أبو بندر اللي كان هذا ثاني مره يكلمها....
أبوبندر: بشاير حرام عليك اللي تسوينه فينا؟؟؟...
بشاير باكتئاب:وش سويت يباه؟؟؟...
أبو بندر:شوفي نفسك...ماعاد صرتي مثل أول...ماعاد صرتي تجيني مثل اول...ماعاد يأثر فيك شي...ليه كذا؟؟؟...انا مقصر معك بشي؟؟؟...
بشاير تهز راسها بالنفي...
أبو بندر بحزن:بشورتي...تكلمي...ليه كذا صايره حزينه...قد صرتي أحسن من كذا وش فيك انتكستي ورجعتي؟؟؟...
بشاير:يباه انا بخير...بس انتوا لمن تشوفوني مشغولة بالجامعه... تقولون زعلانه وغيره...
أبوبندر بمثل الدمعه تلمع بعيونه:أحس بالقهر عليك كذا يا بنيتي.. كله من هالسعود حسبي الله عليه...من اليوم باكلمه وأخليه يطلقك...والله لأجرجره في المحاكم وبين الناس...إن ماخليته يتأدب وتحسف على يوم جيته بالدنيا..
كان أول مره أبو بندر يقول كلام مثل كذا..كان يقول بغيظ..غيظ وغضب الأسد الجريح....كان أبوبندر عنده بشاير غير..يمكن لأنها اصغر عياله.. ويمكن لأنها انهانت بالصميم...ويمكن لأنها لاتزال طفلته اللعوب...
بشاير برجاء:لا تكفي يباه ما ابي فضايح أكثر...
أبو بندر بعصبيه:إحنا صبرنا ولصبرنا حدود...
بشاير برجاء والدموع باقي بعيونها:تكفى يباه...ابوس يدك لااا...
أبوبندر بعصبيه حاده جدا:إنتي مالك دخل...هذا شي بين الرجال....
بشاير بدت دموعها تنزل:يباه لأ...الله يخليك...تكفي لأ...هذا بس طلبي الوحيد...
زعل أبوبندر بزيادة حس بالإهانه خصوصا لمن حس إن بشاير لا تزال تحب سعود...
أبوبندر بعصبيته ويرفع صوته:إنتي مالك دخل فاهمه...
ويقوم من عند بنته ويطلع من غرفتها...كان متعب وام بندر واقفين يسولفون بالدرج...لمن سمعوا صوت ابو بندر معصب...راحوا له بسرعه عرف السالفه متعب من أبوه لمن سمعه يصرخ ومعصب لمن يقعد يقول سعود وبشاير...ويقعد يدعي على الساعه اللي عرف سعود فيها...
راح متعب بسرعه لبشاير شافها تبكي بصمت وهي تناظر فيه...
متعب:ممكن أعرف وش السالفه؟؟؟...
بشاير تصيح:ما فيه شي...
حاول يعرف السبب بس ماقدر منها...لأنها ياهي ساكته...ياهي تصيح.. او تقعد تطلبه إن تخلي أبوه يصبر شوي بدل العجله على سعود...
بعدها طلع متعب من عندها متأسف على حالها...بس بعد ماشاف حال أخته وحال أبوه واهله..أصر إلا لزم إنه لازم سعود يطلق بشاير باقرب فرصه..

بعد ما طلعوا من عند بشاير قعدت تصيح...صح هي تعبت مره أول ماتركها سعود وانجرحت جرح غائر من الصعب ان يلتئم.. بس بعدها تحسنت حالتها...بس لها تقريبا ثلاث أسابيع رجعت لبكائها..لحزنها.. لشوقها...لحبها...لقلبها...رجعت مشاعرها تتجدد...لم يكن من السهل أن تنسى سعود...ولم يكن من السهل أيضا أن تعود تحب نفس الشخص الذي جرحها وادماها حتى النخاع...
راحت بشاير وفتحت جوالها وهي تمسح دموعها..راحت للرسائل للحافظات كانت موجوده حافظه بإسم: (حبي)...

