني .. هذي سمر
سلمان : ــ أي سمر ..؟؟
حوريه : ــ هذيك المره قلت لك.. سمر بنت رضا اللي سافرو ويانا..
سلمان : ــ اهاا .. والله كتاباتها شي .. قدش هي ؟؟
ــ لا اكبر مني بوايد
ــ والله ... كم يعني؟؟
ــ 16 لو 17 سنه.. بس اصغر منك خخخخ
سلمان يطالعها على جنب :
ــ ويش المقصد يعني .؟؟
حوريه تطلع لسانها :
ــ ولا شي .. بس كذا..
سلمان وهو يقوم يكفخها بمخده : ــ صدق .. ما تستحي .. قومي بس عن جهاز خالش تلفتيه ولعنتي خيره
ــ اوهوو هو راح يدرس صيفي ما بيستخدمه .. وثاني شي عطاني الإذن,, ويش باسوي فيه اني باكسره .. لو باكله..
طلع سلمان من الغرفه .. وطلعته دار عليها.. :
ــ اقوول حجيه.. اطبعيها ليي و اذا في غيرها كتابات اطبعيهم
حوريه : ــ لسمر لو لغيرها..
سلمان : ــ بلا ظرافه عليي ..
حوريه : ــ هههههه زين...


قاعد على باب البيت .. يحس بخنقه وضيقه.. مهو عارف ويش يسوي ,,من بعيد قدام البيت في مطعم وفيه جلسات خارجيه.. وكانو اثنين جالسين.. رجال ومره..
وشكل الجو بينهم مكهرب .. نقاش حاد مبين من تعابير الوجه..
فارس بدون قصد صار يتأملهم.. لا شغله ولا عمله.. شوي الا البنيه قامت وهي معصبه وشالت شنطتها وراحت..
والرجال ظل مشبك كفوفه و مسند لحيته عليهم .. وتالي قام..
ابتسم فارس .. وفي باله ..
ــ كنت اظن هالمشاهد بس في الأفلام.. تفارقو.. على الله العوض .. اااه.. متى الله يجمعني وياش يا رؤى.. قريييب ان شالله .. برجع وبيصير عندي القدره اجيب مهرش والحمدلله.. واعيش معاش للأبد.. يـــــــــــا الله متى بس متى...

بالمستشفى حالتها مره صعبه.. المهدئات والمسكنات ما تفيد.. ايمان تعيش اصعب اوقات حياتها و قضيتها متوقفه على ذاكرتها والبحث مستمر عن أي مزرعه فيها شبهات جهة السد اللي لقوها فيه طايحه.. بس للأسف السالفه بتطول وهي مهي عارفه الإسم الكامل للي سوو فيها فعلتهم .. ومع كثرة المهدئات فقدو السطيره على حالتها .. صابتها حالة كآبه عنيفه..
اضطروا على اثرها يحولوها للمستشفى النفسي .. ولقسوة االأقدار والزمن..
ما انتبهو اهلها لفقدانها الا بعد يومين.. كل واحد يفكرها مع الثاني .. امها تفكرها في بيت ابوها والعكس .. ما نبهتهم على فقدانها الا ريهام بنت خالتها اتصلت فيها ولقت جوالها مقفل .. وصارو يدورو عليها من وادي لوادي لين سلمو امرهم للشرطه اللي خبرتهم بالحادث واستنكرت تصرفهم هذا واهمالهم وحملتهم مسؤوليه اللي صار فيها,,,

وبخلال هاليومين رجع حمزه.. واهله مخططين على شي ..وبعدها بكم يوم راحو جميعا زياره لبيت فاضل .. زياره الكل استغرب منها .. واولهم فاضل .. اخوه من سنين ما طب بيتهم بحجة الأشغال والإرتباطات ,, رائد يحاول قد ما يقدر يبلع حمزه وتواجده .. ويحاول يعاند روحه ويتغير الحال من ناحيته زي ما تغير من ناحية فارس .. فصار يسولف وياه قد ما يقدر .
وبعد السلام والتراحيب وهدره شويات وسؤال عن الحال والأخبار.
ابو علي : ــ والله ياخوي يابو رائد.. حبينا نكلمكم في موضوع..
فاضل : ــ خير ياخوي ..؟؟ تفضل ..امر
ابو علي : ــ ما يامر عليك عدو.. ولدي حمزه .. حابب القرب منكم.. وده في بنت عمه تكون من نصيبه ..
حمزه متشقق .. رائد منصدم.. ومنصعق .. وسكووت مفاجا صابه ...

والى اللقاء ..

