*#* من قصة يا عيونه بس يكفيني عذاب *#*

[شوق الربيع]

كانوا الثنتين بالسوق يتسوقون بشاير ونوف بنت أختها...
بشاير اللي تستعد للجامعة..ونوف اللي نزلت معها السوق..وبعد ما شالت بشاير نص الملابس والجزم اللي بالمجمع راحوا قعدوا بالكوفي...
نوف:أقول بشاير وش خليتي بالسوق...كل شي شريتيه؟؟..
بشاير:بتدفعين شي من جيبك؟؟؟...الحمدلله كل هذا من خير ابوي الله يطول بعمره..
نوف:ماقلنا شي..بس نص اللي شريتيه خايس والله إني شفتها ببضايع العام الماضي..
بشاير:طالع من يتكلم وينصحني؟؟؟...أقول دادا روحي هذا اللي ناقصني بزران ويتكلمون...
نوف بعصبيه:بزران بوجهك..إنتي المخفه كل ما دخلنا محل وجا العامل يمدح لك البضاعه خمتيها..منتي بصاحيه..
بشاير حقرتها وهي قاعده تشرب الموكا:أقول نويف..انا الغلطانه اللي اقنعت امك إنك تجين معي..ولا حدك تنزلين معها هي أو عايشه..
وبعدها قاموا..وقبل لا يطلعون دخلت بشاير محل ساعات..أعجبها ونوف واقفه برى..بعدها طلعت بشاير وهم طالعين من المجمع شافوا فارس ولد بندر داخل المجمع معاه اثنين من أخوياه...
بشاير:نوف...مو هذا فارس ولد أخوي؟؟...
نوف تناظر وقلبها يقرع مثل الطبول:إلا.. هذا ولد خالي فارس..
بشاير اللي ماعجبها لبس فارس أبد..ولا تسريحة شعره..أما نوف فكانت تشوفه شيخ الرجال كلهم...
كان لابس برمودا جينز أسود..مع قميص ضيق كات لونه أسود مرسوم عليها المصارع حانوتي..وشعره كان طويل من ورى ومقصوص بطريقه عشوائيه.. ومنقزة بالجل وصابغ اطرافه بنفسجي مع كحلي...وحاط النظاره على شعره
بشاير بقرف:وش ذا؟؟..
نوف واللي راااحت لعالم ثاني:يهبل ياعرب..من دون رتوش من دون..
قاطعتها بشاير:هيه إنتي يا خبله وش تقولين؟؟..
نوف بنظره حالمه:وش رايك فيه؟؟...قمر والله قمر..
بشاير:قمر؟؟...قمر بعينك..والله إنه يفشل..شوفي وشلون يمشي مع أخوياه من وين جاي هذا؟؟...
نوف تدافع عنه:وشو من وين جاي هذا؟؟؟..بعدين عادي كل الشباب كذا ألحين...لا تصيرين معقده..
بشاير بعصبيه وهي رايحه للسياره تركب:إحنا أهل الرياض بدو..يعني هذا أشياء دخيله علينا...وعيب على ولد شيوخ مثل فارس إنه يسوي كذا..
نوف قعدت واقفه عند باب السياره إلين دخل فارس المجمع واختفى عن نظرها ودخلت السياره وهي حاسه..بالحب..لمن شافت ابتسامة فارس.. ياترى هل هو يحبني ولد خالي ولا في باله وحده ثانيه؟؟...

***
عايشه:فاطمه وش أبشرك به؟؟؟...
فاطمه بسخريه:إنك بتذلفين عن وجهي...
عايشه تجاهلت سخرية فاطمه:لا والله من جد فطومي؟؟؟؟...
فاطمه:والله ما أدري...شي يفرحني؟؟؟..
عايشه:إلا يطيرك من الفرحه؟؟؟...
فاطمه بعد تفكير:امممممممم والله ما أدري...إنتي قولي لي؟؟؟..
