فارس يدخل..
ــ هاا هلاااا بففف هههههههههههههههه..
شكل رائد وهو متطلم بالشماغ رهيب ضحك فارس..
فارس :
ــ ويش هذا .. لويش كذا..
رائد :
ــ خربت سكسوكتي.. وتلطمت..
ــ هههههههههههه من صجك..
رائد يشيل اللثمه وهو يرفع حواجبه..
ــ لا افا عليك.. هاا شوف القمر بس..
فارس بثلاث اصابيع يدف راس رائد..
ــ خخ خبل .. قمر في عز الصبح..
ــ أي قمر انا على أي وقت..
ــ رائدوه..
ــ هااه..
ــ خخخ ووجعااه.. مادح نفسه.. ويش..
ــ اكبر صادق في العالم..
ــ اقوول.. ويش رايك بحركة شماغي..
رائد:
ــ حليوه وتناسبك بس انا ما ابغى كذا كنك بدوي. بس احح فله صاير قمر يلعن يومك...
كان فارس فارد الشماغ وماخذ طرفه الشمال وحاطنه على كتفه اليمين وصاير كاشخ..
فارس :
ــ خخخخخ قمرين صرنا هاا.. ما تبغى كذا.. اجل ويش تبغى.. تبغاها مطويه..
ــ ايه وتكون عدله مو نايمه....
ــ خلنا ندخل الحين فطست من الحر .. وفوق نتفاهم...

وهم داخلين.. رائد ناسي عمره انه معاه اخته وامه في البيت.. قال نايمين فما حب يسوي ازعاج ويقول ليهم فارس عندي..


رؤى طالعه من غرفتها واثر النوم مبين عليها ببجامتها.. حاطه على راسها فوطه صغيره تنشف فيها وجهها اذا غسلت.. قعدت من الصبح.. وراها حوسه اليوم حفلة تخرج اخوها وتبغى تسوي له حركتات..
الحمام كان مشترك.. غرفة رؤى بعدين رائد بعدين الحمام.. الحمام قريب للدرج.. وغرفة رؤى ابعد وحده عن الدرج..
رؤى تسمع صوت احد يصعد.. قالت اخوها يمكن.. طنشت وما مداها بتفتح باب الحمام..
الا تحس ظل احد وصل..
وتلتفت وهي مفهيه على الدرج.. تلاقي رجال طول بعرض ومتشمغ.. ولا انتبهت لرائد.. الا هو يقول ليها..
ــ يالله يالله...
رؤى مهي عارفه وين تروح من الخلعه غطت وجهها بالفوطه ودارت تركض واقرب لفه ليها غرفة رائد.. دخلتها وقفلت عليها الباب..فارس حس بإحراج وزخه العرق ..
ــ يا الله كله مني المفروض استأذن.. اقول يالله.. ياربي اسف وربي مو قصدي..
رائد وهو مرتبك ويبتسم ومهو عارف ويش يرد..
ــ لا مني انا ما عليك.. انا الغلط مني ما قلت ليهم.. انا اللي دخلتك مالك ذنب.. حصل خير..

رائد راح غرفة رؤى.. وجاب عبايتها.. وطق باب غرفته..
ــ رؤى.. رؤى..
رؤى ما تجاوب.. كانت متسنده على باب الغرفه وقاعده .. دمها ناشف وتهلوس فبالها... ويش هالموقف .. هاادي ثاني مله وهالمله اعظم,, يا الله .. هئ هئ ..
وصارت تصيح..
ورائد يطق ومقرب بوزه من الباب..
ــ رؤى .. خلاص حصل خير.. ما انتبهنا لش اصلا.. قومي افتحي الباب.. جبت لش عباتش..

صوت المفتاح يفر ويفتح ..
دخل رائد وعطاها العباه.. لقاها تصيح..
كسرت خاطره.. مسح دموعها..
ــ حقش علي خيه .. خلاص حصل خير.. فارس هذا.. مهو غريب تعودنا عليه..
وبلا وعي رؤى تحضن اخوها وتصيح..
رائد حاسس بإحراج اخته خبره بحضنتها من يوم هم صغار .. مهو عارف ويش يسوي وكيف يتصرف .. صار يهديها.. ولبسها عباتها.. وطلع قدامها..
طلعت وراه..
فارس كان قاعد على الدرج وعاطيهم ظهره.. ويوم طلعت رؤى ..
فارس..:
ــ اسمحي لي خيه.. مو قصدي .. انا اسف..
رؤى بصوت واطي..
ــ لا حصل خيل .. ما صال شي.. << قالتها وهي مختلعه وقلبها يطق ودمعتها طايحه..

