فارس :
ــ هاا اتفقتوا..
ــ يسسسس
ــ على وااات
ــ الليله مزرعه .. ياهووو..
ــ ويلاه طفشااان حدي ..
ــ خلاص الليله سهره حلووه .. ونروح الطفش..
ــ بس تعال امي ام حسين ويش ..
ــ وشو ويش خليها ويا رؤى ..
ــ تنام بدري هي ما بطول..
ــ فارسووه.. انا وشو بالنسبه لك..
ــ ههههههه وشو يعني .. اخوي..
ــ اجل انثبر وامك هي امي .. خليها تبات مع رؤى..
ــ لااا..
ــ لويش لاااا.. ويش بيصير يعيني..
ــ خلاص اجل على راحتها هي خليها تبات وانا برجع البيت على راحتي..
رائد رافع حاجب وحاجب..
ــ ومين قال لك بترجع البيت..
ــ لويش ببات في المزرعه..
رائد حمق :
ــ هــــــــذاا اللي بيجيب لي الجلطه.. توك تقول اخوك.. بات مع اخووك يا اخي..
ــ هههههههه طيب اشوف افكر .. ولو اني ما اظن
رائد يصفق فارس على خفيف ..
ــ يللا قدامي .. ما باقي شي على الصلاة ننقلع المسجد يللا..
ــ ههههههه يللا مشينا..
راح رائد لأمه وخبرها بخطتهم الليله .. زهرا استاانست عدل من زماان ما قعدت مع ام حسين وفرصه هالليله .. ووصت رائد يقنع فارس يقعد وياه ..

وطلعوا رائد وفارس ..


بغرفة رؤى المعركه قايمه.. كبت ثيابها معفوس فوق تحت.. تدور على لبسه كشخه ونعومه لحفلتها.. وتلبس وتفصخ.. وتركب وهي رايحه.. لين حصلت اللي يناسب ..
سبحت وطلعتها من الحمام اذن المغرب وصلوا .. وشويات بعد ساعه تقريبا ..

جرس بيتهم يطق...
وصلت خالتها تهاني .. حامله باقة ورد كبيره وكيس فيه حلويات.. رؤى استقبلتها وبالأحضان.
ــ عقبال ما نفرح فيش عروس يا بعد عمري..
ــ الله يخليش خالتي تسلمي ..


في بيت رضا جيران فاضل ..
شذى " 20" سنه :
ـــ سمرووه ويش فيش بعدش ما جهزتي .. قومي .. يللا وباخذ البلوزه الكحليه اللي عندش ...
سمر "27" سنه:
ـــ مالي خلق ويش باسوي اخذي اللي تاخذيه.. وين كوثروه خلصت لو لا
ــ كوثروه ما بتروح ويانا بتطلع مع خطيبها.. كوثر "23" سنه..
ــ اهاا .. يعني .. واني مالي خلق اروح..
ــ وانتين كله مالش خلق مالش خلق .. اروح لحنين احسن لي .. بااي..
ــ بااي وصكي الباب وراش...

سمر.. البنت الكبيره لمريم ورضا.. كانت بنت حبوبه ومرحه واخلاقها حلوه مره.. بس صارت ليها قصه نكدت عيشتها.. كانت تحب ولد خالتها .. اكبر منها بسنه.. بس ما احد يدري بها.. وانصدمت انه حاط عيونه على اختها كوثر وحابنها له.. فخطبها,, وهي ما حبت تبين موقفها .. انقلبت 180 درجه.. حاولت قد ما تقدر تتناسى.. الكل مفكرها تعبانه وغيرانه ليش اختها اللي اصغر منها انخطبت قبلها.. وهي لا مجروحه من داخلها ومداريه جرحها بالقلب.. تحاول قد ما تقدر ترسم الإبتسامه وتصير عاديه باليوم اللي يجي فيه خطيب اختها.. الحمدلله هي قدرت تتناسى معزته عندها .. بحكم انها لازم تعقل روحها انه مو ملكها ولا بعد ملك اختها .. دوم تعيش في صراع مع تأنيب الضمير اذا جا على بالها.. وتحاول قد ما تقدر تكسر هالأوهام اللي بنتها في خيالها وعاشت فيها.. بس كانت اغلب حلولها لهالمشكله هي العزله والوحده.. ياما وياما امها جلست معاها وصارت تهديها وتقول ليها ارزاق وقسمه ونصيب وويش فيها لو ظليتي لعمر 27 بدون ما يخطبش احد.. بنات وايد مثلش وعايشين.. امها تفكرها زعلانه لأنها تمشي بطريق العنوسه.. ما تدري بالحزن الدفين بقلب سمر ..


شذى :
ــ الله حنينوه.. حليوه هالشبيصه بابوقها,,
ــ ههههههه خبري بسمروه ام الشبابيص اخذيها حلالش..
ــ شووكرررن.. تناسب لبستي .. خليني اطلع كشووخه..
ــ خخ لا تخافي مافي حريم كبار الا امي و ام رائد ..
ــ وويش دخل الحريم الكبار..
ــ يعني كان هاا تعجبي وحده منهم وتخطبش لولدها..
ــ هبله لو تستهبلي علي.. صحيح انش ما عندش سالفه..
ــ يؤ يؤ يؤ نسيييت انش محجوزه لولد عمي امجد.. السمووحه.. << قالتها بنبرة مسخره..
ــ ولويش تتمسخري .. لا تنسي مره ثانيه..
ــ خخ لويش اتمسخر .. تقولي زي الصاله لو الكرسي .. << قالتها وهي مغطيه وجهها خايفه تكفخها شذى.. احم اكرمكم الله محجووزه .. خخ صار لش كم سنه..
شذى تتدلع على حنين:
ــ من جمالي وحلاتي خايف اطير منه .. حجزني .. صاله وكرسي الش انتين مو اني..
ــ ههههههه الله لا يبلاني بحجز ولا غيره.. خلصينا تأخرنا...

