ماعرفتوني .. كثر .. ما عرفني ..

[Princess]

فارس منصرع .. ما انتبه من الخلعه ودورة الراس .. وفي باله ..
ــ الله يهديها من ايراااانيه لابسه لي مشمر اسوود مو مشجر .. ياربي شكلي ابتلشت..
ويتجمعو عليه الخلق ... ويجي له ولد الإيرانيه .. ويهدر ويصارخ فيه..
فارس وعيونه متورمه من الخلعه.. مو عارف ويش يقول ..
ــ اسف .. آآسف ... التماس عذر ..
ومتورط.. وشوي يرنه بكس من ولد الإيرانيه.. يورم له عينه..

فارس حمق وصار يصارخ انه مو قصده .. وتجمعو سوريين و زوار..<< اللي ما يشتري يتفرج


حوريه :
ـــ امايي ما تعبتي من المشي .. ما يندرى وين الميكرو حقكم واقف
ام حسين :
ــ لاا يا بتي .. ويش اسوي الكبر شين نسيت اني وينا هوو ..
سلمان :
ــ شكل السالفه أمعصلقه << باللهجة الدرازيه امعصلقة = صعبة..
حوريه :
ــ أي والله زحمة الخلق زحمة .. ولا ينشاف شي ..
شوي وهم يمشوو الا سوري يمشي وهو يسحب سحاحير وتحك في الأرض ..
حوريه :
ــ افففف دقرني دااا..
ام حسين مختلعه:
ــ يؤ دقرش .. قليل الحيا ,, تعورتي
سلمان ضحك:
ــ ههههههه امايي دقرني يعني حرقص ميازي << حرقص مزاجي
ام حسين :
ــ ههههههه ويش دراني اني يا ولدي .. خوب لهجتكم قريبه منا بس كم حاجه مو زيكم
حوريه :
ــ ههههههه واني اقول ويش تقولي .. وانتين صادقه .. بس امي تعودت وصارت تتكلم مثلنا وحنا بعد اذا رحنا بيت يدي كم كلمه نقولها قطيفيه ..

سلمان :
ــ صبرو صبرو.. شوفو جمعة اوادم مناك .. ما يندرى ويش سالفتهم..
حورية :
ــ شكلها هوشة
سلمان :
ــ دهدي بغدي اشوف ويش صاير وبرجع << دهدي = بسرعه بالدرازي ,, بغدي= باروح
حوريه :
ــ تعااال ما عليك منهم علطير يشلخو بدنك << علطير = علشان

الا بدخلة سلمان وسط المعمه .. وهو يصارخ ..
ــ تباعد انت وياه.. خلني باشوف ويش السالفه ...
شاف الإيراني متشابك ويا فارس والهدره واصله حدها..
فككهم ومسك فارس وصار يطالع فيه و ابتسم ..
ــ هلاااا خيوو انت فارس موو..
فارس متوتر وراسه داير :
ــ هااا ويش .. ويش صاير ..
سلمان: ــ انت اللي ويش صاير يا خوك و لويش تتضاربو..
فارس علمه بالسالفه عالسريع..
سلمان.. : ــ امك داهي ويانا .. شفناها..
فارس طار من الفرحه وجى بيطلع من وسط هالناس و
سلمان صار يتفاهم ويا الإيراني :
ــ متأسف اشتباهى غيرعمدى مادر مادر شبـيه... << آسف غلط غير مقصود..امه وامك يتشابهو
الإيراني :
ــ به دست آورده خوب << حصل خير ..
سلمان:
ــ خلاص انتهت السالفه لويش هالتجمع يللا كل واحد يتيسر لشغله..

