ماعرفتوني .. كثر .. ما عرفني ..

[Princess]

في بيت فاضل ..
ــ الوو .. اهللين لوانووه.. اخيللا لديتي..
ــ هلاا فيش .. كنت اسبح جتني النومه صراحه..
ــ أي والله اني كلما جتني قمت بعد اغسل وجهي .. ابغى اخلص اليوم الكيميا كله وافتك .. على شان تالي يوم امتحانه ما استخف..
ــ يؤ يؤ اني عكسش ابدي مواد الحفظ احفظهم عدل توحيد وفقه والباقي على شان يومهم اريح واعوض نووم..
ــ والله فكله.. بس اخاف اني ما يمديني تالي الكيميا صعب خايفه منه..
ــ ذاكري اللي تقدري عليه والله يوفقنا ان شالله
ــ ان شالله.. أي بغيت اسأللش الملزمه المساعده تبع الأبله عندش..
ــ أي تبغيها..
ــ لا عندي بس في صفحه ناقصه ما ادلي شلون صفحة 13 انسخيها لي بالسكانر وارسليها على ايميلي اوكي غناتي..
ــ اوكي .. ولا يهمش..
ــ تسلمي.. الا ويش اخبال ايمانوه مهي مبينه لول تفقع لاسي بمسد كولات واللحين ابد..
ــ والله علمي علمش هالبنيه عاد تبغيها تهتم .. يوم الإمتحان بتشوفيها في حضني روانوه اشرحي لي هذا بسرعه وهذا ويش وذاك ويش..
ــ خخخ أي والله اشوى ما اعلف اشلح اني شان ابستخف
ــ ويش عليش .. مرتاحه..
ــ خخ المهم غناتي لا تنسي الورقه وبالتوفيق
ــ اوكي ما بنساها .. وموفقين جميعا ..
ــ يللا باي ..
ــ بايات..

رؤى في بالها..
ــ اوووف متى تجي الإجازه.. متى اخلص هالهم.. ويلي واااايد باقي اسبوع على الإمتحانات.. ومتى تطلع النتايج ومتى اشوف النسبه وويش ممكن تدخلني << ما كانت حاطه في بالها ولا شي .. على حسب النسبه.. على قولتها ما تبغى تحلم وتخطط وتالي تنصدم.. أي شي.. والسلام..
ومتى بنسااافر الله السفره حليووه بيروحا معانا ان شالله فارس وام حسين ...

طلعوا من المجمع.. وطلعوا البنتين وراهم..
رائد..
ــ لا اله الا الله.. فارس لا تلومني اذا فصخت نعالي وصفقت هالذبانتين اللي ورانا هاا.. وربي مافي كرامه .. انا اول مره تمر علي بنيه كذا .. عادة الولد اللي يلاحق..
فارس ..
ــ خخ بالمقلوب بالمقلوب يازمان العجايب..
ــ انااللي الحين باوريهم العجايب..
ــ طنش هاا.. هم بنات.. صرختين يلموا عليك العالم.. وتطلع انت الغلطان..
ــ مو هذي المشكله .. اووف يلعن هذي حاله..
ووصلوا السياره..
ريهام..
ــ حليووين بس سيارتهم قررعه..
ــ اسكتي مهي سيارة رائد هذي سيارة الكحلي تبعش .. رائد سيارته بنتلي تهبل..
ــ وانتين ويش دراااش ..
ــ مو اقول لش اعرف اخته.. هادا ويش هالصاقعه..
ــ تعرررفي اخته.. علينااا.. ويش دخل اخته بنوعية سيارته..
ــ انشبي لا اصفق وجهش بهالشنطه اطير ضروسش
ــ بـــــــــل مافي تفاهم ابد..

وما مداه رائد بيفتح باب السياره الا ..
ــ لو سمحت ..
ما التفت وبضجر ونفسه بخشمه..
ــ نعم..
ــ لا بس ابغاك تسلم على رؤى ..
رائد من سمع طاري اخته على لسان هذي اختلع..
ـــ نعم..
ــ سلم عليهااا...
فارس صار مبهووت... هذي بعد تعرفها رؤى.. بــــل ويش هذاا...
ــ رائد .. وبالله اقول ليها مين...
ــ قول ليها ...

والى اللقاء غداا

اسألكم الدعاء