ماعرفتوني .. كثر .. ما عرفني ..

[نور الهدى]

الله يعطيك العافية اميرة



وتسلم يدينك



حلقة رووعه طالعه من بنت حبوبة مثلك



تفاعلت معها و قعدت اصيح معاهم


رغم اني ما ابكي امام احد بس لما قريت القصة نسيت حالي واولادي يطالعوني ويش فيها


وما انتبهت الا على نهاية الحلقة


ما حسينا بالوقت


الله يوفقش يار ب اميرة

وان شاء الله نشوف اسمك يلعلع في المجال الادبي

[Princess]

يسلموو جميع على التواجد الرائع
وتشكر اخي مربوش ياهلا فيك حياك الله من ذوقك

وتفضلوا الجديد

[Princess]

عبدالله رجع البيت .. لقى ابوه نايم.. دخل غرفته وقفل عليه الباب .. ارتمى على منامه.. حضن مخدته.. وسرح في ماضيه الأليم.... شوي الا جواله يرن...
رفعه .. لاقاه رقم ما يعرفه... رد عليه...:
ــ الو.. مرحبا..
ــ اسمع.. هالمره عديناها له .. وما اذيناه .. المره الجايه بتكون انت وياه..
عبدالله بحمق:
ــ مين انت؟؟ مين معاي ؟؟؟
ـــ اكون اللي اكون .. مو شغلك..
ــ يا جبان.. لو فيك خير قلت.. انت اكيد ابو مصيبه.. وهين بس يصحى فارسبسئله وانت طلعت انت اللي تعرضت له بوديك في داهيه..ولا تلوم الا نفسك...
ــ هههههههههههه .. نشوف ..
طووط طووط طووط
عبدالله مره متضايق .. قام يسبح .. يمكن الماي يخفف حدة توتره وضيقته..
الماي يصب .. وصوته وهو يرش.. والصدى.. ذكرة بالليله المشؤمه.. ليلة المطر فيها امتزج مع دمعاته.. ليله صار يسابق الخطوه ويتعثر يحاول يهرب من المصيبة.. ليلة انفاسه فيها انقطعت وروحه طلعت.. .. ..
ليلة.... دخل فيها على امه الولهانه الملهوفه على ولدها اللي تأخر,, ويجيها بعدين,, غرقان بدموع الخوف والألم.. قبل ما يغرق بماي المطر...



عبدالله مغمض عيونه.. الماي الدافي يحسه تخلل راسه لعميق حناياه.. سكر الماي .. وطلع.. هالدش اللي اخذه زاده هم وذكره اكثر واكثر...
لبس.. وشعره ما مشطه.. رمى نفسى على السرير جلوس.. وحط كفه على راسه.. وتخللت اصابعه شعره.. صار يحركها ببطء.. ببطء.. وعيونه مغمضنها.. يبغى كان ترتاح اعصابه.. شوي زاد السرعه .. لين وصل لحاله قام يضرب فيها على راسه...
انتبه لحالته..
ــ لاااا.. انا اكيد بستخف...
اخذ مفاتيحه.. طلع من غرفته .. تلقاه ابوه اللي سأله عن حاله.. وويش فيه.. ؟؟
عبدالله قد ما يقدر يحاول يداري الحزن اللي طغى على ملامحه.. بس عينه تفضحه.. ابتسم ابتسامه مثل الشبح.. مجرد ظل ..
ابوه خاف عليه.. لااا.. هذا مو عبدالله اللي اعرفه.. مو ولدي ...
ــ ابوي ويش فيك؟؟
ــ هااه.. هلا يبه.. لا .. ولا شي..
ــ شكلك تعبان.. فيك شي ؟؟
ــ انا... ايه.. شكلها بداية صخونه.. و زكام...
ــ اشرب لك دوا لا تزيد...
ــ ان شالله.. تامرني على شي يبه.. انا بطلع...
ــ لا سلامتك.. انا بطلع بعد .. اهم شي لا تنسى مفاتيح البيت .. نسختك خذهامعاك..
ــ ايه .. اخذتها.. يللا مع السلامة
ــ امانة الله وحفظه.. سوق على مهلك..
ــ ان شالله..

الساعه 5 المغرب ... ركب عبدالله سيارته.. متجه لهاف مون >> " البحر " " شاطىء نصف القمر"..
يبغى مكان بعيد بهالوقت ما يتوقع وجود احد يعرفه.. صار يسوق على اقل من مهله.. يبغى يضيع الوقت.. وصل هاف مون.. مع وقت اذان المغرب.. تمسح وصلى بالصلاة على محمد وال محمد.. وجلس على البحر...
ساعه بالكثير.. غابت الشمس وخيم الليل...
عبدالله جالس على الرمل.. قريب للبحر مره.. يسمع الموج ويزيده شجن شكل الأمواج وهي تتلاطم وصوتها الشجي.. سرح بعيد .. بعـــــــيــــــــــــــــد...