[روحي في ذكراك]

اميرة حرام عليش و الله

يعني كلا النورية كله صدق

ليش والله حرام ما يستاهل

فارس المسكين الله اساعده

جزء حزين واجد جاري الانتظار

تحياتي

[**جوان**]

...

يؤؤؤ لا حــرام

.. لا ياخذها حــمزه ..

بــصيح اذا اخذها ..

ولا رائد قاعد يحسن العلاقــه ..

لا مــسـتحيل.. مابتوافـــق ..

.. تــحــياتــيـ ..

[ارجوان]

لالالالالالالالالالالا والله حرااااااااااااااااااااااااااااااااااااااام عليش
ترى اذا مااتصلحي الامور الشرطة خلاص اتعبت اني من الاصياح
ام حسين ومااتت وايماانوا ورااحت فيها جننتيههاوحمزوا وبيااخذ روئ على قلبي مااتستاهله ثقيل الدم هذا يالله عاد غنااتي رجعي الماي لمجاارية




جاري الانتضار

[زهور الريف]

وينك أمور حرام
عليكِ تسوي كدا

مو حلوة القصة وفارس زعلان والله
قطعتي لوبنا
يا لله وين الصلحة

حبابة ننتظر الخبر الحلو
الي زيك

[عازفت الاوتار]

لالالالالالالالالالالالالالالالالالالالالالالالالا لالالالا مستحيل

تقبل لالالا ان شاء الله رائد يقنعها و ما تقبله

يالله لالا تقبل ااااااااااااااااااااااافــــــ

ياربي انتظر الجزء الجديد باحر من الحمر

لالالا تتاخري

تحياتي

[أميرة الشوق]

أن شاء الله ماتوافق روئ
أميرة متى بتحطي الجزء؟

[Princess]

هلا وغلا حبايبي
تسلمو عالتفاعل وحاسه فيكم والله
اني الحين اكتب في الجزء
هالأيام بدت اختبارات العملي بالكليه اسألكم الدعاء
قريبا بينزل الجزء اخلص كتابته واضبطه وانزله لعيونكم

لفتت نظري ارجوان .. هههههه خيه تسلمي والله اخجلتيني مشاركتين في قصتي وتفاعل رهيب عجبني تسلمي والله ..
ولا حرمني الله من الباقي حبايب وما تتصورو شلون الإبتسامه على وجهي تنرسم من الأذون للأذون على قولتهم.. من فرحتي واني اقرى تعاليقكم
الله يخليكم.. ويعطيكم من العافيه مليون

انتظروني ..
دمتم بحفظ الرحمن

[Princess]

فاضل : ــ الله يقدم اللي فيه الخير ان شالله والراي بالأول والأخير لرؤى
ابو علي : ــ على خير .. يللا نستأذنكم في امان الله
فاضل : ــ حياكم الله..

طلعو .. ورائد بعده مفهي .. مو مصدق ..
ــ يباا..
فاضل : ــ هلا..
ــ تتوقع رؤى توافق ..
ــ والله مادري يا ولدي ..
ــ تصدق .. انا من رايي توافق .. يعني لاحظته انا من زمان وهو مهتم فيها وبالأول والأخير ولد عمها ..
ــ والله مادري يا ولدي .. هي اختك قريبه منك.. روح وفاتحها بالموضوع وشوف .. وعساه خير ان شالله ..
راح رائد لأخته .. طق الباب ودخل لقاها قاعده على السرير .. سحب كرسي وقعد قدامها ..
ــ خيه.. << قالها بكل هدوء ومره اسلوبه ما كنه رائد..
رؤى مستغربه ..
ــ هلا ..
ــ ااا.. ويش رايش في حمزه ولد عمش..
رؤى سكتت.. ووجها بين عليه انها فهمت السالفه .. وصارت تغاور ما ودها تجاوب ..
رائد : ــ ادري به غثيث .. بس يحبش وايد .. وهو ولد عمش واللي من لحمش ودمش اذا ما حبش رحمش.. شلون ويحبش بعد.. براحتش خيه .. بس انصحش تفكري عدل..
رؤى :
ــ ان شالله ..
رائد :
ــ لمتى بتفكري ..
ــ اسبوع..
ــ براحتش..

طلع وسكر الباب .. وهي حضنت المخده .. واشتغلت صياح.. وصارت الذكريات تجي قدامها موقف موقف .. كم مره شافها فارس .. كم مره انحرجت وياه..
صحيح ما كلمها ولا مره .. صحيح كان وياها مؤدب واخلاق لأبعد الحدود.. بس كانت تحس انه مهتم فيها.. شوي بدت تصيح.. مهي عارفه توصف مشاعرها...
ظلت ربع ساعه تصيح.. وهي ضامه مخدتها بالقوه..