قرت بعض الرسايل اللي كان مغرقها سعود فيها...
(يسري لك الهاجس من الوجدان مدفوع
وترتاح لك نفسي وتنسى عناها
واشرب حنانك من جفا الوقت ينبوع
وتشتاق لك عين بشوفك هناها
عين سقت ورد الهوى عشق ودموع
يوم المشاعر أرسلت لك غلاها)
وكان فيه مسج ثاني منه
(القلوب الوفيه ماتنسى ساكنيها
وقلبي بالمحبة يمسي على اغلى من سكن فيها)
قعدت تصيح وانسدحت على جنبها..
(ودي المس كل جرح يتعبك...
ودي اداويه وألمك واجمعك...
ودي اضمك لصدري وتغرق أنفاسي معك..
ودي دوم جنبك مثل ظلك اتبعك..
ودي ابكي فوق صدرك واقول آآآه
وينك يا مخفف أوجاعي اشتقت لك)
قعدت تصيح بقهر...وقعدت تقرى آخر مسج وصلها منه...
(تصدق بسمتك والله تفرح خاطري الولهان..
يطير من الفرح قلبي واصير بعالم ثاني...
والى من شفتك بضيقه احس إني انا الغلطان..
أعاتب نفسي بنفسي ولو ماكنت أنا الجاني...
حبك بداخل عروقي ولا يوصل لحبك إنسان..
يمر الوقت وبثبت لك حبي لك إن الله أحيــاني...)
وصل هذا المسج في هذاك اليوم الشؤوم...قعدت تصيح..تحس بالجرح وبالحب وبالشوق...الذي حاولت تقتله..بس للأسف كان اقوى منها بكثير..
وبالفعل أثبت لها سعود حبه العظيم لها؟؟؟...
وبعدها ضمت جوالها لصدرها...ولمت نفسها بطريقه مكورة وهي منسدحه تحاول تجمع كيانها المبعثر...تحاول تكتم على حبها لا يفضحها أكثر... تحاول تحس بالحب والحنان اللي فقدتهم من شهور طوال...

***

بالليــــــــل الســــاعة(8)...
بندر اللي كان جالس مع عياله في جلسة يمكن تسمى(كرسي الإعتراف) كان اول مره يسويها...بس لقى هذا أفضل حل خصوصا بعد ما أشار عليه خويه إنه يزور اخصائي اجتماعي ونصحه بهالشي في بداية عودة أولاده للجادة الصحيحة...

بندر:الحين ممكن أعرف وين رحت يا فارس امس..ماجيت إلا الساعه 2 ونص بالليل وإحنا بنص الأسبوع؟؟؟...
فارس اللي كان مستغرب من سؤال أبوه له...
فارس:ليش تسأل؟؟؟...
بندر معقد حواجبه:من دون ما تسأل...قولي وين كنت؟؟؟...
فارس:طيب من اللي قالك؟؟؟...
بندر يصرخ:فارس....تكلم احسن لك...
حاول فواز إنه ينسحب من دون ما يحس فيه ابووه...
بندر يلف على فواز:فــــواز...اقعد و يا ويلك لو تقوم...
ويلف على فارس:تكلم...
فارس:كنت سهران مع أخوياي...
بندر:والجامعه؟؟؟؟..
فارس:وش فيها الجامعه؟؟؟...
بندر بسخريه:ينتظرونك تقص شريط الإفتتاح...وش يعني ماعندك دروس.. ماعندك محاظرات...
فارس وهو يبلع ريقه:اليوم ماعلي محاظرات قبل الظهـر بس..
يقاطعه بندر بعصبيه:انطم ولا كلمه تكذب على يافارس...
فارس مات خوف مكانه...
بندر بعصبيه:قسم بالله لو تكذب على أكثر من كذا لاقطع هالعقال على ظهرك فاهم؟؟؟...
هنا فواز مات ضحك مع مره خايف من أبوه...بس كان شكل أخوه يضحك مره..
بندر:وأنت اثبر بعد...
فارس مقهور:تقولي أنا انطم...وتقوله انثبر...وش معنى؟؟...
بندر بإستغراب مع عصبيه:يعني انثبر أهون من انطم...
فارس:طبعا...احسك تقولها لي يباه بحماس..وبعدين انطم مره قويه...
بندر:أقول فارس والله لو ماتتأدب...ومالك دخل فيني أقول اللي ابي فاهم.. بس شكلي ماعرفت أربيكم زين...
فواز:الحمدلله ماقلنا شي إنت تكلمت بنفسك...
بندر:أنا على بالي إني تارك رجال..بس شكلكم أبد بس والله لأعلمكم التربيه من أول وجد وجديد...
وبالفعل تغيرت معاملة بندر مع عياله وصارت الصرامة الشديدة جدا هي المفتاح الأول لخروج أبنائه من حالتهم المخزيه...