رجع به دولاب الزمن.. لطفولته البائسه.. للحادثه الأليمه.. اللي بعدها بكم سنه.. فقد اعز واغلى ناسه.. فقد الحضن الحنون.. سلوته في دنيته .. وعزاه ان تكالبت عليه الهموم...

يتذكر الرعب اللي صابه.. كان ثالث ايام العيد.. بعد صلاة المغرب.. الجو في عز الشتا.. عبدالله ابو 10 سنوات.. توصيه امه .. ينتبه لروحه بطلعته للبقاله.. ولا يطول.. لاتمطر وهو برى..

عبدالله فرحان حده.. بالعيديه اللي جمعها.. ومحتار ويش ياخذ بها.. قرر اول محطاته للصرف .. البقاله.. دخلها,, وصار يداور بين الرفوف .. وايده تتسابق وتلتقط كل شي نفسه فيه.. كل شي مشتهيه ومنحرم منه.. يحس العيد فرصه للتعويض.. كان مصروفه حده للأشياء الضروريه.. بحكم حالة ابوه الماديه وقساوة الظروف ساعتها..

عبدالله.. يحس بنظرات غريبه تطالعه.. رجال في العقد الثالث تقريبا من عمره... شكله مخيف.. من طريقة لبسه.. وعدم احترامه لمساحة المكان اللي عباها دخان من سيجارته..

وكلما تنقل الطفل .. من رف .. لرف.. لقى هالوحش قباله.. كان عبدالله مطنش السالفه.. وعالنيات.. ما فباله أي شي.. حاسب راعي البقاله.. وطلع..
وشائت الأقدار مع طلعته.. يطيح المطر..

لحقه راعي الشهامه الخبيثه.. والنوايا السيئه.. وابتسم في وجهه.. وعرض عليه توصيله بهالجو الممطر..

عبدالله وافق.. وركب معاه.. واكتشف بعد حين انه طاح بشباك احقر مخلوق على وجه الأرض.. مخلوق بلا قلب .. بلا روح .. و بلا رحمه..

وقف في مكان كله مزارع.. ونزل عبدالله البرئ.. اللي ايده كانت ماسكه كيس الحلويات.. ودخله بصندقه << " عشه" " كوخ خشب قديم" معزوله ومهجوره قريبه من المزارع..

عبدالله حاول يدافع عن نفسه ما قدر. صار يضرب بالكيس .. لين تنفر وتبعثر كل اللي فيه.. كيس الفرحه اللي ما تمت..!!

كان الخوف ماكل قلبه.. والشلل اصاب جوارحه فما عادت تحس..


يتبع >>>

[Princess]

تركه الحقير بعد فعلته الشنيعه بالصندقه.. عبدالله يرتجف.. اعتزل في زاويه.. وصار يصيح.. ويون ونين يقطع القلب..

وبالصدفه.. كانوا شلة شباب طالعين من مزرعه قريبه .. هونوا عن السهره بحكم المطر يطيح.. وكل ناوي يرجع لبيته..

سمعوا صوت الصريخ بالصندقه... نشفت ارياقهم.. ويبس دمهم.. وتقلبت الوانهم من الرعب ... اكيييد جني..

شوي سكت الصوت وصار هدوء..
>>>لااا الصبيان من دون شي سهرتهم اختربت بسبة المطره.. بعد جنانوه .. لاااا كملت..
ساعتها كل واحد نفذ بجلده هرووب ... عدا واحد.. كان الفضول ماكل قلبه...
هالصندقه خبرنا بها مهجوره من سنين.. ويش هالصوت اللي طلع منها..
استجمع شجاعته.. وقرر يكتشف ويش داخلها.. وبخطوات متردده .. قصدها..
كان الظلام مالي المكان.. مافي شي مبين.. ولع الصبي جواله وصار يستخدم ضواه كشاف.. وهو يحركه .. وصل لزاويه .. لقى فيها طفل يرتجف.. منكمش.. راسه بين ركبه.. وضام سيقانه بذراعينه.. ووضعه يكسر الخاطر بالمره...

الصبي خاف.. ويش سالفة هالطفل.. تقرب منه.. وهو يمشي داس على كيس بطاطس.. وفقعه..

عبدالله نقز من الصوت وصرخ صرخة واحد مرعوب .. نشف معاها دم الصبي .. وصار يحشر نفسه بالزاويه.. يحاول يحمي روحه..