مشاعر غريبه مختلطه.. خوف على فارس في الغربه.. بنفس الوقت تحس بحقد عليه وعلى اللي سمعو الشباب صوتها وياه.. رفعت كفها ومسحت دموعها :
ــ اني ويش فيني خبله.. على ويه اصيح.. ما وعدني بشي هو.. ولا هو الي .. حق ويه قاتله لوحي .. على ويه عااد.. اغال يعني ..
التفت وطاحت عينها على المرايا.. حاولت تصطنع الإبتسامه.. وتنهدت..
ــ بنساك.. بنساك يا فالس..

صحا من نومه مفزوع.. كابوس غريب .. كن عنده ارض وااسعه وفرحان فيها ومليانه خيرات.. فجأه جا واحد واغتصبها منه.. وهو لاحول ولا قوة له.. و صارت بعد كذا ارض بوور ما تنفع لزراعه وتصحرت ..فتنازل عنها اللي اغتصبها منه.. ورجع فارس يزرع فيها من جديد ..

صار يفكر في الحلمه .. طالع الساعه لقاها 8 العشا .راحت عليه نومه... صار يسلي نفسه انها باطله ,, ويتجاهل يعرف التاريخ .. قام وهو متوتر . صلى صلاته.. وحالته حاله.. غسل و طلع بيشوف ويش يسوي وويش صار على جوازه وبدل الفاقد.. ويخلص باقي الإجرائات مع زينه..
طلع من باب البيت.. وطلعته شاف زينه واقفه ويا واحد على باب بيتها وضرب سوالف و ضحك ,, وهو مو فاهم شي من كلامهم ,, وتالي الرجال حط ايده على راس زينه وهي عادي ولا قالت شي ..
فارس يغض النظر ..
ــ انا ويش دخلني وايد علي مصايب .. اكي هي عادي ..
حاول يغاور ويغير اتجاهه.. انتبهت له زينه ..
ــ فارس ..
فارس عاطنهم ظهره بس لف راسه على جنب بدون ما يطالعهم ..
ــ نعم..
زينه :
ــ الله ينعم بحالك.. ما عرفتكم على بعض ..
الرجال اللي معاها بلهجه كنه متضايق :
ــ علاش من يكون .؟؟
زينه :
ــ رشيد نسيته هذا فارس اللي خبرتك عنه..
رشيد مو ذاكر ..
زينه بهمس ..
ــ فارس ابن جارنا محمد ,, اللي دافع عني وصابتو مصايب قاسحة عليه بزاف << قاسحه عليه بزاف : صعبه عليه مره..
رشيد : ــ اااه ذكرته ..
وابتسم وراح لناحية فارس :
ــ اهلا وسهلا فيك يااخي نورت المغرب .. وشكرا على شهامتك مع زينه..
فارس ابتسم : ــ منوره بأهلها .. والعفو ما سويت الا الواجب..
زينه : ــ فارس .. اعرفك على رشيد ابن خالتي يشتغل بفرنسا ومن يومين بدأت عطلته .. و... ... خطيبي << قالتها ووجهها تلون خجل
فارس ابتسم : ــ ما شاء الله و الف مبروك .. ما دريت عنش ..
زينه : ــ لا بس بالكلام لسا ما انخطبنا رسمي .. بنتظر اوراق الي وفيزا لحتى نتزوج على طول ونسافر لفرنسا..
فارس : ــ اهاا .. الله يقدم اللي فيه الخير..

