][ أيـــامـ الطفولـــة ][

[أمل الظهور]

تذكر لما كنا صغار..
زمااااااان..
قبل أحلامنا تكبر..
ويضيق فينا (المكان)...!
فاكر..زمااااااان..
كان أكبرهمنا...!
يا دوب (حلاوة) من دكان...
العم (صابر)...
فــ آخر (الحارهــ)...!
تذكر...
كيف كنا من الشقاوة...
نشخمط على (الجدران)...!
ونكتب قصايد وأشعار...

انها ايام الطفوله الحلوه وعذب السنين

يالي برائة هذا الطفل
لقد كنت يوما في مثل وضعه
نائم ويبتسم!
يقال ان الملائكه تحاكيه وتقول له كلام مفرح فيبتسم
.

كنا نحلم ان لنا جناح كالطير
لانكتفي ان نلعب بالارض
لو بوسعنا لملكنا جناح وطرنا ليزداد مرحنا
دائما نفكر لماذا لانطير...!

حين نرا المطر يتساقط
نجري له مسرعين
نريد اللعب بالماء
ولا نبالي ماسيصيب ملابسنا او ذاك البرد الصاعق
.

كنا نرسم اجمل ابتساااامه عريضه لاتفارقنا
حتى في وقت الصعاب نجدها تظهر من غير مبالاه ..

وقت التمرد والبكاء على الجميع ان يبتعد
كي لايسمع صفارة الانذار العاليه هههههه
والدموووع الي تنهمر كالشلال

اتذكرون هذا الاينيمي (لـــيدي)
اذا بدأ...وسمعت اغنية المقدمه
نتراكض مسرعين لنحجز لنا مكاناً امام التلفاز
نود ان نكون مكان ليدي لنركب الخيل وندخل في المغامره
.

.

الغريب في الأمر
لم يكن همنا الا اننا نريد ان نكـــــــبر بأي وسيله
نريد ان نثبت اننا كبار

.
.
الا يا طفل .. لا تكبر
كذا أجمل ..
كذا اطهر ..
كذا لا هم يتراكم .. كذا لا ضغط لا سكر
ترى أكبر كذبه عشناها
يالله متي نكبر
احلم قد ما تقدر
وإذا خفت
خب احلامك بدفتر
تري الأيام سراقة
والأحلام تتبخر
.
.
لكل منا ذكريات طفوله في غاية الروعه
وهناك تذكار نحتفظ به منذ الطفوله

والحين البااااااقي عليكم ...

اتمنى ان تكون هذه الصفحه ذكرى للطفوله
كل عضو يعرض تذكار له او حادثه طريفه
او اي حاجه تذكر بأيام الطفوله ..

أو مواقف لاطفالكم أو اخوانكم

اتمنى التفااعل ..

وذكريات الطفووووووووووله ...

منقول

[عماد علي]

أيام الطفولة والبرائة هي أجمل الايام في حياة الانسان... أيام العاب الشارع العنبر، الحتة، الصكة، الطير، الكهرباء، الخشيشوة، الشوتتين، الكنز، المسابقات الثقافية تقدم خطوة حياة بكل معنى الكلمة القلب صاف نتجمع في الصباح الباكر خارج البيت مع شلة الحارة ونعود عند الاذان منتظرين الساعة 3.30 حتى نخرج ثانية ونعود عند أذان المغرب وفي الليل صولات وجولات.. كانت هذه فترة وكانت هناك فترات سابقة حينما كان التلفاز يبهرنا بأعاجيبه والله رسوم أول كانت الاروع والاجمل... ما خلينا شيء ما شاهدناه غريندايزر - جنكر - أبطال الملاعب - ساسوكي - الليدي - لوسي - والمسكينة سالي (انا قصة انسان انا جرح الزمان) ريمي- فلونة -عدنان ولينا-رعد الفضاء - حكايات لا تنسى -قصص عالمية (جنوني)-افتح ياسمسم وحتى القرآن الذي في قناة البحرين وبعده التفسير كنا نتابعه شوقا لما بعده من رسوم متحركة سنان ياسنان.... فضفضت شوية خيتو بس الطفولة تستحق كل ما ذكر...