فارس راح جهة امه ام حسين وحوريه..
ــ يالله يالله..
حوريه وخرت ..
ام حسين : ــ وي هلا امي .. هلا بعد ابوي .. هلا خلف شبدي ..
وانتبهت لعيونه المضروبه ..
ــ وي وي .. ويش بك يا بعد رووحي مسوى مين هالفعله ..
سلمان :
ــ هههههه مفكر الإيرانيه انتين وانضرب من ولدها..
ام حسين تمسح على وجه فارس :
ــ وي بسم الله عليك حسبي الله على بليس.. امش يا غناتي نروح الباص الحين يدورو علينا..
فارس :
ــ مشكور ما تقصر ياخووك رحم الله والديك والله صدفه خخخ بس اسف مهي ذاك الزود ,,طق وتشليخ وشباق ..
سلمان : ــ ههههههه رب شبقة على قولتك خير من الف ميعاد
شوي الا يسمعو رائد ينادي فارسوووووه
ويجي يركض ويوصل له وهو ينافخ من التعب ..
ــ انت ... هناا... وحنا ... ندووور ...
فارس :
ــ توني شايف امي ما مداني اتصل واخبركم..
رائد خذ نفس عميق : ــ اهلييين سلمااان هلا والله ويش هالصدفه ...
ويمد ايده ويمسكها سلمان ويشد عليها :
ــ هلا فيك احلى صدفه اللي خلتنا نشوفكم .. اخبارك انت
رائد : ــ الحمدلله بخير ..لاعاد صدفه ثانيه تجمعنا ,, لااا لازم نتعرف اكثر ونكون علاقات..
سلمان ابتسم : ــ وانت الصادق ,, يشرفني والله ..
فارس : ــ يعز مقدارك حياك ربي
اخذو ارقام بعضهم حق التواصل ,, ومشو...
اتصل فارس للبقيه وقال ليهم حصلو امه و رجعو الميكرو ..



حوريه : ــ هذا فارس ولد أم حسين .. هامن اللي اياه.. << هامن = مين هذا
سلمان : ــ خويه رائد ..
حورية : ــ اهااا .. زين يللا دهدي قريب بيأدن ادان المغرووب..
سلمان : ــ زين ويش تبغي بعد من السوق ..
حورية : ــ دقيقه باوايق على هالمحل فيه تحف حليوين حق روازن داري .. << روازن = رفوف
سلمان : ــ ما تشبعي انتين بيتكسرو في الطريق ..
حوريه : ــ اوهووو ويش فيك سلمانوه عاد باوايق وباشوف اني .. << باوايق = باطل طله
سلمان :ــ زين يللا ..
دخلو المحل ..
حوريه : ــ سلمان تعال هالديل طاولني هاديك باشوفها << هالديل = هالجهه
سلمان رفع ايده : ــ ااي ضابوعي عورني ... وينا .. دي .. عفر مهي حليوه..<< ضابوع = كتف
حوريه : ــ الا عفرااات .. هونت ما ابغاها .. ويش فيك سلامتك ..
سلمان يدلك كتفه : ــ الله يسلمش
طلعو من المحل .. ووقف سلمان عند محل ثياب رجاليه يقلب فيهم.. ومشى ولا اخذ شي..
حوريه : ــ حق ويه ما اخذت شي .. ما عجبوك..
سلمان : ــ لأ محلوسين << محلوسين= مبهدلين .. هطلان
وبعد ربع ساعه
سلمان : ــ اففف تعبت انا من المهايل ..خلي باقي الباقي لباجر <<< المهايل = المداور
حوريه فتحت عيونها : ــ طالع سلمان مناك مو هذا مرادووه
سلمان : ــ أي مرادووه..
حوريه : ــ هذاك الخنيتواه .. << الخنيتواه = اللي يحب قعدة الحريم
سلمان : ــ ههههههه خبرش فيه يوم هو صغير وحبه التلزق في الحريم والبنيات الحين تطور وصار دلعه هههههه اقول لا تغيري السالفه وقدامي باجر نكمل << دلعه = لا يكش ولا ينش ماله شخصيه ..
حوريه : ــ ههههههههههه يصقع دا تطور
وتتعثر حوريه وشوي وتطيح ويمسكها اخوها ..
سلمان : ــ هدااويش انتين ما تحطي بالش ..
حوريه : ــ ويش دراني عنهم ما يباحصو هالشوارع من سنين وهي مكسره << يباحصو = يعدلو
سلمان : ــ هههههههه الا حوبة مرادووه ..
حوريه : ـــ اللاااااي دقيقه سلمان .. شوف هالمفارش .. امي من زمان تبغى من هالنمونه باخذ جم واحد.. << النمونه = هالشكل
سلمان : ـــ اخذي اللي تاخذيه بس نخلص بسرعه..
دخلو يقلبو في المفارش.. والسوري لزقه ويهدر :
ــ شوفي هيدا ,., وكمان هيداا..
سلمان ساكت ويطالعه على جنب.. وقال :
ــ كلمني انا لو سمحت..
البياع : ــ انا آسف بس ما كان أصدي شي ..
سلمان يتحمق بهدوء : ــ قصدك لو مو قصدك
وصار البياع يطلع كم واحد .. وكان معاه بياع ثاني ما شال عيونه عن حوريه..
كانت حوريه ناعمه وعيونها زي الأطفال كلها برائه,, وحجابها كله عفه وستر .. بس عيون اولاد الحرام ما تتوب ..
سلمان لاحظ وحمق :
ــ هيييييييه انت ويش تطالع
البياع : ــ شوو شو في ..
سلمان : ــ هذا خويك بفقع عيونه ما يستحي .. امشي ما بناخذ شي ..
البياع :ــ أيـــــــــــــه بالناااإص
سلمان : ــ نقص عمرك قول امـــــــيــــــــــــــــــــــن
حوريه ساكته وخايفه وطلعت ..
سلمان يتحمق ويسب .. وهي خايفه وساكته .. وشوي قلب على حوريه وصار يصارخ عليها
حوريه جتها الصيحه وصارت تهدر ..
ــ اني ويش كااري .. << ويش كاري = ويش يخصني