طلعوا حنين وشذى كاشخين..
مريم :
ــ وين سمر ..
شذى وحنين يكشروا وجههم ..
مريم :
ــ اهااا عوايدها اللي ما بتتغير ..
راحت مريم لسمر فتحت الباب لقت الغرفه ظلمه...
ــ سمر امي .. ويش فيش..
ــ مافيني شي نعسانه ابغى انام بس..
ــ ما بتروحي ويانا .. ويش ينومش هالحزه الساعه 8..
ــ لا ما بروح راسي يعورني ونعسانه..
ــ زين على راحتش .. الله يهديش..
وسكرت الباب ..
سمر ضمت مخدتها :
ــ الله يهدييني ,, وصارت دموعها تصب..
شوي بعد ربع ساعه.. الا كوثر تطق الباب ..
ــ مييين.. << قالتها بنبره طفش وقهر عنييفه..
كوثر بلعت ريقها وفبالها .
ــ بل شكلها معصبه..
ــ ميييييين..
ــ هاا .. اني ..
ــ ويش تبغي ..
فتحت كوثر الباب بهدوء..
ــ ممكن ابغى بلوزتش الــ
ـــ اخذي اللي تاخذيه .. لويش انتين وخواتش خليتوا شي .. ورثتوني بالحياا
كوثر من سمعت سمر تقول كذا ونبرتها مقهوره وشكلها معصبه..
قالت بهدواه ونبرتها مخنوقه :
ــ اسفه على الإزعاج.. خلاص ما ابغاها..
وسكرت الباب ...
سمر حست بتأنيب الضمير .. وصارت تصيح وتعاتب نفسها..
ــ ليش كذا.. ويش ذنبها اختي.. ويش دراها هي.. اني لويش كذا .. افف ياربي زعلتها والحين بتطلع مع خطيبها .. اني نحيسه وما احس..

قامت من سريرها.. وغسلت وجهها .. وراحت لغرفة كوثر .. لقت الباب مردود.. وكوثر قاعد على سريرها وحاضنه مخدتها ومغطيه وجهها بالمخده..

وقفت على راس اختها وحطت ايدها على كتفها..
ــ كوثر.. غناتي .. اني اسفه..
ما شافت الا كوثر قايمه وحاضنتها .. وابتدوا مشوار صياح ونياح..
لين هدوا .. تنشطت سمر .. وراحت غرفتها ساحبه اختها بيدها.. وفتحت الكبت وخلت كوثر تختار اللي تبغاه.. واستشورت شعرها وحطت ليها ميك اب خفيف..
كانت سمر فنانه وايدها مره حلوه..
كوثر من الفرحه مهي عارفه ويش تقول كيف تشكر اختها..
قامت تصيح.. وسمر تضحك عليها :
ــ لا تصيحي سيحتي الكحل..
وكوثر تضحك ودموعها تسيل .. كوثر في قلبها كاسره خاطرها اختها .. تمنت انها انخطبت قبلها بس هذا الحظ والنصيب وامها وابوها قالوا ليها ما يصير بعد اذا رزقش جا الش ترفضيه على شان اختش ..

شويات جا خطيب كوثر وطلعت معاه.. وظلت سمر لحالها في البيت ..

في بيت ابو رائد طبعا الهيصه قايمه.. لعب وضحك.. وونااسه .. والكل يبارك لرؤى تخرجها وتفوقها...
رؤى تسألهم الدعاء الله يوفقها بإختباراتها وتجيب النسبه الزينه ..
ام حسين فرحت رؤى بحركه ذكرتها بأيام الطفوله .. سوت ليها قلادة ريحان ورازقي..
وحنين غاارت الا تبغى وحده.. وسووا ليها ..
الضحكه عامره المكان والدعاء بالتوفيق للجميع ..
وشويات الا جرس البيت يدق ..
حنين :
ــ يؤ مين هذا.. قلي لخوياتش؟؟
رؤى:
ــ لا اصلا اني ما ادلي بهالحفله.. حفله عائليه هي .. مين هذا..؟؟
حنين .. :
ــ يمكن اخووش..
ــ لااا اخوي طلع مع فالس..
ــ مع فارس والله حركات..
رؤى تطالع حنين على جنب :
ــ ويش الحلكات .. مهي جديده كل ويا بعض ..
ــ أي حركات.. كشخه ..
ــ ويش الكشخه..
ــ انهم اخويا..
ــ اقول حنينوه ما عندش سالفه .. بقوم اشوف مين اللي عالباب..

رجعت رؤى تركض لحنين ..
ــ حنينوووووه خمني خمني مين الي جااانا .. احد ماا تتوقعيه... هههههههه هذاا الحلكاااات ...
حنين :
ــ ميـــــــــــــــن..؟؟؟!!!

والى اللقاء في الحلقة الجااايه ..