عايشه:سلمى مع عبدالكريم أخوي بعد أسبوع رحلتهم...راجعيين لنا..
فاطمه بفرح:والله...يا فرحتي والله فيك يا سلمى....
عايشه:من جد ماني مصدقه...

***


بالعزيمه ببيت أبو عبدالكريم...
تمت تناظر شذى في سلمى..بدون ماتحس سلمى فيها..كان قلب شذى يعورها..يالله من جد ما ألوم تركي لو حبها...كانت سلمى آيه من آيات الجمال...تمت تناظر بعيونها اللي تشبه رسمة عيون تركي بالضبط..بس تركي على رجوليه...أي ظروف سيخبأها لي القدر...خاصه نظرات فاطمه لها تدل على كل مكروه....
ويـــن وصلتي يا حلوة؟؟؟...
إنتبهت شذى على صوت نوف وهي تأشر لها...
شذى تحاول الإبتسامه:أبد مارحت مكاني أنا...
نوف:وين مكانك؟؟لو شفتي عمرك قبل شوي...لا يكون تفكرين بخالي تركي؟؟..
شذى تضحك ببرود:هههههه يا حلوك يا نوف..بس حبيت أقولك خطأ توقعك..
في هاللحظه جات بشاير وقعدت معهم...
بشاير:هاه وش عندكم؟؟؟...
نوف:أبد ما عندنا شي...بس بغيت أسألك وين زوجة عبدالكريم ماجات معهم؟؟؟..
بشاير باستغراب:تصدقون إنها ماجات بنت اللذين...وقاعده هناك مع ولدها لأن عنده دراسه...ورجع عبدالكريم مع أخته بالمره يسلم على أهله و أخوياه اللي هنا..وبيرجع بعد ثلاث أيام...
شذى:بس توهم واصلين أمس...ما بيمديه يريح مع أهله...
نوف:لا شذى عادي..هو من عرفت عمري ما يقعد بالرياض أسبوع..حتى بالأعياد بالكثير أسبوع ويرجع...
بشاير:هاه..أشوف تطورات يا نويف..ما قمتي تقولين لشذى خالتي...لا يكون القرار شمل الجميع قمتي تحذفين الألقاب؟؟؟...
شذى ضحكت:هههههههه لا أنا قلت لها لا تناديني خالتي أحسن شذى حاف كذا...عشان بالمره نطيح الميانه مع بعض ونصير صديقات..
نوف تناظر بشاير بحنق...
بشاير:أقول نوف شكل العدوى انتقلت لك من أمك اشوف نفس النظرات؟؟..
شذى بدون تفكير:لا حرام عليك نوف تهون عند فاطمه...
سكتت شذى وحست بكبر كلامها لمن قطته بخاطرها(ياربي انا وش قلت؟)
أما نوف سكتت وماعلقت حست بالغصه إنه امها تكون صورتها سلبيه كذا أما بشاير ما قالت شي بس حست بكبر كلام شذى..
شذى تحاول تبرر وقفها لنوف:سوري نوف حبيبتي والله ماقصدي شي..
نوف بالموت طلع صوتها:لا عادي...
شذى:لا نوف شكلك زعلتي من كلامي..ترى والله طلع من دون شعور..
نوف بغصه تحاول تنهي الموقف:لا شذى والله عادي..
سكتت شذى وقعدت تتأمل ملامح نوف..باين إنها زعلانه..يالله وشلون أنا قلت لهالأنسانه البريئه هذا الكلام؟؟...وهي عكس امها بكل شي..
بشاير وهي تكلم شذى:وينك ادق امس عليك وماتردين؟؟؟..
شذى تناظر بشاير:أمس كنت مشغوله و...
قطع كلامها لمن شافت نوف قامت....
شذى:نوف....نوف....
ما ردت عليها نوف....
شذى تكلم بشاير:أقول بشاير..شكل نوف زعلت مني صح؟؟؟...
بشاير تناظر نوف وهي طالعه:إيه صح زعلانه...بس لا تخافين بترضى من نفسها...