في الطرف الثاني رائد والجماعه ركبو الباص وصارو يتحمدو بالسلامه لأم حسين .. ومشى الباص راجعا الى البيت...
رائد : ــ مين هذي اللي ويا سلمان..
فارس : ــ يصقع وجهك انتبهت .. ما ادري ما سألته,,
رائد : ــ مممممم شكلها خطيبته ..
فارس : ــ ويش مدرااك انت ,,
رائد : ــ شفته لابس دبله في ايده اليمين ..
فارس : ــ اللهم صل على محمد وال محمد.. اذا انتبهت للدبله ... ما الومك لو تنتبه للبنيه..
رائد : ــ خخخخخخخ بس اذا خطيبته .. ممممم شكلها صغيره عليه موو..
فارس : ــ شعليك منه ههههههه ياااربي صدق ملقوف ليش كم تخمن عمره ..
رائد : ــ مو اقل من 30 .. وهي شكلها اصغر مني لو بعمري << حوريه عمرها 16 سنه ..
فارس : ــ وييش عليييك .. بس تدري رغم الإبتسامه اللي في وجهه ومزحه بس شكله عالم اسرار و وراه حكايات وقصص ..
رائد : ــ ايييه .. عجبني هالرجال يللا هذا احنا عرفناه وطلع حفيد جارتكم ..
فارس : ــ يللا ايام الله جايه وان شالله خير ..

وصلو البيت .. و في الليل صارو يتناقشو .. وين يروحو يوم ثاني ... اقترحت رؤى الزبداني .. وراق ليهم الإقتراح... رائد :
ــ يباا... في واحد يصير حفيد جيران فارس طيب واخلاقي ومن الدارز .. خاطري اتعرف عليه اكثر عادي نعزمه ويانا ..
فاضل : ــ من عيوني عادي كلمن يعز عليك كم رائد عندي انا اذا على كذا نأجل روحة الزبداني لبعد بكره لين تدق على خويك هذا وتشوف علومه حق يجهز روحه ..
رائد باس راس ابوه :
ــ تسلم لي يا لغالي .. بروح اقول لفارس وبكلم سلمان..
فاضل : ــ الله يسلمك حبيبي..

راح رائد وطق باب المجلس على خفيف وطلع له فارس .. كانت ام حسين نايمه ..
علم رائد فارس بالسالفه .. وفرح فارس .. وحسوها فرصه حلوه يتعرفو على سلمان اكثر ..

لهذه الحلقه تكمله .. باكملها قريبا ... تعبتني في صياغة الأحداث خصوصا لهجة سلمان وحوريه.. ما حبيت تصير أي كلام لازم شي عدل و واقعي ..

[روحي في ذكراك]

تسلمين على الجزء الحلو

لكن بصراحة قصير مره

نستنا الجزء الجديد بفارغ الصبر

تحياتي

[غــــلا]

مشكـورة ع الجـزء ..

وننتظر الباقي ..

[فرح]

وااااااو صااار لي فتره ما طبعت لي بصمه هووووووون
بس من ورى الكواااااليس..متخفيه ..
بجد امـــــــــيره .....
جــــــــــزء رووووعه ..تسلمييييييين
ويعطيك العااافيه.
جااااري الانتظااار ..
تقبلي تحياااتي ..