[نور الهدى]

الله يعطيك العافية

اممممم
طفولتي ولا عاد طفولتي اذكرها واقول ليت الزمان يعود يوما ونعيش ببرائة مثل الاول

شقول لج خيتو ايام طفولتي علي حركات انما ايه

حركات صبيانية حشى ما بنت

على طول في الشارع ( عاد الاول كان في امان اكثر من الحين ) طبعا نكون صوب البيت وخاصة ان بيتنا كان من اوائل البيوت في منطقتنا وعشنا تقريبا سنين ما كان صوبنا بيوت واجد

واحنا ما خذين راحتنا
واذا يطيح المطر نروح نسبح في البرك الماي الي تتجمع
وتعالي اذا رجعنا البيت بالعصا على عافيتنا ولا نهتم نرجع يوم ثاني نسوي نفس الشي
يرتفع ضغط امنا مسكينة

التلفزيون الله عليه وقت العصر وقت الرسوم ما في حركة ما في صوت
الكل مندمج مع عدنان ولينة وساسوكي والمسلسلات الي ذكرها ابو باسم

عجيبة مو مثل الحين الرسوم ما احس لها معنى كلها خرابيط

مساكين عيالنا

وبعد اممم اذكر لما نروح تعليم القرآن كانت المعلمه الي تعلمنا ساعات تخلينا نساعدها في شغل البيت واذا ما كان لنا خلق لها

تروح عليها نعفس عليها ونمشي

والله ايام وحركات لو بقعد اعدد لك بتنامين وانتين تقرين

بس احلى ايام ايام الطفولة
استمتعت فيها بكل لحضة من لحضاتها

تحياتي لك خيتو

اختك ام محمد

[أسيرة الأحلام]

مشكوووووووووره خيتووو على الموضوع الأكثر من رائع

واني بصراحه اخوي عماد ماخلى شي ماقاله واللي قاله كان جزء من أيام طفولتي

يسلموووووووو يالغلا

تقبلي مروري

[همسات وله]

تسلمين خيتي امل الظهور
اهههههههههههههه على ايام الطفوله
مازال القلب يحن لها
ومازالت اصوات الماضي صداها يتردد هنا وهناك
والله على ايام الطفوله
ومثل ما قالت خيتي ام محمد
ايام جميله
لما تذكرها نبضات القلب تتراقص شوقا اليها
ياريت تعود ايام الطفوله
جان ما افوت فيها ولا لحظه
اعيش كل اللحظات حتى اخر جزء من الثانيه

تحياتي لك خيتي امل
اختك همسات وله

[أمل الظهور]

عماد علي ، ام حمادة ، اسيرة ، همسات ..

اجل ام حمود كنت تعفسي على المعلمة هاااا قتلتيني ضحك عليك

اشكركم على التواجد

.

جاء دوري الحين والله يعينكم علي ..

كنت خوافة بالمرررررة واللي زاد الطين بلة يوم صار الحرب على الكويت ...

دوم كانوا يخوفوني بصدام حسين ..وبس مااطيع اخواني بشيء او اعاندهم على طول بنادي الك صدام ..

وانا ياعيني على طول سمعا وطاعة ,,,لا مجال للنقاش ..للسان الطويل يروح ويتبرأ مني اذا جابوالي سيرة هالصدام

وياعيني على شيء صار الي وانا كنت تقريبا في ثالث او ثاني ابتدائي مايروح ابد عن ذاكرتي ...

مرة خالي بيروح العمرة مع عياله وبيروحون معاهم جدتي و3 من خلاتي ..

ولزموا الا اروح معاهم ..وانا هااااا ..

عاد الحين كيف اجيب موافقة الوالد وهو متشدد وعنيد بالمرة <<منو طالعه عليه انا ..

طيب يلا جاء دور الأفكار الجهنمية والخطط والمؤامرات ..

خلاتي قالوا الي اترك الموضوع على خالي وهو يقول اله .

وانا لا ..تأبى المروءة ..ولزمت الا انا اقول اله بطريقتي الخاصة ..

وهم لا ماراح يوافق وانا بجرب ..

وياعيني على الخطط اللي كانت تدور في بالي ذاك الوقت ..