شذى:بس أنا غلطت وسبيت أمها...
بشاير:لا تخافين...نوف تعرف امها وحركاتها...فلا تاخذين بال لها..
شذى برجاء:من جد ما أبي نوف تزعل علي...
بشاير: المهم شذى..لا يفوتك الثنائي المدهش وهم يحاولون يسوون أكشن بحركاتهم...
.
.
بالطرف الثاني بالمجلس كانت قاعده عايشه مع فاطمه..
عايشه:فاطمه...وش في بنتك قامت شكلها زعلانه؟؟؟...
فاطمه بغير اهتمام:وش يدريني عنها...بس مشالله سلمى وش فيها احسها سمنت عن أول...
عايشه:هذا لأنك ماشفتيها من ثلاث سنين...
فاطمه:تعرفين..لمن تجي نكون مسافرين...وبعدين هي ماجات إلا مره...
عايشه مفتخره باختها:مشالله هي كانت تاخذ دراسه صيفي والدكتوراة ماخذه أول كل وقتها..شوفي ألحين مشالله نادر تاخذ وحده بعمرها الدكتوراة..وهي باقي صغيره...
فاطمه بإعجاب:مشالله تبارك الرحمن...تعلميني ببنت عمي؟؟...
عايشه:وأخيرا يا فاطمه بتستقر أختي هنا....يالله متى يفتحها الله على عبدالكريم ويجي هنا ويترك شغله هناك...
فاطمه من غير ماتهتم في عبدالكريم:تدرين يا عايشه..والله خساره إن تركي تروح عليه سلمى...
عايشه:خلاص يا فاطمه...انسي هالسالفه..لأن سلمى بس يجي طاري تركي...تصك الموضوع على طول وتقول ماتبيه...
فاطمه:أنا مو قاهرني إلا شذى ما أدري وش تبي...يا ناس أنا حاس إنها كابوس وبصحى منه...
عايشه:أقول يا فاطمه يا قواة وجه مرة أخوك..بعد اللي عرفته عن سلمى جات توقعتها مارح تجي...
فاطمه وهي تناظر شذى وبعدها لفت على عايشه:لاااا...بالعكس انا توقعت تجي مليون بالميه...أكيد تبي تشوف سلمى...
عايشه بغرور:مشالله سلمى كامله والكامل وجهه...وأكيد هي غيرانه ...خل تدق على الخشب...
.
.
سارا اللي كانت قاعده مع سلمى خويتها بالدراسه إلى المرحله الجامعيه..
سارا:هاه وش أخبارك يا حلوة؟؟؟..
سلمى:الحمدلله....وش أخبارك أنتي؟؟؟...
سارا:طيبه...وبالمره مبرووووووووووك يا دكتورة...بالدكتوراة..
سلمى بابتسامه فاتنه:الله يبارك فيك..
سارا:بس تبين الجد ماتوقعت مشالله تجيبينها بهالسرعه؟؟؟..
سلمى تتصنع الخوف:يمه منك...قولي مشالله...
سارا تضحك:هههههههه قلنا مشالله...
سلمى:هههههههههه لا بس تعرفين..انا كنت بتحدي لأني حطيت ببالي فترة محدده إني آخذ الشهاده فيها...وصرت في سباق مع الزمن..أدرس الليل مع النهار...وأوصل الصيف بالسنه الدراسيه ...و الحمدلله قدرت أنجح وكسبت التحدي.....
سارا:أموت على التحدي أنا...والله يوفقك إنشالله..
سلمى تناظر انجود اللي جات من عند أبوها بالمجلس وقعدت جنب أمها..
سلمى:مشالله هذي بنتك يا سارا؟؟..
سارا:إيه هذي انجود..أحلى بنات العالم...
سلمى تمزح:أحلى بنات العالم...القرد بعين أمه غزال...
سارا وهي تضم بنتها:قرد بعينك..بنتي قمر..وأحلى من القمر بعد..
