طلع فارس وهو فرحان على حساب حيدر.. فتح باب الشارع
وشهق شهقه.. طيحت قلبه في بطنه

لقى نافذة السياره منشلخه شوي ومنزله لحدها.. فتحوا حراميه قفل الباب,, وباقوا منها المسجل وجواله كان حاطنه فوق على التابلن.. ونساه بالسياره... ومنبشينها فوق تحت.. ومعفسينها تعفيس..
راح يركض شاف مكان المسجل يا حلاته..فاضي.. قعد فارس على السيت ومفهي ويفكر فباله ..... وظل قاعد بالسياره وبابها مفتوح.. رجوله على الأرض ومتكي كتفه على الدركسون وكف ايده على راسه..

خمس دقايق.. عشر.. ربع ساعه...

ام حسين..
ــ يؤ .. ويش فيه فارس طلع يجيب هالريحان ولا رجع..
رائد..من طلع فارس قام هو الحمام..وتالي راح غرفته بيجيب كاميرته الفيديو عطلانه بعطيها حيدر كان يصلحها.. ..
ويوم رجع وشاف فارس لسا ما جا.. وام حسين تسأل عنه طول وهو برى..

بلا شعور رائد رمى الكاميرا على الكنب .. وطلع لفارس..
فتح باب الحوش بسرعه ولقى فارس بديك الحال.. راح له يركض.. وشاف الوضع وعرف السالفه...
رائد مهو عارف ويش يقول له..
حط ايده على كتف فارس...
ــ قوم يا اخوي .. حسبي الله عليهم.. انتقم الله منهم...
فارس ساكت.. ومفهي..
رائد..
ــ قوم فارس .. قوم الحين وان شالله يصير خير..
فارس.. بهمس وصوت تعبان..
ــ أي خير.. انا هالسياره ما جتني الا بطلعة الروح.. تخيل تفاجأت بأمي تجمع من معاش الشؤون من يوم انا صغير.. تخيل ريال على ريال.. هذي 10 سنوات وهي تجمع.. امي اللي بخلت على روحها بأشياء وااجد.. وكانت تشتغل بالتاوه والسف ليل ونهار .. تفاجأت بها يوم تعطيني المبلغ.. المبلغ اللي ظلت سنوات تجمع فيه وما جاب الا ثلاثة ارباع ثمن هالسياره ولو هي جديده ولو على الأقل موديل جديد ومستخدم.. ما عليه.. الا قديمه ومستخدمه.. باقي ربع ثمنها للحين ندفعه اقساط.. كل شهر نشيل من معاش هالشؤون.. وكل يوم يهددوا خلاص انا بلغت سن قانوني لازم اشتغل واشيل شوي.. وانا اراكض من وادي لوادي مو لاقي لي شغله.. ويش اسوي هااا.. الحين شلخوها.. وباقوا مسجلها.. وراس مالي الجوال .. وبحح.. ويش تبغاني اسوي.. اضحك.. هههههههههه ياقلبي وربي مانا داري ويش اسوي.. ويش هالحاله لمتى ,,؟؟؟ تعبت .. زهقت... وكل فرحه تطلع لي يتبعها سالفه تكدر علي.. ويش هالحظ المنتحس.. انا اسمي فارس هه انا الا منحوس الطايح حظه.. استغفر الله ياربي...

رائد ساكت وبالصدفه نظرته طاحت على سيارته .. اللي للحين يدفع اقساطها ابوه بس فرق كبير بينها وبين سيارة فارس.. حس بغصه وقهر على حالة خويه.. ما بيده حيله .. وحتى لو بيده.. فارس راح يرفض مليون بالميه..

