ماعرفتوني .. كثر .. ما عرفني ..

[Princess]

سكر الجوال .. وصار يطق فيه على فخذه...
ــ افففففففففففف
فارس ..
ــ أي والله افففففففففففف << قالها من قلب مقهووور ومتحسر...

وشوووي .......
الا جوال رائد يرن.. ووجهه تهلل ونور..
ــ ابوي ابوي..
وعلى طول رد..
ــ هلااا يبه ..
ــ هلا فيك..
ــ من متى وانا ادق عليك وابد مافي ابراج كل مقفل..
ــ والله هههههه انا صدفه داق عليك بسألك عن خالك وولد خالتك وولد عمك ما بشرتني عنهم.. ونسيت اسألك الظهر ..
ــ هههههه الحمدلله حيدر اخذ الأول.. وحسن بعد .. وحمزه الثالث..
ــ الحمدلله والله كفو ترفعوا الراس.. ويش كنت تبغى متصل..
فارس فاتح عيونه ويترقب ويدعي يارب يارب..
رائد وهو فارد البوز شبرين من الفرحه..
ــ لا بس بنستأذنك بطلع ويا امي واختي.. وام حسين وفارس ,, وحيدر ويمكن جدي ومرته.. بنروح البحر.. اذا ما عندك مانع.. واذا ما عندك مانع بعد بنروح بسيارتك.,..
ــ ااه يالخونه بتروحوا عني.. احح .. روحوا عليكم بالعافيه..
رائد كسر خاطره ابوه بس يبغى يطلللع..
ــ مشكوور يا اغلى ابو في الدنيا ونعوضها لك ان شالله قريبا
ــ هههههههه اصغر يهالك تراشيني.. عليكم بالعافيه روحوا واستانسوا وانتبه بالسواقه.. واي مكان في وناسه لأمك واختك وديهم لا تتردد اذا ما لقيتني ارد.. رجال انت وانتبه ليهم...
ــ ان شالله يللا يبه تسلم.. في امان الله
ــ في امان الكريم..
رائد قفل الجوال..
ــ يسسسسسسسس بنروووووووح..
فارس يصفق رائد كفك..
ــ ياهوووو ....
حيدر يطالعهم ..
ــ هههههههههههه الحمدلله العقل زينه يمدحوه ترى..
رائد..
ــ ماالت عليك ويش عرفك انت.. روح بس اسأل جدي وامك بيروحوا..

دخل حيدر البيت لقى امه تلبس دلاغها" جواربها" يعني استعداد لطلعه..
ــ احم.. كحح... اا.. بتطلعي اماه..
ام حيدر وهي تدخل رجولها بالدلاغ تطالع في حيدر..
ــ أي لويش تبغي شي..
ــ لا بس ما تقدري تأجلي طلعتش..
ــ لا لويش..
ــ قلت جان تروحي معانا البحر انتين ويا ابوي..
ــ ما تأجلوها لمره فانيه..
ــ لا ما اظن انتين اماه اجلي طلعتش,,
ــ لاااا.. اني ما اقدر ما خططتوا الا توكم.. جان قلتوا قبل.. الحين من متى المره ولدانه.. وكل يوم يكلموني الجيران بيروحوا ليها واقول ليهم غير هاليوم .. يالله لقيت فرصه اليوم بعد ارجع اتفشل لالا.. روح انت واستانس... شوف ابوك اذا بيروح بعد روحوا.. اني باروح لأختي..
ــ على راحتش..
راح حيدر يدور ابوه فوين..
لقاه بالمجلس ونايم..
ــ اففف نايم ابوي.. شكله نعسان مره واحنا فزعناه خخ.. شكلي اطلع لحالي عادي مهم غريبين.. الا اختي وبنتها.. يللا خيرها في غيرها يبه.. راحت عليك.. << قالها لأبوه بهمس وهو يدق ايده تحيه...