[زهور الريف]

مشكورة يالغلا

جزء حلو مع انه قصير

بس مرررة ررررروعة

تسلم الايادي

[أسيرة الأحلام]

مشكووووره يالغلا على التكمله الحلوووه
وأحب أقولش أني كنت أتبع القصه من ورى لورىر
وعلى قولتهم من خلف الكواليس
وبصراحه كلمة مبدعة قليله في حقش

تقبلي مروري
تحياتي

[أمير العاشقين]

هلا خيتوو أميره
ماعليه خيه بتكلم بالصراحه ولا تزعلي من كلامي واسف مقدما
خيتوو بجد والله صاير كل اسبوع اذخل ولا اشوف جزء جديد
روودك هذا خيتتو يخلي الاعضاء تنقطع من القصه ويخليها بارده
لاحظي الحماس الكل متحمس له وانتي صرتي ما تحطي اجزاء مثل ما تعودنا
ان كانت ظرووفك خيه انصحك بان تختصري الاحداث لان كذا راح تخلي القصه بارده
ادري تذخلت في شي ما يعنيني
لاكن خيه اقول لش ليش
انا خيتوو بنفسي اقرا قصتك
واستنى الجزء حالي من حال الباقي
لاكن خيه انسي الاحداث وقسماً بالله اقراخا من اول اذكر احداث نسيتها لين اوصل لجزئك والله
خيتووو مو تزعلي بس والله بروودك وتاخيرك يخلي قصتك خامله ومافيها تفاعل
عذراً خيه على صراحتي والله على العين والراس وكنت ابي اقول لش من زمان
بس الشي الي منعني والله العظيم زعلك
اتمني خيتوو اميره ما تزعلي من وانا اسف ان كان جرحتك
بس والله خيه صرت انسى الاحداث
قصة طولت اكثر من قصة الاولي
احنى ما نبيك كذا تدرين ليش
لان نبيك تكتبي قصة ثالث ورابعه وخامسه
ما تقعدي في قصه وحده
امور بجد اتمنى ما تزعلي
بس قسم بالله كل مره اقراها من البدايه تدرين ليش عشان الهي نفسي
اسف ادري والله جرحتك بس خيتوو قلت لك بتخلي قصتك بارده
والسموحه من الباقي وخاصة اميرة المنتدى اميرة المرح
اخوك
جاسم

[Princess]

اليوم بنزل جزء واني مو لاهيه عنها بالعكس اكتب فيها
والله الشاهد انها الحين على شريط المهام اروح واجي عليها..
ادري مصختها وربي .. وهي همي الوحيد وشغلي الشاغل في المنتدى.. وابدا ما ازعل من صراحتكم وعلى عيني وراسي .. من الليله خلاص بدينا اجازه وراح ان شالله اخلصها قبل الرجعه للمدارس .. يعني ظرف اسبوعين بتواصل فيها ..

اعذروني ومشكورين لأنكم تحملتوني .. بس وربي الواحد يبدي ويش لو ويش .. غلطتي هي المفروض اخلصها كلها تالي انزل ليكم.. على هيك اذا في تجربة ثالثه.. يبغى لي سنه وتالي تشوفوها هههههه يصقع بليسي بدلع روحي ليه..

تسلمو مليون.. وابد خيو امير .. اميره ما تعرف الزعل .. وتعجبها الصراحه.. وكان هذا الكلام تعتبره جرح الي .. الله يخلي جروحي زيه كان تصير الحياه احلى واحلى... شكرا على التواجد

دمتم بحفظ الرحمن

[*زهرة البنفسج*]

يعطيك ربي الف عافيه اموررة اشدعوه اغيب كذا حوالي ثلاث اسابيع اقولل الحين جمعت كفاري اجزاء ليشش كذااااا

الله وناسه ابي اروح سوريا اهي اهي الله يعطيني يارب

رجعتي ذاكرتنا الي سوريا حركتات

موفقه

[سفيرة الاحلام]

مشكوره امير على الجزء

لاتطولي في الاجزاء واجد

[Princess]

راح رائد وطق باب المجلس على خفيف وطلع له فارس .. كانت ام حسين نايمه ..
علم رائد فارس بالسالفه .. وفرح فارس .. وحسوها فرصه حلوه يتعرفو على سلمان اكثر ..