فارس عيونه صارت حمرا و دمعاته تتناثر بلا شعور ..
ــ.. انا ويش اسوي والدنيا كلها واسطات هاا.. قول لي ويش اسوي.. ما بقى شغله ما قدمت فيها.. كل العمالات اجانب..و ما يبغونا احنا.. لويش يعني هااا؟؟؟ جعلني اشتغل براتب 1000 لويش بعد 500 راضي بها وقانع.. ولا هالحال وهالقعده.. لمتى امي شايله همي .. زهقت وربي .. لا اعمام يسألوا عني اذا ابوي ما يسأل ويش اتوقع منهم.. خوال ما عندي الا خالي حسين وتوفى رحمة الله عليه من سنين.. ولا حتى اتذكره.. ولا خالات ولا شي.. انا لو ما امي ام حسين كان ضعت .. وربي وانتهيت...
وحط ايده على وجهه وصار ينحب بهمس ..
مسح كفه بسرعه على وجهه.. ونثر الدمعات وقام وكفخ باب السياره وصوت مبحوح ومقهور..
ــ الريحان في السيت الوراني وديه لأمي ما عليك امر
رائد..
ــ وانت..
ــ بتمشى شوي بريح اعصابي..
وما مداه فارس بيمشي.. رائد وقف بوجهه.. وكلما فارس حاول يعدي.. رائد يعانده ويطلع بوجهه..
فارس حمق..
ــ وييش فيك.. مانا داخل روح ودي الريحان.. ابغى اقعد لحالي شوي فيها شي..
رائد مسك كتوف فارس..
ــ لا ما فيها شي.. بس انا ما اخليك لحالك لو ويش يصير.. وانت متضايق ..

فارس بعده مقهور.. حضن رائد وصار يضغط عليه ودمعاته عصيه .. ما عادت تنزل ..
رائد صار يهدي في فارس..
.. شي ربع ساعه .. الا بطلعة حيدر ليهم .. حيدر تفاجأ بنافذة السياره المكسوره.. وقف جنبها طالع داخلها درى انها انباقت..
التفت لقى فارس بحضن رائد وسكوون عجيب.. ما عرف ويش يسوي ..
لفت نظره الريحان اللي ورا بالزبيل.. فتح باب السياره وطلع الزبيل... وكان فارس عاطنه ظهره.. ورائد مقابلنه بوجهه.. رائد ابتسم في وجه حيدر..
فارس يسأل رائد بهمس..
ــ مين اللي فتح السياره بعد؟؟
رائد..يمسح على ظهر فارس..
ــ هذا حيدر بياخذ الريحان,,,

حيدر دخل وصل الريحان لأم حسين.. ويوم سألوا عنهم ويش يسووا برى..
حيدر..
ــ لا ولا شي بس في واحد برى يعرفوه وقاعدين يسولفوا وياه..
ام حسين..
ــ غربل الله شرهم واحنا خايفين عليهم ما يندرى ويش صار بهم
حيدر..
ــ يللا خيه بطلع انا توصي شي تامري على شي
ــ يؤ.. وين رايح..
ــ عندي مشوار بروح اقضيه..
ــ سلامتك سلم على ابوي وامك..
ــ الله يسلمش يللا مع السلامه
زهرا وام حسين..
ــ الله يسلمك..

طلع حيدر.. لقاهم قاعدين على عتبة الباب.. وساكتين..
حيدر..
ــ قوموا وياي..
رائد..
ــ وينا..؟؟
حيدر..
ــ نتمشى..
فارس..
ــ مالي خلق..
حيدر..
ــ مو .. على.. كيفك..
رائد..
ــ أي والله مو على كيفك.. مشينا..
حيدر..
ــ بنروح بسيارتك فارس..
فارس..
ــ تتمسخر مع وجهك.. مالي خلقك هاا فيني اللي مكفيني ..
رائد..
ــ حيدروه لويش النحاسه.. امش بسيارتك بس ما حركتها من الصبح من على باب بيتنا..
حيدر..
ــ لأ.. بسيارة فارس.. وانا اللي باسوق.. ولا ليكم شغل وين باوديكم..
فارس وهو معصب..
ــ اللهم طولش ياروح..
رائد..
ــ حيدروه بلا مصاخه هاا..
حيدر.. عصب ..
ــ اقسم بالله وربي ما اتمسخر قدامي يللا .. وانتون ساكتين .. واصص ولا كلمه..
فارس ورائد تفاجأوا.. اول مره يصير حيدر كذا.. ولا اصص ولا كلمه بعد.. شكله جاد.. وما يندرى ويش سالفته..!!!
رائد..
ــ امرنا لله .. بس وينا بتودينا..
حيدر
ــ مو شغلك.. تالي بتعرف..
رائد..
ــ يمه..والله استقويت يا حيدوور..
حيدر ماد كفه على فارس..
ــ اشوف عطني السويش..
فارس عطاه اياه,, وركب ورى ما يبغى يقعد قدام.. تسند على باب السياره اليسار.. ومد رجوله للباب اليمين.. وسند راسه على النافذه.. رائد جلس قدام مع حيدر...

تابع>>>