ماعرفتوني .. كثر .. ما عرفني ..

[**جوان**]

..............


مشكوره اختــي امـووور عـلى الجزء الرووعـــه ..

.. مــسكين على عمــري .. فــارسـ ..

..

تــحيــاتي ..

. وانــشاء اللـه ماتتأخري علينا في الجزء الجــاي ...

..

[سفيرة الاحلام]

جزء روعه

الله يعطيك العافيه

بس لا تطولي

[جنة الحسين]

جزء مره مره روووووعه

تسلم الايادي

ننتظر الجزء الجديد على احر من الجمر

لا تتأخري علينا امووره

دمتِ بخير

[زهور الريف]

مشكورة خيتو

جزء روووووعة

مسكين فارس بس يالله ماعليه

لجأ عين تكرم مدينة

[ســحرالقوافي]

ههههههههههههه
مسكين فارس ما دور يبتلش إلا ويا إيرانيه

هذول إيدهم والقبر

خخخخخخخ عن جد ما ادري كيف إذا بلغلط صدمونا كسروا عظمنا

خخخخخخخ

وصراحه سالفة العرافة الله يغربلها خوفتني على فارس

<<<<<< الي يسمعني يقول تصدق كلامهم

يسلمووووو

وعقبال ما نشوف الجزء الجديد قريب

على فكره

شوقتينا الى سوريا
الله يكتبنا مع كل المشتاقين لعقيلة الطالبيين زياره قريبه

دمتـ بود

[غــــلا]

مشكورة ع الجزء

والقصة روووووووووعة وقليلة عليها كلمة روعة

بس وين التكملة اهئ اهئ حرام متحمسة ويه الاجـزاء وتاركة المذاكرة

<<< مو متعودة تقرأ قصة جدي مو مكتملة

وتسلم ايـدك ع القصة

وبانتظــار البقية

[عازفت الاوتار]

مشكووووووووووووووور خيتو

الجزء زااااااااااااااااااااااااااااحف و ازحف من الزاحف

بس فالس مسكين

ما نخلص من مرض روى يتكسر لنا فارس

الله يكون بالعون

بليـــــــــــــــز امور بليز

لالاتتاخري اوكيه

تحياتي

عازقت الاوتار

[..انين الروح..]

اااااااااااااااااااااااااااااااااف

والله العظيم ملل

امووووووووور

تخيلي انتِ مكانه ويش راح تسوي ؟؟؟؟؟؟؟؟؟؟؟

..انين الروح..

ملللللللللليت الااااااااااا نتظار

تحياتي

[كبرياء]

أحناااا قلنا نغيب شويات عن قصة أميروه يمكن نلقى جزئين لو 3 الا بس واحد !!

يسلموووووووووووووووو أميروه على الجزء الروعه

وبانتظار البقيه

تحيــــــــــــاتي

[غــــلا]

أميـرة وينش

طولـتي..؟؟!

[Princess]

هلا حبايبي
كانت عندي اختبارات... والوقت اللي افضى فيه اقضيه اشراف ..
بكره اخر يوم في اختباراتي ادعو لي
وجايتكم باللي يسر

اسمحو لي
بس ودي اكسر راس كبريااائوه لأنها بعد اختبارات ووياي في نفس البيت ..

ايه تبغى هي تذاكر وتخلص وتجي على البراده تشوف ليها كم جزء ..
هين لكن.. ههههههه

و انين الروح .. ما بحط روحي مكانش.. لأني لو حطيت روحي مكانش .. بضطر احطش مكاني..
واذا حطيتش مكاني بتعوفي دنياااش وبتقولي يماااه ارحميني وارجع انينووه مو اميرووه..
حلي هالمعادله عاد ..!!

دمتم بحفظ الرحمن

[غــــلا]

هلاا امورة

الله يوفقك ان شاء الله وتجيبي الدرجـة الكاملة

واحنـا لاحقين ع القصة .. وورانا اجـازة تكتبي فيها ع راحتش و نقرأ فيها ع راحتنـا


تقبلي مـروري\\
غــلا

[آخر شقآوهـ ..~]