فارس فرح وحسها فرصه من جد ,, دق رائد على سلمان..
رائد :ــ الوو هلا خيوو
سلمان : ــ اهلين وسهلين.. هلا وغلا ..
رائد : ــ اخبارك عساك بخير ..
سلمان : ــ بخير طول منت بخير الله يسلمك..
رائد : ــ الله يخليك.. ابو السلم بغيت اخذ رايكم في شي ..
سلمان : ــ تفضل حبيبي ..
رائد : ــ بعد بكره بنطلع الزبداني ويا الأهل .. ويش رايك تطلع ويانا مع اهلك فرصه نتعرف اكثر ..
سلمان : ــ والله .. حلو.. ههههه تسلم وما تقصرو .. من زمان ما طلعنا الزبداني ..
رائد : ــ خلاص خيو شاورو الوالد واهلكم وشوفو..
سلمان : ــ الله يطول بعمر حبايبك ابوي عطاك عمره من سنين .. اشاور اهلي وارد لك خبر..
رائد : ــ رحمة الله عليه .. اسمح لي يا خوك ما دريت ..
سلمان : ــ ههههههه بلا هالرسميات .. اكيد ما تدري ويش دراك.. عموما اشاور الأهل وارد لك خبر .. تسلم حبيبي ما تقصر والله..
رائد : ــ الله يسلمك.. يللا عساه خير ان شالله .. مع السلامه..
سلمان : ــ خير يا رب .. حياك الله..

سلمان هو الولد الكبير .. وما عنده الا اخته حوريه .. وامه.. قايم بهم وشايلهم..
توفى ابوه من سنين .. ايام ما كان يدرس بالجامعه.. ما كمل الدراسه .. بحكم انها تحتاج مصاريف .. طلع وصار يدور له شغل من مكان لمكان .. لين حصل شغله سواق ميكرو حق مدارس اطفال مع مجموعة باصات ..

سلمان : ــ يمه.. ما افادش تروحي الزبداني ..
ام سلمان : ــ ايه يا ولدي .. خبري بهالطلعات من ايام المرحوم ابوك يسكنه ربي فسيح جناته.. بس ويش الطاري هالمره
سلمان : ــ يالله يا كريم ,, بس جماعة شباب من القطيف تعرفت عليهم وبعد بكره يبغونا نروح وياهم اذا تبغو نروح بنروح..
حوريه : ــ منهو .. رائد .؟؟؟
سلمان ابتسم : ــ ايه رائد .. ويش دراش ..
حوريه : ــ يؤ اللي ضاعت جدته بالصالحيه كيفا بعد ويش دراني ..
سلمان توسعت ابتسامته : ــ بس فارس اللي ضاعت جدته .. رائد خويه..
حوريه : ــ يووو.. نسيت .. خربطت..
ام سلمان : ــ يا ولدي كيفا عرفتهم .. ناس اجاويد هم عاد لو لا ..
سلمان علم امه سالفة الجوال والصالحيه..
: ــ وترى ام حسين وفارس جيران جدتي ام ابرااهيم ..
ام سلمان : ــ صدق .. والله زين .. شوقتني يا ولدي اجل لشوفتهم..
سلمان : ـــ زين ويش رايكم الحين ..نروح وياهم
حوريه وام سلمان بنفس واحد : ــ إيـــه..