رشيد وهو مبتسم : ــ إوا شنو درتو بقضية الباس بورت .. << هاا ويش سويتو بقضية الجواز..
فارس فرد ابتسامه شبر ونص
زينه ضحكت عرفت انه ما فهم منه شي ... زينه:
ــ رشيد .. فارس ما بيعرف للهجة .. فارس.. رشيد يقصد ايش صار بجوازك..
فارس :
ــ هههههه اسف والله لهجتكم صعبه علي .. ولا شي كان عندك خبره في هالمواضيع ممكن تساعدني..
رشيد :ــ ان شاء الله
والتفت لزينه : ــ ايوااا شراح اقل لك .. راني بعرف شخص ممكن يساعده وبسرع وقت يجيب له تأشيرة ليرجع لبلده..,,, <<< راني= ترى انا
ورجع التفت لفارس :
ــ انت مزروب ..؟!
فارس فتح عيونه حسها كنها سبه لو اهانه ..
ــ نعم..!!؟؟
زينه : ــ هههههههههه شقلت لك يا رشيد ما بيفهمش على كلاماتنا .. فارس يعني انت معجول ..
فارس : ــ ههههه اهاا يعني مستعجل على الرجعه لبلدي ..؟؟
زينه : ــ هههههه ايواا..
فارس : ــ ايه والله ابغى ارجع في اقرب فرصه ابغى اخلص كل شي هنا وارجع..
رشيد : ــ ان شالله خير .. بس اللي بعرفه مسافر مللي يرجع واكلمه..
فارس اكتفى بإبتسامه..
زينه وهي تضرب رشيد على كتفه بخفه : ــ ههههههه ما راح تحاول تكلمه بلهجه ابسط.. فارس بيقل لك رشيد اذا رجع من سفره بيكلمه ان شالله..
رشيد يضرب راس زينه بأصابعه على خفيف وبمزح:
ــ هههههه حاضر بحاول ..متنسيش العربي منه قوي عندي ولهجتي نصفها كذا ونصفها فرنسي ..
ويهمس ليها ..
ــ ما قط قلتلك توحشت على ضرباتك..
زينه انحرجت وتلونت وبإبتسامه : ــ رشييييد..
رشيد : ــ هههههههه
فارس في باله . ــ بل اروح عنهم احسن ههههههه يا سااااتر .. انا استحيت..
فارس :
ــ اا .. احم .. يللا اخليكم ..
رشيد : ــ على فين يا فارس ..
فارس : ــ لا بس بروح اشتري لي شي اكله ..
رشيد يطالع في زينه: ــ شعندك دابا يا زوينه.. << ويش عندش الحين يا حلوه
زينه بدلال : ــ ولا شي ..
رشيد : ــ يللا استأذن من خالتي بخطفك نتعشى..
وغمز وهو يطالع في فارس ..ــ انتي و فارس عازمكم الليله اذا ما عندهش مانع..
زينه طالعت في فارس .. اللي كان مبتسم وعيونه مليانه استفهامات,,

تابع>>>

[Princess]

رشيد لاحظ عليه التعجب : ــ فارس زينه كلمتني عنك بزاف وصراحة موقفك معها كبرك في عيني و حاسس نفسي ولفت عليك من كلامها .. باين عليك بنادم طيب بزاف..
زينه ضحكت.. : ــ رشيييد راح اصير مترجمه لألك .. فارس رشيد ارتاح لك كثير و حابب يتعرف عليك اكثر اذا ماعندكش مانع.. وهو عندو خبره في هاي المواضيع اكثر مني
فارس : ــ تسلم والله يا اخوي من ذوقك وطيب اصلك ..
فارس يحس بإحراج داخله بس لبى الدعوه حق يشوف له هالرشيد .. حل يطلعه من ورطته..

وفي المطعم .. فارس محتار على عمره .. وين يقعد.. قعد رشيد مقابل زينه..
فارس منحرج.. ان قعد جنب زينه احراج وان قعد جنب رشيد بعد بيقابل زينه.. صرف عمره وهو يهدر في باله :
ــ ويش هالبلشه.. اقعد جنبه والف وجهي ناحيته ارحم لي ..
قعدو وبدو السوالف ..
رشيد : ــ سبحان الله المكاتيب جمعتنا يا خيي .. زينه حدثتني عنك بزاف من بعد ما توفى المرحوم والدك .. شقد حسيت الدنيا قاسحه عليك.. الله يكون بعونك..
فارس : ــ يالله يا كريم..
رشيد : ــ شوف يا فارس ,, انا بعرف صديق لي حريف وبيعرف لشغلات الجوازات وعنده واسطات ,, هو دالحين مسافر وبعد شي ثلاث ايام ومثل ما قلت لك مللي يرجع واكلمه .. ومتأكد حيقدر يساعدك ويدبر لك تأشيرة رجوع بسرعه ,,
فارس : ــ مشكور يا اخوي وما تقصر ..
رشيد : ولو ,, حنا اللي نتشكرك على جميلك والله صحيح انك غريب على زينه بس الرجال ماشي كله حال بحال ..
فارس ابتسم.. ضحكت زينه :
ــ يعني الرجال مو كلياتهم مثل بعض ..
فارس : ــ اهاااا.. ههههههه تسلم والله..
رشيد يضحك بإستغراب : ــ هههههه الله يسلمك.. لهالقد لهجتنا قاسحه عليك..
فارس : ــ أي والله لو ما بعض الكلمات تكرروها كذا مره ما افهم..
زينه : ــ هههههه ايش الكلمات اللي خلاص رسخت في بالك..
فارس : ــ مممممم هههه علاش وكفاش وقاسحه وبزاف .. << ليش و كيف و صعبه و مره او كثير
رشيد : ــ ههههههه يالله ضحكتني يا اخي
فارس : ــ هههههه ويش اسوي .. عاد نصهم استفهام ونصهم حسرة
زينه ورشيد صارو يضحكو..
زينة : ــ هونها يافارس وتهون ..
فارس : ــ ان شالله.. الا يا رشيد ما قلت لي ويش تشتغل في فرنسا؟؟.
رشيد : ــ مراسل صحفي ..
فارس : ــ ما شالله صعبه الشغله؟؟
رشيد : ــ لا بالعكس حلوه وممتعه .. بس غربه ويحتاج فيها البنادم لونيس ..<< قالها وهو يطالع في زينه.. وزينه مستحيه
فارس انتبه ليهم : ــ احم.. كح.. الله يكون بعونك ويوفقك يارب..
رشيد : ــ الله يخليك.. ويفتح الرزق في وشك يا كريم..
فارس : ــ هههههه استغفر الله.. مو انفتح وضاع الجواز.
رشيد : ــ ههههه لا بإذن الله حتلاقي دباره .. << دباره = حل اوتدبير مثل ما نقول
فارس : ــ ان شالله..