طلع حيدر..
رائد يتعيلف فيه..
ــ حشاا حشاا.. انحلت قضية فلسطين وداروا للعراق.. ماااا صاااارت ..كل هذي مشاورات..
حيدر يسوي بيده حركة مالت.. ويوجه كفه على وجهه..
ــ هه.. مالت علي وعلى وجهي.. امي بتطلع وابوي نايم..
فارس مات من الضحك..
رائد يهز برقبته يمين وشمال..
ــ توتوتوتوتوتوتو... لا حوووول.. افااا... يللا امي مثل امك عادي عادي..
حيدر..
ــ استناك تقول يعني.. ادري .. يللا بتروحوا متى..
رائد
ــ الحين اوووه نسيت من الفرحه ما دقيت على امي .. الحين يللا ويش ورانا...
حيدر ..
ــ زين دخيل الله ابدل هالدراعه بتضايقني في البحر.. زين..
رائد وهو يدق على امه ما مداه يرن رنه قفله..
ــ هييييييه تعااال لا تقول بتتسبح.. سبوحتك سنين اهل الكهف بتعطلنا..
حيدر مكشر حواجبه مو طايق ..
ــ لااا بسبح بس ما بطول.. والله والله صدقني..
رائد..
ــ باشوف انا والله لك عشر الا خمس دقايق.. الا انت طالع ..لا بنروح عنك..
ــ حشاا.. ويش هذا.. لا ربع ساعه على الأقل..
ــ زين ربع..
فارس..
ــ لويش تعجل الصبي.. وديني انا بيتنا بعد ابغى اتسبح...
رائد..
ــ اه جت المغرب.. في احد يتسبح ويروح البحر..
فارس يضحك..
ــ ايه انا <<< لغاية في نفس يعقوب خخخ
ــ انا لا انا متسبح ولا شي.. ببدل ثيابي بس.. يللا اجل حيدروه روح .. وانا بوصل فارسوه بيتهم.. وبروح بيتنا...
فارس..
ــ ما تدق على امك.. << ما ينسى ,,,
رائد..
ــ اووووه نسيت....
وكلم رائد امه.. اللي راحت على طول تقعد رؤى..
ــ رؤى رؤى امي قومي..
رؤى تغطي راسها بالبطانيه وصوتها كله نووم..
ــ مممممم... ويش صاايل توني نايمه ما مداني..
ــ علي ياعلي صار لش ساعتين ونص تووش..
ــ شوي بس شوي..
ــ قومي مافي وقت بنروح البحر
رؤى من سمعت طاري البحر رفعت ايدها بسرعه والبطانيه عن وجهها.. وفتحت عيونها..
ــ هاااا صدق...
ــ أي قومي بسرعه..
رؤى طايره من الفرحه..
ــ الله من زماااااااااان ما لحنا.. بس خسااله ابوي مو معانا
ــ قومي بسرعه بلا هدره وعاونيني..
ــ امي ام حسين وينهي ... لا تقولي لاحت..
ــ لا بيروحوا معانا امش ام حسين وفارس وحيدر..
ــ حلكات... << ابتسمت ابتسامه خفيفه,, فرحت يوم درت ان فارس بيروح وياهم.. بس دايما تتجاهل هالإحساس في قلبها..وتتجاهل وجود فارس معاهم,, وتحاول قد ما تقدر تكون طبيعيه..

قامت سبحت وجمعت الشكاليت" شكولاتات" اللي عندها في شنطتها.. فتحت جوالها الا ثلاث رسايل من حنين .. ثنتين خدمه من الجوال لأنها ما ردت .. ووحده من عند حنين كاتبه فيها..
ــ وحشتيني مالت عليش ياللي يا اسأل عنش والا ما تسألي.. تعالي بيتنا اليوم الليله ابغااش تتعشي وياااي... باااي..
رؤى..
ــ خخخ يؤ بتذبحني...
دقت رؤى على حنين ..
ــ اهلييييييييين صح النووووم..
ــ صح الله بدنش ههههههه ويش فيش ...
ــ ولا شي واحشتني يللا تعالي ..
ـــ خخخ باالوووح البحللل
حنين انصرعت..
ــ وييييييييش لالاااااا.. مااافي ماني ماااني ابغاااش الليله تتعشي وياااي..
ــ وي على عملي ليلة الجايه..
ــ ليلة الجايه جمعه واحنا وانتون كل واحد في بيت جده..
ــ أي والله صدق خلاص خيلها بغيلها...
ــ ماني ماااني انتين لا تروحي .. وحشتيني حرام عليش..
رؤى في بالها وسواس عفوي.. .. مجنوونه اني بيلوح فالس ويانا وما الوح..
حنين تصرخ..
ــ الوووووووووووووه ردي وين طرتي..
ــ هاااااااا .. ولا مكان اسمحي لي غناتي غيل هالمله بالوح اعاون امي بنجهز الأغلاض للطلعه باي يا غناتي..
ــ اوووووووف مننش باااي..
ــ اموواه لا تزعلي والله باجي لش بس غيل هاليوم..
ــ هههههههه دبه تعرف تراضي.. زين باشوف متى هاليوم فارقي.. عليكم بالعافيه..
ــ الله يعافيش باي..
ــ باي..
رؤى تررركض طياري لأمها.. وشاده الهمه وحوسه وتشيل وتحط.. الا بدخلة رائد..
ام حسين بالصاله منبطحه.. سمعت الباب انفتح..
ــ امي.. وصلتوا..
ــ أي هلا اماه..
ــ يؤ اجل وينا فارس..
ــ وصلته البيت بيسبح وتالي طلعتنا بنمر عليه...
ــ عطاك الله العافيه والله يخليكم لبعض يارب وما يحرمكم قادر يا كريم..
ــ الله يعافيش ولا يحرمنا منش يالغاليه..

