وصلوا البيت .. وزهرا شافت الضربة بجبهة رؤى ..
ــ ويش هااادي ..؟؟ من وييش ؟؟
علموها السالفه .. اختلعت المسكينه .. وما يحتاج السوالف اللي تسويها الأمهات اذا سمعوا خبر كذا ..

رؤى واقفه قدام المرايا تحوس في الضربه .
ــ ايي تهي تهي .. حلاتها ما تلوح ليوم حفلة تخلجي

وبتغميضة وتفتيحه ..
رؤى عند المرايا ..
ــ تهي تهي وجا يوم حفلة التخلج.. وبعدها هالضلبه ما لاحت ..

لبست وكشخت الحفله كانت في العصر .. وكل شوي تحط بوجهها شي وتمسحه تبغى تخبي اثر الضربه ..بالأخير نزلت شعرها على جبهتها على جنب .. واشوى على حالها كان ناعم فصار شكلها كيوت مره ..

شويات الا جايتنها حنين .. كانت بثاني ثانوي.. شرت ليها كرت على شان تحضر الحفله ..

خلصت رؤى متأخره شويات.. وطلعت خذت كيسين واحد فيه اغراضها شال التخرج والقبعه وعباية التخرج.. والثاني فيه خرابيط ورود وكروت وعفايس وعلبة المكياج...

وطلعت لرائد .. هي ويا حنين .. يبغوه يوصلهم الأستديو بعدين مكان الحفل .. وبعدين يرجع لأمهم يوصلها ليهم .. بعد ساعه...

وصلهم الإستديو.. رؤى مهي عارفه من العجله والربكه كيف توقف وكيف تقعد .. جننت المصوره .. وحنين ضحك عليها وتمسخر :
ــ خبله رؤووه هذي حفلة تخرج كيف لو حفلة خطوبها بتنتف المصورة شعرها ..
رؤى تكتفي بالبحاليس كالعاده..

خلصوا تصوير وتأخروا واايد .. دقت رؤى على رائد مره ومرتين وعشر ..

طلع الأخ مخلي جواله في السياره ونزل يشتري له حاجه من المطعم ذبحته الدواره من الجوع << كنه هو اللي يداور مو السياره .,,,
شاف المكالمات ..
ــ بل بل .. 23 مكالمه .. علي ياعلي .. الا سندويشة شاورما وغرشة بيبسي الا نزلت اشتريهم ..
ويدق على رؤى وهو يحط السندويشه في بوزة
ردت عليه :
ــ الووو وينك ؟؟
ــ انووه احم هاداانا الهين ممممم باجي ..
ــ يؤ اخووي ويش فيك مين اللي خانقنك .. << قالتها بنبرة مختلعه
ــ كححح ..هههههه ..كح كح غربل الله شرش .. أي خانقني اكل كح كححح..
ــ ههههههه صحه صحه .. اشلب مااي ..
ــ كح كح .. زين سكري قتلتيني ..
ــ هههههه زين بسلعه تعال باي ..
ــ باي كحح ..

ويرفع رائد غرشة البيبسي بيشرب .. ويتذكر كلام اخته ..
ــ كحححححح كح كح ههههه كحح
ويطفر بيبسي على جامة السياره ..
ــ اوهوو كح كح ..غربل الله شرش .. كح كح احححم

ويمسح بالنشافه وحالته حاله .. ويتأخر شويات ياكل وهو يسوق ..
رؤى :
ــ وي اخوي سكلت الجوال وهو شلقان .. كان ما صال فيه شي بس ..
ــ لا ان شالله دقي وشوفي

ما مداه الجوال يرن الا رائد راد عليها ..
ــ ثواني واطلعي ...
طووط طووط طووط
رؤى :
ــ ههههههه اشوى ما صال له شي..

وصل رائد وطلعوا .. ركيض متأخرين وحالتهم حاله ..

ويوم قريب يوصلوا الا رؤى شاهقه وضارب صدرها :
ــ تهي ماااااني ماااااااااااني ....



والى اللقاء بالجزء الجديد الباقي بكره تعبت .. احم