رشيد ارتاح لفارس وايد .. وطلب منه يسولف له عن حياته.. وكيف كان عايش بالسعوديه .. فارس قلبه كبير و اخلاقه عاليه .. صار يسولف وحكى لرشيد قصته.. وطرى له رائد خويه وانه زعلان منه على حساب راح المغرب وخلاه
رشيد : ــ ايييه يا اخي قصتك بزاف مؤثره,, تصلح تتكتب بس بصراحه اسمح لي رائد غلطان على زعله هذا ..
فارس وهو مبتسم.. : ــ ويش اسوي .. بزااف غلطان
رشيد وزينه : ــ هههههههه ..

كانت سهره حلوه رغم الإحراج اللي حس فيه فارس .. بس غير جو بعد الضغوط والتوتر اللي صايبنه.. واستانس شوي..


منسدح.. ويحرك الدبله في صبعه.. ويفكر في نفسه ..
ــ اااه... لمتى هذا حالي .. لمتى ..!!!
انقلب على يمينه.. لمح ملف مجمعه فيه حوريه كتابات سمر اللي طلبهم..
فتح الملف وصار يقلب بين الأوراق ...
لفتت نظره جمله من خاطره كاتبتنها..
بيدنا نستطيع رسم السعاده.. ووحدنا قادرين على التفنن في الوانها.. ولكن ما ذا لو كان الكراس في واد والألوان في واد اخر..
لربما في يوم ما يلتقيان.. ويرسمان معا قوس الرحمن ..

سلمان :
ــ نستطيع رسم السعاده.. وقوس الرحمن..
رجع انسدح على ظهره .. رفع كفه.. حرك الدبله.. شالها وحطها على الطاوله.. ونام...

هذا باقي الجزء الساابق
جاري كتابة الجديد

[فرح]

امـــــــــووووره ياااقلبي ..
بجد اتاااابع للحلقااات وقلبي يتقطع ع فارس ورؤى
ياااربي ماتوافق ..يكسر الخاطر فارس ..
احممم اذا بهدر مابخلص ..
يعطيك العااافيه غاااليتي امـــــوووره
ع الابــــــــــدااااع ..وتسلمي..
اجمل الامنيااات لك بالسعاده والتوفيق
تقبلي تحياااتي ..

[زهور الريف]

ماشاء الله عليك أمور
عندك تتابع بالاحداث رهيب
اللهم صل على محمد وآل محمد
ويالله حبابة في الجزء الجديد رجعي فارس السعودية
وريحينا هههههههههه

تسلم الايادي الروعة

[دموع الوحدة]

أمووووووره حرررااااام لا تزوجي رؤى حراااام بتصيري مجرمة خخخ<< سكتي لا تحصلي تكفيخ خخخخخخخخخخخخ
اموووورة هالله هالله في فارس ورائد راضيهم على بعض وخلي رؤى تعرس نبغى نستانس <<< افضل الصلاة والسلام عليك ياحبيب الله محمد كللللللللللللللللللوش هههههههههههههههههههههههههه
مشكوووووورة امووووووورة الجزء حليو بس مازال حزين يكسر الخاطر ابو الفوارس خخخخ
الله يوفش ان شاء الله في الاختبارات ياااااااااارب
دموع الوحدة

[سفيرة الاحلام]

مشكوره على الجزء

الله يعطيك العافيه

ان شاء الله سلمان يعرس على سمر

جاري انتظار الجزء