الصبي :
ــ بسم الله الرحمن الرحيم.. مين انت؟؟ وويش اللي مجيبنك هنا هالحزه؟؟

عبدالله خايف.. ويشاهق,, ويحس نفسه مو فاهم ويش يقول هالصبي...!!
الصبي تقرب منه.. واختلع من ردة فعل عبدالله اللي صار يرفس ويصارخ ويرمي أي شي قريب منه تتطاوله ايده..
حاول يهديه .. مسكه حد ما عنده .. وكتفه....
ــ هدي .. هدي... خلااااص..
عبدالله يقاوم.. لين خلاص بادت قواه وضعفت.. وتحول صوت الصريخ الى صوت مبحوح.. انين .. مثل الطير مكسور الجناح..

انكسر خاطر الصبي على عبدالله.. في هالمكان.. وبهالليل وهالوقت.. وبهالوضع والحاله.. اكيد هالطفل صايبتنه مصيبه...

شاله السياره .. وطلب منه يدليه بيتهم.. ووصله لفريقهم..
نزل عبدالله يتعثر بالألم والهم.. يجر خطواته جر.. وصل بيتهم.. طق الباب ..
فتحت له امه الملهوفه والولهانه عليه يوم تأخر ... ودموعها تصب ............. . .. .. ..

انتبه عبدالله من سرحانه.. بسبة ماي البحر .. صار مد.. وارتفع الماي ووصل لعنده.. تباعد عنه شويات.. انبطح .. وصار يطالع في السما.. كانت صــــــــــــافيه.. والنجوم فيها شي فظيع.. متجميعن في كومه لامعه.. منظر رهيب يشرح الصدر..

ما عدا نجمه وحده لفتت نظره.. كانت صغيرة.. وضواها خافت مايل للصفرة...
وحيده.. صار يتأملها.. يحسها مثله في هالكون.. تنهد من قلب.. وقام .. نفض الرمل بتعب شديد .. وركب سيارته بيرجع البيت...



فتح عيونه صار يطالع السقف..
ــ انا وين ..؟؟
لقى على يمينه ممرضه.. تغير له كيس المغدي اللي فضى.. سألها :
ــ ويش صاير ؟؟؟
ما فهمت عليه .. اكتفت بإبتسامه.. ونادت على الدكتور...
اللي جاله وهو فارد البوز شبر..
ــ ايوه.. ايوه.. اااه.. ما شاء الله.. الحمدلله على سلامتك يبني.. ازياك ديالوأتي.. عامل ايه..
ــ الحمدلله.. ليش انا هنا ..؟؟ ومين اللي جابني ؟...؟
ــ لا بس بعد الضرب اللي حصل لك.. قابك هنا راقل اسمو عبدالله..

فارس .. تذكر اللي صار له.. وشبح بعيونه بخوف.. وتمتم بسؤال:
ــ وينهو عبدالله ؟؟
ــ خرق النهار ده.. وان شاء الله حيقي لك تاني بكره.. المهم انت يبني تهدينفسك وتريح لينا اعصابك لأنو بكره على خير حتيقي الشرطه هنا تحأأ معاك فياللي حصل لك...
ــ لويش يعني ..؟؟
ــ دي اقرائات ضروريه يبني .. انت استريح بس دي الوأتي وان شاء الله خير..
ــ ان شالله..

فارس حاس بخوف.. صار يرجف يحس ببرد .. تلحف بالشرشف.. وابتدى يقلب الفكر لين غفت عيونه ونام...



ــ وعرست فطوم على ولد السلطان.. وجابت صبيان وبنات.. وعاشوا احلى عيشه
وخلصت الخرّافه , بالصلاة على محمد وال محمد...

رائد ورؤى بنفس واحد..
ــ اللـــــــــــــــــــهم .. صلي .. على محمــــــــــــــد.. وآل.. محمد..
رؤى:
ــ امااه.. اماااه..
ام حسين:
ــ هلا امي..
ــ بعد وحده تانيه..
ــ لااا.. وايد هالليله .. باجر الصبح اقول ليكم غيرها..
رائد:
ــ انا لو من ولد السلطان.. ما اخذ فطوموه هذي..
ام حسين :
ــ يؤ يؤ يؤ ..ههههههههه.. ولويش امي..
ــ دلووعيه.. كل تصيح.. وتسوي حالها مسكينه...
رؤى:
ــ بالعكسسسسس.. حليوه..
رائد بمسخره:
ــ شفتيها انتين ؟؟
رؤى:
ــ أيـــــــــــــه... من وصف امي ام حسين.. شكلها حليوه..
رائد يبغى يقهر رؤى:
ــ ويـــــــــــــــــــــع.. والله لو مافي الدنيا بنات الا هي ما اخدتها..
رؤى حمقت:
ــ فالق.. مع وجهك.. اللي يسمعك يقول مله.. كبيل وبتعلس بكله.. مالت عليك..
ــ بتسكتي لااااا...
ام حسين..:
ــ يؤ يؤ يؤ.. يللا عاد خليكم حليوين ولا تتشابقوا .. فطوم خلاص عرست..
رؤى وهي تبحلس:
ــ لاحت عليك...
رائد يطالعها على جنب.. :
ــ مرة من حلاوتها عاد..