رائد..
ــ اماااه.. اماااه..
ــ هلا...
ــ انا باروح ابدل خمس دقايق وبنزل .. يللا تجهزوا...
ــ يللا على خير...

خمس دقايق بالضبط نزل رائد لابس بنطلون برمودا بيج وقميص كاروهات نص كم الوانه حليوه.. وطالع كششخه
رؤى ..
ــ اف اف.. ويش هذا.. بتلوح نادي مو بحل.. ويش هالكشخه..
رائد وهو يضحك..
ــ كشخه على جرفلي ما تسبحت..
ــ ههههههه وعووه لويش..
ــ لويش ورانا شوي وحوسه.. رجعتي اتسبح..
ــ تسبح الحين ولجعتك..
ــ بـــــــل سااالفه..
ــ الا قطو..
ــ قطو وجهش خخخ.. خلصوا خلصتوا..
زهرا تطلع السلات والأكياس ..
ــ ايه ها حملهم السياره..
ــ تعالوا سيارتي ما تكفي بنروح بسياره ابوي قلت اله .. << سياره ابو رائد كيا كرنفال,,
ــ أي زين ما عليه.,...

تابع >>>

[Princess]

اخذ رائد سويش سياره ابوه وصار مع رؤى يحملوا في الأغراض ويرتبوهم..
رؤى ضاربنها فضوول وين فارس ومهي عارفه تسأل اخوها... وفي بالها,.,, لا يكون ما بيلوح..
ــ ااااا.. الا خالي حيدل وينهو << احم..
ــ خالش يسبح تعرفيه ....
رؤى في بالها..
ــ بل يجاوب على قد السؤال يا اخي كمل والثاني وينهووو...
ترجع تسأل..
ــ اااااا يعني طلعتنا بنمل عليه..
ــ خخخخخ ويش رااايش.. .<< رائد قاعد يحوس ويعدل الأغراض وباب السياره الخلفي" الدبه" مفتوح بس مو حده...
رؤى في بالها..
ــ ياااعلي هذا اللي بيلفع ضغطي.. اوووف ..
ورجعت تسأل..
ــ يعني بس هو اللي بيلوح ما بيلوحوا جدي ولا ملت جدي..
رائد رفع راسه بسرعه وصفق في الباب..
ــ اااه وصاقعه.. وانتين ويش فيش قرقر قرقر.. مستلمتني تحقيق من الصبح.. اححح يا راسي..
ــ بللللل ما يسوى علينا كم هالسؤال يا دافع البلا..
ــ لا تسألي اسكتي .. اصص.. اااح ,,,راسي والله.. هااداا ويش هالبنات..
ــ أي بنات اللي يسمعك شايف بنيه غيلي..
ــ لااااحووول الله .. اناااا لله,,, بتسكتي لو اشوتش برى..
ــ لا والله كوله حقك اني.. تشاوت فيني.. دب مالت عليك.. ماني معدله وياك..
ــ رووحي فرقاش عيد.. عاد اللي يسمع من فايدتش.. بس فقعتي راسي بالهدره.. ياااساااتر ..
رؤى تركته.. ودارت عليه .. وعطته كم بحلوس...
رائد وهو محمق..
ــ رووحي..