سلمى:ههههههه إذا بنتك أحلى من القمر...عز الله إن القمر شين...
سارا:الله عليك يا سلمى قولي إنك غيرانه من بنتي؟؟؟...
ضحكت سلمى...وأخذت انجود وسلمت عليه وكانت انجود تناظر في سلمى باستغراب...
سلمى تكلم سارا:وش فيها بنتك..تناظرني باستغراب؟؟...
سارا:يمكن مو متعوده عليك...
سلمى:تعرفين غيبة خمس سنين مو بسيطه أبد...
سارا:إيه أتذكر أول ماسافرتي..كنت توني جايبه انجود...
سلمى وهي تناظر بشذى:هذيك زوجة تركي؟؟؟...
سارا بابتسامه:إيـه هذي هي...
سلمى وهي تناظر شذى وهي تسولف مع بشاير:باقي صغيره؟؟.. بعمر بشاير شكلها صح؟؟؟..
سارا تناظر شذى:لا هي أكبر من بشاير بسنه أو سنتين تقريباً..
تلاقت عيون شذى بعيون سارا...ابتسمت سارا لها وبادلتها شذى الإبتسامه...
.
.
بشاير:إذا إنتي خايفه تعالي نامي عندنا...
شذى تفكر:صعبه يا بشاير...
بشاير:ليه صعبه؟؟؟...يعني بتنامين لحالك؟؟؟...
شذى:تركي يقول لي..بلا دلع معي بالبيت الشغالات بس من جد والله أخاف بحالي...الأخ يبي يرابط بالشغل وينام برى البيت وانا انام بحالي...ويقول عادي ليه تخافين الرياض مليانه...
بشاير:والله شرير هالتركي...ماعليك منه بس يروح الدوام تعالي بالسواق عندنا وقبل لايرجع البيت اليوم الثاني ردي البيت قبله...
شذى تتطنز:تصدقين والله فكره؟؟؟...
بشاير:تتطنزين طال عمرك؟؟؟...
شذى:انا ادري عنك...مسويه فيها عبقور أم الحلول..
بشاير:أجل كيفك...نامي بحالك وموتي خوف...
شذى:اموت خوف هاه؟؟...اقول الشرهه على اللي يشكي لك مع هالخشه...
بشاير:على العموم..انا مارح أضرر..الضرر كله بيلحقك...
شذى تكلم بشاير:خلينا من هالسالفه...مشالله حلوة بنت عمك سلمى..
بشاير بغرور:بس انا احلى...
شذى:الحين من سأل عنك؟؟؟...
بشاير:محد...بس حبيت أذكرك إني أحلى...
شذى:المهم...سلمى هذي وش تدرس؟؟؟...
بشاير:كيمياء...صايره سلمى دكتورة...
شذى بخاطرها(مشالله جمال وعلم بعد دكتوراة):طيب هي مخطوبه من قبل؟؟؟...
بشاير تخزها:انا أعرف ليش تسألين مس شذى؟؟؟..عن سلمى...
شذى ارتبكت:ليه؟؟؟...انا أسأل عادي...
بشاير:على هامان يا فرعون...
شذى:فرعون بعينك...أنا اسأل عادي عن بنت عم رجلي...
بشاير:عادي ولا ملون هههههههههه....
شذى:كع كع كع...بايخه...
بشاير:انا البايخه..ولا إنتي...المهم تراني عرفت عن السالفه اللي صارت ببيتنا يوم أبوي بالمستشفى مع فاطمه وعايشه...
شذى انصدمت:أي سالفه؟؟..
بشاير:لا تمثلين علي...المهم إني عرفت السالفه...
شذى اللي اعترفت:من وين عرفتي؟؟؟...
بشاير:من مصادري الخاصه..
شذى:بشورة يله قولي لي من وين عرفتي وخل عنك حركات المسلسلات...
بشاير:بشورة هاه...طيب باقولك يا شيخه لأني إذا ما قلت لك راح تلصقين فيني لصقه مهوب طيبيعيه...