لحد مااهتديت الى هاي الخطه ...

رحت كتبت رسالة الى ابوي ويلا تقولوا معروض او خطاب ..

اتذكر كانت من 3 الى 5 صفحات ..

طلب اني اروح معاهم ...وطبعا طلب عفو ولينت قلب ابوي علي ومابقى شيء ماقلت اله

طلعت كل المواهب اللي عندي ذاك اليوم ..

المهم الحين كيف اعطيها الى ابوي ...امممـ ماكوو الا هالفكرة..

رحت حطيتها تحت مخدة ابوي ...

عدا يومين وابوي ماجاب الي سيرتها ..وانا خلاص شكله موب موافق علشان كذا ماجاب الي ونسيت

جاني بعدهم حسني قلبي انه قرأها قعدت اشاهد هل في ايده شيء عقال وماشابه

لا الحمد لله ..

ضحك الي ..ارتاحت نفسيتي ..وارتاحت اكثر يوم عطاني الموافقة ..

ويافرحة خلاتي مع بنت خالي ذاك الوقت تقول حفلة سووا في بيتهم ...

المهم كان الاتفاق انه خلاتي في غرفة وعيال خالي في غرفة ..

من عيال خالي كانت بنت مقربة الي كثير ونفس سني ..يعني المفروض اكون معاها دوم

خلاتي لا لا لا والف لا ..بس لها انت احنا بعد نبغاك تنامي عندنا ..

وانا ياعييييييييييييني على العدالة اللي عندي ...

قسمت نفسي يوم عند خلاتي ويوم عند بنت خالي ...

عاد اذا جات ليلة بنت خالي خلاتي تهديد وتشويق لليله ذيك يعني مايبقى لعبة مايفرحوني فيها

ولا يبقى شيء مايواعدوني فيه بس لاتروحي الى بنت خالك ...

وانا عاد قدام المشجعات اللي يقدموها الي ضعيفة بالمرة ...السالفة فيها سهر ولعب واكشن وقصص ..

ابيع بنت خالي وابيع نفسي بعد ...

ونتفق على بنت خالي واروح اعمل جووو بيني وبينها علشان تخاصمني وتتشابك معاي وتقول بنفسها

لا تجين غرفتناااا

..او اعمل نفسي نايمة في غرفة خلاتي وتجي تصحيني وخلاتي لا لا حرام عليك

هي نايمة وتعبانه تجلس من الصبح خليها بكرة بكره عندك ..

عاد هم دوم خلاف معاها علشان كذا كانوا مايخلوها تسهر معانا ...

ايام تكسر خاطري ويحن قلبي واروح عندها والشرار والتهديد من عيون خلاتي يبخر ..

بس كانت عندي لسى من احلى السفرات وامتعها بعد مقالبي مع خلاتي على بنت الخال

ولسى تذكرني في غدري وخيانتي الها واني فضلت خلاتي عليها ...وتذكرني بالخطط اللي كنت انفذها

مع خلاتي

يعنو بعد ايام طفولتي دوم كذا اكون واحده ويتخاصموا ثنتين علي ..

كل واحده تبغاني عندهاا وبسسس

بنت خالي هاذي وبنت خالتي يالله عليهم ايش قد لعوزوني ومرمروني في صغري ..

كل واحده لاتروحي للثانية وتشحني عليها ..

كانوا جيران وانا بعيده عنهم موب نفس منطقتهم فاذا جيت يوم الخميس مايبقى الا النعل تجي علي ..

ليش تروحي لها واحنا لا ..

طيب انتوا جيران خلونا نتجمع ثلاثتنا ..وهم أبد كل واحده ماتبغي الثانية ..وانا اكون الضحية او

او هاذي عندها

اسرار ماتبغي تقولها الا الي ...صايرة مستودع اسرار صاير ..

المهم اتفقنا اسبوع عند بنت خالي واسبوع عند بنت خالتي ..

بقينا فترة وبعدين اعترضوا ..ليش بس هاليوم تيجي النا واحنا نشتاق الك ومانشوفك الا بعد اسبوعين

يااملوووة ويش تسويين علشان ترضي هالبنتين طلعوا قرونك من جد ..