طن طون طن طون ... صوت عداد السياره.. السرعه 180.. عبدالله مسك الخط .. ومهو في وعيه.. والسرعه ابد مهي هامتنه..

الأحداث تتسابق عليه بالذكرى مع تنغيمة العداد.. وصورة امه يحسها قدامه..
المؤشر يزيد؟؟؟ وعداد الخطر مستمر بالدق..
وشوووي..
حححححححححححححححححححححححححححححححححححححححححححح


والى اللقاء بالجزء الجديد

[كبرياء]

ها ما مدانا لاتقولي عاااد
الانسه اللي جنبي تقوول ما صحت اليوم؟؟
على العموم يسلموا وبانتظار الجديد

[آخر شقآوهـ ..~]

لالالالالالالالالالالالا حرام لاتقولي حادث كفايه عليه هموم بتسوي فيه كسور يكسر الخاطر
وعلى عمر عدوينه ان شاء الله<<قصة ترا مو حقيقه
الصراحه حويوه وتبكي
تسلمي خيوه
تحياتي
ضحكوه البطه

[.:روح وريحان:.]

هع
بطل القصه يمووت؟؟
ماتوقع
لاتخاافوا
مشكوورة اموورة ع التكمله

[أسيرة الأحلام]

مااااااااااااااااااااااااااني
أميرووووه الحلقه مرررررررررررررره قصيره
يلا أشوووف بسرعه الحلقه اللي بعدها وهاه أبغاها طويله موقصيره
يلا أني أستناااااااااااااااااااااااش
بس ياربي لو يموووت عبدالله <<<< يؤيؤيؤيؤ فال الله ولافالش
خخخخخخخخخخخخخخخـ
يلا أميروووه ترى أني على أعصابي

[أمير العاشقين]

حسبي الله علي شرش يا أميروووه

كل مره اخلي كم جزء يتجمع

يالله عاد عفيه حطي الاجزاء خلينا نشوف شنو بعد الحووووووووووووووووووووووووووووووووووووو

والله ان القصه فله لدرجه ان كل جزء انسخه في مستند نصي

تسلم الايدين اي كتبتهم

[الحال2007مه]

اهيء اهيء ........ القصه مأسويه
الله يبعد عنا وعنكم أولاد الحرام بحق محمد وال محمد
تسلم يمينش امووووووووووووووور
ولاتحرمينا من جديدش <<<<الصراحه ضحكني المصري يوم قال خرق<<<خرج

[Princess]

يسلمووو جميعا على التواجد الجميل
واعذرووووني من جد على تأخيري
يسلموو على التفاعل الرائع << صارت تخاف منكم خخ لا تدعوا عليهاا هااا.. الله الله بأميرووة..

تفضلواا حبايبي الجديد...

[Princess]

بعد ساعه.. انتبه ورجع لوعيه رفع راسه من الدركسون " مقود السياره" .. كان الحر شديد وعرقه يصب والسياره خنقه ..صار يسترجع الحادث .. تذكر انه وهو مسرع طلع قدامه فجأه كلب خلاه ينحرف عن طريقه وينزل من الشارع الى الرمل..
سند راسه على الكرسي .. وانسلت دمعته..
ــ ااااه.. يالتني مع هالحادث قضيت وافتكيت ...
صار يهدي في نفسه..
ــ الحمدلله .. استغفر الله ياربي... هذانا عشت كل هالسنين متناسي همي .. ليش اقلب المواجع الحين...
وصار يضرب على الدركسون وهو يصرخ..
ــ ليش.. ليش...

شغل السياره .. حاول فيها مره مرتين يالله اشتغلت.. وكمل طريقه...



يوم السبت.. الساعه 8 الصباح... فبيت ابو رائد التلفون يرن...

زهراء :
ــ الو..
ــ الو.. السلام عليكم..
ــ ياهلا وعليكم السلام..
ــ هلا اختي ام رائد كيف الحال ان شالله بخير..
ــ الحمدلله الله يسلمك.. مين معاي..؟؟
ــ انا عبدالله..
ــ ياهلا فيك .. هلا..
ــ عسى بس ما ازعجناكم..
ــ لا ابد صاحيين .. لا ازعاج ولا شي..
ــ طيب بغيت اسأل ام حسين اذا صاحيه بروح لفارس المستشفى.. قولي ليها ما عليش امر..
ــ ان شالله ولا يهمك يوصل .. دقيقه بس اقول ليها...
ــ طيب...

