رائد هدت اعصابه ,,, وانكسر خاطره على فارس مره.. صار كلام عبدالله يتردد في مسامعه ... " منهو اكثر واحد شقيان .. منهو يستاهل اهتمام من اللي حولة وعطف عليه .."
عبدالله:
ــ يللا بطلع انا.. توصي على شي...
ــ وين بتروح..
ــ ولا مكان.. با.. اهايت في الشوارع .. ما احب قعدة البيوت.. خصوصا اذا في ناس عزيزين علي عاطيني طناش.. اطلع احسن لي ..
ــ هااا.. اجل بطلع ويااك...
ــ ههههههههههههههه .. لعن ام التطنيش اللي كذا.. يللا مشينا.. بس روح استأذن من ابوك اول..
ــ هههههه .. زين.. مشينا...
استأذن رائد من ابوه .. وطلعوا... وهم بالطريق شافوا علي ولد هادي.. عم رائد.. في سيارته.. ومعاه راكب امينووه... رائد من شاف علي ويا امين... فتح النافذه وطل براسه والسيارة تمشي يبغى يتأكد .. علي هذا.. واللي معاه .. امينوه صدق ...
عبدالله مستغرب من حركة رائد:
ـــ ويش فيك.. ماد راسك برى .. لا يكون بس ترسل سلام للي ما يتسمى..؟؟
ــ مين..؟؟
ــ خخ مين بعد.. اللي لعنت سيارته حضرتك تشمخ..
ــ هههههه .. امينوه.. ايه.. بس لويش ما تقول اسمه..
ــ خذ لك .. وايه بعد.. يعني تعترف ترسل له سلام .. هااا.. اعود انزلك عنده.. يللا حاضرين..
ــ يؤوو .. لاااا.. انت ما فهمتني .. انا اقصد امين صحيح بس اقصد علي اكثر.. مستغرب ويش جمعه وياه.. وبعدين صدق لويش ما تقول اسمه خخ
ــ ما اشتهيه.. ينطرى على لساني.. ومين علي هذا؟؟؟
ــ هذا ولد عمي .. تخرج من الثانويه.. هذي 9 سنين وكل ما يدخل وظيفة طلع لو طردوه.. مو عاجبنه العجب...
ــ بلل .. صدق من شاف بلاوي الناس هانت عليه بلاويه.. من 9 سنين هذا يعني عمره تقريبا 29 ..
ــ خخ ايه...
ــ ولا عرس...؟؟
ــ لااا.. اهله مهم معرسينه لين يقعد بوظيفة ويثبت نفسه فيها ما يبغوا يبلشوا بنت الناس وياه..
ــ خخ لا حول الله.. بس تعال دورت راسي ... مو ابوك اكبر واحد
ــ ايه اكبر من عمي هادي بسنتين بس ..
ــ يؤ.. وشلون .. عرس عمك قبل ؟؟
ــ هههههه ايه عرس قبل.. يقول ابوي كان يحن يبغى بنت عمه خايف لاتطير.. حجزوها له وعمره 15 سنه... وتالي قامت الناس تهدر .. فمن صار عمره 18 عرسووه خخ.. وابوي ما عرس الا وعمره 23 وبعدين ابوي وامي ما جابوني على طول تأخروا 10 سنين كذا.. يعني كان انا المفروض اكبر منك خخ يمكن 25 سنه.. مانى شاطر بالحسابات لا تدوخني
ــ ههههههه الله.. لا اجل الحمدلله .. خلك اصغر مني.. انت هالكبر وانا مو قادر عليك... شلون تصير اكبر ..
رائد يطالع عبدالله على جنب :
ــ ويش قصدك..
عبدالله يضرب راس رائد بعلبة النشاف:
ــ ولاااا شي .. لا تتحسس بس لينا...
ــ ايه فكرت بعد...
ــ خخ لا تفكر...
هدووء .. عبدالله يفرفر بالسيارة مو عارف وين يروح... عبدالله:
ــ الا لويش اختلعت يوم شفت امينوه ويا علي ...
ــ هههههههههههههههههههههههه..
ــ لويش تضحك..
ــ قلت اسمه .. قلت اسمه..
ــ ويشووو,,..؟؟!!
ــ امينووه .. قلت اسمه...
رجع عبدالله كفخ رائد بعلبة النشاف:
ــ ههههههه حسبي الله عليك .. تتصيد علي هاا.. لكن لوريك....
ــ اجل اللي ما يتسمى هااا..
ــ هههههه.. خلاص عاد.. صدق لويش اختلعت..
ــ ما ادري .. مع انه علي يعني رايح فيها .. بس مو زي امينوه .. علي فاشل بس امينوه داشر صايع اغبر...
ــ تدري خخ يمكن علي ما صار فاشل الا من مجالس امين وربعه..