شذى بضيق:ياربيييه بشاير...
بشاير تبي تقهرها:صح ما قلتي وشلون إنتي عايشه وإنتي إنسان لصقوي...يعني بالعربي عندك تلصقين يعني إذا نشبت بالواحد ما عاد تفكينه إلين يقول الموت يارب أرحم...
شذى:ياليل ما أطولك...
بشاير:طيب وش شعورك لحظة ماعرفتي إنك إنسانه لصقه...أكيد إنتي وجه لشركة باتيكس...
شذى:تدرين لا تقولين لي...
بشاير تضحك:هههههههههه خلاص بأقولك...نوف قالت لي...
شذى اللي انصدمت شكل السالفه منتشره عند العايله كلها:نوف وش يدري نوف؟؟..
بشاير:سمعت أمها تقولها لناصر عقب ما رجعوا ذيك الليله من عندنا بصراحه هذاك اليوم استغربت لمن طلعت فجأة بس بعدين عرفت وعذرتك...
شذى وهي حاطه يدها على خدها:هلا هلا...ناصر زوج فاطمه بعد عرف..من باقي ما عرف...
بشاير:وأنا انتظرك يا الخايسه متى تقولين لي....
شذى بحزن:وش تبيني أقولك...
بشاير وهي تواسيها:ما عليك منهم والله كذابين...
شذى وهي تناظر سلمى:بعد ماشفت سلمى ما أتوقع إنهم كذابين...
بشاير:ماعليك منهم هالثنائي المدهش...والله كذابين وتركي خطبك إنتي أول وحده...وبعدين بأقولك معلومه يمكن تركي ماقالها لك ترى اهلي حاولوا إنه يخطب جواهر بنت خالي بس رفض مايبيها وحاولوا إنه ياخذ سلمى بس قال إنه غض البصر عنها...
شذى:يعني كان حاط عينه عليها...
بشاير بتهور:هو كان ميت عليها(بعدها استوعبت)هو ماكان ميت يعني ميت لااا..يعني كان يشوفها حبيبه..
شذى:لا عادي إنه كان يحبها...انا حاسه بكذا...
بشاير باعتها:تبين الصدق...هو كان يحبها موت بالثانوي وبكى عليها بعد تخيلي توه مخلص الثانوي يقول اخطبوها لي ألحين انا صرت رجال وعمري 18ههههههههههه والله عبيط تركي.. بس لمن كبر وقال إنه يبي يتزوج على طول قالوا له سلمى...قال ما أبي سلمى...حاولوا معه يمين يسار فوق تحت أبد مافيه فايده..ودورا له من جميع بنات العوائل اللي نعرفهم...بس مالقوا له أحد..وعاد بعدها بفتره جاتنا عبير بالبشرى إنه لقت البنت اللي تصلح لتركي..وقعدت تمدح فيها وإنها طالبه عندها بالقسم محد مثلها متميزه وعليها هاله إعلاميه من بنات الكليه اللي بالشرقيه والبنت هذي ذوق وتيك أوي يوم قالت كذا قال تركي أبد هذي هي حصلناها...ولك ياعبورة الحلاوة...وفي الأخير كانت البنت إنتي بحضرة جنابك اللي كلنا متشوقين نعرفك...
سكتت شذى وابتسمت...
بشاير:أقول لا تكبرين راسك علينا...
شذى:وش تبيني أسوي مثلا..أرقص؟؟؟...
بشاير:يعني إنتي ماعندك حل وسط إذا أحد مدحك يا تبتسمين بس ولا تقومين مره وحده ترقصين؟؟؟...
شذى تتتطنز:شفتي شلون ماعندي حل وسط....
.
.
بعد العشاء عند الرجال...
تركي:وين ياعبدالكريم ..ما أمداك ترد نفسك...
عبدالكريم:تعرف وراي دوام...
متعب يمزح:السفاره من عقبك ياولد عمي صكرت...
الكل ضحك...