***

كانت شذى رايحة مع تركي لكوفي من دون فصولي الصغينون..
شذى:وش عندك عازمني على قهوه...اول مره تسويها من تزوجتك؟؟؟...
تركي بابتسامه:قلت تغيير...
شذى:وش سر هالتغيير؟؟؟....
تركي بنظرة مكر:شي اتمنى اغيرة...
ضحكت شذى بصوت عالي..
شذى تناظر تركي:يا حليلي والله يا تركي...
تركي بإستغراب:ليه؟؟؟..
شذى:لأني عارفه وش السبب...بس لمن يصير اللي براسك بيرجع الروتين لحياتي....خلنا كذا احسن يصير شوية اكشن...
تركي:أكشن هاه؟؟؟....أقول مالت عليك بس...
شذى:طيب ليش ما خليتني أجيب فيصل معي خله يتونس شوي...
تركي بقهر:ماعندك غير هالفيصل تشلينه معك بكل مكان تروحين له ترى من جد لاعت كبدي منك ومنه ومن حبك له...
شذى تناظره باستغراب....
تركي مقهور:ترى كل الحريم عندهم عيال مو بس إنتي... إنتي شوفي نفسك كيف أهملتيها عشانه..بعدين بيكبر وبيتزوج وبيسحب عليك وما بيبقالك غير تركي...
شذى بضحكة سخرية:قول مقهور وارتاح...
تركي يكابر:قالوا لك مجنون...اغار من ولدي...
شذى:إيه مجنون...وموت بغيرتك...وكلامك اللي قلته تو بيزيدني أتمسك بولدي...وإنت ادري إنك مقهور لأنك(تقولها بدلع)صفر على الشمال...
تركي بمزح مع جد يمسك يدها اليمين بقوة وهي تحاول تفك يدها منه بس مهيب قادرة...
تركي:أنا يا أم شوشه صفر على الشمال...
شذى بألم وهي تصر على اسنانها:فك يدي..ولا تخليني أصرخ...ترى إحنا بمكان عام...
تركي يزيد:يقالك تهددين...
شذى وهي تترجى بعيونها:الله يخليك فكني...
تركي:ببوسة...
شذى تفتح عيونها زياده:تركي؟؟؟....واللي يرحم امك فكني...
فكها تركي وقاعده تدلك يدها من الألم...
شذى تناظره:وحش...
تركي بطنازة:يا الحسناء....
شذى:غصب عنك...
تركي:إنتي ليش الحين كلامك ابد مافيه رومانسيه...
شذى:بالعكس أحس إني انا ألحين بقمة الرومانسيه...
تركي:باين يا قلبي....
شذى بعد فترة صمت:تركي...
تركي:سمي...
شذى بهمس:الله يخليك لي يا تركي...
تركي:والله يخليك لي يا شذى...
هنا حط تركي يده على خده وقعد يناظرها...أما هي فقعدت تناظره.. التقت عيونهم بحب...وبشوق..يحاولون يعدلون ويصلحون اللي بينهم...
شذى بحرج بالغ:خلاص وخر عيونك...
تركي:لأ ما راح أوخرها...
شذى:طيب البس نظارة شمسيه ما أحب احد يطالعني كذا...
تركي:للحين إنتي كذا...
شذى تصرف الموضوع:شخبارك؟؟؟؟؟....
تركي قعد يناظرها ويضحك:تصدقين تعرفين تصرفين الموضوع...