ــ شكله.. ما علي منه... لو هو ولد خالتي وريته شغله..
ــ ههههههههههههه شمعنى..؟؟
ــ لااا .. بس خالتي الكبيره اكثر شي انا مع ولدها.. عكس عموميتي تدري عمي هادي عنده ولد قدي اسمه حمزه .. وخالتي الكبيره ما عندها بعد الا ولد وقدي اسمه حسن.. بس انا مع حسن اكثر .. عمي ما يزورنا وايد ولا نزوره من ماتوا جدي وجدتي.. قبل لا انولد حتى.. وحنا ما نشوفهم بالسنه الا بالأعياد.. غير خالتي الكبيره .. حسن اشوفه وايد .. بس حتى هو .. مو مره معاه ...
سكت رائد شوي وصار يضحك...
عبدالله :
ــ ويش فيك.؟؟؟.
ــ ههههههه.. لا بس عندي خال .. كله وياه صفقه .. اكبر مني .. عمره 11 سنه تقريبا .. لو تشوفه خخ تقول اصغر مني ..
ــ اهاا قد فارس يعني ..
سكتت رائد ... وفي باله <<< يا حنا يا هالفارس ..
عبدالله لاحظ عليه :
ــ هااا .. ويش قلنا ..؟؟
ــ خخ ولا شي .. ايه بس فارس اكبر بسنه ..
ــ هههههه والله .. طيب ليش طشونه؟؟
ــ ايه صغيرون وضعيف .. والدب ما يكش ولا يهش ..
ــ ههههههههه ... حش حش بس فيه ويش وراك
ــ عادي طيب ..
ــ ههههههه .. غربل الله شرك..
ــ ويش رايك نمر عليه اعرفكم على بعض ... اذا ما عندك مانع..
ــ افاا.. انا يصير عندي مانع .. ولا طلب بعد من رائد .. افا علي اذا قلت لا.. مشينا .. احسن لينا من المهايت ... وين بيتهم ..
ودلى رائد عبدالله على بيت جده,, نزل رائد ودخل بيت جده .. لقى خالته في الصاله .. دخل سلم عليها .. :
ــ هلا رائد ...
ما مداه بيركب لحيدر يشوفه .. الا مرت جده تناديه بطريقة عجيبه ..
ــ تعال تعال تعال ... ارجووولك ... عسى ما فيها رمل بس .. توني منظفه هاا...
رائد وقف وما دار ليها .. هذي سوالفها المعتادة يا دافع البلا .. وبملل شديد رد عليها :
ــ لااااا.. علي جوتي مو نعال بعد .. ما تشوفي الشراب .." جوارب " << "دلاغ" على قولة ديرتي ام الحمام...
ــ ولو .. شراب يمكن فيه شي ..
ــ يــــــــــــــااااربي .. فيه مجاري .. بواليع .. دست حافي .. ويع رطوبه .. بملي فرشكم كله .. زين
ــ صدق قليل ادب .. تعــــــــااال .. اطلع واني بانادي لك على حيدر .. يللا ..
رائد دار عليها وهو محمق ونفخ في وجهها..:
ــ افففففففففف .. معقده...
ــ معقد انت .. يا طويل اللسان .. اطلللع ..
رائد سلم امره لله .. ما يبغى مشاكل يدري بها مريضه .. ما مداه يوصل للباب الا ابو كرار دخل ..
ــ هلاااا .. وسهلاااا.. مين عندنا .. رائد .. هلا حبيبي هلا ..
وانحنى له يبوسه ..
ــ هلا يبه .. قواك الله ..
وباس راس جده ..
ــ يقويك .. ويش اخبارك من زمان ما شفتك .. ويش اخبار امك وابوك ..
ــ الحمدلله بخير..
ــ وين بتطلع ..؟؟ وين رايح ..
ــ لا بس كنت جاي بانادي حيدر بطلع وياه مع عبدالله ..
ــ اهاا .. عبدالله ولد محسن ,, اللي ساكنين بأخر الفريق .. هذا هو اللي في سيارته برى ..
ــ ايه .. لويش تعرفه ؟؟
ــ ايه ابوه اعرفه .. والله كبر الولد وصار رجال ... ها ناديت على حيدر
ــ لا ام حيدر قالت لي اطلع برى هي بتنادي ..
ابو كرار رفع حاجبه ..
ــ اهاا ,, ام حيـــــــــــــدر .. قلت لي ...
ام حيدر على جنب تسمعهم لسا ما صعدت لحيدر ..
ابو كرار :
ــ رائد اصعد فوق انت .. ونادي على حيدر ... واي وقت تعال ,, وسوي اللي تبغاه ..
رائد طالع في ام حيدر نظره المنتصر الفرحان ..
ــ ان شالله يبه .. الحين اركب ...
