كالعاده .. تغيب اميروه شوي زين عن العام .. وترجع بهدره .. عسى بس هدرتها مهي ثقيله وتعور الراس….<< لا تقعدي تسألي .. وخلصي هدرتش خخخ..

المهم... مع زحمة الأيام وكثرة الضغوط النفسيه..
تجي فيوم ... تفتح عينك من فجر الله .. تلاقي مزاجك متعكر .. ياربي يالله صباح خير .... تشيل عمرك شيل من هالوكر الهادئ.. وتسحب روحك سحاب .. تدخل الحمام.. اكرمكم الله .. تجي تغسل وجهك.. تطلع المرايا .. وتتحنطب على هذاك الوجه المتنفخ والعواين اللي كنهم تيل خخخ : " ويش هالحاله اففف . مع هالوجه" .. ويامسكين هالوجه.. وتقعد تكفخ الصابونه من جهه ومعجون الأسنان من قوة الضغط تقول بتغسل اسنان فيل ياادافع ..خخخ . .. تطلع وتكفخ البيبان .. واذا ما كنت مجهز ثياب لك .. من النوع اللي حزة الحزه يشوف ويش الدنيا وويش عنده .. .. يامسكين يالكبت " الدولاب "
.. تقلب احواله فوق تحت .. ويالله تخلص و تلبس ..شبااق عاد ويا هالثياب .. .
و ان كنت رجا ل .. يللا دق سلف السياره.. واستناها تحمى في هالصبح.. واف واااه . وانااا لله .. وخذ لك غفو على الدركسون.. وشغل الإذاعه .. وخل ضغطك يرتفع زود يا اما مع مياعة مذيعه .. او مع اخبار تجيب الهم والفجيعه ... و انت مره واصل حدك... . تحس نفسك توصل في لحظه لقمة الغضب ..و يدق عندك عداد الخطر . وابد منت راضي تخفف السرعه .. وتغلط في الشارع ... و...لا ااا ..و تسب بعد .. لاحوول . ويوصل دمك لراسك... وتعض على اسنانك. وتوصل شغلك او مكان دراستك ... خاطرك تكفخ اللي قدامك ..
. سلام عليكم .. ما ترد .>> عجييب السلام لله .
والا ترد من طرف خشمك >>. كان لا رديت .
والا ترد ببتسامه بارده << زين نعمه من الله ...
. وتبغى متى اليوم يقضي على خير
وان كنتي انثى .. من تركبي السياره والا الباص رايحه شغلش والا مكان دراستش . او ل ..الغيث... كفخه لباب السياره.. وان كان ابوش بيقول يالله صباح خير .. كان اخوش بتلاقي لش شوي زين من السبايب كان سواق المرجع لله بيتأفف مابيده حيله .... و تقعدي طول الطريق فبالش تتحججي و بأقل شي .. مع اقل لفه تلتفي معاها . نفختي . اففففف ... ويـــــــــــــــــــاكثر الأف ...
وان كنتي ربة بيت .. لما تصحي الصبح لأولادش تصيري معصبه ... وتصارخي عليهم واقل الشي انقهرتي .. واذا راحوا مدارسهم تجيش حالات تأنيب الضمير ..!!!
بالمختصر ..الحال في هاليوم .. غاااز ويبغى له ولاااعه...
وليش ..؟؟
الجواب الغريب و الغير مقنع ... ماااا ادري ...!!!
كذا قعدت لقيت نفسي ماني رايق ..×××
طيب... شذنب اللي حولك.. ؟؟؟
اااا.. صدق ماليهم ذنب.. بس غصبن عني .....
الكل يمر بهالشي ... واني اعترف تجيني ايام .. اهاوش حتى الهوا ... بس مو دايما,,,
القهر والعتب .. على اللي دووم عافسين هالخشه.. خاطرك تشوف ابتسامه على وجههم.. مافي امل .. واذا ابتسموا .. معجزه .. بسم الله .. وامحق من ابتسامه.. صفرا وتجيب الكدر...
مصيبه معاشرة هالأصناف.. العمر معاهم يقل ...دوم شكايين .. حنانين.. ما يعجبهم العجب.. دووم يحسوا نفسهم نااقصين اشياء وااايد مع انهم والحمدلله احسن من غيرهم...
تحس نفسك ضاايق ومكتوم بمجرد شوفتهم.. وكأنهم هم على القلب...

وان كنت طويل البال وقلبك وسيع ,, تحاول قد ما تقدر تحتويهم.. تهديهم .. ترسم البسمه .. تضحك وياهم...
صنف صلوات على محمد ,, يتلحلح معاك.. يتجاوب .. ويحاول يغير طريقة نظرته للدنيا .. وتفرح انت .. لأنك تحس نفسك انجزت شي عظيم .. غيرت ذات انسان للأحسن..

وصنف والعياذ بالله .. تلعن وتندم على الساعه اللي فكرت فيها تكلمهم .. لأنهم بجد غااااز ,, وكلامك ومواساتك بمثابة ولاااااعه ... ويـــــــــــــاويلك اذا صرت من ضحايا الإنفجار ..×××
من فينا ما يتعكر مزاجه .. ويعصب .. من فينا ما يصير فيوم ثقيل طينه وما ينطاق .. بس يكون هاللحظه يمر بمرحله .. ازمه .. تعدي .. وصاحب الإبتسامه والقلب الطيب والمرح... اذا مرت به هالحاله.. تلاقي الكل حوله .. ولايزعلوا منه لو غلط عليهم.. ليش؟؟
لأن هذا مو طبعه ..فمقدرين حالته ووضعه .. غير اللي كذا على طول .. من يشوفوه عافوا ارااضيه وهجوا عنه .. لأن من جد .. الهم والكدر يقصر العمر .. والواحد يعيش عمره لحظه بلحظه .. فالدنيا لحظه..
االزبده من هدرتي "
نصيحه.. الى كل عاابس .. والإبتسامه عليه كلافه .. ابتسم وانسى الهموم ... مافي شي على حاله يدوم .. وعش جميلا .. لترى الوجود جميلا .."

ودمتم بحفظ الرحمن