***


في هذا اليووووووووم اللي طال انتظاره...واللي طال صبره...
كانت سلمى بتلتقي مع عادل وبتقوله عن كل شي...عشان يلقى حل لحبهم الضائع...
سلمى:هلا عادل...
عادل:هلا بحبيبة قلبي...
سلمى:وصلت؟؟؟...
عادل:أبشرك...أنا الحين بالفندق...
سلمى بفرح:صدق؟؟؟...طيب ليش ما قلتي أول ما وصلت المطار...
عادل:بغيتها مفاجأة...
سلمى:خلاص إنت اليوم ارتاح...وبكره نتقابل...
عادل بإصرار:اليوم نتقابل...مافيني أصبر حتى بكرة...
سلمى بدلع:الصبر زين...
عادل:أنا صبور...بس محد يقول للعطشان اصبر وبيده كاس مويه..
سلمى تضحك:يا عيني على التشبيه...
عادل بضيق:اخبار الزفت ولد عمك البدوي هذا...
سلمى بضيق:يا شين ماطريت..قبل فترة جاني وتهاوشت معه...
عادل:فكه منه هالخايس...
سلمى:قلعته.....طيب وين نتقابل...
عادل:شوفي الفندق اللي انا فيه فيه مطعم بأعلى دور مره حلو...
سلمى:اوكيه اوكيه...خلاص اتفقنا...
عادل:الساعه 8...
سلمى:لا 8 بدري....خلها 10...
عادل:ما أقدر أصبر...أخاف تقعدي شوي وتقولي الوقت متأخر...
سلمى:لا لا تخاف.. مهوب سلمى اللي يمشي عليها هالكلام...
عادل:راح انتظرك فوق بالمطعم من الساعه 6...
سلمى بابتسامه:اوووووووووووووه يا خطيـــــر يا العاشق الولهان..
عادل:الله يصبرني بس...
وبعدها قعدت تسولف معه شوي..وبعد ماصكرت نزلت تحت ولقت عايشه وامها ام عبدالكريم تحت...
سلمى:هلا علوووووش...
عايشه:هلا وينك؟؟؟....وش سر هالضحكة اللي شاقة الوجه...
سلمى:مستكثرة علي هالضحكة انتي ووجهك...
عايشة:لأ بس فرحينا معك...من زمان ما شفتك كذا...
ام عبدالكريم: الله يخليك كذا دايم فرحان ومبسوطه يا سلمى...
سلمى:آميـــــن يمه...
أم عبدالكريم وهي قايمه:يالله بروح أشوف ابوكم...
وبعد ما اختفت أم عبد الكريم...
عايشه وهي تصر أسنانها:أكيد عادل أسود الوجه ورى هالسالفه...
سلمى تبي تقهر عايشة:إنتي ماعندك بيت يضفك 24 ساعه عندنا وين رجلك ووين عيالك؟؟؟..
عايشه:مالت عليك...هذا جزاي إني جاية اقعد معكم واونسكم...
سلمى:مين قال يا قلبي إنك تونسين...بالعكس تلوعين الكبد... أصلا انا ما أدري بندر رجلك أبو قلب طيب كيف متحملك...
عايشه:من جد ما تستحين...
سلمى بفرح وتتكلم بآلية:اليوم بشوف عادل..عادل قلبي وروحي ووجداني..
عايشه بخوف:سلمى تكفين لا تروحين...والله خايفه لا أحد يشوفك من معارفنا وأقاربنا...
سلمى:وهم وش يدريهم بالحب اللي بقلبي يكويني...خليهم بالطقاق...
عايشه:يعني إنتي عادي لو أحد يشوفك؟؟؟...
سلمى:اليوم بيتكلمون وبكره بينسون...
عايشه: من جد انهبلتي...
سلمى: من جد أنتي وش يعرفك بالحب...إنتي طوووول عمرك عشتي بدون حب...تعرفين تكرهين....بس ماتعرفين تحبين...
كان كلام سلمى لعايشه مثل السكاكين إنها تسمع هالكلام من أختها تحس بالجرح...وبالعذاااب...معقولة أنا ما أعرف احب...وبس اكره؟؟؟؟...



***

بالليل الساعه 10...
كانت سلمى قاعده فوووق بالمطعم مع عادل...
عادل:سلمى من جد صايرة حلوة...بس مرة نحفانة...
سلمى بطنازة:الجمهور عايز كده...
عادل يضحك:أي جمهووور؟؟؟...
سلمى:امزح معك يا حبيبي...بس تعرف اللي مريت فيه كرهني بنفسي وبالأكل...
عادل:إنشالله هذي آخر الآحزاااان...
سلمى:كيف يا عادل...وأنا أسمع عايشه اختي تكلم أبوي وتقولة لازم يكلم تركي ولد عمي إنه لازم يعجل بزواجنا...تعرف لنا متملكين من زماااااان..
عادل بعصبية:وعايشة هادي ايش دخلها بالموضوع...
سلمى بإبتسامة خجل: ما ادري..اسألها...
.
.
كانت بنفس الوقت عايشة مع ولدها فواز ببيت أهلها...قاعده على أعصابها لأنها هي كانت الوحيدة اللي تدري باللي يصير...وهو عن سلمى تقابل عادل ألحين...وهذا هو الصدق..لأن سلمى كذبت على أهلها...وقالت إنها معزومه على خطوبة خويتها لمن شافوها طالعه بهالزينه كلها... كانت عايشة تدق على سلمى بس سلمى لمن تشوف اسم عايشه تعطيها بزي...
.
.
على الســــاعه 11 ونص بالليل وباقي سلمى ماجات...الكل خاف وخصوصا إنها ماترد على جوالها...جوالها تقفل؟؟؟....
.
.
بالفندق دق جرس الحريق...وبالفعل شبت حريقه بالفندق اضطرت ادارة الفندق إنها تصك جميع المصاعد الكهربائيه وعلى اللي فوق بالمطعم والأدوار العلوية إنهم ينزلون مع السلالم حقة الطوارىء..كانت زحمة الممرات...
سلمى بهلع:عادل وش نسوي؟؟؟....
عادل بإرتباك مع عصبيه:لحظه...
وحاول إنها يبعد الناس...بس وين كلن يبي يطلع وينجو بحياته...
كانت سلمى متمسكه بيد عادل بقوة..وهو بعد مافكها...بس للأسف بالفندق ما صكو الكهرباء اللي كانت السبب بالحريقة لأنه صار التماس بالكهرب وفجأة صار الفندق ينفجر مثل الألعاب النارية طابق طابق...
سلمى بصرااااخ:ما أبي أموووووووووت محترقة...
بس للأسف قدر الله وما شاء فعل...


***