وجا اليوم الموعود.. اتصل رائد الصباح لسلمان حق يعرف في أي فندق ساكنين.. صدفة طلع قريب من فندق بيت عمه وجارهم رضا.. فإتصل بجاره رضا وعلمه بالسالفه ,, ووصف له سلمان وقال له بعد شويات اذا وصل لفندقهم بيدق عليه حق يستقبله ويركب معاه في الميكرو.. وتلاقو سلمان ورضا...
سلمان له محيا يشرح الصدر ما شالله عليه.. الواحد من يشوفه يرتاح له من بشاشة وجهه وابتسامته ,, يدخل القلب بسرعه.. وهالسبب كفيل لإرتياح رضا اله من اول لقاء ..
حمزة .. كان قريب .. وفي باله مليون الف سؤال .. مين يكون هذا.. عرف انه مو سعودي ,, بس ويش سالفته سؤال صار يدور في باله ..
وركبو الميكرو ,, جلس سلمان جنب فاضل .. وصارو يسولفو.. حمزه قاط اذونه ولقط انه جارة ام حسين تصير جدة سلمان.. فجته العله.. ناقص فارس حق بعد ناس تبعه,, ومن طرفه.. << ما كان يدري انه من طرف رائد..
رضا عجبه سلمان بالمره.. من جلسته وياه مشوار الطريق .. انطلق معاه بالسوالف و رغم اختلاف الأجيال ارتاح له .. لمح في ايده دبلة ,, وعرف انه خاطب وما حب يسأله لأنه واضح الأمر..
وصلو الزبداني .. دخلو احد البساتين.. ونزلو... واجتمعو يرتبو عمرهم النسوان في جهه والرجال في جهه.. ظل الميكرو داخل معاهم حق اذا احتاجو شي يطلعهم..

حوريه اندمجت بسرعه مع حنين و شذى و رؤى عاد حنين وشذى ورؤى ما يحتاج هدارات و مره وناسه ..بس لفت نظرها هدوء سمر و صاير فيها فضول
تتقرب منها وتعرف ليش هي مو زي خواتها ,, صارت تسولف وياها .. لاحظت ان
كلماتها كانت قليله .. ردودها وافيه وموجزه .. حزن في عينها يطغى عليه ويغطيه ابتسامه من شفتها..
سمر حبت حوريه ,, رغم ان بينهم فرق يقدر بـ 12 سنه تقريبا.. الا انها حستها ناضجه فكريا وعقليا.. ومهي مراهقه من مراهقات هاليومين..

حمزه انبطت مراراته يوم شاف سلمان صار ويا الجماعه.. وبالأخص رائد.. مع انه توهم يعرفوه.. وهو اللي يصير ليهم عاجز عن الإندماج وياهم..

ام سلمان ضرب سوالف ويا الحريم.. خصوصا ام حسين.. بحكم انها جارة امها .. وام حسين تذكرها ايام لول يوم هي صغيره وشباقها ويا حسين ولدها .. وتذكر ليهم مواقف حلوه .. رغم كبر سنها وخرفها المتزايد الا ان بعض من الذكريات ظلت محفوره..

الكل مستانس . راعي البستان شايب وطيب وحباب ... وبعد الغدى .. جت بنته.. ودخلت عليهم وهي حامله صحن مليان فواكه من البستان.. كان ابو كرار قاعد بصدر المكان.. جت وسلمت وحطته قدامه..
ام حيدر فتحت عيونها تطالعها.. كانت مره عاديه وشكلها كبيره بالعمر يعني في الثلاثينات,,
سألتها سؤال كله ريبه و فضول :
ــ انتين مرت صاحب المزرعه..
ــ لأ .. انا بنتوو..
ام حيدر من قالت بنته .. استلمتها اسئلة..
ــ متزوجه,,..؟؟

تابع >>

[Princess]

