العصر الساعه4 العصر كانت جالسه على سرير بنتها ويدها على جبينها وتقرأ قران بصوت منخفض..
طلت على بنتها لقتها نايمه....وفجأه اوتعت من كابوس ونقزت من السرير بسرعه
ام محمد: خلود يمه حبيبتي شفيك؟
خلود وهي تطالع امها بخوف: ناصر....وينه؟ صار فيه شئ؟
ام محمد: بسم الله عليك...لاحبيبتي كان حلم نامي وارتاحي
خلود ويدها على رقبتها: يمه هاتي لي ماي عطشانه...
ام محمد: من عيوني
قامت وعطت بنتها كاس ماي شربته وشفايفها ترجف..بعدت الكاس عن فمها لما اكتفت وتلحفت بالبطانيه زين لانها تحس بالبرد
ام محمد: يمه خلود شفيك؟
خلود وهي تبكي: يمه تعبانه مره...لاتتركيني
ام محمد: انا جنبك بس انتي هدي بالك ايش الحلم اللي حلمتيه؟
خلود: يمه حلمت ان ناصر كان مريض وعلى فراشه ويناديني وانا مااسمعه يحاول يمسك يدي وانا ابتعد عنه..
ام محمد: بعدك مصممه عاللي براسك؟
خلود وهي تبكي اكثر: يمه انتي اكثر وحده تعرفين شقد احب ناصر واتمنى ابقى وياه بس..
ام محمد : بس شنو؟؟ ياخلود ياحبيبتي فكري بعقلك مو بعواطفك ناصر زوجك يحبك ويبيك والمفروض مو من اول غلطه تطلبين الطلاق..ياخلود الحرمه العاقله الفاهمه تجلس مع زوجها تكلمه وتسمعه وبعدها يرجعون مثل قبل واحلى...
خلود: ايش قصدك؟
ام محمد: قصدي بالتفاهم والهدوء كل اللي تبينه بيصير
خلود: عارفه يمه..بس احس ناصر ماعاد يحبني مثل قبل...مطنشني...
ام محمد: قد مره سألتي نفسك عن السبب؟
خلود: اكيد مافيه سبب بس مزاج..انا ماارضى اكون بالنسبه له مجرد مزاج ساعه يبيني والف ساعه يرفضني
ام محمد: ليش عايشين بالغرب احنا؟ الظاهر ياخلود حياة الغرب اثرت عليك وعلى تفكيرك هالشئ يصير هناك عندهم متى مامل الزوج من زوجته رماها وراح لبنت غيرها ويعاملها مثل زوجته ويمكن يجيب منها عيال..
لكن ياخلود حناا مجتمع مسلم ..سألتي نفسك مره عنده مشاكل بالعمل اولا..قصرتي معاه بشئ من حملتي؟

جلست تفكر وهي تطالع امها..كلام امي معقول انا مادري عن ظروف عمل ناصر..ومن ناحية تقصيري معاه مااذكر قصرت....لكن لا امي معاها حق انا مقصره بوجباتي تجاه ناصر كزوجه..اول ليل نهار معاه وقربه اعطيه كل واجباته والبي رغباته بدون تردد ..لكن الحين من حملت وانا تفكيري منحصر حول هالولد اللي ببطني وانام كل ليله قبل لايجي ناصر ويصحى قبلي ويروح العمل...اووف طيب شسوي انا تعبانه ومااقدر اسهر معاه مثل اول..

قطع عليها افكارها صوت ابوها وهو يدخل الغرفه وبسمة وقار على محياه...
ابومحمد: السلام عليكم
خلود- ام محمد: وعليكم السلام
خلود: هلا يبه..وينك عني؟
ابومحمد: موجود يابنتي بس والله هالشركه كسرت ظهورنا
ام محمد: ياعبدالله العمر يخلص والشغل مايخلص ريح عمرك..تعال استريح
جلس مقابل بنته وهو مبتسم...
ابومحمد: عسى مانتي تعبانه ولاتحسين بشئ؟
خلود: الحمدلله يبه شوية الم وتعب يروح مع الوقت
ابومحمد: تبيني اكلم الدكتور والممرضات يحطون بالهم عليك؟
خلود: لايبه مايحتاج والله من عرفوا اني بنتك وابوماهر عمي وهم مايتركوني دقيقه وحده ممرضه داخله وممرضه طالعه..من قدي ابوي عبدالله وعمي جاسم...
ام محمد: ههههه تعال شوي ابومحمد بره ابيك بكلمة راس..
ابومحمد: طيب ..حطي بالك ياخلود على نفسك
خلود: من عيوني يالغالي لاتحاتي...

توهم طالعين الا ناصر جاي مع امه وابوها وقربوا منهم...سلم ناصر على عمه وعمته بسرعه ودخل لزوجته
وامه وابوه تركهم بره...
ام محمد: حيالله ام ناصر شلونك؟
ام ناصر: الله يخليك ويعز قدرك احنا بخير الحمدلله على سلامة خلود
ام محمد: الله يسلمك ...ها بتدخلي لها؟
ام ناصر: اجل شلون يلا
دخلت ام ناصر مع ام محمد لخلود...ابتست خلود دايركت الى ام ناصر وحمدت ربها ان ام ناصر ردت لها الابتسامه ولاطنشتها....قربت منها حتى تسلم عليها
ام ناصر: الحمدلله على سلامتك
خلود: الله يسلمك
ام ناصر: خفنا نفقدك...خلاص ارجعي البيت نويصر قالبه فوق تحت علينا
خلود: ههههههههه جد يعني اشتقتوا لي
ام ناصر: انتي تعرفين ....
خلود: الا وين عمي....
ام ناصر: الحين يدخل لك....

دخل عليها عمها وسلم عليها واستأذن مع مرته وروحوا وبقت مع زوجها وامها وابوها...
استغلت امها فرصه وجود ناصر وطلعت مع ابومحمد بره حتى ياخذون راحتهم بالكلام...
ناصر: بتبقين ساكته؟
خلود: ماعندي أي شئ اقوله..
ناصر: كذا يعني انعدمت المواضيع اللي ممكن نتكلم فيها؟
خلود: بالضبط...
ناصر: خلود لين متى ؟
خلود: ناصر لو سمحت اتوقع الصباح قلت لك اني ماعدت ابي اعيش معاك
ناصر: وانا ماصدقتك..
خلود: ليش تظن اني امزح معاك؟
ناصر: لا مو تمزحين بس لازلتي تحت تأثير الصدمه..خلود مو من اقل مشكله تطلبين الطلاق مني
خلود: اقل مشكله؟ يعني اللي صار في نظرك شئ تافه؟
ناصر: حبيبتي خلود شوفي..
قاطعته: انا مو حبيبتك وخليني لوحدي
قام من مكانه وهو معصب وطلع من الغرفه وهو يحاول يهدي نفسه ويلقى حل للمشكله...