راحت زهراء لأم حسين.. لقتها جالسه على سرير رؤى ورؤى حاضنتنها وحاطه راسها على صدرها .. وام حسين بهداوه تمسح على شعر رؤى..
كانت تحكي ليها قصه مثل ما وعدتها بالليل..

زهراء:
ــ صبحش الله بالخير خالتي..
ــ هلا.. صبحش الله بالنور ..
ــ اخبارش اليوم عساش بخير
ــ الحمدلله بخير الله يخليكم ..
ــ الحمدلله.. خالتي عبدالله متصل يسأل اذا بتروحي لفارس والا لا..
ــ يؤوو.. وهادي فيها سؤال.. اكيد باروح لضناي..
ردت زهراء على عبدالله اللي استاذنها اذا رائد يبغى يروح وياهم والا لا..

طبعا رائد ما يحتاج .. ما بيقول لا...

وصل عبدالله.. ركبت ام حسين .. ركب رائد قدام.. التفت مبتسم على عبدالله بيسلم عليه... واختلع من شكله..
كان مبهدل وعيونه مره منتهيه .. شكله واحد ما غمض جفن عينه,, ولااا سهران بدموع بعد..
رائد الهم ماكل قلبه.. وفي باله..
ــ لااا.. عبدالله ويش فيك.. ويش اللي صاير لك ..؟؟

وصلوا المستشفى.. دخلوا الغرفة اللي فيها فارس..
خذته جدته بالأحضان.. وصارت تصيح.. وفارس يهديها.. عبدالله سلم على فارس.. اللي لاحظ شحوبه وتعبه... روائد بعد اكتفى بالسلام من بعيد والسؤال عن الحال..
فارس:
ــ مشكور عبدالله ما تقصر.. تسلم..
ــ لا تشكرني على واجب... انت ويش اخبارك..
ــ الحمدلله احسن..

عبدالله وده يكلم فارس بين بعضهم.. يبغى يسأله مين اللي سوا فيك كذا... بس مو عارف.. شويات الا باب الغرفه يطق... شرطي معاه كاتب لمحضر تحقيق.. جاييين بيسألوا فارس..
جدته خافت.. عبدالله يهدي فيها .. هذي اجرائات ضروريه.. طلعت وراحت انتظار الحريم... وظل بالغرفه مع فارس رائد وعبدالله...

رائد وقف عند النافذه يطالع الرايح والجاي واذونه مع التحقيق....
ــ اسمك..؟؟ وعمرك..؟؟
ــ فارس الــ .... ’’ 13 سنه..
صاروا يسألوه كذا سؤال.. هل سوى شي يستحق احد يعاديه عليه.. ويش اخر شبقه صارت له...
صار فارس يجاوب .. بخوف.. لين سأله الشرطي:
ــ ويش اللي صار لك امس بالضبط...
فارس حس بخنقه بكتمه .. ووده يصيح.. صار يطالع عبدالله .. مو عارف يتكلم.. ويش يرد...
ــ امس.... كنت رايح السوق كعادتي كل اسبوع .. تفاجأت بسياره فيها ثنين شباب ما اعرفهم.. خذوني بالقوه.. ودوني بيت ما ادري بيت مين.. وتالي جا ابو مصيبه..
عبدالله في باله انصعق .. ــ انا كنت متوقع هالحقير
الشرطي :
ــ ابو ايش.. مصيبه.. اللهم يا كافي .. ايش اسمه هذا بالله ..
ــ جابر الــ......
ـ وايش سوى فيك؟؟
ــ حاول يعتدي علي.. و الصبيان الإثنين مسكوني وكتفوني.. وابو مصيبه صار يضرب فيني ..و كان يخوفني ويهدنني انه بــ .. اا..
ــ ايش..؟؟
فارس قام يصيح ..
ــ ما ادري .. ما ادري..
ــ طيب طيب هدي يافارس.. فهمنا عليك.. بس علمني .. عسى ما نفذ تهديده..
فارس ودمعته بعيونه:
ــ لا بس شقق ثيابي وضربني ضرب في اماكن حساسه.. وهددني المره الجايه بسوي اعظم..
وصار فارس يصيح.. عبدالله قعد على سريره وضمه اله يهديه..
رائد مو فااهم ولا حاجه.. ولا هو داري لويش فارس يصيح ..
ــ يعني افهم من كذا انه بس هدد .. متأكد ما ضرك بشي..
ــ لا..
ــ خير ان شالله.. يللا ما تشوف شر وان شالله خير .. في امان الله
عبدالله :
ــ حياكم الله...
طلع الشرطي .. رائد التفت على فارس وعبدالله .. لقى عبدالله ضام وجه فارس بيده ويقول له :
ــ لا تخاف انا معاك..
الموقف والمنظر فطر قلب رائد.. حس الغيره اللي كانت فيه ما ليها داعي .. حس شقد فارس محتاج لعبدالله اكثر من حاجته هو.. مع انه مو فاهم ويش صاير.. قامت عيونه تدمع من تاثير الموقف..