شوي الا بدخلة امها
البنت بنبره مستحيه وهاديه :
ــ لأاا.. ما حصل نصيب ..
امها تتدخل بعد ما سلمت وقعدت وياهم :
ــ أيه شو بدنا نعمل إسمة الله ما كتب لهالبنت تتيسر .. مع إنا كتير شاطره بشغل البيت ومرتبه ومربايه .. واخلاااأ لك تؤبرني
ام حيدر ولعت.. ويش قصدها دي بالوصف تعرض بنتها ..
ابو كرار ساكت.. وام حيدر تطالع فيه وودها تطفر البنت وامها برى ..
ابو كرار حس عليها.. فمن يوم قامو جى يبغى يقهرها << يموت في التعيلف فيها وقهرها..
ــ ام حيدر .. اقوول .. ويش رايش بهاا..
ام حيدر مختلعه وبريبه : ــ من هي ..
ــ البنيه .. شكلها شاطره والله.. ويش رايش .. لو اخطبها ..
ام حيدر بإنفعال : ــ لمييييييييين
تهاني انتبهت لمرت ابوها كانت جنبهم .. ضحكت :
ــ الله لا يروعش خالتي يمزح ابوي .. عاد ما تعرفيه انتين ..
ام حيدر : ــ مزحه يحرق الأعصاب ..
حيدر : ــ هههههههه اخطبها لي يبا..
ام حيدر : ــ ولعنه انت بعد.. ما تستحو.. اهووو .. << وكفخت وجهها زعلانه,.
شوي قامو البنيات يتمشو.. الا سمر ما قامت.. حوريه التفت :
ــ سمر ما بتقومي ويانا..
سمر ابتسمت : ــ لااا.. << تحس نفسها مهي من جيلهم تخاف ما ياخذو راحتهم .. دايما تفكيرها سلبي بخصوص هالأشياء ..
حوريه : ــ لويش عاد.. امشي ما يصير تظلي هنا قاعده ..
ابتسمت سمر .. وفرحت من قلب .. وقامت وياهم..
الشباب على جنب يتمشو.. رائد و فارس و حيدر و حسن وسلمان.. حمزه ما قام ما يطيق المشي وياهم طول ما فارس وياهم شولون وسلمان بعد نفر جديد ومعرفه وياه..
البنات قريب من شجرة تفاح . لفتت نظر سمر :
ــ الله شجرة تفاح.. بعيد لكن..
رؤى : ــ اقول لأخوي لائد ...يقطع لينا..
رنت عليه مسد كول على رائد .. اللي كانو قبالهم من قريب .. جاها وقالت له يبغو تفاحه وحده من الشجره..
رائد : ــ رفيعه ما اطالها.. بروح اشوف الشباب اذا واحد منهم يوصل
وراح ليهم يسألهم ...
فارس : ــ خخخ احملك..
رائد : ــ هههههههه وجهك .. سلماان انت اطولنا يللا قطع لينا تفاحه ..
سلمان : ـــ ويش يطولني اياها مو لهالدرجه.. رحم الله ايام قضب اللوز .. ما يجيني ابويي الا متعلق عليه..
ويحاول سلمان ويمد ايده ويقطع التفاحه بصعوبه.. وتجيه نخزه في كتفه.. تغير معاها ملامح وجهه..
فارس لاحظه : ــ خير سلمان ويش فيك..
سلمان ابتسم وهو يدلك كتفه :
ــ لا بس ضابوعي شوي ينخزني ..
حسن : ــ ضابوع .. يعني ويه..
سلمان : ــ هههههههه يعني كتف ..
حيدر : ــ تجنن لهجتكم تشبه لهجتنا شويات..
سلمان : ــ تسلم الله يخليك من ذوقك..

رائد اخذ التفاحه.. وغسلها في البركه.. وعطاهم اياها . وهو رايح ليهم طاحت عيونه بعين حوريه بالغلط.. ارتبك وغض النظر و بلا شعور صار قلبه يدق .. وحوريه اختلعت وغاورت وجهها عن ناحيته.. خذت رؤى التفاحه وعطتها سمر وشكروه...
رائد تصرفاته عفويه .. وكلها بحسن نيه... قال :
ــ العفو بس الشكر لسلمان..
ابتسمت حوريه بعفويه لطاري اخوها ...
رائد انتبه ليها ورجع غض النظر وابليسه يوسوس..
ــ اخته اكيد .. يمكن خطيبته و مسافرين وياهم والحين جت وياه البستان
ونادى سلمان من بعيد :
ــ سلمان يشكروك ..
سلمان ابتسم : ــ العفو .. ولو حاضرين..


حيدر وحسن تعبو راحو ياخذو ليهم غفوه..
سلمان اخذ سكين وصار يحفر على وحده من الشجر...
بعفويه رائد ولقافه .. معتاده ما تنتهي ..
ــ اوه اوه حركتات ويش بتكتب .. مممم اكيد حرفك وحرف الخطيبه مووو << قالها وهو يحرك حواجبه..
سلمان وقف حفر .. ابتسم ابتسامه تخفي وراها حزن عميق ... وبنبره خافيه ومكسوره :
ــ أي خطيبه..
رائد حس عليه .. ما عرف ويش يرد .. ارتبك وسكت..
سلمان صار يحوس في دبلته..
ــ شفت بيميني هالدبله فكرتني خاطب
..رائد وبنبره خافته :
ــ ايه صراحه ..
سلمان ابتسم ..
ــ لا .. كنت خاطب .. بس الخطيبه .. توفت من زمان.. ما كملت وياها سنه..
رائد حس بغصه وكسر بخاطره سلمان.. كان مره متغير ونفسيته تعبانه وهو يتكلم في الموضوع...
رائد : ــ الله يرحمها .. انا آسف خيي.. حقك علي ما كنت ادري .
سلمان ابتسم : ــ لا .. حصل خير يا خوك.. ويش دراك انت ..
فارس يسمع الحديث بصمت .. بصمت وبدون أي تعليق .. حس بضيقه بعد سماع هالسالفه من سلمان.. ومو قادر يتخيل رؤى ماتكون له .. وصار يتمنى يجي يومه قبل لا تصير من نصيب غيره ..
سلمان يكمل حفر .. كتب اسمه واسم رائد وحيدر وفارس وحسن على هذاك الجذع .. وسجل التاريخ..