فارس قدام المرايا..
مره يحط على صدره البلوزه السودا.. ومره القميص الأبيض.. مره التي شيرت الأصفر.. وكل شوي حاجه ومهو عارف ويش يلبس.. لين طاحت عيونه على تي شيرت احمر عليه شخابيط بيضا.. ولبس معاه بنطلون جينز كحلي.. وعبى عمره عطر << حشاا مو بحر...
ويضبط بشعر هالراس.. وشعره طافره من سكسوكته قاعد يبغى يعدلها لو يقبعها..
ــ اففففففف ترى ما عندي جواال نسيت.. اوهووو.. الحين اظل انتظر متى يجي رائد...
راح التلفون.. ودق على بيت رائد.. رفعت رؤى..
ــ الو..
فارس من سمع صوتها .. في باله,,
ــ اااه.. دخيل هالألو انا..
رؤى ..
ــ الووو..
ــ هلا .. قوه..
ــ الله يقويك..
ــ كيف الحال.. <<< الأخ مستانس يللا بيسولف شوي..
ــ حياك الله..
ــ ويش الأخبار,,
رؤى بلهجه شوي قويه..
ــ نعم اخوي ويش بغيت..
فارس.. في باله..
ــ والله لو تحصلي لي طول العمر ما ابغى غيرش..
رؤى..
ــ اخووي نعم..
ــ الله ينعم عليش.. رائد هنا...
ــ اتصل عليه جوال... << زهقانه الأخت تنادي على اخوها من برى..
ــ لالا ما اعرف جواله.. و ضروري ابغاه...
ــ صفل خمسه خمسه... << قامت تمليه الرقم
فارس.. في باله..
ــ دخيل الصفل .. والخمساات انا...
ويرد عليها..
ــ لا لو سمحتي ما عندي صفر دولي وينهو طلع مو موجود.. << صدق ما عنده صفر دولي..
رؤى تفشلت حست انها مصختها..
ــ هو بلى في الحوش .. دقيقه اشوفه واناديه..
ــ اوكي

رؤى وهي متفشله طلعت لأخوها اللي توه مسكر باب السياره ومخلص ترتيب..
ــ لائد..
ــ نعم ويش عندش..
ــ بل بل يمه منك.. لا تاكلني زين... واحد يبغاك على التلفون..
ــ كان قلتي له يدق جوال .. غريبه مين المتصل فيني..
ــ ما ادلي بس صوته مهو غليب.. كنه مل علي..
ــ ليش انتين تفرقي كل شي عندش زي بعضه..
ــ فالق بس .. اكو ينتظل على التلفون..
ــ زين..

رائد...
ــ هلا..
ــ اهللين وينك يالدب..
ــ هلااا فارسووه خلصت سبوحتك..
رؤى من سمعت انه فارس.. ابتسمت وفتحت عيونها.. وصارت حمراا .. وفي بالها..
ــ بلللل يصقعني مله صلت نحيسه.. ولا كلما يقول حاجه .. اقول له حاجه...ويش هالفشله مالت علي..
فارس..
ــ أي والله ضايع بلا الجوال متى بتجوا..
ــ الحين دقايق بس ادق لك هرن اطلع..
ــ اوكي يللا بنتظارك..
سكر فارس السماعه.. ووقف قدام المرايا في مغسلة بحوشهم..
يعدل في شعره.. ويهلوس في باله..
ــ والله انا قمر.. اموواه.. بس لو تحن علي السماا.. كان اطلع اسعد كوكب.. ههههههه ويش فيني قمت اهلوس..

ركبوا السياره..
ركبوا كلهم ورى.. ام حسين وزهرا.. وينتظروا رؤى..
جت رؤى بتركب ورى وياهم..
الا رائد ..
ــ هيه هيه.. هنديكم عفر.. تعالي قدام..
ــ وتالي حيدل وفالس ويشوو..
ــ اذا رحنا لفارس انزلي ورا.. مافي الحين تخلوني كني الا هندي,,
زهرا..
ـــ هههههههههه صدق.. امي اركبي وياه قدام..
ـــ اوووف الكب الحين وانزل تالي..
رائد..
ــ حركينا...

ركبت رؤى.. وهي تحاتي النزله تالي قدام فارس... ووصلوا بيت فارس.. وما دق هرن لأن فارس كان برى ينتظر خبركم بيتهم في زرنوق.. طلع من الزرنوق وقام يتمشى.. لين يجي له..
رؤى من شافته من بعيد وهو لابس الأحمر.. ورائد يوقف عنده.. ويضرب له هرن على خفيف.. حست قلبها طفر مع دقة الهرن..

وقام يرقع رقع.. ويطق طق مو طبيعي...
شالت عيونها بسرعه.. وفتحت الباب..
فارس وخر على جنب..