هلووووها اميرووووه البطيخه
شحوالش وش مسوويه عفر الا هداك فاجه عليي والقصه بعد فاجه عليي
هوه اني مابقوول طولتي ومادري ويش لاني ادري لاويه متاخره <<<جحمه كفيير
بس صحيح مهلتي<<اني ماقلت طولتي قلت مهلتي
الله حيييهم اهل سورياا عفر الا فجت عليي سوريا
الله يرد ديك الايام احم كووح
الله يوفقش ان شاء الله قلبوو
تسلمي قناتي ع الجزء
ربي يعطيك العافيه
تحياتي
ضحكوه البطه

[Princess]

يسلموو جميعا ...
هالجزء صرااحه تعبني واايد..
فيه كذا لهجه..
درازيه بشكل كبير .. وايرانيه شوي ..
استخفيت في صياغة الحوار المناسب مع الشخصيات والأحداث..
اتمنى تعجبكم..
تفضلوو..

[Princess]

فارس منصرع .. ما انتبه من الخلعه ودورة الراس .. وفي باله ..
ــ الله يهديها من ايراااانيه لابسه لي مشمر اسوود مو مشجر .. ياربي شكلي ابتلشت..
ويتجمعو عليه الخلق ... ويجي له ولد الإيرانيه .. ويهدر ويصارخ فيه..
فارس وعيونه متورمه من الخلعه.. مو عارف ويش يقول ..
ــ اسف .. آآسف ... التماس عذر ..
ومتورط.. وشوي يرنه بكس من ولد الإيرانيه.. يورم له عينه..

فارس حمق وصار يصارخ انه مو قصده .. وتجمعو سوريين و زوار..<< اللي ما يشتري يتفرج


حوريه :
ـــ امايي ما تعبتي من المشي .. ما يندرى وين الميكرو حقكم واقف
ام حسين :
ــ لاا يا بتي .. ويش اسوي الكبر شين نسيت اني وينا هوو ..
سلمان :
ــ شكل السالفه أمعصلقه << باللهجة الدرازيه امعصلقة = صعبة..
حوريه :
ــ أي والله زحمة الخلق زحمة .. ولا ينشاف شي ..
شوي وهم يمشوو الا سوري يمشي وهو يسحب سحاحير وتحك في الأرض ..
حوريه :
ــ افففف دقرني دااا..
ام حسين مختلعه:
ــ يؤ دقرش .. قليل الحيا ,, تعورتي
سلمان ضحك:
ــ ههههههه امايي دقرني يعني حرقص ميازي << حرقص مزاجي
ام حسين :
ــ ههههههه ويش دراني اني يا ولدي .. خوب لهجتكم قريبه منا بس كم حاجه مو زيكم
حوريه :
ــ ههههههه واني اقول ويش تقولي .. وانتين صادقه .. بس امي تعودت وصارت تتكلم مثلنا وحنا بعد اذا رحنا بيت يدي كم كلمه نقولها قطيفيه ..

سلمان :
ــ صبرو صبرو.. شوفو جمعة اوادم مناك .. ما يندرى ويش سالفتهم..
حورية :
ــ شكلها هوشة
سلمان :
ــ دهدي بغدي اشوف ويش صاير وبرجع << دهدي = بسرعه بالدرازي ,, بغدي= باروح
حوريه :
ــ تعااال ما عليك منهم علطير يشلخو بدنك << علطير = علشان

الا بدخلة سلمان وسط المعمه .. وهو يصارخ ..
ــ تباعد انت وياه.. خلني باشوف ويش السالفه ...
شاف الإيراني متشابك ويا فارس والهدره واصله حدها..
فككهم ومسك فارس وصار يطالع فيه و ابتسم ..
ــ هلاااا خيوو انت فارس موو..
فارس متوتر وراسه داير :
ــ هااا ويش .. ويش صاير ..
سلمان: ــ انت اللي ويش صاير يا خوك و لويش تتضاربو..
فارس علمه بالسالفه عالسريع..
سلمان.. : ــ امك داهي ويانا .. شفناها..
فارس طار من الفرحه وجى بيطلع من وسط هالناس و
سلمان صار يتفاهم ويا الإيراني :
ــ متأسف اشتباهى غيرعمدى مادر مادر شبـيه... << آسف غلط غير مقصود..امه وامك يتشابهو
الإيراني :
ــ به دست آورده خوب << حصل خير ..
سلمان:
ــ خلاص انتهت السالفه لويش هالتجمع يللا كل واحد يتيسر لشغله..