بالطرف الثاني .. كانو البنات قاعدين.. السوالف قايمه
الا سمر كانت ساكته... حوريه كانت تراقبها.. الباقي متعودين عليها وعلى هدوئها..
حوريه :
ــ سموره ممكن اتلقف شويه..
سمر ابتسمت ..:
ــ هلا غناتي مافي لقافه ولا شي تفضلي ,,امريني ..؟؟
حوريه : ــ ما يامر عليش ظالم.. اشوفش كل ساكته ما تسولفي ويانا لويش ..؟؟
ابتسمت سمر : ــ ما اعرف اسولف
حوريه ابتسمت: ــ تصدقي خيه.. ذكرتيني بخطيبة اخويي سلمان.. كذا هاديه مثلش مره..
شذى : ــ حركااات اخوش الكبير خاطب .. حليو اذا الوحده عندها اخو اكبر منها ويخطب ويعرس وتصير عمه حركااات والله..

حوريه : ــ الله يرحمها كان يحبها وايد وما خطبها الا عن حب فيها ,, ما تت جاها السل الرئوي اللهم ادفع البلا عنكم وعن عمر حبايبيكم.. واعتزلها حق لا تعديه.. ومن يقرب ليها سوت له سالفه ,, كانت تخاف عليه .. وكان يتعذب وياها بكل ثانيه.. كسر بخاطري يوم ماتت وتركته.. ترك دبلتها بيمينه ما شالها.. الله يكون بالعون..
عم الصمت.. وشوي الا حنين تقترح... يلعبو لعبة الخشه .. وقامو يتوزعو والدور كان على رؤى تدورهم وينا هم ..

فارس كان تعبان.. وراسه داير .. قال لرائد بيروح يركب الباص بيريح في السيت اللي ورى ..
ركب الميكرو وراح اخر سيت .. انسدح عليه وكان فيه لحاف غطى روحه كاامل ..

رؤى بدت تدور المنخشات.. شوي لفت نظرها الباص .. الباب مفتوح وشافت ورى اخر شي فكرت فارس حنين منخشه..
ركبت الميكرو.. وراحت وبعفويه قعدت على فارس المغطى من فوق لتحت.. وصارت تثقل روحها وتفلص و تضرب :
ــ حنينوووووه قووومي
فارس حس من اولها ان احد قعد عليه.. استحى وارتبك..مو عارف كيف يتصرف .. وزاد الطين بلة صرخة رؤى مفكرتنه حنين..
رفع الغطى من عله وجهه وهو مغمض عيوونه بالقوه.. يبغى رؤى تنتبه انها غلطانه..


والى اللقاء..

اعذروني ما قدرت الونها صداع صدعت ولا حبيت امهل عليكم وما انزل .. الليله اكيد الجزء 51

[غــــلا]

مشكورة اميرةع الجزء

وبانتظار البقية

[**جوان**]

...

.. مـشكوره ..

.. خــيوووه على الجزء الروعــه ..

..ياربي على الفــشيله .. مــسكينه رؤى ..

..تــحيــاتـــي ...

[عازفت الاوتار]

هلا والله

الجزء ولعه جناااااااااااااااااااااااااااان

حرااااام سلمان كسر خاطري مسكين

وهم

روى مسكين فشلتها مو هينه

الله اموووووووووووووووووووووور ونااااااااااااااااسه

الليلة في جزء الله يابختنا

شكلنا بنرجع مثل ايام اول (الى اللقاء غداً) مو (الى اللقاء اسبوع القادمـ)

تقبلي مزحي

تحياتي

عازفت الاوتار