دخلت غرفتها..
رائد:
ــ البسي مشمرش واذا بغينا نطلع مكان بنعطيش خبر..
ــ ان شالله..

قعدت رؤى على سريرها وقدامها المرايا.. صارت تطالع في روحها..
شالت العبايه .. وحطت الفوطه على راسها .. ووقفت .. وصارت تعاين شكلها يمين وشمال.. وفبالها..
ــ اففف افششل مع هالكشه وهالبيجاما....
وشوي ..
ــ ويش اخلف اني .. ياعلي والله متفشله.. هئ هئ..
قعدت شوي زين .. وتالي طلعت للحمام..

رائد مقابل فارس يعدل له شماغه..
فارس ..
ــ هاادا ويه انت... لا تتخشب خليك عادي..
رائد يرخي عمره..
فارس :
ــ انا لله عاد مو كذا ولا كذاك..
ويصير فارس يطوي الشماغ لرائد.. كذا حركه.. ورائد .. مو عاجبنه الوضع..
فارس ..
ــ صدقني سويها زيي.. لأنك تالي بتتحرك.. وبتحوس رايح وجاي .. وبتقعدعلى اعصابك اذا انها مطويه.. احسن لك لفها زيي والله اريح.. وكل ما طاح الطرف رجعه لورى..
رائد ..
ــ صدق .. هذا رايك يعني..
ــ صدقني ..

سواها رائد مثل ما قال له فارس..
وطالع في المرايا..
ــ والله ماشيه حليوه.. وتناسبني الحركه بعد..
ويدور على فارس بسرعه..
ــ بس عليك افف شي والله ..
فارس..
ــ عاد بتصكني عين على شماغ ..خخ ..
ــ بس تدري .. حرام مغطي الحرير..
فارس يصفق رائد..
ــ هههههه وتاليتها ويا هالحرير.. والله ان قرعت لو صار لي شي بخبق عيونك..
ــ ويش تقرع .. انا اشوف كلما هدرت عليه زاد حلاه..
فارس يمسح ايده على شماغه..
ــ سترناه وخبيناه.. بالصلاة على محمد وال محمد..
ــ اللهم صلي على محمد وال محمد.. تف تف..
فارس يمسح وجهه..
ــ وصاقعه ويش هذا رشاش.. غسلت وجهي..
ــ ههههههه عن الحسد مالت عليك..
ــ ههههههه ماي ورد ماي ورد..
رائد..
ــ بدق على حيدوور الحين تلاقي امه على راسه وتكشخ فيه..
فارس ..
ــ هههههههه غربلك الله.. تدري نسيت انه يدرس بنفس مرحلتك راح عن بالي والله..
رائد وهو حاط سماعة الجوال على اذونه..
ــ خخخ مسكين خالي كان تخرج هادي سنتين.. بس احسن .. حلاوته وياي ..
وشوي يرد حيدر..
رائد ما عطاه فرصه يقول الو.. على طول هجم هو قبل ..
ــ الووووه..
حيدر..
ــ هوووه .. هو هووووه.. هلاااا قووه..
ــ يقوويك.. ها قعدت من النوم..
ــ اووه من زمان.. وخلصت لبس.. شغلت السياره احميها..
ــ بلل.. ويش بتسوي بتروح الحفل من فجر الله بتعدل الكراسي والطاولات.... احنا بنفطر تالي بنطير..
ــ خخ مالت عليك.. لا انا طالع بدبر لي فطور باشوف لي بوفيه والا شي جوعان....
ــ يؤ يؤ غريبه امك نايمه ما قعدت فطرتك..؟؟
ــ خخخ ايه نايمه عن المسخره مع وجهك..
ــ عجبا عجبا.. زين وابوي ابو كرار بعده ما غير رايه..
ــ لا ماغيره يقول ويش لي بهالسوالف ما فيني شدتها.. نايم هو بعد..
ــ خخ اجل ولي امرنا فويرس..
ــ حركاات.. أي اكبر واحد فينا.. ولي امرنا..
فارس..
ــ وجع سووني شايب.. وشوو ابوكم..
رائد..
ــ خخخخخ سمعته حيدر ويش يقول..
حيدر ..
ــ ههههههه ايه ويش فيه حمق هذا الواقع..
فارس..
ــ تلاقوا زيي ولي امر.. كاشخ كذا..
رائد..
ــ لا يطيح وجهك بس..
حيدر ..
ــ هااه .. اناا..
ــ ههههههه لا اقصد اللي وياي.. يعني الحين انت طالع بتفطر..
ــ ايه تعالوا معاي..
ــ خلاص اسبقنا وشوف أي مطعم ودق علي بس توصل وجايينك بالطريق....