شوي الا الإستاذ .. ينبه الوقت قريب يخلص..
ونفس الشي المراقبات بعد ....
ــ باقي ربع ساعه يا بنات.. اللي كاتبه برصاص تحبر..
الا البنيه اللي في بداية الإختبار.. تصيح.. رجعت تشاهق وزادت صياح.. وصاروا يهدوها لا توتر البنات باللجنه... وشوي اغمى عليها..
قامت رؤى تركض تحبر وهي تتنافض ومتوتره..
ــ حشاا مو امتحاان هااذاا هذا ويش هالبنات.. جابو لي خوف مو طبيعي الله يغلبلهم.. مفتكه لوانوه ويا ايمانوه في اللجنه الثانيه اووووف..

انتهى الوقت... وقاموا يجمعوا دفاتر الإمتحان.. رؤى تقرى ايات وتنفخ على دفترها وهي تدعي يارب تتوفق .. وفي بالها اخوها ياارب يتوفق..

وطلعوا من القاعه.. الأولاد على طول كل واحد سيارته وبيته.. البنات.. يراجعوا الحلول.. روان اكلت الكتاب اكال وهي تراجع.. رؤى مهي مشتهيه اكره ما عليها هالحركه.. الا بجية ايمان المروقه..
ــ هااي .. ويش سويتوا..
رؤى ..
ــ الحمدلله.. وانتين
ايمان..
ــ خخ ما ادري.. وانتين روانوه..
روان ..
ــ هاا الحمدلله .. بس وين هالقانون الزفت هذاا..
ايمان..
ــ خخخ.... رؤى دقيقه تعالي بسألش..
ــ هلا..
وبهمس..
ــ الا اخوش وصل لش السلام لو لا..
رؤى انصرعت.. يعني كلام رائد صدق .. وطلعت بعد لطلعة السوق ليها لبس وحركات خاصه.. لا حوول...
ــ ايه... وصل..
ــ ززييين اشوى.. أي بعد. ابسألش... مين هذا اللي وياه..
رؤى حمقت .. ويش فيههااا هذي تسال عن فارس << دقتها الغيره..
ــ خويه... لويش..تسألي؟؟
ــ اهاا.. ادري خويه.. اجل خويته خخخ.. ويش اسمه..
رؤى شبت حريقه..
ــ وانــــــــــي ويش دلاااني..
ــ زين شوي شوي .. ويش فيش عصبتي.. خلاص باي باي وموفقين..
ــ باي..
روان..
ــ اووف ويش فيها هذي ..
ــ ويش دلااني..
ــ بيني وبينش كلما جا ليها تخترب.. ما عادت ايمان الأوليه..
ــ أي والله افاا بس افاا...الله يستل عليها بس تعبنا ننصح فيها و لا يفيد..
ــ اييييييه خلها على الله... ويييين هالقاانووون
ــ اهوووو فالقي بسسس

وانتهى اول يوم .. بتوتر وخوف وقلق..
وبعد اسبووع ويومين..... وما باقي الا يومين اضافه لهاليوم وتخلص الإختبارات..
ــ الصلااااة خير من النووم... << مسجد قريب بيت فاضل..
رؤى .. وجنبها دلة شاي وعيونها متفقعه وما كان عليها صلاه وتعبانه حددها.. قامت تصيح..
ــ والله ما نمت.. تهي .. والله صعب الفيزيا ليش خلوا الكيميا اللي ذاكرته يوم سبت .. تهي تهي.. يالله ساعدني..

رائد اخوها كان مذاكر الفيزيا من قبل وما ذاكر الكيميا.. بس سوى زين...

بعد نص ساعه ..قعد رائد من النوم للصلاة وبيراجع .. مر على رؤى.. لقاها قاعده على الأرض.. وحاطه راسها بين ركبها.. وكفوفها على راسها وتحت ارجولها فارشه جريده فيها اسئله للفيزيا واجوبه.. وقاعده تقرا..
ــ رؤى.. ما نمتيي؟؟؟
رؤى بصوت تعبان ومبحوح
ــ لااا..
ـــ حراام عليش ارتاحي شووي ويش فايده مذاكر بدون راحه.. قومي نامي لش ساعه.. تالي بقعدش..
رؤى ساكته.. ما شاف رائد الا عالجريده دموع تطيح..
راح لخته.. رفع راسها لقى عيونها منتهيه .. ومبين على وجهها تعب مو طبيعي..
ــ قووومي يلعن ابو النسب والإختبارات.. ما تسوى عليش بتموتي.. ما يصلح لش .. كفايه عليش فيش جي سكس بي دي << فقر دم فولي.. ,, وحامله سكلسل وسهر وقلة اكل ولا شرب بهالشاي.. قومي عااد.. على شاني..
قومها ... وسدحها على سريرها.. وغطاها...
ــ ماني ناايمه ما خلصت...
قام يطبطب عليها..
ــ نامي ساعه بس صدقيني بقعدش تالي وبراجع وياش عالسريع اللي ما خلصتيه..
ــ احللف بس ساعه..
ــ والله العظيم.. يللا ريحي..

ريحت رؤى ساعه.. وجلسها رائد بعدها.. على طول قامت..
وصار يراجع وياها بسرعه.. وعطاها ملخص قوانين كاتبنهم هو للجزئيه اللي ما خلصتها .. واستانست به .. وصارت تصيح.. وهو يهدي فيها .. ويضحك عليها..

وعدوا هالإختبار.. مع بعض الثغرات من رؤى بسبب التعب... وكان رائد يوديها الصباح وترجع الظهر مع باص..
وفي الباص .. ما قصر السواق دار برؤى ذاك اليوم من طياحة الحظ .. الفريق كله.. واخر وحده وصلها.. نزلت وهي تترنح.. وراسها داير.. لا اكل ولا نوم... دخلت بيتهم... وفي الحووش...طاحت مغمى عليها..

الى اللقاء بالحلقه القادمه..