عبدالكريم يجاريه:شفت كيف..لازم أرجع وافتحها تعرف المصالح المشتركه والعلاقات بين البلدين أساسها السفارات...
فارس:أقول يا خالي يمدي أروح أدرس عندك هناك...
عبدالكريم:وأنتوا شفتات إنشالله واحد يسلم والثاني يستلم عندي تدرسون...
ابوفارس:لا تكون الجامعات هناك إنشالله لك ياولد عمي؟؟...
عبدالكريم يضحك:ههههههههههه كان زين إنها لي...
فارس يضحك:لا تخاف مارح أدرس عندك..بأدرس هنا بالرياض..
عبدالكريم:أحسن لك يا فارس عند أهلك...
أبوعبدالكريم:كان زين إنك أنت تفهم بنفسك وتقعد...
ناصر:ما عليكم منه عبدالكريم..هذا الرجال المستقبل قدامه في السياسه واعد..
نايف: أنا اؤيد كلام أخوي ناصر..مستقبله واعد في السياسه مشالله
عبدالكريم:سمعت يابو عبدالكريم...ولدك سياسي كبير بإذن الله وراح يكون سفير لبلاده إنشالله..بس اصبروا علي كم سنه...
متعب: قصدك كم عقد هاه؟؟؟...
عبدالكريم:مارح أرد عليك...ردي راح يكون لمن أصير سفير بإذن الله...
ابوفارس:احلم يا عبدالكريم ترى الأحلام ببلاش...
ابو بندر:أقول يا عيالي لا تكسرون مجاديف ولد عمكم..خلوه يسعى في طموحه والله يوفقه إنشالله..
تركي:ههههههه ماعليك منهم ياعبدالكريم..هم كذا حتى علي انا...
عبدالكريم:ليش؟؟؟...
تركي:لأننا طلعنا خارج نطاق تغطيتهم...
عبدالكريم:إيه والله صدقت ياتركي..(يكلم اهله بالمجلس)ياجماعه أنا وتركي مانبي تجارتكم صح ياتركي؟؟...
هز راسه تركي بالإيجاب وهو يبتسم..
عبدالكريم يكمل:والله عاد أنا أحب السياسه وتركي يحب العسكريه.. وكلنا في خدمة الوطن...
فواز:أموووووووووووت انا على الوطنييين...
.
.
حصه:والله إنك يا سلمى احلويتي مشالله عليك...
سلمى:عيونك الحلوة ياعمه...
ام بندر:والله أخيرا رجعتي ياسلمى ماني مصدقه...
فاطمه:إلا صدقي يمه...والله لك يا سلمى يا خايسه وحشه...
سلمى بغرور:انا خايسه حرااااااااام عليك يابنت عمي...
عايشه تناظر شذى:إذا سلمى خايسه أجل ثلاث أرباع البنات شيون..
فاطمه:إيش ثلاث أرباعهم..إلا كلهم شيون...امزح ياسلمى...
سلمى تبتسم:أوكيـــــه بس لا تعيدنها...
سلمى تناظر شذى:إنتي مرة تركي؟؟؟...
شذى تناظرها:إيه....(بعد تردد)هلا فيك سلمى...
سلمى تقزها وترفع حاجب:شخبارك شذى؟؟...
شذى:تمام...ومبروك على الدكتوراة...
سلمى:الله يبارك فيك...فرصه سعيده إني شفتك...
نوف اللي رجعت على طبيعتها بعد العشا:عاد لو قعدتي مع شذى راح تحبينها موت..
ناظرت فاطمه ببنتها نظرة تهديد يعني اسكتي...
سلمى تكلم شذى:إنشالله...اتوقع بينها صداقه حلوة...
شذى اللي حبت نوف زياده وناظرت سلمى:إنشالله..
بشاير تناظر فاطمه...وعايشه تناظر سلمى أختها....ولا أحد يعرف الغيب اللي يحمل كثير من المفاجآت...والمفاجعات؟!..