فارس راح جهة امه ام حسين وحوريه..
ــ يالله يالله..
حوريه وخرت ..
ام حسين : ــ وي هلا امي .. هلا بعد ابوي .. هلا خلف شبدي ..
وانتبهت لعيونه المضروبه ..
ــ وي وي .. ويش بك يا بعد رووحي مسوى مين هالفعله ..
سلمان :
ــ هههههه مفكر الإيرانيه انتين وانضرب من ولدها..
ام حسين تمسح على وجه فارس :
ــ وي بسم الله عليك حسبي الله على بليس.. امش يا غناتي نروح الباص الحين يدورو علينا..
فارس :
ــ مشكور ما تقصر ياخووك رحم الله والديك والله صدفه خخخ بس اسف مهي ذاك الزود ,,طق وتشليخ وشباق ..
سلمان : ــ ههههههه رب شبقة على قولتك خير من الف ميعاد
شوي الا يسمعو رائد ينادي فارسوووووه
ويجي يركض ويوصل له وهو ينافخ من التعب ..
ــ انت ... هناا... وحنا ... ندووور ...
فارس :
ــ توني شايف امي ما مداني اتصل واخبركم..
رائد خذ نفس عميق : ــ اهلييين سلمااان هلا والله ويش هالصدفه ...
ويمد ايده ويمسكها سلمان ويشد عليها :
ــ هلا فيك احلى صدفه اللي خلتنا نشوفكم .. اخبارك انت
رائد : ــ الحمدلله بخير ..لاعاد صدفه ثانيه تجمعنا ,, لااا لازم نتعرف اكثر ونكون علاقات..
سلمان ابتسم : ــ وانت الصادق ,, يشرفني والله ..
فارس : ــ يعز مقدارك حياك ربي
اخذو ارقام بعضهم حق التواصل ,, ومشو...
اتصل فارس للبقيه وقال ليهم حصلو امه و رجعو الميكرو ..



حوريه : ــ هذا فارس ولد أم حسين .. هامن اللي اياه.. << هامن = مين هذا
سلمان : ــ خويه رائد ..
حورية : ــ اهااا .. زين يللا دهدي قريب بيأدن ادان المغرووب..
سلمان : ــ زين ويش تبغي بعد من السوق ..
حورية : ــ دقيقه باوايق على هالمحل فيه تحف حليوين حق روازن داري .. << روازن = رفوف
سلمان : ــ ما تشبعي انتين بيتكسرو في الطريق ..
حوريه : ــ اوهووو ويش فيك سلمانوه عاد باوايق وباشوف اني .. << باوايق = باطل طله
سلمان :ــ زين يللا ..
دخلو المحل ..
حوريه : ــ سلمان تعال هالديل طاولني هاديك باشوفها << هالديل = هالجهه
سلمان رفع ايده : ــ ااي ضابوعي عورني ... وينا .. دي .. عفر مهي حليوه..<< ضابوع = كتف
حوريه : ــ الا عفرااات .. هونت ما ابغاها .. ويش فيك سلامتك ..
سلمان يدلك كتفه : ــ الله يسلمش
طلعو من المحل .. ووقف سلمان عند محل ثياب رجاليه يقلب فيهم.. ومشى ولا اخذ شي..
حوريه : ــ حق ويه ما اخذت شي .. ما عجبوك..
سلمان : ــ لأ محلوسين << محلوسين= مبهدلين .. هطلان
وبعد ربع ساعه
سلمان : ــ اففف تعبت انا من المهايل ..خلي باقي الباقي لباجر <<< المهايل = المداور
حوريه فتحت عيونها : ــ طالع سلمان مناك مو هذا مرادووه
سلمان : ــ أي مرادووه..
حوريه : ــ هذاك الخنيتواه .. << الخنيتواه = اللي يحب قعدة الحريم
سلمان : ــ ههههههه خبرش فيه يوم هو صغير وحبه التلزق في الحريم والبنيات الحين تطور وصار دلعه هههههه اقول لا تغيري السالفه وقدامي باجر نكمل << دلعه = لا يكش ولا ينش ماله شخصيه ..
حوريه : ــ ههههههههههه يصقع دا تطور
وتتعثر حوريه وشوي وتطيح ويمسكها اخوها ..
سلمان : ــ هدااويش انتين ما تحطي بالش ..
حوريه : ــ ويش دراني عنهم ما يباحصو هالشوارع من سنين وهي مكسره << يباحصو = يعدلو
سلمان : ــ هههههههه الا حوبة مرادووه ..
حوريه : ـــ اللاااااي دقيقه سلمان .. شوف هالمفارش .. امي من زمان تبغى من هالنمونه باخذ جم واحد.. << النمونه = هالشكل
سلمان : ـــ اخذي اللي تاخذيه بس نخلص بسرعه..
دخلو يقلبو في المفارش.. والسوري لزقه ويهدر :
ــ شوفي هيدا ,., وكمان هيداا..
سلمان ساكت ويطالعه على جنب.. وقال :
ــ كلمني انا لو سمحت..
البياع : ــ انا آسف بس ما كان أصدي شي ..
سلمان يتحمق بهدوء : ــ قصدك لو مو قصدك
وصار البياع يطلع كم واحد .. وكان معاه بياع ثاني ما شال عيونه عن حوريه..
كانت حوريه ناعمه وعيونها زي الأطفال كلها برائه,, وحجابها كله عفه وستر .. بس عيون اولاد الحرام ما تتوب ..
سلمان لاحظ وحمق :
ــ هيييييييه انت ويش تطالع
البياع : ــ شوو شو في ..
سلمان : ــ هذا خويك بفقع عيونه ما يستحي .. امشي ما بناخذ شي ..
البياع :ــ أيـــــــــــــه بالناااإص
سلمان : ــ نقص عمرك قول امـــــــيــــــــــــــــــــــن
حوريه ساكته وخايفه وطلعت ..
سلمان يتحمق ويسب .. وهي خايفه وساكته .. وشوي قلب على حوريه وصار يصارخ عليها
حوريه جتها الصيحه وصارت تهدر ..
ــ اني ويش كااري .. << ويش كاري = ويش يخصني