طيب ساعه الك وساعه للثانية ..اوكي وافقوا ..

وماارتحت من هالمهزلة الا بعد زواج بنت خالتي ومن حسن حظي تزوجت وهي صغيرة

والله حالة حسسوني اني رجال وعندي زوجتين من عمايلهم فيني ...

وكنت افضل واحده من خلاتي واغليها بالمرة لدرجة اني كنت اخش مصروفي واشتري الها فيها هدية

واقدمها لها اذا رحت الخميس ...وياعيني لو تشوفوا الرسايل اللي بيني وبينها ...

والله ذكرياتنا احلى بكثير من ذكريات هالوقت اللي كلها حزن وزعل وهموم ....

ايام مضت ..

احم احم ...

مواقفي ماتخلص مثل ماقالت ام حمود بتناموون وانتوا تقرأون فيها ...

مشكورين وتسلموووون ياااارب

[majdyhamdy]

مشرفتنا العزيزه
امل الظهور

لقد ارجعتينا الى ماض جميل

لكن الانسان لن يعيش اسير الماضي

[دمعه حزن]

.. أمل الظهور ..
بصراحه طرح روووووعه << بس بتطلعي فضايحنا .. هههههههههه
بس هاااا مو تقولوا هداره .. ترى شكثر فضايح الطفوله ..
انا طفولتي فيها من الا قالته الأخت .. ام محمد ..
وبالخصوص يوم نروح نتعلم قرآن .. نتغذى انا واختي وبنات الجيران عشان نروح نتعلم .. ما نروح الا اهم توهم قايمين من الغذى وتعالوا بنات غسلوا واشتغلوا << هههههههههههه طبعاً مو انا لاني كنت صغيره بس البنات الكبار شوي .. وهم يقعدوا يتحلطموا على المعلمه << جايين نشتغل عندها احنا لو نتعلم ومن هالكلام .. ههههههههه
وبعدين انتقلت لمعلمة ثانيه لانها اقرب لي .. وعاد هالمعلمه الثانيه ما تشغلنا ولا شيء بالعكس اهي جارتنا وما تدرسنا الا انا واختي وبنتها وتعتبرنا بناتها .. بس انا واختي نروح لها نبي نخلص بسرعه ونطلع عشان نروح نلعب ونطالع الرسوم وهي تقعد تشتغل فى بيتهم وتحوس واذا خلصت تجي لنا << نقعد نتحلطم على انها تأخرنا بس .. اختي عادي تقول لها تكلمها واحيانا يتهواشوا بعد << هههههههه .. لكن انا اخاف منها كنت ما اتكلم بس الحين يوم كبرت نقعد نتذكر وتقول لي انتي مسكينه ولا تتكلمي مو مثل اختج ملسونه الحين شوي طلع صوتج اقول لها اي انتي مسوينا لنا رعب يوم كنا صغار .. لاني تعودت عليها والله بحسبة الوالده .. ربي يخليها ..

وبعد من ايام الطفوله ..
كان احنا بيتنا جديد فى منطقه ما فيها بيوت وشوي شوي صار فيها بيوت بس خفيف عاد كنا خمس بيوت بس << يومياً المغرب بعد الصلاه نتجمع بنات وشباب اللي بالفريق الاول امااااان وعادي مو الحين .. وكنا نلعب سباق والغميضه والصبه وما شاء الله ع الالعاب القديمه شحلاتها ..
ويوم نلعب الغميضه ننخش فى البيوت الا قاعدين يبنوها << مايتين خوف ورعب من الظلمه بس ندخل << والله مغامرات طفولتنا ..
وامهاتنا كلهم ويانا برى بالفريق هم يتجمعوا يقعدوا على باب بيت من الفريق ويسولفوا واحنا بالشارع نلعب .. << والله ايااااااام رووعه ..