بعد يومين ..
ــ وزع الورق يــا..... <<< سكرانين يلعبوا قمار..
امين :
ــ ويش صار باللي طقيناه من ثلاثة ايام..
علي وهو مهو في وعيه :
ــ هع.. مين اللي طقيناه..
امين يسطره :
ــ انا اسأل ابو المصاايب .. ما سألتك .. ويش دخلك تجاوب..
علي :
ـــ فكرت روحي ابو مصيبه فجاوبت.. كفك..
طااخ ..ههاااااااي
ابو مصيبه :
ــ وووجعااااي.. ويش فيكم مزعجين..
امين :
ــ واحد انتحل شخصيتك..
ابو مصيبة فتح عيونه وكأنه افاق من السكره :
ــ مين هذا الــ ... الـــ ... خليني العن .... و .... و....
ــ ههاي .. هذا مدري ويش اسمه ..
علي يرفع ايده :
ــ اناااا.. ابو المصايب ويش عندك؟؟
ابو مصيبه:
ــ عندي لك دست بيتلقاه بدنك اذا عدتها مره ثانيه..
ــ ويش اللي اعيدها...
ــ هاا.. بفففففففف.. والله نسيت..
ــ ههاااااي..

<<< جو قرف.. للغايه..

شوي الا قامت عركه وتحذف وطق بالنعول ... واحد قام يغش باللعب ,, وقامت المذبحه...
ابو مصيبه هو الرئيس العود.. قام ليهم بعقاله .. ووين ما ياكل في لحمهم ..
طرااخ طرييخ طررووخ.. مزق جسمهم تمزيق.. <<< خلاهم يتنافضو زي القطاوه اذا كبوا عليهم ماي ..
ولم الفلوس اللي قاطينها للعب ,,
ــ جزاء ليكم ما في احد يربحهم الي كلهم...
ما احد يتجرأ من الشباب يرد على ابو مصيبه والا يكسر كلامه .. لا يتكسر.. فالكل مستسلم للأمر الواقع...
شويات الا جرس الشقه يدق ...
ابو مصيبه .. يطالع في الشباب الموجودين كلهم كاملين... سأل:
ــ في واحد منكم عزم احد على السهره..
الكل هزوا روسهم .. لاااا << مثل يهال بالروضه ..
ابو مصيبه حط شماغه على كتفه .. وراح فتح الباب ..

طرمطاااخ <<<< هجوووم شرطه ...
الكل قام يتنفر ويفزع بعمره.. خلاص ضبطوهم كلهم.. ويا عيني خمر وقمار غير المهمه اللي جايين ليها بالأساس ... خموهم كلهم بالسياره .. << وي وي وي وي الى القسم..

قام التحقيق مع ابو مصيبه اللي انكر كل شي.. بس الشرطه خذت بصماته اللي طابقت البصمات الموجوده على ثياب فارس.. وخلوه يعترف بكم كف .. مين المشترك معاه بالجريمه .. وحبسوهم على ذمة التحقيق....


بس للأسف... الزمن قاسي واغبر.. الزمن زمن فيتامين واو .. ابو مصيبة عنده واسطات قويه.. ما طول ساعتين بالكثير.. الا وجاه المنقذ ,, وطلعوه مع امينوه وعلي..

عبدالله جواله يرن... لقاه نفس الرقم الغريب ... قال هذا ابو مصيبه .. بس ويش طلعه.. رد عليه..
ــ الو..
ــ مفتكر نفسك بتقدر علي.. ههاااي.. لا يا يبه... شوف .. انا وراك والزمن طويل .. وما عاش من يخليني بالتوقيف..... وترى بالدور انتظر انت ويا هالياهل ويش بيصير فيكم .. باااي يا حلوو...
طووط طووط طووط..
عبدالله رمى جواله مقهور شاب ناار وين قاعدين احنا.. المسأله سايبه ..؟؟ .. طلع راح بيت امينوه .. طق الباب .. وسأل عن امين .. ومن طلع له امين ,, وشافه فعلا برى التوقيف.. مسكه وطاح فيه بدست غبر به الشارع.. وسدحه وقعد على بطنه ومسك كلر بلوزته..
ــ اسمع.. بسرعه توديني للداهيه ابو مصيبه.. لا العن خيرك..
امينوه داخ من الطق .. طق عبدالله طق واحد ما يرحم وواصل حده موووت .. خطررر ..
قام وياه للمزرعه اللي يقعد فيها .. كانت الساعه 8بالليل ,,, المزرعه ما يفتحوها الا للي يعرفوهم .. فركب مع امين بسيارته...