في الطرف الثاني رائد والجماعه ركبو الباص وصارو يتحمدو بالسلامه لأم حسين .. ومشى الباص راجعا الى البيت...
رائد : ــ مين هذي اللي ويا سلمان..
فارس : ــ يصقع وجهك انتبهت .. ما ادري ما سألته,,
رائد : ــ مممممم شكلها خطيبته ..
فارس : ــ ويش مدرااك انت ,,
رائد : ــ شفته لابس دبله في ايده اليمين ..
فارس : ــ اللهم صل على محمد وال محمد.. اذا انتبهت للدبله ... ما الومك لو تنتبه للبنيه..
رائد : ــ خخخخخخخ بس اذا خطيبته .. ممممم شكلها صغيره عليه موو..
فارس : ــ شعليك منه ههههههه ياااربي صدق ملقوف ليش كم تخمن عمره ..
رائد : ــ مو اقل من 30 .. وهي شكلها اصغر مني لو بعمري << حوريه عمرها 16 سنه ..
فارس : ــ وييش عليييك .. بس تدري رغم الإبتسامه اللي في وجهه ومزحه بس شكله عالم اسرار و وراه حكايات وقصص ..
رائد : ــ ايييه .. عجبني هالرجال يللا هذا احنا عرفناه وطلع حفيد جارتكم ..
فارس : ــ يللا ايام الله جايه وان شالله خير ..

وصلو البيت .. و في الليل صارو يتناقشو .. وين يروحو يوم ثاني ... اقترحت رؤى الزبداني .. وراق ليهم الإقتراح... رائد :
ــ يباا... في واحد يصير حفيد جيران فارس طيب واخلاقي ومن الدارز .. خاطري اتعرف عليه اكثر عادي نعزمه ويانا ..
فاضل : ــ من عيوني عادي كلمن يعز عليك كم رائد عندي انا اذا على كذا نأجل روحة الزبداني لبعد بكره لين تدق على خويك هذا وتشوف علومه حق يجهز روحه ..
رائد باس راس ابوه :
ــ تسلم لي يا لغالي .. بروح اقول لفارس وبكلم سلمان..
فاضل : ــ الله يسلمك حبيبي..

راح رائد وطق باب المجلس على خفيف وطلع له فارس .. كانت ام حسين نايمه ..
علم رائد فارس بالسالفه .. وفرح فارس .. وحسوها فرصه حلوه يتعرفو على سلمان اكثر ..

لهذه الحلقه تكمله .. باكملها قريبا ... تعبتني في صياغة الأحداث خصوصا لهجة سلمان وحوريه.. ما حبيت تصير أي كلام لازم شي عدل و واقعي ..