رائد : ــ فديت البلبل انا عاش عاش..
فارس : ــ خخخخخ اسكت بس كم كلمه صفيناها,,
حسن : ــ يعني ويه غلط كلامك.. ويش قلت ليها..
فارس : ــ وجهك غلط .. جاوبت عليها اللي بناه الأموي الوليد بن عبدالملك سنه 705 ميلادي ..
رؤى تتطفر وفي بالها : ــ يصقع وجهها تكلمه عيني عينك.. ويصقع وجهه يلد عليها .. اووف مننننهم...
دخلو الجامع .. وصلو لموضع الرأس الشريف .. وصارو يقبلوه.. ويمسحو عليه..
شوي سمعو همس رجال من وراهم:
ــ شيسون هذولي ..
ــ والله مدري .. ليش يبوسونه..
رائد تليقف ودار ليهم :
ــ موضع راس الإمام الحسين عليه السلام ....
واحد من الرجال ..
ــ وموضع راسه .. وش العبره من تبويسه .. وش الفايده خخ .. والله حركات غريبه..
رائد بيرد.. سحبه فارس وهمس له..
ــ الجدال وياهم عقيم.. خليهم عنك وخلنا نكمل ...

خلصو من الجامع وطلعو سوق الحميديه.. ام فارس طلبت من ولدها يوصلها للباص بداية السوق واقف .. بتركبه بترتاح.. وقالت ام حيدر بتروح وياها ويا ابو كرار تعبو وما فيهم شدة مداور بالأسواق .. ركبو الباص وكان السواق مسند راسه وعيونه غافيه.. الباقي كل ناس ويا اهلهم ,, يتبضعو.. ام حيدر في الباص :
ــ ابو كرار .. افادنا بكيلو قهوه.. اشتم ريحته تطخ في الرااس طخ.. حول جيب لنا كم كيلو نمخمخ روسنا عليهم..
ابو كرار : ــ اف منش ما قلتي داك الحين .. يوم ركبت ما مداه يحمى مكاني بعده باااارد ما مداني قعدت الا طلبتي .. .. زين باحول .. ام حسين ما تبغي شي ..
ام حسين :
ــ سلامتك.. يعطيك الف عافيه..
ــ الله يسلمش ويعافيش..
ونزل ابو كرار.. راح كذا محل بعدهم ما حمصوها " حبات البن .. القهوه" .. وهو يبغاها محمصه.. وبالهيل .. فصار يداور ...
عشر دقايق .. ام حيدر سندت راسها وغفت عينها...
ام حسين .. طالعت في رجولها..
ــ ايييه شكلي يبغى لي ابدل هالشحاطه.. بشحاطه يديييده .. باقوم .. ياااعلي .. اه.. ويش هالعافيه فقيله.. خلني باحول محل قريب واشتري لي وحده ..
ونزلت من الباص ولا انتبهت ليها ام حيدر والسواق انتبه بس فكرها عادي بتتبضع ما يدري بها مسكينه مخرفه...

رجع ابو كرار .. وما طالع ورى .. ركب :
ــ يالله يالله... ورمى كيس القهوه.
نقزت ام حيدر :
ــ بسم الله على عمري ...
ــ ايه انتين اشخري نوم.. وانا مشاوط من محل لمحل لقهوتش .. يالله حصلت كم كيلو محمص عدل وفيه هيل ..
ــ يعطيك العافيه يا الغالي يا خلف ابووي يا خلف اللي راحو ولا عودو..
ــ ههههه ايه حريم تعرفو تراشو بكم كلمه .. الله يعافيش..
وقعد ابو كرار .. بعد ما لفت نظره من بعيد.. شناط مغطيين بلحاف ماخذتنه ام حسين لرجولها لأنه تعورها فتلحفها.. فكر الشناط المغطيه ام حسين منسدحه.. وهي لا شناط بناته و عفايسهم..

وبعد ساعه على اتفاقهم.. انهم يرجعو الباص .. تجمعو .. وركبو ابو علي ورضا باصهم..
وركبو فاضل واهله وفارس وتهاني واهلها الباص الثاني..
التفت فارس ما لقى امه.. فتح عيونه وسأل :
ــ وين هي امي ..؟؟؟؟
ابو كرار نقز :
ــ شيه مو نايمه ورى..؟؟
فارس :
ــ لااااا هذي شناط مغطيه.. ياااربي متى نزلت.. ما تندل هي ومافيها شده,,
ونزل يركض .. ونزل رائد وراه..
ابو كرار :
ــ حيدر يبا .. روح وياهم دور .. انا لله .. عساه خير .
ونزلو فاضل وزوج تهاني .. يدورو..
الميكرو الثاني تقدم ومشى .. بيرجعو شارع التين .. ما يدرو ويش السالفه..