والله بالمدرسه << علوووووم وهوايل ..
بيت خالي جنبنا .. نطلع من المدرسه انا واختي وبنات خالي 3 .. ونروح البيت مشي وما شاء الله المدرسه وين وبيتنا وين مساااااافه .. وعلى الطريق فى مزرعه وفي بيت يبيعوا لنا اسكريم اللبن << نشتري الاسكريم ونروح الزراعه نأكله ونلعب بالزراعه ولا بعد الا تشوفيها تتسدح بالزرع واللي تلاحق الفراشه .. << نروح المزرعه نأكل الاسكريم لان امهاتنا ما يرضوا نشتريه .. يقولوا لان كله ماي ما فيه لبن مو زين ..
وعاد نرجع البيت نحصل لنا زفة محترمه من امهاتنا لان ما نرجع الا بعد ساعه او اكثر << هههههههه ننسى عمرنا بالمزرعه ..

وااااااااااااجد هدرت وطلعت فضايح .. بس الباقي خله مستوور ..
تسلمي اموووووله ع الطرح الجميل منك والله ..
خليتنا نعود بذاكرتنا لايام الطفوله ..
الله يعطيك الف عافيه ..
دمتي بخير ..

تحياتي
دمعه حزن

[القلب المرح]

السلام عليكم
الاخت الكريمة امل الظهور
اشكرك على طرحك اللطيف
ايام الطفولة رحلت لتأتي ايام اكبر منها
لكن الطفولة ايام برائه ورووعه وايام الفضايح بعد
اتذكر طفولتي كلها مشاغبات يومية وهجات مالها اول ولا اخر
واتذكر على ماكان عمري 4 سنين او 5 تقريبا في هالحدود
كنت اروح ادرس قرآن عند مره كبيرة في السن وهذي اذكر ذكرتها القصه اهنا في المنتدى بس ناسي اي موضوع
المهم كنت اتعلم عندها قرآن وباليالله اقرا قران اجننها تجنن وهي عندها عصاة تضربني تصيحني وكان فيه مجموعة بنات وانا ماطيق البنات يضحكو عليي اقوم انتفهم تنتيف هههههههههههههه
والمره الان رحمة الله عليها توفت بس ذكريات ماشاء الله حلوة جننتها اتجنن المسكينه حتى ساعات احقرها واروح اشاهد وانا ببيتهم مع ابن ولدها جازورا ههههههه
واذكر بعد قتلت كتكوت برفسه هههههههه ومسكت سنانير صغار ولعبت بهم مثل المروحه لين داخو وماتوو
وكنت الاول كل اشابق الجهال من اشوف واحد اعطيه كف وامشي بس مره حصلت لي عضه قوييييييييه خلتني افزع الدنيا من الصياح
بس حطيت حرتي بعدين في جاهل وعضيته خخخخخخخ والله ايام راحت طفولة حلوة وكل لعب وهياصه ومسخره واحسن مافي ديك الايام مانحس بطعم الهموم والحمد لله للان ماحسينا واتمنى مانحس
تحياتي للجميع بالتوفيق..

[ومضة امل]

مشكوره اختي امل الظهور على الطرح الرائع
اممممممممم اما انا واخواني كانت عندنا سوالف ما اعتقد ان احد كان يسويها
كنا احنا كلنا ننام في حجره وحده وبعد ما ينامون امي وابوي تبدأ المغامره
احم احم
كانت عندنا ثلاجه في الحجره الي ننام فيها اذا جاء الليل وسكنت الناس نبدأ نشتغل عليها ونظفها
كان الوالد يقفلها عنا بس كنا نفتحها بسكين حتى القفل خربناه من كثر من ما كنا نسوي هالحركه
المهم كنا نطلع لينا السحور (فواكه وحلاوه وخرابيط)
وطبعا الوالد والوالده يا غافلين ليكم الله
وبعد ما نشبع البطن ونطالع المدبلج الي يحطونه في البحرين
تبدأ المغامره الثانيه
كنا ناخذ فراشاتنا ونحط تحتهم مساند ونرتبهم على شكل سرير نمام عليه
وطبعا قبل ما انام عليه
نسوي فيه اجرام
كنا نركب فوق الكبت مالنا ونطيح من فوقه الى تحت على السرير المزعوم
بالدور واحد واحد
وبالكبت الثاني العمليه الثانيه
نجيب لينا كارتون ونركب داخله وكلحين دور ناس يدزون
نطيح من فوق الكبت الى تحت على مساند
وعاد شوفوا اذا احد منا طاح
تقوم الوقعه في البيت
وتخترب علينا الحفله
الي يصيح يروح ركيض للوالد يشكي عنده
وعاد بعدين خلاص
تخترب الحفله ويضطر الكل ينام