يتبع >>>

[Princess]

ام حسين قاعده مع ولدها فارس.. كان منسدح على منامه,, تحاول فيه كان ياكل له لقمه تشد عظامه المترضرضه بعد الطق وهو مهو راضي..
شوي الا باب بيتهم يطق..
ام حسين :
ــ ميــــــــن؟؟
ــ اني زهراء خالتي..
ــ هلا .. هلا ببنيتي...
فتحت ليها الباب.. وكانوا معاها رؤى ورائد.. دخلت زهراء وهي حامله صينيه فيها اكل..
ــ تفضلي خالتي كان تنبني عظام فارس .. و زين للدم ..
ــ لويش تكلفوا على عمركم .. خير الله وايد..
ــ الحمدلله .. هذا اقل شي نقدر نسويه.. انتون خلاص بحسبة اهلنا وعزيزه علينا والله انتين ويا فارس ..
ــ وي .. بلغش الله مرادش ووسع عليكم وعطاكم من نعمه وخيره زود الزود يا رب يا كريم..
ــ يالله.. تسلمي الله يخليش ويطول بعمرش

فارس مو راضي ياكل .. لا من اكلهم ولا من اللي جابته زهراء..
رائد:
ــ افاا.. وانا ما تعشيت للحين.. قلت بتعشى وياك.. وانت منت راضي .. اجل بطلت اكل..
فارس ابتسم..
ــ لااا.. اكل خذ راحتك .. انا مالي نفس..
زهراء مستغربه من ولدها .. تعشى هو.. بس تدري به يبغى يشجع فارس.. فساكته ومبتسمه ومستانسه على ولدها..
ــ اخذ راحتي .. لااا.. اما ما برتاح الا اذا اكلت انت..
ــ وربي مالي نفس...
رائد اخذ لقمة بيده.. ومدها على فارس... اللي كان يبتسم ويتمنع...
رائد :
ــ وغلاة عبدالله عندك.. الا تاكلها ...
فارس ابتسم :
ــ ايييه.. تمسكني من ايدي اللي تعورني .. زين باكل بس هذي اللقمه..
ــ لاااا.. بتاكل وياي الصحن كله.. لا اشتكي عليك عند عبدالله..
ــ ههههههه .. امري لله...
صار فارس ياكل ببطء شديد .. بس كذا يضيع وقت.. رائد لاحظه:
ــ انا ما باكل شي.. الصحن هذا هو.. ابغاه يخلص .. لا عبدالله بيدري بك .. وان درى.. عبدالله ينقهر.. وان انقهر .. الله يستر .. وان ..
ــ ههههههههه خلاص خلاص باكل...
فارس انفتحت شهيته من حركات رائد وطاري عبدالله.. >> حبيب القلب مازولا
اكل وخلص وبالشكر تدوم النعم..

صار رائد يسولف مع فارس.. وضحكهم قايم.. كنهم يعرفوا بعض من سنين..
شوي سكت رائد وسرح يفكر... فباله..
ــ بــــــــل .. كيفا كنت اكره انا هالفارس .. شوف الحين كيفا صرت وياه,, عجيب..
ــ هاا رائد وين وصلت..
ــ ههههههه لا معاك..
رؤى قاعده مع ام حسين وامها .. واذونها قاطتنها على الصبيان.. زهقانه .. مهي عارفه ويش تسوي..
شوي لفت نظرها شي يتحرك قريب رائد وفارس .. وقامت تنادي وهي تأشر :
ــ لااائد لااائد .. صلصوول صلصووول..

فارس التفت على المكان اللي تأشر عليه رؤى.. وفي قلبه كاتم الضحكه :
ــ لااائد .. و لااااا ...صلصووول .. بعد هههههههههههههههه....
رائد كش بدنه .. ويوخر بعيد .. فارس من شاف رائد نط من بعد تحذير اخته .. هو من دون شي ضحكته حركة رؤى وطريقتها ورائها الحلوه.. بعد يشوف صبي ينقز من صرصوور <<< لاااا كملت...
ويمووت ضحك.. عليه .. ويشيل زنوبة جدته ..
<<<طااخ طااخ طااخ ...
ويحطها على جنب.. وينادي على رائد :
ــ ههههههههه تعال خلاص مات...
ــ اكو يتحرك.. شنبه ..
ــ ههههههههههه .. من صجك.. مات خلاص ما تشوفه مترصع.. تعال لا تخاف .. ما يخوف..
ــ ويع انا ما اخاف انا ما اشتهيه ..
رؤى وبعفويتها المعتاده..
ــ الا تخاف انت ما الصلاصيل لا تشلخ..
رائد طالعها منقهر .. ناار .. <<< قام ضرب الصورايخ شرر من العيوون ..
رؤى عرفت النظره نظرة تهديد وسكتت..
فارس بقلبه مو قادر على رؤى .. مره عجبته رائها.. صار يتخيلها كيف تقول اسمه .. صار يتمتم بشوي شوي بصوت هادي مو مسموع..
ــ فالس .. فالس ..هههههههه .. حلووه والله..
ظلت زهراء وولادها مع ام حسين وفارس شوي زين.. وتالي طلعوا...