رؤى وهي مرتبكه بالغلط تدوس على طرف عباتها.. وطاااااااااخ
تطيح على ركبها
فارس تقرب بسرعه منها ووخر .. مستحي..وقال ..
ــ بسم الله عليش .. تعورتي..
زهرا فتحت النافذه..
ــ وي امي.. تعورتي ..
وبتفتح الباب بتنزل ليها..
رؤى قامت ونفضت الغبرى وفي عيونها دمعه..
ــ لا .. ما تعورت..
رائد..
ــ شوي شوي.. هادا ويش انتين.. لو منتبهه.. هاذا حالش ويا الشدخات..
زهرا..
ــ استح على وجهك عاد اختك من دون شي منحرجه وتحرجها زياده..
رائد..
ــ اسف.. خلاص خلاص..
ركبت رؤى جنب امها وفيها صيحه بس كاتمتنها..
ام حسين..
ــ على عمري متأكده ما تعورتي..
رؤى ..
ــ لااا..
وركب فارس قدام..
عشر دقايق ووصلوا لحيدر.. دق عليه رائد ونزل حيدر يركض..
وركب السياره.. ورى جنب بنت اخته... وانطلاااق للبحر...

[Princess]

وبعد سويعات.. << الله عالفصحى..
وصلوا ..البحر...
نزلوا الحريم.. وصاروا الرجال يعدلوا يفرشوا وينزلوا الأغراض..
عدلوا كل شي وقعدو..
رؤى..
ــ خالي خالي..
حيدر..
ــ ياعيونه..
فارس في باله..
ــ اححح حركااات... متى اقول انا كذا بعد...
رؤى..
ــ قوم وياي ابغى اتمشى..
حيدر..
ــ مشينا..
وقام حيدر.. وقامت وراه رؤى..<< وقام وياهم قلب فارس,,,

رائد وهو قاعد وركبه.. مسوينهم على شكل حرف M ما شافه فارس الا يشلح بنطلونه البرمودا لفووق الركبه.. ويضرب فخذ فارس..
ــ مشينا..
ــ ويناا؟؟
ــ بنتمشى في الماي..
فارس شلح بنطلونه..
ــ مشينا..
ونزلوا في الماي.. ما تعمقوا بس غطو سيقانهم..
فارس عيونه تروح وتجي على حيدر ورؤى..
الا رشة مااي قويه جايتنه على وجهه..
ــ اححححححح... ويش فيك..
ــ خخخخخخ لا طلع طبيعي مو استشوار .. خخخخخخخ انت اللي ويش فيك.. سااكت .. وصار لك فتره احسك مخبي شي..
ــ ههههههه غربلك ربي غربال وهذي سالفتك ويا هالشعر بحلق عالصفر وارتاح.. هههههههه انا.. مافيني شي..
رائد وهو يحرك بحواجبه..
ــ علينااا << بس كذا يسوي روحه والا هو مو حاس بحب فارس ولا شي.لأن فارس اساسا مهو مبين ولا شي ...
ــ هههههههه ويش يالخبل.. على ويش..
ــ كحح اللي ماخذ عقلك يتهنى به..
ــ أي عقل.. الشغل ماخذ عقلي.. وتفكيري ..
ــ يللا ربك كريم ان شالله تنحل..
ــ ان شالله..

فارس من حبه لرائد.. وده يصارحه بحبه لأخته.. بس خايف يحس رائد ان اهتمامه به سببه اخته.. وهو..لا.. بالعكس .. ما يقدر يستغني عن رائد.. واخته اكلت قلبه وعقله.. وخايف بعد لو صارح رائد.. تصير روحته لبيتهم قليله وقعدته وياهم جميع تقل.. بيستحي حزتها وبيحس نفسه لو سواها ورائد يدري به بيصير قوي عيون .. وبيحس بعد ان رائد بيراقبه.. وان كان خويه ويحبه.. فلذلك سااكت.. ومخلي القلب بحبه يتعذب..

شويات .. اذن المغرب.. صلوا بالصلاة على محمد وال محمد..
واستعدوا للتشوية ..
قعدوا فارس يشك اللحم في الأسياخ..
ورائد الدجاج...
وحيدر يشوي..
حيدر يهف على الفحم بكرتونه وهو يتحنطب عليهم..
ــ كحح كح.. دبب عطوني اخيس شغله.. اشوي فحم وخياس هين بس..
زهرا ورؤى يقطعوا خضار سلطه ما مداهم يسووها في البيت ..
ام حسين متسنده.. ومن اشتمت ريحة الفحم..
ــ اححح.. غربلكم الله ذكرتوني بالقدو وايامه..
فارس..
ــ ههههههههه ويش امااه.. حنيتي له..
ــ هههههههه لا يقطع ايامه مرض وعوار قلب..
الكل قام يضحك على ام حسين <<< شكلها مع ريحة الفحم مسكينه كنها محشش ويحن لأيام الأدمان..
وبين ما رائد يشك الدجاج..
ــ ااااااوهوووووووو....... اوووووووووف......

والى اللقاء في الحلقة القادمه