هذا بالنسبه للبارتي مالت الليل
اما بالنسبه للنهار فكان هذا شي ثاني
كنا ناخذ لينا مربع ونحطه على ادرام ونسويه لينا ميزان نلعب عليه
كل ناس يركبون في جهه
وياويلنا اذا طحنا
كانت الطيحه صدق تعور
ولا عاد اذا كانت على الراس
وكنا ناخذ النعله مالنا ونلعب بها نسوي لينا بيوت نرسمهم على الارض بالطربوش والنعله يازعم ناس
عاد تعالوا شوفوا ذاك الحوش
هذا غير الالعاب الي نعفس بهم المكان
واذا امي عصبت علينا على النعله نروح نرسم لينا اوادم ونقصصهم ونلعب بهم
او ان احنا نطقها للبيت الي يبيعون الالعاب
نتعب واحنا نمشي ليه


وهذاك الباص مال المدرسه الي يصير ضك فيه عدل حتى النفس ما تقدر تاخذه
هذا غير الدريشه الي كله تنسك على اليد او المحطه الي يطوفها سايق الباص
لا وازيدكم من الشعر بيت الين وصلنا عاد احنا محطتنا كانت مشحونه حدها كان يقول لينا كلي بره
عاد قصده الكل برا الباص ياله نزلوا
ووووووووووووو
ما يخلصون صدق كانت ايام حليوه
تحمل من الذكرى ما يكفي
اني للحين ما كملت العشرين ومتحسفه على الايام الي اندر تونتي
احسها مرة بسرعه


بس ياله خلنا نستمتع بما بقي لنا من ايام
لاننا سنشتاق لها كما نشتاق لايام الطفوله
دمتم بخير وعافيه

[ملكة سبأ]

يااااااااااسلام يا اموله قراءة الموضوع ممتعه جدا والردود أيضا إستمتعت بقراأتها وضحكت كثيراً
حقيقه لا أعرف ما أكتب وما أترك من ذكريات الطفوله الجميله
أذكر في عمر 4 إلى 5 سنوات كنت عضاضه ويجون للبيت يشتكون مني وشفتي عاد الفشيله للوالد والوالده ويعطوني نصيبي طبعا لكن بعد هذا العمر الظاهر تبت من الشطانه وصرت خجوله يعني تصورو إذا عندنا حرمه في البيت من رابع المستحيلات
إني أطلع من الغرفه وفي المدرسه كنت بعد خجوله واحترم معلماتي
بس اللعانه في البيت لابد منها وبالذات مع اختي شمعة
الله على الأيام الحلوه على قول إخواننا السنه( سقى الله ذيك ليامي )

[ومضة امل]

مره اخرى
تذكرت لكم ذكرى من ذكريات الطفوله
هي صدق تفشل بس لا تاخذون عني فكره غلط ذيك ايام ولت
المهم
كان عندنا في البيت دجاج
واخوي كان صغير يعني بعده يلبس الحفاظ
اخذنا وحده من دجاجاتنا المساكين وسوينا فيها ارهاب
لبسناها وحده من الحفاظات وركبناها في العربانه وقعدنا ندزها
عاد ما في الا ذيك الدجاجه تستصرخ وتستنجد
بعدين كسرت خاطرنا ونزلناها
مساكين الدجاج عذبناهم ويانا كنا نلحق وراهم
ياله الحين كأني اشوفهم من زمان انتقلوا الى رحمة الله تعالى
بعناهم مساكين

والحين ياله ننتظر من الباقي بعض الذكريات
دمتم بود

[أمل الظهور]

عذرا على تاخري في الرد :


مجدي ، دموعة

المرح ، ومضة امل

ملوكة


مرحبا بكم وبذكرياتكم الجميلة

استمتعت بقرآتها

والابحار في عالمكم الطفولي البريء الرائع

لاحرمنا الله من مروركم العطر

يسلموو على المرور