وعناد في ام حيدر سوى حركه حرقت اعصابها .. فصخ شرابه ونفضه .. وقال وهو يطالع في أم حيدر ..
ــ حرر.. بخلي جوتيي هنا برى .. وشرابي باخذه .. امي تغسله .. وبتسلف نعال من عند خالي ..
ابو كرار فهم مغزى ولده الملسون ومات عليه ضحك :
ــ سوي اللي يريحك يا ولدي لو تبغى نعالي اخذه ..
ــ هههههه افا بس مو قدي ..
ــ هههههههه حسبي الله على شرك ..
وركب رائد الدرج وهو يصفر .. وام حيدر محمقه طلع دخانها من القهر ..
ابو كرار دار عليها وهو معصب بس يكلمها بهداوه :
ــ وتاليتها وياش... عقدتينا وعقدتي خلق الله .. قلت لش باوديش المستشفى يشوفوا لش حل .. اهون من هالعذاب اللي عايشتنه ومعيشتنا فيه وياش..
ــ ما فيني الا العافيه .. الواحد اذا يحب النظافه سويتوه هوسي .. اما عليكم كلام مو طبيعي ..
ابو كرار حمق ورفع صوته :
ــ هااا .. ويش اللي مو طبيعي
ام حيدر خافت :
ــ لااا ,, اني .. ولا شي ..
ــ ايه حسبالي بعد..
ــ لااا.. سلامتك ..
وفي بالها .. الا انت يبغى لك تروح الدختور... ياعلي شخاط..
طااااااخ ... << رائد اقتحاااام غرفة حيدر
حيدر كان يحوس .. في يدة اتاري خربانه .. مفتحنها والويرات حاله ...وبراغي وسكاريب ..
من سمع فتحه الباب .. يطير السكروب من ايده ويصفق الجداار :
ــ وصاااقعه ... هدا ويش انت .. خلعتني ..
ــ هههههههههههههه .. اسمع .. هع هع هع .. خلعتك ..
ــ ايه .. وطيرت الفكره من راسي بعد..
ــ الله يالمخترع والمفكر الخبير ... ويش براسك ..
ــ كنت افكر ليش اليدة خربانه .. صرت احوس فيها وفي وايراتها .. وخطرت في بالي فكره التصليح وانت طيرتها مع الخلعه ..
ــ هههههههههه مع وجهك .. قوم بس لا تصدق عمرك ... قوم بطلع ويااك بسيارة .. مع واحد فلته زمانه ..
حيدر يموت على الطلعات بسيارة .. ابو حيدر ما يسوق .. وطلعاته قليله .. عنده بقاله جنب البيت ويقعد فيها بعد ما تقاعد من شغله .. وحيدر يستمل .. الله رحم حاله برائد كل شويات يفاجأه بطلعه .. بس هالمره غير بسياره ..
طاار حيدر من الفرحه ...
ــ من هوو هالفلته ,,
ــ عبدالله ...
ــ أي عبدالله ..؟؟
ــ اللي تشابق ويا امينوه امس ..
ــ الله .. عبدالله ..داك الصبي الطويل الحليو .. مسررررع عرفته
ــ هيييييه . صلي على محمد ... بعدين ويش حليو وما حليو ..ويش تخربط ,, هاا ,, <<< رائد يغار .. خخ
ــ اللهم صلي على محمد وال محمد لا بس شي هالصبي صحيح فلته ..
ــ فلتوك في زباله وما طلعوك
ــ افا .. بتمسكها علي ..
ــ خخ امزح وياك .. يللا خلص اجهز .. وخل عنك القرقر ..من زمان عبدالله واقف برى..
ــ زين ..
وخلص حيدر .. ونزلتهم .. تعمد رائد يحفط برجوله قدام ام حيدر قبل لا يطلع ..
وهي بدورها ما قصرت فيه سبايب ... طبعا في عدم وجود ابو كرار معاها .. لأنها ما تتجرأ وهو موجود ..
ركبوا السياره .. سلم حيدر على عبدالله ..
عبدالله يوم يركبوا كان متكي راسه على الكرسي .. فما انتبه اليهم وهم يطلعوا من الباب .. انتبه يوم يركبوا السياره ,.. وحيدر صار بابه بجهة باب رائد على حسب وقفة عبدالله .. فمع كفخه الأبواب انتبه عبدالله ...
رد السلام .. ودار .. يشوف هالصغيرون ...
مسكين حيدر .. جت لعبدالله ضحكه .. خفاها بإبتسامه .. تبعها بقولة :
ــ اهلااا .. بخال رائد ..
شكل حيدر طشونه على داك الكرسي .. طوله متر و 25 سم .. وضعيف .. وعلية نظاره .. وشعره ناعم مغطي عيونه شوي .. مره صاير حاجه كتكوته صغيره مو صبي ابو 11 سنه ..
رد مع اقتباس
المفضلات