توزعو الشباب في السوق واتفقو يكون بينهم اتصال .. وصارو يدورو..
فارس يدور وايده على قلبه خايف على امه..
والكل يدور..
وفي مكاان ما في سوق الحميديه.. ام حسين تعبت وقعدت على واحد من الأرصفه وقعدتها مره تعبانه.. وبلا وعي ايدها مدتها.... الا بواحد ماد ليرة ليها ..: ــ تفضلي حجيه..
رفعت ام حسين راسها..وهي دايخه:
ــ يا ولدي اني ماني طراره.. ويش تفضلي .. ما شفت ميكرو منا قريب .. راسي داير ..
الصبي :
ــ لا حجيه ما شفت.. ويش لونه ... ؟؟
ام حسين :
ــ عفر ماني مفتكره.. ياعلي ويش هالحاله .. ويش اللي خلاني احول منه بلا راي .. انا لله.. ويلي عليك يا ولدي ..
ــ حجيه ولدش وياش.. ويش اسمه..؟؟
ــ فارس الــ....
ــ فارس الــ..... .. ,,, مممم ,, كن مر علي هالإسم..
قومي حجيه.. هذي اختي حوريه .. خلها بتمشي وياش وانا وياكم.. لين تشوفي ولدش ان شالله..
حوريه :
ــ هلا اماه.. تعالي امسكي ايدي ..
حوريه كانت بنت محجبه بعباه زينبيه .. وقمه في الستر والحشمه..
ام حسين :
ــ وي خلف شبدي يخليش لأهلش .. .. من وينا انتون.. القطيف ..
حوريه : ــ لا اماه.. درازيين من البحرين..
ام حسين : ــ هلا عيوني بأهل البحرين والدراز,, جارتي ام ابراهيم بنتها سكنه ماخذه ولد خالتها درازي هو من البحرين
حوريه بدهشه: ــ ام ابراهيم الــ .....
ام حسين : ــ ايه شيه تعرفوها..
حوريه ضحكت : ــ ايه هههههههه جدتي ..
ام حسين ضحكت : ــ يؤ يا سبحان الله.. صدق .. اني ولا نوبه شفت بنات سكنه بت ام ابراهيم والله سنين.. ..
حوريه : ــ ههههههههه ايه .. لا اله الا الله سبحان الصدف .. سلمان.. تعال اسمع.. هذي ام حسين طلعت جاره جدتي ام ابراهيم
سلمان : ــ ما شاء الله .. صدق .. هههههههههه لا اجل سهلتو المهمه علينا... انا مار عليي اسم ولدها .. بس مو من زمان مانى ذاكر ... اييييه حجيه .. وياه خويه اسمه رائد وواحد اسمه حيدر ..
ام حسين : ــ ايه ويش دراك يا ولدي ..
سلمان : ــ مممممم .. سالفة ويش دراني سااالفه.. امشي مع حوريه وانا وياكم وبقول لش ..
وصارو يتمشو يدورو على الميكرو ويعلمها بالسالفه..

فارس يدوور من وادي لوادي .. ومن بعيد .. لمح مره.. هيئتها ومشيتها زي ام حسين..
راح يررركض .. وصل ليها .. و مسكها .. ونادى ..
ــ اماااااه الله يهديش وين رحتي ..
الا هي دايره عليه ايرانيه وتهدر هدره ماليها اول ولا تالي .. وسب قايم فيه على اصول بالإيراني .. وتصارخ عليه.. تفكره بيعتدي عليها لو بيبووقها..
فارس منصرع .. ما انتبه من الخلعه ودورة الراس .. وفي باله ..
ــ الله يهديها من ايراااانيه لابسه لي مشمر اسوود مو مشجر .. ياربي شكلي ابتلشت..
ويتجمعو عليه الخلق ... ويجي له ولد الإيرانيه .. ويهدر ويصارخ فيه..
فارس وعيونه متورمه من الخلعه.. مو عارف ويش يقول ..
ــ اسف .. آآسف ... التماس عذر ..
ومتورط.. وشوي يرنه بكس من ولد الإيرانيه.. يورم له عينه..

والى اللقاء ...قريبا ان شاء الله..