وصل امين المزرعه.. عبدالله لبس شماغ طلعته وتلطم به.. اللي فتح باب المزرعه عرف امين.. وسأله من اللي وياه وليش متلطم..
قال له واحد من الربع.. ومزكم زكام حاد لا يعديني ..
دخلهم .. وصلوا للغرفه اللي مره صوت طق العود والطبل واصل لبرى من قوته
نزل عبدالله وهو يهدد في امين ان سوى شي كذا والا كذا,,,
دخل عبدالله وهو متلطم بشماغه << خخ الفارس الملثم..
صرخ :
ــ ابو مصيبه .. وينك اطلع اذا فيك خير..
كانت الغرفه واسعه وفيها شباب متفرقين جماعات.. وجوهم لا يطاق...
شوي الا واحد من الشباب ينادي..
ــ ابو مصيبة .. يا ابو الشباب .. واحد يبغاك..
قام ابو مصيبة ..
ــ مين هذا...
شال عبدالله اللثمه..
ــ اناا...
ابو مصيبه :
ــ هلااا.. ومسهله.. ومية مرحبــــااا.. جاي لخرابك ودمارك هااا..
ــ انت اللي بفنيك من دنياك انا الحين ..
ــ هع ,, تفنيني.. تراك مفخم نفسك وايد..
ومد اصابيعه على خد عبدالله يطقه على خفيف..
ــ يبه روح بس روح...
عبدالله مسك ايد ابو مصيبة وعوجها له ونفضها بعيد عن وجهه..
ابو مصيبه قهرته الحركه.. قام وبكل وقاحه تفل على وجه عبدالله ..
عبدالله ساعتها .. كل شياطين الدنيا تجمعت براسه << هجووووووووووووم ..
قام الطق والتبكيس..
طبعا ما احد يتجرأ يفك عبدالله عن ابو مصيبه.. لأنه ان سواها .. ابو مصيبة بيذبحه قبل عبدالله .. ما يرضى ابو مصيبة << ومصيبة تصيبه ..

المهم عبدالله اخذ بالثار << صعايده حشاا..
ودحن ابو مصيبة بالغرفه وداس رمته بالقاع,,
وطلع عنهم..


ابو مصيبة ما يحتاج .. حمق .. شلون هذا يكسر عظامه قدام الأوادم... وبصرخه حد ما عنده :
ــ برااااااااااااااااااااااااااااا..
وتنفروا الشباب تنفير .. يلحقوا على اعمارهم لا يلعن خيرهم ابو مصيبه ...



والى اللقاء في الحلقه القادمه

[آخر شقآوهـ ..~]

ياسلام ويش هل جزء يجنن فلته يهبببببببل
اكتشفت اكتشاف قصدي جاني احسان وهو كــ التالي

فارس بقلبه مو قادر على رؤى .. مره عجبته رائها.. صار يتخيلها كيف تقول اسمه .. صار يتمتم بشوي شوي بصوت هادي مو مسموع..
ــ فالس .. فالس ..هههههههه .. حلووه والله..

فارس بيحب ام الراء الجميله وبيعرسو<<هدا ادا عرسو نيهههههههههههاي
تسلمي حبيبتي
يعطيكِ ربي العافيه
بانتظار جديدكِ
تحياتي
ضحكوه البطه

[أمل الظهور]

امرووشه ...

اجل تقولي الاحداث في هالجزء موب شيء ومدري ويش تقولي ...

اجل فالس وفالس خخخخخ وربي فقعت ضحك

يحليلها تجنن ههههههههههه

كويس انه لائد حن اشويات على فالس واندمج معاه اشويات وترك غيرته

لاتقولي بيرجع (يتدحن ) ويغار ..

شكل فالس ولا ئد بيطلعوا فولات او فراولات ولا ويش رايك



اموور الاحداث تحلوو وتحلووو وتحلووو

ونحن على ناااااااااااااااااااااااااااااار من الوله والشوق


<<<جاري الانتظار <<<